Read Vute Màtíyò 17 Bible Online

Màtíyò 17 - Vute bible

Màtíyò 17

¹Cùr jíì tínmwi̧í̧, Yésù ɨ́ ɓégè Píyéèr, Jâk, ɓe Jâŋ mwin yàá Jâk ɗà ŋgə́ ɨ́ gè ŋgáb ɓe kàm kù ya, ŋgáb yaá ɓè ŋgáb kɨ̀ ŋgáb.

²Ɓɨ̀m noò ɨ́ cə́ndɨ̀rê ŋgábè tíí, ɨ́ yà sánnɨ hȩ mvii; ɗà júúb noò ɨ́ vùùɓə̀ə̀ɓà hȩ mwa.

³Nɨ̀fuùb taarɨ́b lè pə́cì na Mòyîs ɓe Èlî á bɨ sà̧nì ɓe Yésù.

⁴Á Píyéèr tana Yésù: «Tá, á mîn nɨ́m dùná nɨ hò̧. Wu ɗúú, mɨ a ôŋ njáŋnɨ̀b taarɨ́b, kɨ́ woò mwi̧, kɨ́ Mòyíìs mwi̧, kɨ́ Èlíì cè mwi̧.»

⁵Hȩ ŋgə́ ya duye nyìnkɨ́niì, ɓàk ɓə̧ ɓə̧né kù ɨ́ fúhè ŋgáb. Ɓàk kɨ́ no, kúu kù ɨ́ yà tàhó̧nɨ ɨnè: «Nò rè mwin ɗûnɨ́mí moò mɨ caré á, sum moò lâs á ŋgə́ ya. Óknáam ŋgə́!»

⁶Ɓwâ nɨ̀fuùb* ya ók kúu kíì, ŋgáb ɨ́ ókɓà vùù cei, ɗà ŋgáb ɨ́ gùfúùsê ɗàá.

⁷Yésù ɨ́ ŋgɨ̀ɨ̀sò gín ŋgábè, ŋgə́ ɨ́ dì̧nè ŋgáb, ŋgə́ ɨ́ tà: «Éícuwúnáam còóm, nyí nɨ vùù ô.»

⁸Hȩ ŋgáb ŋgerɨwú íí còmné, ŋgáb pə́cùcì na Yésù á ŋgə́ mwi̧.

⁹Ŋgáb sócùnɨ ɓeè, á Yésù tana ŋgáb: «Kpáb! Nyí nò kù àm nɨ́m nyí pə́ kɨ́ tànàwá, há̧á̧ hȩ Mwin Nɨ̀rì ɓa sə̀ə̀mcùhó̧nɨ mvókín nɨ̀kwíbí.»

¹⁰Á nɨ̀fuùb ya fɔ́ Yésù ɨnè: «Àm níì á nɨ̀gááŋ káàtàbì tace ɨnayâna Èlî ɨ́ ɓa nɨ́ gòyàyènɨ ru?»

¹¹ŋgə́ ɨ́ pììnà ŋgáb: «Á mè u̧, Èlî ɓa gònɨ á, ɗà ŋgə́ a gò nyààŋcùnɨ nɨ́ɨ́b lâs.

¹²Ɨ́dù mɨ tanaɓa nyí wááŋ á: Èlî ya gocií nɨ́, nɨ̀vɨ́tɨ̀b ɨ́ dù bɨ́ ŋgə́ ɗə̀ə̀ŋcùwá. Ŋgáb ɨ́ ndɨ̀ŋ ŋgə́ nɨ́m ŋgáb ɗúré. U̧nè ɓwê á ŋgáb ɓa jóktɨ̀nɨ Mwin Nɨ̀rì.»

¹³Nɨ̀fuùb ɨ́ ókgì ɨnayâna ŋgə́ nyin ɓe ɨ́r Jâŋ nò kɔhɨ kùb kɔ ə́mní á.

¹⁴Ɓwâ ŋgáb ya féín yá mɨ̀kwìn nɨ̀vɨ́tɨ̀bì ya duré, nɨ̀ŋgwá kù ɨ́ ŋgɨ̀ɨ̀sò gín Yésùù, ŋgə́ ɨ́ cáàmsê ŋgéé tíí.

¹⁵Ɗà ŋgə́ ɨ́ tà: «Yée Tá tɔ̀hí! Ók mwin móò mwàm. Ŋgə́ á gùnnɨ cáícáí. Yáb kɨ́ á ŋgə́ lòmɓànɨ cei. Ɓwâ kù ŋgə́ a gùrê wa̧á̧, kɨ́ kù mvúúm.

¹⁶Mɨ tɨ genaá ŋgə́ nɨ̀fuùb woò, wáŋhȩ̀ȩ́ ŋgéé ɨ́ yɔ̂ nɨ́ ŋgáb.»

¹⁷Yésù ɨ́ tà: «Kə́í! Ɨna nyí nùb ɓáŋhɨ́b ə́ə́m sumí ɗàwá rè, há̧á̧ ɓwâ ŋge á mɨ ɓa dùkwànɨ ɓe nyí? Mɨ ɓa nyí jíìkwànɨ há̧á̧ ɓwâ ŋge? Gewonaná mɨ mwɨi kɨ́ hò̧.»

¹⁸Á Yésù ya pám nyéhè ɓáŋhîn kɨ́, ɗà nyéhè kɨ́ ɨ́ éíhô̧ mwɨi kíì só. Ŋgə́ ɨ́ wáŋnè ɓè mu̧u̧.

¹⁹Nɨ̀fuùb ɨ́ ŋgɨ̀ɨ̀sò gín nóò, yɨ́ ŋgə́ yi du mwi̧í̧, ŋgáb ɨ́ fɔ̂ ŋgə́: «Àm níì á nyéhè kɨ́ tɨ yɔ́kce nɨ́ nɨ́m ŋgɨ́nnɨ?»

²⁰Yésù ɨ́ pìhè: «Àm ə́ə́m nyínè tɨ du ŋgóbtií á. Mɨ tanaɓa nyí àmɨɨr wááŋ á, ə́ə́m nyínè tɨ dùɓà háyè jíri ti hȩ íì mɨ̀nyéhȩ̀ȩ́ u̧, tɨ á sàmàìn nyí tana ɓe rè ŋgə́ éíkɨ́ ɓè, ŋgə́ gɨ̀ péín ndɨ, ɗà ŋgə́ a éíkî. Nɨ́m kù yè nɨ́ nyí yɔ́knɨ ndɨ̀ŋnɨ ɗàà.

²¹[Ɨ́dù, jɔ̀sé ɓe mɨ̀yú̧, ɨ́ jìí ɓɔ̧ɔ̧ á kùb fɨ́tɨ ŋgɨ́nnɨ kúúŋ nyéhè kíì ru.]»

²²Ye kù nɨ̀fuùb lâs ya ɓáatɨ́ Gàlìlê, Yésù ɨ́ tànà ŋgáb: «Kùb ɓa nàrénɨ Mwin Nɨ̀rì nɨ̀vɨ́tɨ̀bì ŋgáré á.

²³Ŋgáb a kwíhè ŋgə́; ɨ́dù jíì taarɨ́bí Mèín a tì sə̀ə̀mcùhô̧ ŋgə́.» Nɨ̀fuùb noò ɨ́ ókɓà yəré cei.

²⁴Ɓwâ Yésù ɓe nɨ̀fuùb noò ya féín Kàpèrnàwúùm, nùb ɓáhe làmpóò Dúú Jíri Mèèín ɨ́ gàìnwò Píyéèr. Ŋgáb ɨ́ fɔ̂ ŋgə́ ɨnè: «Tá tɔ̀hí nyínè nɨ gòmnɨ làmpô Dúú jíri Mèèín ɗàwá à?»

²⁵Píyéèr ɨ́ pìhè ɨnè: «I̧i̧, ŋgə́ á ɓà há gòmnɨ.» Ɓwâ Píyéèr lə́ yóò, Yésù ɨ́ gàmkɔ́hè nyindí, ɗà ŋgə́ ɨ́ tà: «Sìmôŋ, wu lə́əmce ɨna? Na ɨ́ du nò njáabna mvènnɨ́b jííb ɗɔ̀bɨ́nné làmpô: nùb ti̧né kèè, nɨ̀gwííb?»

²⁶Píyéèr ɨ́ ta: «Nɨ̀gwííb á.» Á Yésù ta: «Hȩ du u̧ kɨ́, nùb ti̧né bɨ nɨ́m kù gòmnɨ ɗàà.

²⁷Ɨ́dù, nɨ́m mwi̧, nɨ́m nɨ ɗúwa nànɨ nùb lè njù̧. Àm kɨ́ á mɨ ta wu gɨ̀ ɓárín mɨ̀cɔhɨ̀rí. Həré yàyɨ̀rí wu ɓa bìniì, kumnɨm ɓɔ̧ ŋgéé. Wu ɓa kwànɨ mòné no á; mwèìn ɗóhe ɓe làmpô nɨ́me wé. Áam mwèìn kɨ́ ɗà wu a njáábè làmpô nɨ́mè ɓe kí.»