Read Varisi Revaleson 3 Bible Online

Revaleson 3 - Varisi bible

Revaleson 3

¹Valeke ne igo napu de, “Ono karo ne zaqe aqelo na eklesia na Sadisi. Iato dena seko era, valeke qa pala go kavitu spirit velaka ia God mana domiri ne go. Basoero ne iri go ramu qamu too, do ramu qamu le bana tanae.

²Iago muna dogara mana vakaraputa qamue desuka too iara kone qamu go nae, ramu qamu ara kaebo lete le sivala. Tanego era qa mia zatu pataro qamu zazu nego, iara kaebo so totoloṉoe na tarakenaqana God era.

³Muna nanao tarua pataro iri vatatana qamue go, mana qamu gata go. Muna vaogote mana vana ne vatovato sakata ro ramu. Ba ṉalu qamuki dogara mego kaega, era tuna lamae deqamu koego gerena valeke sikosiko, mana ramu tamuniki rove kaega ṉalu era tuna doka qamu go.

⁴Do kavia ro ramu vano Sadisi, qamu miasoka vavelake mana va vorua poga ro ramu. Ria nae to tarina vakeba ne go roku kakasa mana zaza tavisi ava era go, ria nae to i tora qira go, tanego i sauna to zazu velaka ria.

⁵Basoero iri karaputa ego varitara dena, tarina vakeba ne roku kakasa, mana tuniki vakuziki ne qirae kaega vitoṉo qira i koego buka na too. De koe tarakenaqana Mamae mana aqelo ro ia, era tuna sine vasadake basoero nae to iri ke ogoto era.

⁶Ramu i kone qamu go qeqele muna gata seko ia Spirit tabo iri sine go eklesia ro ne!”

⁷Ia i seko, igo napu dena, “Ono karo ne zaqe aqelo na eklesia na Piladelpia. Iato dena seko era, qa valeke tabo mana qa ogoto osina ṉalu, mana qa pala kii gere kii ia Davita, mana ṉalu qa papaqa go, i kaega ka basoe i mazala go kokoqu na, mana ṉalu qa kokoqua go, i kaega ka basoe tina papaqa go.

⁸Era qa rove pataro qamu zazu nego, mana qa rove karaputa ramu i suka so, do qamu lulua vari vatatana era mana qamu osaka nava go. Iago siporaṉa ne era qa papaqa ne qamu to, i kaega to ka basoe tina kokoqu ne qamu go.

⁹Muna gata! Tautau iri vazaka go Satana nae, iri go iri vano Jiu, do iki ogoto kaega, iri poqe so, era tuna va rabatavakapata qirae make qamu ramu, ṉalu nae tarinara mia rove era qa lete mamaligara ne qamu ramu.

¹⁰Tanego ramu qamu lulua vari vatatana era mana qamu vanadue go, era tuna miasoka qamu ṉalu kaki makuru tina pada ne qira go basoero na vudu pua de.

¹¹Tiniki umata kaega era tuna lama napu, iago ramu muna palataru vanadua too velaka qamu pala bana go nae, niki go lama vakuziki ne qamue kaki basoe sakata, sasarapa velaka qamu pala bana go.

¹²Basoe i karaputa nego varitara nae, era tuna vagere ze ia kameka turu maqa i degere go vari loborina Pade Lotu ia God era, mana tina ko taru osina ṉalu. Turu nae ne, tuna karo ze vitoṉo voru qu tanuqu, vitoṉo na God era mana vitoṉona komala lavata ia God, iato Jerusalema voru, tina za vaqoqoro me ze rani ne God era.

¹³Ramu i kone qamu go qeqele muna gata seko ia Spirit tabo iri sine go eklesia ro ne.”

¹⁴Ia i seko, igo napu dena, “Ono karo napu ne zaqe aqelo na eklesia na Laodisia. Iato dena seko era, valeke vitoṉoqu iri koru zego, ‘Amen!’ Era to qa tarama totoloṉo mana qa ogoto taru mego kokosona me osina ro pata i vazaria go God.

¹⁵Era qa rove pataro qamu zazu nego ramu, mana qa rove ramu qamuki lolomu mana qamuki ila kaega. Ṉalu go ramu tamu lete ila, ba lete lolomu gogo ne, iato i velaka va go era!

¹⁶Do tanego ramu qamu koeso loboro, qamuki lete ila kaega mana lete lolomu kaega, iago era tuna lua vana ne qamue ramu saqequ.

¹⁷Ramu qamu go, qamu lete vavagado mana qamu tonovo lupo to osina ro pata. Do qamuki rove kaega kapata, qamu lete vari vananama mana mata qamu, iara kodo so.

¹⁸Iago ma sine ne qamu pata ogoto, muna voli zavae era qolu ilete velaka sivala, go tamunara vavagado ogoto go. Muna voli palu ze poga tamuna vakeba nego, go tina sapua go tokamaqamu ni sisinaqa go, go tamuniki agava go kaega. Muna voli napua sumuku tamuna alu zego mata qamu, go tamuna mimia velaka go.

¹⁹Qa seko lavata qira mana qa vakimata napu qira basoero qa mamaligara ne qira go. Iago muna pada neto vana lupo ne na osina too mana vatovato sakata ro ramu go.

²⁰Muna gata! Era qa degere tarakenaqana siporaṉa ne mana qa tetedeke, ṉalu ka basoe i gata go seko ro era, mana i paqapaqa siporaṉa ia gogo ne, era tuna kebae loborona pade ia mana ṉaṉa tavise iago.

²¹Basoe i karaputa nego varitara dena, tina lama koloku tavisi ve era de koloku batubatu era, gere ava so era qa karaputa bana ne go varitara ne, mana ninidena qa za kolokue, de koloku batubatu ia Mamae.

²²Ramu i kone qamu go qeqele muna gata seko ia Spirit tabo iri sine go eklesia ne.”