Read Vute Màtíyò 14 Bible Online

Màtíyò 14 - Vute bible

Màtíyò 14

¹Ɓwâ ya kɨ́ Hèrôdə̀ nò ya du gómnà ɗɔ̀ɔ́b Gàlìléè ya óó wúúm Yésùù.

²Á ŋgə́ tana nùb no ə́ré ɨnè: «Nò kɨ́ Jâŋ nò kɔhɨ kùb kɔ ə́mní á, ŋgə́ ɨ́ səəmcuhó̧ mvókín nɨ̀kwíbí ru; àm kɨ́ á ŋgə́ du ɓe nyòm ŋgə́ ndɨŋtee nɨ́ɨ́b sɨ̀sɨ̀rí ru.»

³Kí du Hèrôdə̀ ya taá kùb bɨ̀ Jâŋ; kùb kwéí ŋgə́, kùb a kɨ́klê ŋgə́ nìrì. Ŋgə́ ya nɨ́ nɨ́m kɨ́ sam ndɨ̀ŋwá, yɨɨ́m ɓe àm Èròdíyádə̀ gwi mwin yàá noò Fɨ́lɨ̂b á.

⁴Hȩ Jâŋ ya tanakom Hèrôdə̀ ɨnè: «Ɓíì á kààŋnɨ ɓùcùkîí Èròdíyádə̀!» rèé,

⁵Hèrôdə̀ ɨ́ ɗû kwíìnɨ Jâŋ, ɨ́dù ŋgə́ yaá lùnɨ vùù gbàŋ Jwîf ɓoò, ɓetí nùb lâs yaá bɨ́ ánɨ Jâŋ hȩ tɨ́kìn Mèèín.

⁶Hȩ ye jùrúb vùùŋcùú fin Hèrôdə̀ ya ɗóoré, mwin Èròdíyádə̀ nò nɨ̀gwi ɨ́ núnyààŋɓà wòr nùb kùb ya ɓéworé tíí. Hèrôdə̀ ɨ́ óknàɓà ŋgə́ mɨ̀tù cei.

⁷Kí á ŋgə́ guna mɨkóóme rè ɓɔ̧, ŋgə́ ɨ́ tà ní á ŋgə́ nànɨ nɨ́m lâs ŋgə́ ɓa ní ɓwèìniì yáá.

⁸Hȩ yàní ya sóŋhȩ ŋgéé, mutí ɨ́ gì tànànɨ mvèìn: «Nawom mɨ ŋgwé Jâŋ nò kɔhɨ kùb kɔ ə́mní, pásɨ́njà kù no!»

⁹Kí á yəré ya bɨɓa gómnà, ɨ́dù ɓe ɓɔ̧ ŋgə́ ya guŋgáhe mɨ̀kùnɨ́nné, ŋgə́ ɨ́ ə́mnè ɓoré kɨ́.

¹⁰Kí á ŋgə́ ya tómso nò kù dúú nìrì, gɨ̀ téínwònɨ ŋgwé Jâŋ kíì.

¹¹Kùb ɨ́ gèwò ŋgwé kɨ́ pásɨ́njà̧à̧, kùb ɨ́ nà mɨkóóme rè, ŋgə́ ɨ́ gènà yà nóò.

¹²Nɨ̀fuùb Jáàŋ ɨ́ gò hànnɨ kúndu ŋgéé, ŋgáb ɨ́ gì vɨ́rɨ̀nɨ. Ŋgáb ɨ́ gì tànànɨ Yésù nɨ́m yi ndóŋndé.

¹³Ɓwâ Yésù ya ók kìn kíì, ŋgə́ ɨ́ éíkî ɓè. Ŋgə́ ɨ́ lê kwáí kù no. Ŋgə́ ɨ́ gì ŋgə́ mwi̧, yá nò kù ya du ɗàwáá. Ɨ́dù hȩ nɨ̀vɨ́tɨ̀b cɨ́ bɨ́ àm kíì, ŋgáb ɨ́ fó̧tèèwòɓà kwɨ́ì lâs no, tùnɨ Yésù, ŋgáb a ɓaŋgeece gíngín ɓárí.

¹⁴Ɓwâ Yésù ya fó̧ kwánnè, ŋgə́ ɨ́ pê mɨ̀kwìn kàm nɨ̀vɨ́tɨ̀bì, ɗà mwàm ɨ́ bɨ̀ɓà ŋgə́ cei ɓe nùb kɨ́, ŋgə́ ɨ́ yà wáàŋnɨ nɨ̀yáàb ŋgábè.

¹⁵Hȩ lɨ́tɔ̧ ya kerɨré, nɨ̀fuùb Yésùù ɨ́ ŋgɨ̀ɨ̀wò gín nóò, ŋgáb ɨ́ tànà ŋgə́: «Lɨ́tɔ̧ kerɨcií. Yɨ́ rè cè nɨ́ hò̧ tɨfuru̧ á; tómcugem nùb lè kwɨ́íbìn ŋgáb gɨ gùnnɨ nɨ́m ŋgáb taŋndé.»

¹⁶Yésù ɨ́ tàcùnà ŋgáb: «Nɨ ɗúwa ŋgáb gìi, nyí nɨ̀miib, nanáam ŋgáb nɨ́m cɔɔ̀ŋ ye!»

¹⁷Ɨ́dù ŋgáb ɨ́ tànà ŋgə́: «Nɨ́m á ɗóò hò̧ ɓe bɨ̀rê ŋgiì ɨ́ həré bɨrɨ́b.»

¹⁸Yésù ɨ́ tànà ŋgáb: «Gewonaná mɨ kaín.»

¹⁹Kí á ŋgə́ ya ndɨŋ nɨ̀vɨ́tɨ̀b dùré ɓwìín; ŋgə́ ɨ́ â bɨ̀rê ŋgiì ɓe həré bɨrɨ́b rè, ŋgə́ ɨ́ góòmwî íí còóm, ŋgə́ ɨ́ sáktè Mèín, ŋgə́ ɨ́ kùùmè bɨ̀rê kɨ́, ɗà ŋgə́ ɨ́ nà nɨ̀fuùb noò gɔ̀knà nɨ̀vɨ́tɨ̀b.

²⁰Nùb lâs ɨ́ tàŋ, ŋgáb ɨ́ fùb. Nɨ̀fuùb Yésùù ɨ́ ɓáàcù kumsiì ya meré há̧á̧ lɨ̀ŋtɨ̧̀ cóóŋ ɨ́ bɨrɨ́b.

²¹Nùb ya taŋ cɔŋ kíì yaá sàmàìn ndɨŋ nɨ̀ŋgwáàb tɔ́sìn ŋgiì, kùb nɨ̀gub ɓe mucutɨ́b fàìnwá.

²²Cùr kɨ́ no ɓè mu̧u̧, Yésù ɨ́ kpɔ́hè nɨ̀fuùb noò ŋgáb lə́ kwáìn, pèyànɨ cəə́r, ɓwâ ní nɨ̀mɨr ní duye ndɨ̀ŋnɨ nɨ̀vɨ́tɨ̀b gɨ̀cùtɨ rè.

²³Cùr ŋgə́ ya ndɨŋ nɨ̀vɨ́tɨ̀b gɨ̀cùte á ŋgə́ ya wɨ́í ɓeè còóm mɨ̀yú̧ú̧. Ɓwâ sɨ́mnɨ̀r ya sɨ́ɨmndé, ŋgə́ yaá ɓè ə́ŋhîn ŋgə́ mwi̧.

²⁴Kór yaáɓàcɨ̀ ɗaŋhîn ɓe sɔ̀, tɔkain mvúmí yaá kór njókcùnɨ ɓetí kəŋmbə́r yaá ŋgáb no cùrónɨ.

²⁵Ye sərì á Yésù ya gainge nɨ̀fuùb noò, ŋgə́ a ɗeigece mvúmí ya còóm.

²⁶Ɨ́dù ɓwâ ŋgáb pə́ ŋgə́ mvúmí còóm ɗèìwòniì, vùù ɨ́ bɨ̀ɓà nɨ́ ŋgáb cei, ɗà ŋgáb ɨ́ tà: «Kɨ́ rè nyéhè ɓáŋhîn kù á kèè!» Ɗà ŋgáb ɨ́ gbə̀kɓà kɨ́ŋnɨ́b vùklì.

²⁷Ɓwâ kɨ́ ɓè mu̧u̧ á Yésù weina ŋgáb ɓɔ̧, ŋgə́ ɨ́ tà: «Nyí nɨ vùù ô, mɨ á, taamnáam njɔ̧̀!»

²⁸Kí á Píyéèr ya gam nyindí, ŋgə́ ɨ́ tà: «Kéké, óo dumeɓatɨ́ wu, ndɨŋ mɨ gàìnsò wu mɨ a ɗeisoce mvúmí còóm.»

²⁹Yésù ɨ́ tàcùnà ŋgə́ ɨnè: «Gom!» Píyéèr ɨ́ éíhô̧ kwáìn, ŋgə́ ɨ́ yà ɗèìgàìnsònɨ Yésù mvúmí còóm.

³⁰Ɨ́dù ɓwâ ŋgə́ ya pə́ nɨ́ kəŋmbə́r fùniì, vùù ɨ́ bì nɨ́ ŋgə́. Hȩ ŋgə́ ya ducɨ nɨ́ mvúúm nyòlléniì, á ŋgə́ gbək ɓɔ̧ ɨnè: «Kéké, ɓátɨm mɨ!»

³¹Ɓè mu̧u̧ á Yésù naamso ŋgáár, ŋgə́ ɨ́ bì ŋgə́, ɗà ŋgə́ ɨ́ tànà ŋgə́: «Nò ə́ə́m sumí ŋgóbti rè, àm níì á wu séndɨce?»

³²Ŋgáb ɨ́ lê kwáìn, ɗà kəŋmbə́r ɨ́ ə́ŋhȩ̀.

³³Kí á nɨ̀fuùb ya du kwánnè ɨ́ cáàmndê kwáìn Yésùù tíí, ŋgáb ɨ́ tà: «Á àmɨrì, wu dumeɓa Mwin Mèèín á!»

³⁴Pècáŋhȩ̀ȩ́ ɓárí, ŋgáb ɨ́ sê ɗàá ɗɔ̀ɔ́b Jènèsàréèt no.

³⁵Nùb ɓèé ɨ́ ɗə̀ə̀ŋcù Yésù, ɗà ŋgáb ɨ́ àhè péìn ŋgə́ féínworé ŋgɨ̀ŋgɨ́ŋ ɗɔ̀ɔ́b kíì bɨ̂ŋ. Kùb ɨ́ gèwònà ŋgə́ nɨ̀yáàb lâs.

³⁶Kùb ɨ́ yôŋ ŋgə́, ŋgə́ mbɨ́k ŋgáb dì̧nɨ̀hó̧há tó júú ŋgéé sóò. Nùb ya di̧nɨ tó júú ŋgéé kíì lâs ya wáaŋtɨ́.