Read Vute Màtíyò 11 Bible Online

Màtíyò 11 - Vute bible

Màtíyò 11

¹Ɓwâ Yésù ya nacáŋhȩ nɨ̀fuùb no cóóŋ ɨ́ bɨrɨ́b lè sóóŋ kíì, ŋgə́ ɨ́ éíkî nɨ́ ɓè; ŋgə́ ɨ́ gì nɨ́ tɔ̀ɔ̀ɓéèsénɨ àm Mèèín kwɨ́ì ɗɔ̀ɔ́b kɨ́ no kwe no.

²Jâŋ nò kɔhɨ kùb kɔ ə́mní yaá dúú nìrì, á ŋgə́ ók sà̧à̧ Krístùù. Kí á ŋgə́ tómso nùb kù tɨŋtɨ̀ŋ nɨ̀fuùb noò no,

³ŋgáb gɨ̀ fɔ́nɨ Yésù ɨnè: «Wu ɨ́ du nò nɨ́m ɗəŋhȩ yi du gònɨ rɨ kèè, nɨ́m móŋndóŋ nò ji?»

⁴Yésù ɨ́ tàcùnà ŋgáb ɨnè: «Gɨnáam tànànɨ Jâŋ nɨ́m nyí óklé ɓe kɨ́ nyí pə́ré.

⁵Ɓùɓú̧ù̧b á pə́cùnɨ, nùb gurub ɗə́mne á gɨ̀cùnɨ gùr ɗɨ́ɗɨ̧́. Njɨ̀njə́ə̀b, njɨ̀ɨ̀b ɓoò sɨttɨ́, mgbòŋtóob á ókcùnɨ. Nɨ̀kwííb á sə̀ə̀mcùnɨ, nùb tiri á cè óknɨ Kìn Nyɔ̧ɔ̧́.

⁶Mɨ̀tù ɓa dùnɨ ɓe nò ə́ə́m nóò du gùwá ɓe ɨ́r moò rɨ á!»

⁷Ɓwâ nɨ̀fuùb Jáàŋ yi gɨré, á Yésù yi yaré nyìnnànɨ nɨ̀vɨ́tɨ̀b àm Jáàŋ sóò, ŋgə́ a tace: «Ní á nyí yi gɨ pénɨ ŋgwàì ndɨ̀ŋnì? Nyí yi gɨ pénɨ kɨ̀càì cɨ́cɔ̧̂ du jɨ̀ɨ̀niì á à? Ɗàwá.

⁸Nyí ma yi gɨce nɨ́ pénɨ ní? Nyí yi gɨ pénɨ nò du ɓe júk nyɔ̧ɔ̧́ ceí á à? Nùb duɓacéye bɨ́ lénɨ júúb nyɔ̧ɔ̧́ ceí á bɨ́ mvènnɨ́b jííbí hamnin.

⁹Nyí ma yi gɨce nɨ́ pénɨ ní? Nyí yi gɨ pénɨ tɨ́kìn Mèèín kèè? I̧i̧, mɨ tànàɓà nyí, ŋgə́ ndóŋɓacéyetɨ́ nɨ́ tɨ́kìn Mèèín.

¹⁰Ɓetí ɓe ɨ́r Jáàŋ á káàtà Mèèín du wáànɨ ɨnè ru: ‹Mèín taá, péye, mɨ tómsotɨ́ tɨ́kìn moò wo tíí, ŋgə́ gɨ̀ wu njáínkɨ́nànɨ jɨ̀r.›

¹¹Mɨ tanaɓa nyí àmɨɨr wááŋ á: mvókín nɨ̀vɨ́tɨ̀bì, nò jíri kù ɗóhe ɓe Jâŋ nò kɔhɨ kùb kɔ ə́mní ɗàá hò̧ sə̀myèwá. Ɨ́dù nɨ́m mwi̧ nò ti mɨ̀ténè Haam Mèèín noò ndóŋtɨ́ ŋgə́.

¹²Yàrénɨ ɓwâ Jâŋ nò kɔhɨ kùb kɔ ə́mní há̧á̧ gònɨ féínnɨ ɗàrò, nùb kù á ɗúnɨ lèènɨ su ɓe Ŋgɔ̧́ɔ̧̀ Mèèín, nùb du ɓe nyòmeè á mánɨ gànɨ ŋgɔ̧́ɔ̧̀ kɨ́ a dù kɨ́ vúmè.

¹³Tɨ́kɨ̀nɨ́b Mèèín lâs, ɓe ɓíì Mòyíìs ya nyintɨ́ àm ŋgɔ̧́ɔ̧̀ kíì há̧á̧ ɨ́ gò féínnɨ ɓwâ Jáàŋ.

¹⁴Ɓè nyí fɨ́tɨ mɨ ə́ə̀mnaniì, Èlî, tɨ́kìn Mèèín yi ɓa gònɨ kɨ́, Jâŋ á.

¹⁵Nò du ɓe tó ók àmnì, óktɨ.

¹⁶«Mɨ áɓàyè nùb jíìb mwánnè hȩ na bɨ? Ŋgáb á fɨ́tîn ɓe mucutɨ́b du du̧ú̧ laŋtaŋ kù no, nùb kù a yà kɨ́ŋsònànɨ kùb ɓoò ɨnè:

¹⁷‹Nɨ́m kunnatɨ́ nyí jíín, nyí ɨ́ mvû wànnɨ; nɨ́m soŋnatɨ́ nyí bɨ̀ìmèrè, nyí yéínwa!›

¹⁸Nɨ́m ɗəəŋtɨ́ Jâŋ yi goó ɗɔ̀bín. Cɔŋ yoo, súm yoo, àm noò yi nɨ́ ɓe kí ɗànyàŋwá, kùb ɨ́ tà: ‹ŋgə́ á ɓe nɨ̀wàtɨ̀b só!›

¹⁹Mwin Nɨ̀rì ɨ́ gò, ŋgə́ ɨ́ tàŋ nɨ́ cɔŋ, ŋgə́ ɨ́ mèì nɨ́ súm, kùb ɨ́ tà: ‹Pə́náhá mvə̀cɔɔ̀ŋ ndè, ɓe mbirú rè, ɓwàjìrí nùb ɓáhe làmpóò ɓe nùb ɓáŋhɨ́bí!› Ɨ́dù nɨ́ɨ́b nɨ̀vɨ́tɨ̀b du ndɨ̀ŋniì ɨ́ du túùmnɨ kɨ̀cáàb Mèèín á ɗɨ́ɗɨ̧́ ru.»

²⁰Kí á Yésù ya yetɨkom kwɨ́ì ŋgə́ ya ndɨŋvíi nɨ́ɨ́b sɨ̀sɨ̀rí no kwe ɓe àm nùb kwɨ́ì kɨ́ noò ya du sum ŋgábè ɓàndɨ̀wáá, ŋgə́ ɨ́ tà:

²¹«Jábɨ́r á ɓe wu Kòràsə̧̂! Jábɨ́r á ɓe wu Bètsáyídà! Ɓetí nɨ́ɨ́b sɨ̀sɨ̀rí ya ndɨŋ yá nyínè rè, ya dùyè Tíìr ɓe Sìdôŋ á naa, nùb kwɨ́ì kɨ́ noò yè ya lə́réé júúb jɨ̀rí só kúríí, ɗà ŋgáb a sàtèè tu̧ ŋgwéé, túùmnɨ ɨnayâna vúm ɓandɨtɨ́ sum vúmè.

²²Àm kɨ́ á, mɨ tanaɓa nyí wááŋ: ye Mèín ɓa ŋgùnnɨ nɨ̀vɨ́tɨ̀bì, jábɨ́r kùb ɓa túùmnɨ nùb Tíìr ɓe nùb Sìdóòŋ ɓa dùnɨ cə̀k á, kɨ́ nyínè ɨ́ ɓa ndóòŋnɨ.

²³Wu ɗàrɨ́ cè, Kàpèrnàwûm, wu lə́mne wu ɓa wútɨ̀wúnɨ síí há̧á̧ ɓɨllin á à? Kùb ɓa wu nyísénɨ ɗàá há̧á̧ ko̧ó̧ á. Ɓetí nɨ́ɨ́b sɨ̀sɨ̀rí kùb ya ndɨŋ yá woò rè, ya du Sòdôm á naa, kwɨ́í kɨ́ yè á yè dùnɨ há̧á̧ ɗàrò.

²⁴Àm kɨ́ á, mɨ tànàɓà nyí wááŋ: ye Mèín ɓa ŋgùnnɨ nɨ̀vɨ́tɨ̀bì, jábɨ́r kùb ɓa túùmnɨ nùb Sòdóòm ɓa dùnɨ cə̀k á, kí woò ɨ́ ɓa ndóòŋnɨ.»

²⁵Ɓwâ kɨ́ á Yésù ya yóŋ Mèín, ŋgə́ ɨ́ tà: «Tá, wu nò du Kéké ɓɨɨr ɓe ɗɔ̀bí, mɨ sáktií wu àm wu ya yokna nùb kɨ̀cáblì ɓe nùb ɗɨŋhí̧ nɨ́ɨ́b wu ya túumna mucutɨ́bí rè.

²⁶I̧i̧ Tá, á mè u̧nè. Àm wu ya ɗú dù u̧nèé á.

²⁷«Tá moò yi ɨ́ naɓa mɨ nɨ́ɨ́b lâs lu, nò ɗəŋhȩ muní nɨ ɗàà, sé Tá. Nò kù ɗəəŋce Táà nɨ ɗàà, sé Mwin, ɓe nùb Mwin ɗú ɗə̀ŋhɨ̀ Táà.

²⁸«Nyí lâs, nyí nùb du ɓe ha̧á̧ lúhîn ŋgwéné, nyí nùb du yenné, gonáam yɨ́ moò, mɨ ɓa nyí nànɨ ùwí á.

²⁹Ə́əmnáam ɓíhɨ̀b moò, nyí a ə́ə̀mɓwê mɨ dù tá tɔ̀hí nyínè. Ɓetí mɨ á mɨ kerîn, sum móò á cè gurîn. U̧ á nyí ɓa kwànɨ ùwí ɗóhe ɓe nyínè.

³⁰Ɓíhɨ̀b moò bɨ tamnì ɗàà, ha̧á̧ kɨ́ á cè nɨ́ wáŋnîn.»