Read Vute Màtíyò 22 Bible Online

Màtíyò 22 - Vute bible

Màtíyò 22

¹Yésù ɨ́ átɨ̀nàkwà nùb ya ókkom ŋgéé ɨnè:

²«Pə́náye nɨ́m fɨ́te ɓe Ŋgɔ̧́ɔ̧̀ Mèèín á ɨnè: Mvèìn jíri kù ya sitɨ́ cɔŋ jùrúb gùmní mwin nóò.

³Ŋgə́ ɨ́ tómsò nùb no ə́ré ɓétèèwònɨ nùb ŋgə́ tɨ ɓé cɔɔ̀ŋ, nùb kɨ́ ɨ́ dù bɨ́ ɗúwa gònɨ.

⁴Ŋgə́ ɨ́ tómgwà nùb no ə́ré kù; ŋgə́ ɨ́ tà: ‹Tananáam nùb mɨ tɨ ɓé kɨ́ ɨnè: Ndèìn ɓe nyèém foóm moò lâs á cɨ̀ kwíhɨ́b, cɔŋ móò á cɨ̀ ɗàrò ɓéin. Nɨ́ɨ́b lâs á cè nyaaŋkí̧i̧. Gonáam cɔŋ jùrúb gùmní tàŋnɨ!›

⁵Ɨ́dù nùb ŋgə́ ya ɓé kɨ́ ɨ́ dù bɨ́ àm kɨ́ ɓɔ̧ɔ̧ áréwa. Ŋgáb ɨ́ gì bɨ́ ə́rɨ́b ŋgábè éítèènɨ, nò gɨ mwa̧né kèè, nò gɨ mákə́tì noò ndɨ̀ŋséniì kèè.

⁶Nùb kù ɨ́ bɨ̀cê nùb ə́ré kɨ́, ŋgáb ɨ́ jóktè ŋgáb, ɗà ŋgáb ɨ́ kwíhè ŋgáb.

⁷Kí á mvèìn jíri rè ya ók njù̧. Ŋgə́ ɨ́ tómsò sójààb noò gɨ̀ kwíìkɨ́nɨ nùb tɨ éí ə́r kíì, ɗà ŋgáb a tòŋkɨ́gwà kwɨ́í ŋgábè kɨ́.

⁸Cùr kɨ́ no, ŋgə́ ɨ́ tànà nùb no ə́ré: ‹Cɔŋ jùrúb gùmní á rè, ɨ́dù nùb kùb tɨ ɓéworé tɨ bɨ fɨ́tîn ɓe cɔŋ kɨ́ ɗàà.

⁹Gɨ̀ná jìíb suklì lâs no, nyí a ɓétèèwò nò nyí kwaré lâs.›

¹⁰Nùb ə́ré rè ɨ́ gì jìíb kɨ́ no, ŋgáb ɨ́ ɓáàtèèwò nùb ŋgáb ya kwaré lâs, nùb ɓáŋhɨ́b ɓe nùb mɨ́nɨ́b cúk. U̧ á dúú jùrúbí ya yúk ɗéé ɓe nɨ̀vɨ́tɨ̀b.

¹¹Kí á mvèìn ndè lə́so góòmnɨ nùb kùb ya ɓéworé, ŋgə́ ɨ́ pê na nɨ̀ŋgwá kù á nɨ dùkɨ́nɨ júk jùrúb gùmní só ɗàà.

¹²Ŋgə́ ɨ́ fɔ̂ ŋgə́: ‹Ɓwàjìrí moò, wu lóce wú yó hò̧ júk jùrúb gùmní só ɗàà i̧?› Nɨ̀ŋgwá rè ɨ́ dù nɨ́ nɨ́m kù pììwá.

¹³Mvèìn jíri rè ɨ́ tana nùb ə́ré ɨnè: ‹Kwéínáam ŋgə́ ŋgárɨ̀b ɓe gurùb lâs, nyí a lèèhô̧ ŋgə́ lúu yá sɨ́mnɨ̀rí. Ku á ŋgə́ ɓa gbə̀knɨ kɨ́ɨ́ŋ ŋgə́ a ŋgáíce nyíín.›

¹⁴Yésù ɨ́ kpɔ̀ɔ̀régwà ɨnè: Kùb ɓétɨ́ nɨ̀vɨ́tɨ̀b ví̧i̧, ɨ́dù nùb kùb caré á bɨ ŋgób.»

¹⁵Kí á Fàrísààb ya gi kúllí, cànɨ i̧ á vúm fɨ́tɨ fɔ́nòòmhó̧nɨ Yésù àm ɓɔ̧ɔ̧ ɗà vúm a bì ŋgə́.

¹⁶Ŋgáb ɨ́ tómsò nɨ̀fuùb ŋgábè, ɓe nùb Hèrôdə̀ kpánéné kù gɨ̀ fɔ́nɨ Yésù ɨnè: «Tá tɔ̀hí, nɨ́m ɗəəŋtɨ́ wu á tànɨ àmɨrì. Ɓe àmɨɨr cúk, wu á tɔ̀ɔ̀nɨ ɗɨ́m juu Mèín ɗúré. Wu cè wú lùnɨ íí nò kù ɗàwá, ɓetí àm woò nɨ ɓe ju jíri nɨ̀vɨ́tèé ɗàà.

¹⁷Tanaye nɨ́m nɨ́m wu lə́mne ɓe nyindí rèè. Ɓíì nɨ́mè á tànɨ kùb gòmnà Sèsáàr, mvèìn kàm jíri làmpô kèè kùb gòmwá?»

¹⁸Ɨ́dù Yésù ya ɗəəŋtɨ́ nɨ́ mɨ̀lə́m ɓáŋhɨ́b ŋgáb ya du ɓe kíí, á ŋgə́ ya tana ŋgáb: «Mɨ̀yooɗíím ndè, nyí fɔ́noomhó̧ce nɨ́ mɨ àm ɓɔ̧ɔ̧ ɓe ní?

¹⁹Túumnaná mɨ mwèìn nyí du làmpô ɓe kí gòmnɨ kɨ́.» Ŋgáb ɨ́ túùmnà ŋgə́.

²⁰Yésù ɨ́ fɔ̂ ŋgáb: «Ɓɨ̀m du yá hò̧ ɓe ɨ́r du yá tɨín ndè, kɨ́ naà á?»

²¹Ŋgáb ɨ́ tà: «Kɨ́ Sèsáàr á.» Kí á Yésù tana ŋgáb: «Àhâ̧, nanáam Sèsáàr nɨ́m ók ɓe ŋgéé, nyí a nàhàcè nɨ́ Mèín nɨ́m ók ɓe Mèèín ye.»

²²Hȩ ŋgáb óknɨ pìí kíì, ŋgáb ɨ́ gbɨ̀ɨ̀ŋɓà bɨ́ cei. Ŋgáb ɨ́ mbɨ́kkɨ́sò ŋgə́ ɓè. Ŋgáb ɨ́ sìhè.

²³Ye mwi̧ kɨ́, Sàdúsààb ɨ́ gàìnsò Yésù. (Ŋgáb ɨ́ du tànɨ ɨnayânaá nɨ̀kwííb kwá bɨ sə̀ə̀mcùhô̧ ru). Ŋgáb ɨ́ fɔ̂ Yésù ɨnè:

²⁴«Tá tɔ̀hí, nɨ́m Mòyîs ya nyinndé á rè: ‹Nɨ̀ŋgwá kù ɨ́ kû ŋgə́ mwin fèìnwá, á ɗúnɨ mwin yàá noò ácù gwi kɨ́, ŋgə́ a fènnà nɨ̀kúr mwin.›

²⁵Mwin yàá bɨ kù yaá ku ŋgáb tɨ́ɓaám. Nò ŋgwéé ɨ́ kúmbɨ́kkɨ́sònà wɨ́í nóò gwi ŋgə́ mwin fèìnwá.

²⁶Nɨ́m mwi̧ kɨ́ ɨ́ féínnàɓwê nò bɨrɨ́bí, ɓe nò taarɨ́bí, há̧á̧ ŋgáb tɨ́ɓaám lâs.

²⁷Cùr kɨ́ no, nɨ̀gwi ɨ́ kútèrécáŋhȩ̀.

²⁸Ɓwâ nɨ̀kwííb kwá səəmcuhó̧ré, ŋgə́ ma kwá duhó̧bɨ́ɨŋ gwi naà, ɓetí ŋgáb tɨ́ɓaám lâs yi ɓuú ŋgə́!»

²⁹Yésù ɨ́ pììnà ŋgáb ɨnè: «Nyí mbáaŋɓa nɨ síí á, ɓetí nyí nɨ ɗə̀ə̀ŋwá nɨ́m du tɨín káàtà Mèèín noò, nyí nɨ ɗə̀ə̀ŋɓwêwá nyòm Mèín du ɓe kíí.

³⁰Kí du ɓwâ nɨ̀kwííb kwá səəmcuhó̧ cwéé, ɓùú gùmní kwá nɨ dùcɨ̀r. Nɨ̀ŋgwá ɓe nɨ̀gwi kwá ducɨ bɨ ɓɨllin hȩ dùgallɨb Mèèín.

³¹Duce kɨ́ sə̀ə̀mcùhô̧ cwéé nɨ̀kwíbí, nyí ya nɨ́ fàìnwá nyindí Mèín ya nyinndé à? Ŋgə́ ya taá ɨnè:

³²‹Mɨ Mèín Ábɨ̀ràhâm, Ìsâk ɓe Yákòb á.› » Á Yésù takwa: «Mèín nɨ Mèín nùb jááŋ á, ŋgə́ nɨ Mèín nɨ̀kwíbí sé.»

³³Vùùm nɨ̀vɨ́tɨ̀b ya ók tɔ̀ɔ́ ŋgéé kíì ɨ́ gbɨ̀ɨ̀ŋɓà bɨ́ cei.

³⁴Ɓwâ Fàrísààb ya ók Yésù ɗeintɨ́ Sàdúsààb ɓɔ̧ na, ŋgáb ɨ́ ɓáhè.

³⁵Nò kù mwi̧ mvókín ŋgábè no yi du nɨ̀gáŋ káàtàbì ɨ́ ɗû Yésù fɔ́nòòmhó̧nɨ àm ɓɔ̧ɔ̧, ŋgə́ ɨ́ fɔ̂ Yésù ɨnè:

³⁶«Tá tɔ̀hí, ɓíì jíri ndóŋ kɨ́b lâs á cè kɨ́ ŋge?»

³⁷Yésù ɨ́ pììnà ŋgə́ ɨnè: « ‹Á ɗúnɨ wu ɗú Kéké nò du Mèín wóò ɓe sum wóò lâs, ɓe mè wóò lâs, ɓe kɨ̀cáàb wóò lâs.›

³⁸Ɓíì jíri ndóŋ kɨ́b lâs á kí.

³⁹Kɨ́ bɨrɨ́bí duɓwée hȩ kɨ́ tíí á rè: ‹Á ɗúnɨ wu ɗú kùŋ ɓwà woò hȩ wu ɗú síí wu nɨ̀mɨ́rí.›

⁴⁰Ɓíì ya Mòyíìs ɓe tɔ̀ɔ́ tɨ́kɨ̀nɨ́b Mèèín lâs ɗoŋwo ɓíhɨ̀b bɨrɨ́b kɨ́ ya á.»

⁴¹Hȩ Fàrísààb ya du ɓáhɨ́nne, Yésù ɨ́ fɔ̂ ŋgáb ɨnè:

⁴²«Ní á nyí lə́əmce ɓe péín Mèsî? Ŋgə́ mwin náà á?» Ŋgáb ɨ́ pììnà ŋgə́: «Ŋgə́ mwin Dàvíìt yóò á.»

⁴³Yésù ɨ́ tànà ŋgáb: «I̧ á cè Dàvît, ɓe nyòm Nyéhè Sarɨ́nne ya fɨ́tɨkwa ŋgə́ ɓénɨ ‹Kéké›? Ɓetí ŋgə́ Dàvît kɨ́, ŋgə́ ya taá ɨnè:

⁴⁴‹Mèín nò du Kékéé ya tanaá Kéké móò ɨnè: Gom ŋgáŋnɨ mo ŋgáár lame, há̧á̧ hȩ mɨ ɓa ndɨ̀ŋnɨ wu ɗèìkɨ́ nùb wo ɓi̧ní.›

⁴⁵«Dàvît ɨ́ ɓê ŋgə́ ‹Kéké›, i̧ á cè ŋgə́ ɓa dùkwànɨ Nyȩ Dàvíìt?»

⁴⁶Nò kù mwi̧ yaám sàmàìn nacu ŋgə́ pìí kíì ɗàà. Yànɨ ye kɨ́, nò kù yi nɨ́ sàmàìn kəkgwa ŋgə́ fɔ́nɨ fɔ́ɔ́ ɗàcɨ̀wá.