Read Varisi Revaleson 9 Bible Online

Revaleson 9 - Varisi bible

Revaleson 9

¹Gonae valima na aqelo ne i puqo kuvili ia. Ṉalu qa reṉa qa mia zaqe kameka domiri, i kasi ne rani ne i soru me vudu pua. Domiri dena iri teke ne ia kii na bolu na uṉaṉa ne.

²Domiri ne i paqapaqa bolu na uṉaṉa ne mana kauku i za reqe mego i gere kauku na kameka nako lavata, i lama midiki ne varitaka ne, iago saṉa ne iki tatavata to kaega.

³Loborona kauku dena i za reqe me nopi ro mana iri za siporo me vudu pua ne, karaputana ne i gere napua so karaputana pedepede ne.

⁴Iri sine ne qira muniki vasakate seuseu, moki ro mana pata lebaleba ro, do iri vamao ne qira tarina vasakata qira so basoero iki koego kaega lala ia God rae qira.

⁵Nopi ro ne iriki vamao ne qira kaega tarina vae vale qira basoero, do tarina va vokara ne qira so basoero ne torana kalima inaqa, mana vokara nae tina gere silipina kabala na pedepede ne.

⁶Torana kalima inaqa iri gata vokara go nae, ria ne tarina taqia kadego mara le tarina go, do tariniki soba so kaega. Do le tina paqa ne qira.

⁷Nopi ro dena iri mimia gere ose ro, iri vanama nego varitara, kuzuku qira iri vatopatopa ze qolu, tarakenaqana qira i gere tarakenaqana basoe.

⁸Uguru qira i gere loda na uguru qira qolero ne, mana saqe qira i gere saqe na laioni go.

⁹Iri vakeba ne roku varitara iri zazu neze aeana, mana naki na babalakuru qira i gere naki na pata tititolo i toqo vazazao go ose ne, ṉalu i teteṉe nego varitara ne.

¹⁰Kupele qira i gere kupele na pedepede ne, mana kupele qira to nae ikoego pata tina va vokara qirae go basoero ne torana kalima inaqa ne.

¹¹Iko ne qira batu lavata ria, mana ianae ne aqelo i miasoka go ununa ne. Seko va Iburu iri koru ze Abadoni, vano Qrik iri koru ze Apolina, talupasana, valeke i vasakate go osina ro pata.

¹²Kimata kenaqa ne i sivala zato, do taramuzina ia dena kaki karua pata vari vakimata tinara za lama napu.

¹³Gonae vaonomona aqelo ne i puqo napua kuvili ia. Qa gata ovaṉa i reqe me kavasi maqa na sara qolu i degere go tarakenaqana God.

¹⁴Ovaṉa ne i seko me de ikoego vaonomona aqelo ne, igo de, “Ono lukase kavasi aqelo iri qolo taru qirae go uguru Eupratus!”

¹⁵Vaonomo na aqelo ne, i lukasa qira kavasi aqelo ro ne go tarina vae vale go takoborona basoero na vudu pua ne. Aqelo ro dena iri ko vanama bana ne so, ṉalu de, inaqa de mana ave dena tina lama doka go.

¹⁶Iri sine nava, topu ria vano soldia ne i karua vasa kokorako.

¹⁷Mana qa miadua napua ose ro mana vano iri age go. Basoero nae iri vakeba ne roku varitara i mesara gere nako ne, i kuri mana i noba. Kuzuku qira ose ro ne i gere kuzuku qira laioni ro ne, mana saqe qira iza siporo me nako i gere go nako kamu i poto sadaka mego loborona pua ne.

¹⁸Takoborona basoero na vudu pua i vae vale qira kapisa pata makuru dena, nako kauku mana ipaka iri za reqe mego saqe qira osero ne.

¹⁹Tanego karaputa na ose ro ne i koeso saqe qira mana kupele qira go. Kupele qira ne i gere dole i zari go kuzuku qira, mana iato iri vazazua go iri vae vapaleka ze go basoero ne.

²⁰Ria iri ko sivala ego vudu pua ne, iriki le ne kaega pata makuru ro dena ne, iriki mamanava so kaega vazaka na pataro iri zazu nego tanuqira, iri vazaka manuru sakata ro, beku ro iri zazu neze qolu, siliva, boronizi, ipaka, mana moki go tanego beku ro dena iriki mimia kaega, iriki gata pata kaega mana iriki zaza kaega go.

²¹Mana iriki mamanava kaega vae vale na basoe, zazu mamaruku, vari va gabu ro, ba sikosiko go.