Read Varisi Kameka Jon 2 Bible Online

Kameka Jon 2 - Varisi bible

Kameka Jon 2

¹Ramu salero era, go qa karo ne qamu go pata dena, go ia mamu kasi vasakata pata, do ṉalu ka basoe izazu ne pata sakata, ita iko ne qita Jesu Kristo tina tavisi ne qita. Tanego ia to i totoloṉo sivala, mana tina pene zego de ikoego Tamaqita go tina tavisi ne qita go.

²Mana tanuna to Kristo ile go i bauru ne go vasakata pata titita vamiki so kaega, do sauna napu to vasakata pata pata ria osina basoero na vudu pua dena go.

³Ṉalu kakia basoe igo, era qarove velake God igo do iki lulua go kaega Tamana igogo ne, basoe nae i poqe mana i kaega ne so ka seko ogoto de ikoego.

⁵Do ṉalu basoe ilulua go seko ia God, iato basoe nae to ilete mamaligara ogoto ne go God. Ianae to qata mazala go rove velaka na ita qata ko kameka ogote go de i koe go God.

⁶Ṉalu basoe igo, iko kamekae loborona God, basoe nae to too ia tina igere ogote vatovato ia Jesu Kristo.

⁷Ramu turaquro, tamana qa karo ne qamu go dena iki tamana voru kaega, do i tamana bana qamu rove bana me so kokosona ne. Mana tamana dena iato qamu qata bana mego.

⁸Do patavolomo nae, tamana qa koro ne qamu go era dena, i tamana voru napu so, mana ogotona tamana dena ita qata mia bana ze Kristo, mana i sadaka napue de qamu koego ramu, tanego tatavata i damara me mana ivakuziki ne rodoko.

⁹Ka basoe igo ikoe tatavata, do i vasakate kaena gogo ne, basoe nae iara koeso rodoko, go i lama idokae so ninidena.

¹⁰Do ṉalu basoe i mamaligara ne kene basoe lotu, basoe nae to ikoego loborona tatavata. Mana i kaega kaki pata i vasakata nego ia, gogo tina sine ne go kene basoe.

¹¹Do basoe ivasakata nego kene basoe lotu, basoe nae i koeso loborona rodoko, mana zaza ia izazae so rodoko, iago iki rove kaega ka tepa i zaza go zago. Tanego rodoko iva kodo go ia.

¹²Qa karo ne qamu salero era, tanego God i nanao ule ne vasakata pataro ramu, iato iva doka ze go le ia Kristo.

¹³Qa karo ne qamu kazigarataro tanego qamu rove bana ia iko bana mego tarakenaqana go iara vazariago vudu pua. Qa karo ne qamu vano voru, tanego qamu vaqoqoro bana vatovato sakata ia Satana.

¹⁴Qa karo ne qamu salero era, tanego qamu rove velake God Tamaqi-ta. Qa karo ne qamu kazigarataro, tanego qamu rove ia iko bana me so kokosona me. Qa karo ne qamu vano voru, tanego qamu karaputa, mana seko ia God itoo e loboro qamu, mana qamu vaqoqore vatovato sakataro ia Satana go.

¹⁵Kasi mamaligara ne na ba vakenaqana patana ro vudu pua dena. Ṉalu qamu mamaligara ne go vatovato na vudu pua dena, ramu qamuki mamaligara ne kaega God Tamaqita.

¹⁶Tanego too iri vazazua go basoero na vudu pua dena, iki reqe me kaega God Tamaqita. Gerena soko na nanao sakata i reqe go nanao qira mana pataro iri mia ze mataqira go, mana iri vazakanapu ne go. Too ro dena i reqe meso vudu pua de.

¹⁷Vudu pua, mana osina pataro iri lete soko go basoero ne iri pata kavakava so, tarinara za kaega so. Do basoe i lulua mana i zazu ne go soko ia God, tina too sivala.

¹⁸Salero era, i garogaro to valupolupona osina pata! Ramu qamu gata bana basoe iri vitoṉo ze “Kana ia Kristo” tina lama. Mana ṉalu nindena vano kana ro ia Kristo iri lama sadaka bana to, iago ita qata rove i garogaro to lupolupona vudu pua dena.

¹⁹Basoero dena iriki basoero ita to kaega, iato go iri kasi ne qita go ita vano qata vaogote go Kristo. Ṉalu ria tarakasi ne qita go kaega, ria tara ke ita to. Do tanego iri kasi ne qita, iato go i sadaka va velaka me to iriki ke ita go kaega.

²⁰Do ramu ne Kristo i zele bana qamue Spirit tabo, go tamuna rove pata ogoto.

²¹Qa karo ne qamu leta dena, tanego qamuki rove kaega ramu pata ogoto iki go kaega nanaoqu; do tanego ramu qamu rove seko na pata ogoto, iago muna rove napua mara kaega kaki seko poqe mara reqemego seko ogoto.

²²Iago, akena to basoe poqepoqe nae? Iato basoe ni sine go, Jesu iki Kristo kaega igogo. Basoe to nae i kana iago Kristo. Tanego i sila qiru God Tamana mana Tuna.

²³Basoe i sila go Tuna God i sila napu to God Tamana go. Do basoe i vaogote go tuna God ivaogoto napua to God Tamana.

²⁴Iago muna soti vanadu ze puṉuqamu tarama qamu gata bana me kokosona ne. Ṉalu qamu sotia go tarama nae, ramu tamuna koe loborona vari vakameka ia Kristo, sale ia mana God Tamana go.

²⁵Mana pata i pui ne go Kristo tina teke ne qita, iato too ogoto iki rove go kaega lupo.

²⁶Qa karu qamu ramu, tanego i sau qira ria iri pada ne go poqetoni qamu go.

²⁷Do ramu Kristo i teke bana qamu Spirit tabo. Mana Spirit tabo nae i ko tarue loboro qamu, iago qamuki ara taqia kaega kaki vari vatatana napu. Tanego Spirit tabo nae to iva tatana qamue go osina pata. Iago osina pata i vatatana qamue go i pata ogoto, iki poqe kaega, iago nuna ko vanadue loborona vari vakameka ia Kristo, gerena i vatatana qamue go Spirit tabo.

²⁸Iago salero era, muna ko vanadu tarue so loborona Kristo osina ṉalu, go tatana purake go karaputa ṉalu tina lama sadaka qita go. Mana ita mara kaega ne qita agava de ikoego ia musaqara tina lama go.

²⁹Ramu qamu rove Kristo itotoloṉo, iago basoe i zazu nego vatovato itotoloṉo go, i sale ogoto ia to God.