Read Varisi Karua Pita 3 Bible Online

Karua Pita 3 - Varisi bible

Karua Pita 3

¹Ramu turaquro ia dena i varuana leta era, qa karo ne qamu ramu. Loborona karua leta dena qa soko va dogara qamu ramu mana va totoloṉo velake nanao qamu ramu sauna pata ro dena.

²Qa soko ramu muna nanao tarua seko ro ria propeta tabo ro iri sine bana mego ṉalu bana ne, mana tamana ia Batu na vari vakavele iri teke ne qamu go apostoloro ne.

³Pata kenaqa, ramu muna nanao tarua ṉalu musaqara muzimuzi tina za sadaka me, kavia ro basoe iri too ego soko na vasakatena tokama qira, tarina va kari ne qamu.

⁴Mana tarina go, “Jesu i pui ne tina za lama igo ba? Iago adepato tane i koe ninidena na? Tamaqita ro iri le bana zato, do osina pata iko varipada gere me so de nigo God ivazari bana mego vudu pua!”

⁵Ria iriki soko to kaega sine vasadakena pata ogoto dena. Loborona so seko ia God, rani mana pua i zari me ṉalu bana sivala me. Mana vudu pua iza sadaka me so loborona loka.

⁶Iato loka igogo ne tane i zazu nego kiale lavata, i popoka i sapu va sakate go vudu pua.

⁷Do rani mana pua iru ko doka ninidena, God i pala taru ze so seko ia go tina lama doka qiru go nako tina subi qiru go. Rani mana pua iru vanama ne so ṉalu musaqara muzimuzi, God tina varitanae nego basoero sakata iri legulegua go, go tina pero vanaqe qira go.

⁸Do muniki nanao kasupe ne kameka pata lavata sivala dena turaquro. De ikoego God, kameka musaqara mana kameka mao ave ivari pada so, i kaega kade i vari vakakavatae nego.

⁹Kakiaro basoe iri nanao, God i valosia so pui ia, go tina lama ogoto go, do iki go kaega nae, God iki soko kaega vasakatena kakia basoe, do i soko basoero ne mara vana ne too sakata ro ria, mana lamae de i koego tanuna igo.

¹⁰Do musaqara ṉalu Batu ita na ule mego, tina gere lama na valeke sikosiko, qatiki rove go kaega ita lama na. Ṉalu nae varioka ne tina zaga lulua kameka naki lavata. Osina pata ikoego varioka ne mana osina pata ikoego vudu pua tina subi lupo nako ne.

¹¹Tanego osina ro pata tina sakata mana kaega lupo, iago muna mia velake too ramu. Muna lulua nanao ia God mana ko basoe tabo go, tanego too nae to i soko go God.

¹²Ṉalu ramu qamu ko piri ne go musaqara ia God, muna lete pada ne to zazu, go mara lama katikili musaqara nako tina subia vudu rani, go osina pataro iri koego rani ne tarina soro lupoe nako ne.

¹³Do ita qata piri ne so pata ni pui bana ne go God, rani voru mana vudu pua voru de tarina koego basoero iri too totoloṉo.

¹⁴Iago turaquro, ko piri qamu vae ne go musaqara nae, pada ne mamu velaka mana tabo go, go mara kaega ne qamu kaki kebu tarakenaqana God, mana ko bule de ikoego iago.

¹⁵Muna mia de igogo God, ia i losi so, mana i teke ne qamu ṉalu. Ia to go iki lama katikili ne kaega. Iago, ramu muna mia pata dena, i ṉalu raramu to go tina vakavele qamu go. Gerena God i teke ne nanao velaka Pol, go i karo bana ne qamu go.

¹⁶Ia to dena pata i sine ze go leta ro ia. Kakiaro pata i karo ze go leta ia i makuru nanao rove na, mana kakia ro basoero iriki rove va velake kaega pata igogo ne, iri itana vakakavata talukasana seko ro dena, gerena iri itana va kakavata bana go kakiaro Buka tabo ne. Iago, vatovato dena iri taru ze so makuru lavata sivala de iri koego tanuqira.

¹⁷Do ramu turaquro, qamu rove bana pata ro dena. Iago muna miasoka va velaka napu qamu tanuqamu, niki go toqo va kasi ne qamue vaogoto qamu pala bana go.

¹⁸Do ramu muna pala va popoka loborona velaka, mana roverove velaka ramu de ikoego Batu ita, mana vari vakavele ita Jesu Kristo. De ikoego ia mata vazaka vitoṉo na nini, mana ṉalu topu ro ne. Amen!