Read Varisi Kameka Jon 4 Bible Online

Kameka Jon 4 - Varisi bible

Kameka Jon 4

¹Ramu turaquro kasi vaogoto qira basoero iri go, iri toṉove Spirit tabo. Do muna pada mana mia va velake ṉalu go Spirit iri toṉove go ireqe ogoto me de ikoe God. Tanego topu propeta poqepoqe iri zaza goe to osina dia.

²Ramu tamuna gata rove ze so seko ia basoe, ṉalu iri pala ogote go Spirit ia God. Ṉalu basoe igo Jesu Kristo i lama podo basoe gere so tokama qita ita vano basoe, ria tonae iri toṉove go Spirit ia God.

³Do ṉalu basoe i legua go pata dena sauna Jesu, basoe nae iki toṉove kaega Spirit tabo ireqe mego God. Nanao na basoe nae, mana vatovato ipala gonae ireqeme kana ia Kristo. Ramu qamu gata bana ia tina za lama, mana ninidena ikoe to vudu pua dena.

⁴Do ramu turaquro qamu keia God mana qamu vaqoqoro bana qira ramu tane propeta poqepoqe ro nae, tanego Spirit tabo i koe go de qamu koe i karaputa sivala ne qira, kana ro ia Kristo iri keia go vudu pua de.

⁵Vano propeta poqepoqe ro iri ke ia vudu pua iato go iri seko ne so, pata na ro vudu pua dena. Mana basoero ne iri soko gata na pataro iri sine go ria.

⁶Do ita qata keia God. Basoe i rove go God, i gata mana i toqe ne, pataro qata sine go ita. Do basoe iki keia go kaega God, iki gata kaega ia tane pataro qata sine go ita. Iato nae to pata iru vari kakavatae ne go Spirit tabo ogoto mana Spirit ia vudu pua dena ni poqe go.

⁷Vakitaka ro era, ita tatana vari mamaligarae, tanego mamaligara i reqe de ikoego God. Ka basoe i vari mamaligarae, i sale ia God mana i rove God go.

⁸Basoe iki mamaligara ne qira kaega basoero ne, basoe nae iki rove kaega God, tanego God to imamaligara go.

⁹God i vasadake mamaligara ia de qata koego ita, mana iva lame sale ia vudu pua, go ita tatana pala too ogoto de ikoego ia.

¹⁰God Tamuna iva sadaka ne qita go ita, de igogo mamaligara. Tanego iki ita kaega qata mamaligara kenaqa ne go God, do God Mamaligara kenaqa ne qita go ita, go i valame go sale iago ilama vokara mana le ne sauna lukasana vasakata pataro ita.

¹¹Ramu turaquro tanego God i lete mamaligara ne qita, iago ita mata vari mamaligarae napu tanuqita.

¹²Kaega ka basoe ireṉa bana ne God, do ṉalu ita gata vari mamaligarae napu go tanuqita, God iko kamekae de qata koego, mana mamaligara ia i lama totoloṉo lupoe de qata koego.

¹³Tanego God iteke bana ne qita Spirit tabo ia. Iago ita qata rove God i kotavisi qita, mana ita qata kotavise go.

¹⁴Remu qimu mia bana Sale ia mana qimu sine bana ne qira basoero ne sauna God Tamaqita ivalame go sale ia, go tina vakavele go basoero na vudu pua.

¹⁵Basoe i sine vasadake go Jesu i Tuna God igogo, God i too e go loborona too ia basoe nae, mana basoe nae ne ikoe loborona God go.

¹⁶Iago ita tanuqita qata rove mana vaogote mamaligara ia God i koe go de qata koego. God tanuna i mamaligara, iago, basoe i tooe go mamaligara ikoe loborona God, mana God ikoe loborona basoe nae go.

¹⁷Lavatana mamaligara ia God izazu ne totoloṉo de qata koego ita, gogo mara kaega ne qita sareki, do mata ko vanamanama, ne musaqara varitanae ia God. Tanego too ita vudu pua dena i gerena so too ia Kristo.

¹⁸Ṉalu God i mamaligara ne go basoe, basoe nae i kaega ne sareki, iago ṉalu mamaligara itotoloṉo lupoe go too ita, ita i kaega so ka sareki ita. Do basoe isareki go tane i sareki ne kimata. Tanego mamaligara ia iara kaebo totoloṉe na too ia.

¹⁹Ita mata vari mamaligarae, tanego God i mamaligara kenaqa ne qita go.

²⁰Ṉalu basoe igo, “Qa mamaligara ne God igo, do sakata qira so kero ne vano lotu gogo ne i poqe, tanego, ia iki mamaligara ne kaega basoe lotu ni reṉa ne go, iago, avatina go tane tina mamaligara ne go God iki reṉa ne go kaega.”