Read Varisi Revaleson 21 Bible Online

Revaleson 21 - Varisi bible

Revaleson 21

¹Taramuzina pataro dena qa mia kameka rani mana vudu pua voru, rani mana vudu pua kenaqa ne iru kaega zato. Masi ne do i kaega napu to go.

²Gonae qa mia komala tabo Jerusalema i ko tavise God mana i qoqoro me tepa rani ne, komala nae i vanama gere kameka qole i malemale vanama ne soba na velake ia.

³Qa gata kameka ovaṉa i seko me de kolokoloku batubatu me, ogi dena, “Ninidena komala ia God i kotavisi qira to vano basoe. Ia tina ko tavisi qira mana ria tarina basoero ia, mana God tina God ria go.

⁴Ia tina qulasa vakadale sone na mataqira. Kaega napu ka basoe tinara za le ba maqata ba dae mana vokara go. Tanego osina pata bana ro i kaega lupo to.”

⁵Gonae ia i kolokue go de kolokoloku batubatu ne igo dena, “Era qa va vorua to osina pata,” mana i sine napua, “Ono karo pataro dena, tanego sekoro dena i ogoto mana taru ze ruruqe aro go.”

⁶Mana igo napu dena, “Osina pataro iri doka to.” Era to qa kenaqana mana muzimuzina osina pata, era to qa tutupiana mana lupolupo na osina pata. Ka basoe i kaṉoso go era tuna teke ne ia besi vuala na too i kaega go volina.

⁷Basoe i karaputa nego varitara ia ne, tina pala go pataro dena. Era qa God ia mana ia i sale ia.

⁸Do basoero i kaega ne qira padapada, vano iri vabesa nego vakitaka ro ria, vano iriki agava ne kaega vasadake na vatovato sakata ria, vano iri vae vale basoe, mana vano iri zazu nego zazu tatakiu mana vari vagabu, ria iri vazaka qira go beku poqepoqe ro gogo ne, varuana le ria ne, iato bolu na nako i poto sadaka mego loborona pua ne.”

⁹Kaki kameka aqelo i za lamae de qa koego era, aqelo dena iato vavituna go aqelo i pala bana go ebata lavata i purake go vavituna pata vari va makuru ne. Gonae igo dena, “Lama go ma vamia goe era qole ia Tunana Sipi niara busia go.”

¹⁰Spirit tabo ne i lamae de qa koego era, gonae aqelo ne i sua vazao ve era popokona kameka kubolo zakazaka sivala ne, i va mia ve komala lavata Jerusalema i kasi ne me God tepa rani ne mana i qoqoro me vudu pua go,

¹¹mana tatavatana karaputa ia God i damare go. Komala lavata dena i damara gere ipaka dulikana menomeno, mana i damara gere sirosiro na loka na masi ne i lete tatavata sivala go.

¹²Komala lavata dena i zari bari lavata na i lete zakazaka. Manoga karua siporaṉa dena iri karo ze vitoṉo qira manoga karua sinaqe na Izirel.

¹³Kapisa siporaṉa na ne iri taru ze go nogotona rikisi na pade ne. Kapisa i koe tepa zunu na saṉa go.

¹⁴Bari na komala lavata ne, i vakutama ne manoga karua ipaka lavata. Manoga karua ipaka dena iri karo ze vitoṉo qira manoga karua apostoloro ia Tunana Sipi ne.

¹⁵Aqelo i seko tabe ava go ne, i pala kameka moki qolu padapada, go tina pada ze go komala lavata ne, siporaṉa ro mana bari na ro go.

¹⁶Komala lavata dena i kavasi maqana, betaraṉa mana lodana gogo ne iru varipada so. Aqelo ne i pada komala lavata ne, mana i manoga karua mao kilomita. Lodana, betaraṉa mana zakazaka gogo ne, iri varipada lupo so.

¹⁷Aqelo ne i pada napua bari na komala lavata ne, zakazaka na ne i kameka vasa vasiṉaulu kavasi mita. Aqelo ne i pada pataro dena, gerena so de go vano basoe iri pada go pata.

¹⁸Bari na komala lavata dena iri zazu neze ipaka dulikana menomeno. Mana lavata na to komala lavata dena ne iri zazu lupo zeso qolu. Iago i damara gere sirosiro ne.

¹⁹Kutamana barina komala lavata dena iri koe ipaka menomeno sivala ro, ipaka kenaqa ikoe go kutamana bara ne Jaspa, varuana ipaka ne Sapae, vapisana ipaka ne Aqeti, vavasina ipaka ne Ameral,

²⁰valima na i paka ne Onikis, vaonomo na ipaka ne kaniliani, vavituna kuots, vazaluna Berol, vaiana ipaka ne topas, vamanoga na ipaka ne kalsedoni, vamanoga kameka na ipaka ne tokues mana vamanoga karua na ipaka ne Amitisi.

²¹Manoga karua siporaṉa na ne, iri zazu neze kuete. Zuka lavata na loboro komala ne iri zazu ne ze qolu, iago i lete menomeno mana i duviduvi gere sirosiro ne go.

²²Era qaki mia ze kaega Pade Lotu loborona komala lavata dena. Tanego God Batu ne i moqere sivala mana Tunana Sipi ne iru ko taru ego, iago riru to iru Pade Lotu na.

²³Komala lavata dena, iki ara le ne kaega tatavatana saṉa ba inaqa, tanego karaputa mazala ia God i tatavata ego, mana Tunana Sipi ne, i pazi napu na komala nae go.

²⁴Basoero na vudu pua tarina goe so tatavata dena, ṉalu tarina kebae go komala lavata dena. Vano batu lavata na vudu pua tarina palame pata vavagado ro ria tarina keba mego komala dena.

²⁵Siporaṉa na komala lavata dena, i papaqa taru so osina ṉalu tanego i kaega ka kuse na komala dena.

²⁶Osina pata mazamazala ro mana pata vavagado totoloṉo so, tarina va keba zaqe go komala lavata dena basoero na kolabana pua ne.

²⁷Do pataro iki dalo go kaega, mana basoero iri zazu taru nego pata sakata ro ba iri poqepoqe gogo ne, tariniki keba za kaega komala dena. Do basoero i karo ego vitoṉo qira buka na too i pala go Tunana Sipi ne so tarina keba zago komala lavata dena.