Read Varisi Revaleson 6 Bible Online

Revaleson 6 - Varisi bible

Revaleson 6

¹Gonae qa reṉa ne zaqe Tunana Sipi ne i kaqole vakuziki kameka ke kenaqana va vitu na pata varoroto ne, mana qa gata kaki kameka ria kavasi pata qaraqara too ne, i ovaṉa valavata me i gere naki na pakala, igo, “Lama!”

²Qa reṉa mana qa mia kameka ose kakasa valeke iage go ne i pala tuana mana lepo, mana iri teke ne topatopa, i va topatopa ne go. Valeke i age go ose dena ne i karaputa banae varitara ne, mana i zaza napu go tina za karaputa napu ne kaki varitara napu.

³Gonae Tunana Sipi ne i kaqolo vakuziki napu ne varuana pata va roroto na vivolona pepa ne, mana qa gata napua varuana pata qaraqara too ne igo, napu de, “Lama!”

⁴Kaki kameka napu ose mesara i sadaka me, valeke i age go ne, iri teke ne pegi varitara, go tina lama varitarae go vudu pua dena, go vano na vudu pua ne tarina vari vae vale napua tanuqira.

⁵Tunana Sipi ne i kaqolo vakuziki napua vapisana pata varoroto na vivolona pepa ne, mana qa gata vapisana pata qaraqara too ne, igo, “Lama!” Qa reṉa mana qa mia kameka ose poṉo, valeke i age go ose ne, i pala tarua kaki pata i vari pada so maqata na karua tepa na ne.

⁶Qa gata kaki ovaṉa igere kapata igo mego varilobori qira kavasi pata qaraqara too ne, igo dena, na lama doka ṉalu, kameka kima raisi so i tora go voli na zazu ria kameka tutukunu na musaqara, mana kapisa kima palava so i tora go volina zazu ria kameka tutukununa musaqara. Do oniki vasakate moki olivi mana barue vaeni go.

⁷Gonae Tunana Sipi ne i kaqolo vakuziki napua vavasina pata varo-rotona vivolona pepa ne, mana qa gata vavasina pata qaraqara too ne igo, “Lama!”

⁸Ṉalu qa reṉa za qe mia kameka ose i lete mimia sakata, valeke i age go, iri vitoṉo ze le. Basoe i muzi ne go ia iri vitoṉo ze uṉaṉa osiqiru i ko ne qiru karaputa vae vale ne takoborona basoero na vudu pua, tiruna vari va vae ne pataro dena, saqo, kana, mokoso mana pata qaraqara piru ro go.

⁹Gonae Tunana Sipi ne i kaqolo vakuziki napua vivolona pepa ne. Ṉalu qa reṉa ne zaqe qa mia polana sara ne, mana qa mia madau qira vano iri vae vale bana qira go, tanego ria dena to iri vaogote mana tarama ne seko ia God.

¹⁰Madau qira ria dena iri seko valavata me iri go, “Batu qo lete tabo sivala mana qo moqere go, aro i purake vavaogoto, kasi vaumate na varitanae aro de iri koego basoero na vudu pua, ono vakimata qira tanego iri vae vale qemu remu.”

¹¹Nogoto qira iri teke ne qira roku kakasa mana iri sine ne qira, muna noto tekere ramu, na doka so ṉalu tarina vaevale lupo qira basoero velaka ne, taramuzina God tina vae vale lupo qira basoero sakata ro taramuzina God tinara velo qira vano velaka ro iri le bana go.

¹²Qa mia napua Tunana Sipi ne i kaqolo vakuziki napua vaonomo na pata va rorotona vivolo na pepa ne. Gonae kameka nunu lavata i vizua vudu pua ne, pasi nae saṉa ne iki tatavata to kaega osina dia ne i rodoko lupo, mana inaqa ne i taitana i mesara gere parasa ne.

¹³Domiri ro na zakazaka ne iri soru me pua ne, gere urena lebu i lama vuvutuqira go sokoro lavata ne.

¹⁴Rani kulumu ne i gere tobi iri vivole go, mana osina kubokubolo ro, mana ṉugu ro iri ziki kasi lupo ne de iri ko banae go.

¹⁵Gonae osiqira batu lavata na vudu pua ne, vano kenakenaro, batu ro ria vano soldia ro, vano vavagado, vano iko ne qira karaputa vano seka ro mana vano basoe volomo ro gogo ne, iri paqa mana za pipikae loborona leṉa ro mana polana baba ro na kubolo go.

¹⁶Gonae iri korua kuboloro mana babaro, iri go, “Soru poka qemu mana pika qemue matana ia i kolokue go de kolokoloku ia, mana muma ia Tunana Sipi ne!

¹⁷Pata ogoto, musaqara ṉalu God mana Tunana Sipi tiruna vakimata qira go osiqira basoero ne i lama doka to, iago akena to tina mazala go vakavele na too ia na?”