Read Varisi Revaleson 16 Bible Online

Revaleson 16 - Varisi bible

Revaleson 16

¹Gonae qa qata zaqe kaki naki lavata i reqe me loborona pade lotu ne, i seko tabe qira aqelo ro ne, i vane qira dena, “Pala kavitu ebata ikoego muna ia God dena mana za zele ze vudu pua go!”

²Aqelo kenaqa ne i za zele ze ebata ia vudu pua ne. Gonae ria iri pala bana go lala ia pata qaraqara piru ne mana iri vazaka go beku na gogo ne, i pala qira topuna kukuru i lete vokara sivala go, mana i va sasakata ne qira go.

³Varuana aqelo ne i zele ze ebata ia masi ne, gonae masi nae iparasa, igere parasana basoe le, mana osina pata too iri koego loborona masi ne iri le lupo.

⁴Vapisana aqelo ne i zele ze ebata ia besi uguru mana besi vuala ro go gonae besi dena iri taitana mana parasa lupo go.

⁵Gonae qa gata zaqe aqelo ni miasoka go besi ro ne, igo dena, “God, aro qo lete tabo sivala, qo ko bana me, mana qo ko taru ninidena go, kimata ro qo valame go ne itotoloṉo lupo so.

⁶Iago, ria iri vae vale qira go propeta ro ne mana basoero aro gogo ne, aro qo va besi qirae to parasa, ianae i volina to pataro iri zazu nego!”

⁷Gonae qa gata kameka ovaṉa i seko me sara ne, igo dena, “God Batu qo moqere sivala. Aro so ikoego osina karaputa, iago varitanae aro de koe basoero ne, i velaka mana i totoloṉo go!”

⁸Vavasina aqelo ne i zele ne ze ebata ia popokona saṉa ne, gonae saṉa ne i pala karaputa i lete ila napu, mana i subi qira basoero ne go.

⁹Basoero i subi qira go ilana saṉa ne, iri tulaṉa vasakata ne vitoṉona God i kone go karaputa, sivala nego kimata ro dena. Do iriki nanao ule ne kaega vasakata pata ro ria, ba vazaka na vitoṉo na God gogo ne, iriki soko kaega.

¹⁰Valima na aqelo ne i zele ze ebata ia do koko batubatu ia pata qaraqara piru ne, gonae rodoko i sapua de ikoego vari miasoka ia pata qaraqara piru ne. Osiqira vano iri koego de igogo ne, iri kabale kalamia qira, tanego vokara ikoego tokama qira i lete vasasakata qira.

¹¹Do ria iri lete tulaṉa vasakate vitoṉona God ikoego rani ne, sauna kukuru ikoego tokama qira ne. Ba nanao ule nena vatovato sakata ro ria ne, i kaega bana ne qira go.

¹²Vaonomona aqelo ne i zele ze ebata ia uguru lavata Eupratus. Gonae uguru ne i kadala go tina lama kavae go batu lavata i reqe mego keba na saṉa ne.

¹³Gonae qa mia napua kapisa manuru sakata iri mimia gere pori ne, iri siporo me saqena propeta poqepoqe ne go.

¹⁴Kapisa manuru sakata dena, iri lete sakata sivala, iri zazu ne pata vari vapoloso. Kapisa manuru sakata dena, iri zae de iri koego batu lavata na vudu pua, iri za teṉo qira go tarina varitarae de ikoego God Batu ni lete moqere sivala nego musaqara muzimuzi.

¹⁵“Gata! Era tuna gere basoe sikosiko ne! Kula basoe i dogara taru mana i vanadua baribari ia osina ṉalu, go tiniki za sisinaqa go kaega.”

¹⁶Gonae kapisa manuru sakata ne iri koru teṉo qirae kameka dia batu lavata ro ne, de iri vitoṉo ze seko va Iburu Amagedoni.

¹⁷Gonae vavituna aqelo ne i zele zaqe ebata ia varioka ne. Kameka ovaṉa lavata i seko me de kolokoloku batubatu ikoego Pade Lotu ne, igo dena, “Osina pata i lupo to!”

¹⁸Torana so nae qumara lavata i naki, kapi i tatavata mana pakala i soru. Kameka nunu lavata i vizua pua ne. Pasi god i vazaria go basoe mana i taru zego vudu pua, i kaega to kaki nunu i gere go nunu lavata igogo ne.

¹⁹Komala lavata ne i kapisa tavota, mana komala suka ro na rudu pua iri tapero lupo. God iki nanao kasupe ne kaega komala lavata Babiloni, do i vage ze ia loka na vaini ikoego muma lavata ia God.

²⁰Osina ṉuguro iri zaga lupo, mana osina kuboloro iri kaega lupo.

²¹Tapasina ipaka lavata na aisi i soru me rani ne, maqatana ne i torana neqo kilo, i vae qira basoero ne. Gonae basoero ne iri tulaṉa ne God, tanego pata vari vakimata dena, i lete sakata sivala.