Read Vute Màtíyò 20 Bible Online

Màtíyò 20 - Vute bible

Màtíyò 20

¹«Nɨ́m du fɨ́tîn ɓe Ŋgɔ̧́ɔ̧̀ Mèèín á rè: Tá mwarí kù ya fó̧ó̧ yekɨ́rɨ̀b kù no àm ŋgə́ áré nùb ə́ré no mwa̧né.

²Ŋgə́ ɓe ŋgáb ɨ́ bì kúu. Ŋgáb ɨ́ ə́mnè gàmnɨ gum ə́r mvii mwi̧í̧. Á ŋgə́ tómndé ŋgáb no mwa̧á̧.

³Ŋgə́ ɨ́ fó̧cùgwà mvii sàr, ɗà ŋgə́ ɨ́ pə́gwà nùb kù ə́ə̀ŋtèènɨ u̧, nɨ́m kù éínɨ ɗàà.

⁴Ŋgə́ ɨ́ tànà ŋgáb: ‹Nyí ɓwê gɨnáam ə́ré mo mwa̧á̧ ɗà mɨ a gòmɓà nyí gum hàráá.›

⁵Á ŋgáb ya gi mwa̧á̧ ku. Tá mwarí rè ɨ́ fó̧cùgwà mvii ŋgwéé ɓe mvii ɓɨ̀r, ɗà ŋgə́ ɨ́ ndɨ̀ŋ nɨ́m mwi̧ kɨ́.

⁶Péín mvii lɨ́tɔ̧né, ŋgə́ ɨ́ fó̧cùgwàhè, ŋgə́ ɨ́ kwà nùb kù lúu ə́ə̀ŋtèènɨ. Ŋgə́ ɨ́ fɔ̂ ŋgáb: ‹Àm níì á cè nyí sé hò̧ píì, nyí ə́r kù éíwa?›

⁷Ŋgáb ɨ́ pììnà ŋgə́: ‹Àm nò kù du nɨ́m ə́r nàwáá á›, Ŋgə́ ɨ́ tànà ŋgáb: ‹Gɨ̀náɓwê mo mwa̧á̧ ə́ré.›

⁸«Ɓwâ lɨ́tɔ̧ ya kerɨré, tá mwarí ɨ́ tànà nò gə́tɨna ŋgə́ mònéè: ‹Ɓéem nùb ə́ré ɗà wu a gòmnà ŋgáb mwèìn ŋgábè. Wu a yàréyàyè nùb kùb tɨ áré ə́ré cùrìì ya, ɗà wu a cáàŋgì ɓe nùb kùb tɨ áá tíí.›

⁹Nùb yaré ə́r péín mvii lɨ́tɔ̧né rè ɨ́ gò, ŋgáb ɨ́ gàm nɨ̀mwi̧ mwèìn ə́r mvii mwi̧í̧.

¹⁰Ɓwâ nùb kùb ya áré ə́ré tíí rè ya féínndé, ŋgáb ya lə́mne vúm ɓa gàmndóòŋnɨ mòné ví̧i̧ á; ɨ́dù kùb ɨ́ gòmɓwê ŋgáb nɨ̀mwi̧ mwèìn ə́r mvii mwi̧í̧.

¹¹Ɓwâ ŋgáb ya gam mwèìn kíì, ŋgáb ɨ́ ókɓà ɓáŋhîn ɓe tá mwarí.

¹²Ŋgáb a tace: ‹Nùb wu tɨ áré ə́ré cáŋhɨ̀rí, nùb kɨ́ ɓàcé nȩ̀ȩ́ éíwa, ɨ́dù wu njáabtɨ́ ŋgáb hàrák ɓe nɨ́m nùb tɨ jíhe píì mvii kàm ndè no ɓe yəré lâs, wu éínàniì!›

¹³Kí á tá mwarí piina nɨ̀mwi̧ mvókín ŋgábè, ŋgə́ ɨ́ tà: ‹Ɓwàjìrí moò, mɨ mɨ wu mbáàŋwá. Wu tɨ ə́əmhaá éínɨ ɓe ɨ́r gum ə́r mvii mwi̧í̧ ye?

¹⁴Gam mwèìn woò, wu a éíkî; mɨ á nànɨ nyíne nò tɨ ló ə́ré cùrì rè nɨ́m mwi̧.

¹⁵Mɨ ɓe nyòm mɨ ndɨŋ nɨ́m mɨ ɗúré ɓe mwèìn moò ɗàcɨ̀wá à, kèè wu ók wú ɓáŋhîn ɓe nyàŋnjɔ̧̀ moò á à?› »

¹⁶Yésù ɨ́ kpɔ̀ɔ̀régwà ɨnè: «Nùb du cùrì ɗàròò ɓa dùcùnɨ tíí á. Nùb duce tíí ɗàròò ɓacuce dùnɨ cùrì á.»

¹⁷Yésù yaá wúínɨ Yèrúsàlèèm. Ŋgáb gɨ̀sénɨ jȩ̀ȩ̀ á ŋgə́ ɓéhó̧ nɨ̀fuùb no cóóŋ ɨ́ bɨrɨ́b lè gɨ́ní, ɗà ŋgə́ ɨ́ tànà ŋgáb ɨnè:

¹⁸«Óknáye, nɨ́m wúíná ɗàrò Yèrúsàlèm á, yá kùb ɓa sə́rɨ̀kɨ́nànɨ nɨ̀gááŋ káàtàbì ɓe mvènnɨ́b nùb na satɨgàà Mwin Nɨ̀rì. Ŋgáb ɓa ŋgə́ ŋgùnnɨ, ŋgáb a tà kwíhɨ̀ ŋgə́ á.

¹⁹Ŋgáb a nàrê ŋgə́ nɨ̀gwííb du bɨ́ Jwîf séé ŋgáré. Nùb kɨ́ ɓa ŋgə́ kə́ə̀nɨ á, ŋgáb a jɨ̀m ŋgə́ ɓe lòré, ɗà ŋgáb a kpáàŋwû ŋgə́ bɨ̧̀ɨ̧́. Jíì taarɨ́bí, Mèín a tì sə̀ə̀mcùhô̧ ŋgə́.»

²⁰Kí á munɨ́b Sèbèdéè ɓe yà ɓóò ya gainso Yésù. Yà ɓó kɨ́ ɨ́ cáàmsê Yésùù tíí ɓwèìnɨ ŋgə́ ɓoré.

²¹Yésù ɨ́ fɔ̂ ŋgə́: «Ní á wu du ɗúnɨ?» Ŋgə́ ɨ́ pììnà ŋgə́: «Yée, ndɨŋ munɨ́b mo bɨrɨ́b lè dù nɨ̀mwi̧ wo ŋgáár lame, nɨ̀mwi̧ wo ŋgáár pène ɓwâ wu ɓa wúínɨ mvènnì.»

²²Yésù ɨ́ tàcùnà ŋgə́: «Nyí nɨ ɗə̀ə̀ŋwá nɨ́m nyí du ɓwèìnɨ kɨ́. Jábɨ́r mɨ ɓa pénɨ du hȩ tob yînɨ́mí rè, á sàmàìn nyí jíiɓwéeceré à?» Ŋgáb ɨ́ pìhè: «Á sàmàìn nɨ́m jíiɓwéeré.»

²³Á Yésù tacuna ŋgáb: «Nyí ɓahá mèìɓwênɨ tob kɨ́ á. Ɨ́dù kɨ́ ju ŋgáár lame kɨ́ kù ŋgáár pèneè, nɨ mɨ sé ɨ́ du nànɨ, ɓetí nɨ̀miib Tá moò ya nyaaŋkɨ́na mɨ̀yɨ́ kíì á bɨ ku.»

²⁴Ɓwâ nɨ̀fuùb cóóŋ ndè ya ók nyindí kíì, ŋgáb ɨ́ yàrê ŋgùùŋnɨ mwin yàá bɨrɨ́b lè.

²⁵Kí á Yésù ɓé ŋgáb lâs, ŋgə́ ɨ́ tà: «Nyí ɗəəŋtɨ́ nùb kùb du pénɨ hȩ mvènnɨ́b tií á kɨ́ɨ́nɨ ɓe ŋgɨ́ŋgɔ̧́ ŋgábè.

²⁶Ɨ́dù mvókín nyínè no, nɨ ɗúwa dùɓwê u̧. Ɓàcéyè nò ɗú dùnɨ jírií, dù nò ə́ré nyínè.

²⁷Nò ɗúce dùnɨ tíí dù mbɔ́ɔ́ nyínè.

²⁸U̧nè á Mwin Nɨ̀rì du nɨ́ gòwá àm kùb éína ŋgéé, ŋgə́ go nɨ kùb éínànɨ á. Ŋgə́ a kàìkɨ́ɓwê mè noò ɓe ɨ́r cénnèé nɨ̀vɨ́tɨ̀b ví̧ne.»

²⁹Ɓwâ Yésù ɓe nɨ̀fuùb noò yi du éíhó̧nɨ Yèríkòò, kùŋkùŋ kàm nɨ̀vɨ́tɨ̀bì ɨ́ yà tùnɨ Yésù.

³⁰Ɓùɓú̧ù̧b bɨrɨ́b kù ya du gín jɨ̀rì du̧né ɨ́ ô Yésù á ndóŋnɨ. Ŋgáb ɨ́ yà kɨ́ŋɓénɨ ɨnè: «Kéké, Nyȩ Dàvíìt, ók nɨ́m mwàm!»

³¹Nɨ̀vɨ́tɨ̀b ɨ́ yà ŋgáb páámɨ̀nɨ ŋgáb ɗèìn ɓɔ̧. Ɨ́dù ŋgáb ɨ́ yà bɨ́ kɨ́ŋndóŋɓàgɨ̀nɨ tíí tíí: «Kéké, Nyȩ Dàvíìt, ók nɨ́m mwàm!»

³²Kí á Yésù ə́ŋhȩ. Ŋgə́ ɨ́ ɓéwò ŋgáb, ɗà ŋgə́ ɨ́ fɔ̂ ŋgáb: «Nyí ɗúce mɨ ndɨ̀ŋnà nyí ní?»

³³Ŋgáb ɨ́ pììnà ŋgə́ ɨnè: «Kéké, ndɨŋ nɨ́m pə́cù íhín.»

³⁴Yésù ɨ́ ô ŋgáb mwàm, ɗà ŋgə́ ɨ́ dì̧nè íí ŋgábè. Ɓè mu̧u̧, íí nɨ̀ŋgwáàb bɨrɨ́b lèè ɨ́ kùmnè, ɗà ŋgáb ɨ́ tù Yésù.