Read Varisi Revaleson 1 Bible Online

Revaleson 1 - Varisi bible

Revaleson 1

¹Zazaona buka dena, i vasadaka me pataro iri kokopika bana me go, do Jesu Kristo i vasadaka me. God i teke ne Jesu Kristo go tina vamia qirae basoero iri zazu nego ia, sauna pataro tiniki umata kaega tina lama doka go. Iago Kristo iturine me aqelo iago tina vamia ze Jon, valeke zazu ia.

²Iago Jon i karo to osina pataro i mia go. Iato dena pataro i reqe mego seko ia God, i seko ogoto reqe mego Jesu Kristo.

³I kula sivala basoe i toere valavate go seko na buka dena, mana iri lulua go pataro iri karo ze go. Tanego i garogaro to ṉalu tina sadaka go pataro dena.

⁴Era qa Karo ne qamu ramu kavitu eklesia qamu koego kena Esia. Pepene era, qa pene Mana ia Batu ne, mana bule ia mara ko tavisi qamu ramu, tina za reqeme de ikoego God, i ko bana, i ko ninidena mana tinara lama napu go. Mana ia Batu ne mana bule dena i reqe napu meso kavitu spirit velaka iri koego tarakenaqana de koloku batubatu ia God.

⁵Bule mana Mana dena i reqe napu meso Jesu Kristo i basoe totoloṉo i tarama ne go seko ia God, mana iato i too kenaqa me tepa le ne. Mana ia napu to i kone go karaputa i sivala ne qira go vano batu lavata na ro vudu pua dena. Jesu Kristo i lete mamaligara ne qita mana ile ne sauna vatalukasana vasakata pata ro ita.

⁶Ia i lama batu lavata ne qita mana i teke ne qita zazu patere go tatana osaka ne God tamana. Iago ita mata vazaka Jesu Kristo ikoego osina karaputa mana menomeno, osina ṉalu topu ro ne. Amen.

⁷Muna rove Jesu tina za reqe me popokona toba ro ne. Osina basoero mana ria iri paqo bana go ia, do, tarina reṉa napu neso, osiqira basoero iri koego kolabana pua ne, tarina maqata mana dae va lavata sivala, ṉalu tarina reṉa paqale ia. Iato nae de tina za gogo.

⁸God Batu ne igo, “Era to qa kenaqana mana muzimuzi na osina pata,” God Batu ita ikoego osina karaputa, iko bana me, iko taru ninidena mana de iara za ko mego.

⁹Era Jon qa kaki kameka toga qamu ramu, qata vaogote go Jesu Kristo, qata pala taru vanadua go ia patavolomo iri va vokara qitae de ikoego too vari miasoka ia God. Iago era iri taruve kameka ṉugu suka vitoṉona Patmos, go tuna tarama vasadake seko ia God mana seko ogoto na Jesu Kristo.

¹⁰Musaqara ia Batu ne, karaputana Spirit tabo i lamae de qa koego era. Gonae qa gata kameka ovaṉa lavata, i naki me taramuziqu i gere naki na kuvili.

¹¹Naki nae igo dena, “Ono karo ze buka osina pataro qo mia go dena, mana vazao ne qira kavitu eklesia iri koego komala lavata ro dena, Epesus, Simina, Peqamam, Taetira, Sadisi, Piladelpia mana Laodisia go.”

¹²Qa tabali mana ma mia kake i seko tabe ava go, gonae qa mia kavitu pazi iri zazu neze qolu.

¹³Mana vari lobori qira pazi ro dena, qa mia zaqe kameka basoe i gere tuna basoe i va keba ne roku loda i za dokae makena ne, mana barabaraṉa ne i poke ze qolu.

¹⁴Uguruna ne i sele igere uguruna sipi ne. Matana ne igere uqulu na nako ne.

¹⁵Makena ne i gere barasi i damara go. Ovaṉana naki na saqena ne i gere ququtalana besi ne.

¹⁶Karisi matauna i pala taru ze kavitu domiri, saqe nane i siporo me kameka pegi loda, i zogoto go karua tepa na, mana tarakenaqana i gere damara na saṉa ne ṉalu ni kikinaka go.

¹⁷Pasi qa reṉa soba ne ia, qa soru kapate tarakenaqana makena ia, gere basoe i le bana go. Do i sibave karisi matauna, mana igo, “Oniki sareki, era to qa kenaqana go mana lupolupo na go osina ro pata.

¹⁸Era to, basoe qa too ogoto go, era to qa le bana go ninidena qa too, mana tuniki ara le napu kaega, doka to ṉalu gado kutona i kaega go. Era to qa pala go karaputa i sivala nego le, mana qa pala karaputa i sivala ne go komala ria vano le go.

¹⁹Ono karo qira pataro qo mia go iri sadaka go ninidena, mana pataro tinara za sadaka mego ṉalu muzi go.

²⁰Qo mia kavitu domiri qa pala taru zego karisi matauqu mana kavitu pazi qolu dena gogo ne, iri pata ko pipika bana so mana i ko talupasana ro go. Kavitu domiri dena iri talukase kavitu aqelo na kavitu eklesia ro dena.”