Read Vute Màtíyò 26 Bible Online

Màtíyò 26 - Vute bible

Màtíyò 26

¹Ɓwâ Yésù ya cáŋhȩ tɔ̀hí, ŋgə́ ɨ́ tànà nɨ̀fuùb noò ɨnè:

²«Nyí ɗəəŋtɨ́ jùrúb Páskàà metɨ́ mwáín jíì bɨrɨ́b, kùb ɓa bìnɨ Mwin Nɨ̀rì àm kpáaŋwú ŋgə́ bɨ̧̀ɨ̧́ á.»

³Kí á mvènnɨ́b nùb na satɨgàà ɓe kɨ̀jííb ya ɓáhe Kàyíìf hamnin, Kàyîf kɨ́ yɨɨ́m nɨ̀gáŋ satɨgàà á,

⁴Ŋgáb ɨ́ lê kúúr ɨ́nayâna vúm bɨ̀ Yésù yoó ɗà vúm a kwíhè ŋgə́.

⁵Ŋgáb ɨ́ tà: «Nɨ ɗúwa nɨ́m bɨ̀ɗóòré ŋgə́ ɓwâ jùrúbí, duú u̧ ɗàà nɨ̀vɨ́tɨ̀b ɓa bɨ ə́tɨ̀wúnɨ ɓe nɨ́m á.»

⁶Yésù yaá Bètànî yɨ́ Sìmóòŋ, nɨ̀ŋgwá kù njɨ̀ɨ̀b noò yi sutɨré.

⁷Á nɨ̀gwi kù yi ŋgɨɨso gín Yésùù ɓe njɨ́b kù kùb nyaŋhɨ ɓe sɨɨ kùb ɓé àlbâtɨ̀rè rɨ ŋgáré, làmɨ́ndà kùb du gùnnɨ ɓe mòné ceí yaá no ɗéé; ŋgə́ ɨ́ sɨ̀ìwúnà Yésù ŋgwéé, Yésù á cè cɔɔ̀ŋ.

⁸Ɓwâ nɨ̀fuùb pə́ u̧nèé, ŋgáb ɨ́ ókɓà bɨ́ ɓáŋhîn cei, á ŋgáb ta: «Kúúŋ ɓáàŋ ŋge á rè!

⁹Tɨ á sàmàìn kùb sə́rɨ làmɨ́ndà kɨ́ mòné ví̧i̧, kùb a nà nùb tiri mwèìn kɨ́ ye!»

¹⁰Hȩ Yésù ɗəŋhȩ ɓè ŋgáb du nyìnnɨ u̧nèé, ŋgə́ ɨ́ tànà ŋgáb: «Nyí nacɨ nɨ̀gwi rè yəré ɓe ní? Nɨ́m ŋgə́ ndɨŋ ɓe mɨ kɨ́ á nyɔ̧ɔ̧́ cei.

¹¹Ɓetí nyíne nùb tiri kwá dulɨ́ŋ bɨ́ tɨ́k, ɨ́dù kɨ́ moò, nɨ́me nyí tɨ̀ nɨ ɓwâ lâs dù.

¹²Hȩ ŋgə́ sɨiwú làmɨ́ndà kɨ́ mo só rè, ŋgə́ ndɨŋ u̧ àm nyaaŋkɨ́na mɨ lêé sèrɨ̀nnè á.

¹³Mɨ tana nyí àmɨɨr wááŋ á: yɨ́ lâs kùb kwá ta Kìn Nyɔ̧ɔ̧́ ɗɔ̀ɔ́b lè noò, kùb kwá átɨ nɨ́m nɨ̀gwi rè ndɨŋ kɨ́, kùb a lə́əmcuce ŋgə́.»

¹⁴Nɨ̀mwi̧ kpáín nɨ̀fuùb cóóŋ ɨ́ bɨrɨ́b lè no, ɨ́r yi du Yúdàs Ìskàrìyôt lè ɨ́ gì pénɨ mvènnɨ́b nùb na satɨgàà,

¹⁵ŋgə́ ɨ́ fɔ̂ ŋgáb ɨnè: «Ní á nyí ɓa mɨ nànɨ ɓè mɨ gɔkkɨ́na nyí Yésùù?» Kí á ŋgáb fain sure mònéè vɨríí ɨ́ cóóŋ, ŋgáb ɨ́ nà ŋgə́.

¹⁶Yànɨ ɓwâ kɨ́, Yúdàs ɨ́ yà cábnɨ i̧ á ní fɨ́tɨ Yésù sə́rɨ̀kɨ́nɨ.

¹⁷Ye yàyɨ̀rí jùrúb kùb taŋ bɨ̀rê mvùùŋ no ɗàwáá á nɨ̀fuùb go fɔ́nɨ Yésù: «Ŋga á wu ɗú nɨ́m sìnà wu cɔŋ Páskà?»

¹⁸Yésù ɨ́ tànà ŋgáb: «Gɨnáam kwé yɨ́ nò kù, nyí a tànà ŋgə́: ‹Tá tɔ̀hí taá ɨnè: Ye móò sattɨ́, wo yó á mɨ du tàŋnɨ cɔŋ Páskàà nɨ́me nɨ̀fuùb moò.› »

¹⁹Nɨ̀fuùb ɨ́ ndɨ̀ŋhácè nɨ́m Yésù ya ta ŋgáb ndɨ̀ŋte. Ŋgáb ɨ́ sì cɔŋ Páskàà kɨ́.

²⁰Ɓwâ lɨ́tɔ̧ ya kerɨré, Yésù ɨ́ dùrê cɔɔ̀ŋ ɓe nɨ̀fuùb no cóóŋ ɨ́ bɨrɨ́b lè.

²¹Ŋgáb á cè cɔɔ̀ŋ, á Yésù ta: «Mɨ tanaɓa nyí àmɨɨr wááŋ á, nɨ̀vɨ́tè mwi̧ mvókín nyínè noò ɓa mɨ sə́rɨ̀nɨ á.»

²²Yəré ɨ́ bɨ̀ɓà nɨ́ nɨ̀fuùb ɓe nyindí kɨ́, kí á ŋgáb yaré ŋgə́ fɔ́nɨ tùré tùré ɨnè: «Kéké, nò kɨ́ ɓa nɨ dùnɨ mɨ kèè?»

²³Yésù ɨ́ pìhè: «Nò nɨ́me ŋgə́ tɨ həllə́ɓáhe kɨr mwi̧í̧ ɗàrɨ́ ɨ́ ɓa mɨ sə́rɨ̀nɨ ru.

²⁴Mwin Nɨ̀rì ɓa kúnɨ ɗóhîn ɓe nɨ́m káàtà Mèèín yi ta ɓe ɨ́r ŋgéé á; ɨ́dù jábɨ́r á ɓe nò ɓa sə́rɨ̀nɨ Mwin Nɨ̀rì kɨ́! Ɓe ɨ́r ŋgə́ ndɨ̀ŋ u̧nèé, kùb kè ya du bɨ́ ŋgə́ fèìnɓàcê!»

²⁵Yúdàs nò yi ɓa ŋgə́ sə́rɨ̀niì ɨ́ gàm nyindí, ŋgə́ ɨ́ fɔ̂: «Tá tɔ̀hí, nò kɨ́ ɓa nɨ dùnɨ mɨ kèè?» Yésù ɨ́ tà: «Á hȩ wu ta kɨ́.»

²⁶Hȩ ŋgáb ya du cɔɔ̀ŋ, Yésù ɨ́ â bɨ̀rê. Ŋgə́ ɨ́ sáktè Mèín, ŋgə́ ɨ́ kùm, ɗà ŋgə́ ɨ́ nà nɨ̀fuùb noò, ŋgə́ a tace: «Gamnáam nyí a tàŋ, nɨ́m ndè síí móò á.»

²⁷Cùr kɨ́ no, ŋgə́ ɨ́ â tob súmé, ŋgə́ ɨ́ sáktè Mèín, ŋgə́ ɨ́ nà ŋgáb ŋgə́ a tace: «Meináam nyí lâs,

²⁸ɓetí nɨ́m ndè tɨ́m moò á. Tɨ́m kɨ́ sú túùmnɨ jin nyàáŋ heé Mèín kwéí ɓe nɨ̀vɨ́tɨ̀b ví̧i̧, àm ákîí cum ŋgábè á.

²⁹Mɨ tanaɓa nyí wááŋ á: Yànɨ ɗàrò, mɨ tɨ̀ mɨ súm mèìcɨ̀r há̧á̧ hȩ nɨ́me nyí kwá meicu súm heé haam Tá moò no kwe.»

³⁰Ŋgáb ɨ́ sòŋ wààì ŋgáb kúmnɨ Mèín ɓe kíí. Cùr kɨ́ no, ŋgáb ɨ́ gì ɓe Òlìvíyéè ya wɨ́ínɨ.

³¹Kí á Yésù ya tana nɨ̀fuùb noò ɨnè: «Sɨ́mnɨ̀r mwánnè no, nyí lâs nyí ɓa mɨ lumbɨ́kkɨ́sònɨ á, ɓetí á tɨín káàtà Mèèín no ɨnè: ‹Mɨ ɓa kwíìkɨ́nɨ nò gə́tɨ jírɨ́bí á, ɗà jírɨ́b a njàkî lâs.›

³²Ɨ́dù, kɨ́ moò, ɓwâ mɨ ɓa sə̀ə̀mcùhó̧nɨ sèrɨ̀nnè, mɨ ɓa gìnɨ nyí móŋnɨ ɗɔ̀ɔ́b Gàlìléè no á.»

³³Píyéèr ɨ́ gàm nyindí, ŋgə́ ɨ́ tànà Yésù: «Nùb lâs tií lumbɨ́kkɨ́sogií wu, kɨ́ moò, mɨ tɨ̀ mɨ u̧ ndɨ̀ŋɓwêwá.»

³⁴Yésù ɨ́ tàcùnà ŋgə́: «Mɨ tanaɓa wu àmɨɨr wááŋ á; sɨ́mnɨ̀r mwánnè no ɓà, cein tíí gònɨ tóŋnɨ rɨ, wu tacií há̧á̧ gwì taarɨ́b ní mɨ ɗə̀ə̀ŋwá á.»

³⁵Píyéèr ɨ́ tànà ŋgə́: «Tàgɨ̀ nɨ́me wu kú cúk, sàmàìn mɨ tahó̧ɓa mo ɓɔ̧ɔ̧ mɨ wu ɗə̀ə̀ŋwáá ɗàà.» Á nɨ̀fuùb kù rè tàɓwê nɨ́m mwi̧ kɨ́.

³⁶Yésù ɓe nɨ̀fuùb noò ɨ́ féìn yɨ́ kùb du ɓénɨ Gètsémànè rɨ. Ŋgə́ ɨ́ tànà ŋgáb ɨnè: «Móŋkɨ́náye mɨ ɓè, mɨ gɨ̀sòyè péín ndɨ Mèín yóŋnɨ.»

³⁷Ŋgə́ ɨ́ gɨ̀ndôŋ ɓe Píyéèr ɨ́ munɨ́b Sèbèdéè bɨrɨ́b lâs. Yəré yíìnɨ́mí ɓe vùù ɨ́ yàrê ŋgə́ bìnɨ.

³⁸Ŋgə́ ɨ́ tànà ŋgáb: «Mɨ á ɓe yíìnɨ́m njɔ̧̀ hȩ mɨ ɓa kúnɨ; móŋkɨ́ná mɨ ɓè, nyí a dùɓwê jáŋ ɓe mɨ.»

³⁹Ŋgə́ ɨ́ gɨ̀sò tíí ŋgób, ŋgə́ ɨ́ gùsê ɗàá fúhîn, ŋgə́ ɨ́ yôŋ Mèín ɨnè: «Yée bɨ̀bá, ɓè tob yíìnɨ́mí rè tɨ fɨ́tɨye mɨ pèìnndóŋniì naa! Ɨ́dù nɨ́m kɨ́ nɨ hȩ mɨ ɗúré ndɨ̀ŋ, ndɨ̀ŋhá hȩ wu nɨ̀mɨr wu ɗúré.»

⁴⁰Kí á ŋgə́ cuwogi péín nɨ̀fuùb taarɨ́b lè. Ŋgə́ ɨ́ kwà nɨ́ ŋgáb wumí. Ŋgə́ ɨ́ fɔ̂ Píyéèr: «Kí du sàmàìn nyí duhó̧háce jáŋ ɓe mɨ mvókín ti ŋgób ɗàwá hàye?

⁴¹Dunáam jáŋ, nyí a yôŋ Mèín àm kɨhɨr tɨ̀ kwa nyínè. Njɔ̧̀ nɨ̀vɨ́tèé á ɗúnɨ ndɨ̀ŋnɨ nyɔ̧ɔ̧́, ɨ́dù síí nóò á nɨ ɓe mɨ̀góòsɨ́m.»

⁴²Ŋgə́ ɨ́ gɨ̀cùgwà kɨ́ gwì bɨrɨ́bí yóŋnɨ Mèín, ŋgə́ ɨ́ tà: «Yée bɨ̀bá, du nɨ́ sàmàìn tob yíìnɨ́mí rè ndóŋ nɨ́ mɨ ya u̧ ɗàwáá, nɨ́m wu ɗúré ndɨ̀ŋbɨ̂ŋtɨ!»

⁴³Ŋgə́ ɨ́ cùwò, ŋgə́ ɨ́ kwàcùhâ nɨ́ ŋgáb wumí, ya nɨ́ sàmàìn ŋgáb jíiɓa dùnɨ jááŋ ɗàà.

⁴⁴Yésù ɨ́ mbɨ́kkɨ́sògwà ŋgáb, ŋgə́ ɨ́ gɨ̀cùhâ Mèín yóŋnɨ kɨ́ gwì taarɨ́bí, ŋgə́ a tace nɨ́m mwi̧ kɨ́.

⁴⁵Á ŋgə́ gaincuwo nɨ̀fuùb noò, ŋgə́ ɨ́ tànà ŋgáb: «Nyí á háyè ùwèènɨ nyí a gwínce wum à? Pə́náye ɓwâ du ɗúnɨ kùb sə́rɨ̀sòkɨ́nà cɨcóòm Mwin Nɨ̀rì ŋgóobtɨ́.

⁴⁶Éíwúnáam còóm! Nɨ́m gɨ̀náa! Pə́náye, nò sə́rɨ mé féínwotɨ́!»

⁴⁷Yésù á cè nyìnkɨ́nɨ, á Yúdàs, nɨ̀mwi̧ kpáín nɨ̀fuùb cóóŋ ɨ́ bɨrɨ́b lè féínwo; ɓe kùŋkùŋ kàm nɨ̀vɨ́tɨ̀bì cùrì, jì̧í̧ ɓe ŋgɨ́ɨ̀ŋ ŋgáré ŋgáré. Mvènnɨ́b nùb na satɨgàà ɓe kɨ̀jííb ti̧né ya tómwo ŋgáb lu.

⁴⁸Yúdàs nò ya du sə́rɨ̀nɨ Yésùù ya takɨ́natɨ́ kúùŋ nɨ̀vɨ́tɨ̀bì nɨ́m ŋgə́ ɓa ndɨ̀ŋnɨ ɗà ŋgáb a ɗə̀ŋhȩ̀ Yésùù. Ŋgə́ yi taá ɨnè: «Nò nyí pə́ mɨ ɓa kùùkɨ́nɨ rɨ, nò nyí má kɨ́ á, bɨnáam ŋgə́.»

⁴⁹Ɓè mu̧u̧, Yúdàs ɨ́ ŋgɨ̀ɨ̀sò gín Yésùù, ɗà ŋgə́ ɨ́ tànà ŋgə́: «Tá tɔ̀hí, mɨ nyindií wu!» Ɗà ŋgə́ ɨ́ kùùkî Yésù.

⁵⁰Yésù ɨ́ tànà ŋgə́: «Ɓwàjìrí moò, nɨ́m wu go ndɨ̀ŋniì, ndɨŋkɨ́cɨm.» Á nùb kù rè ya ŋgɨɨso gín Yésùù, ŋgáb ɨ́ ɓáàrê ŋgə́ ya. Ŋgáb ɨ́ bì ŋgə́.

⁵¹Nò mwi̧ mvókín nùb ya du ɓe Yésùù ɨ́ ɗàmhô̧ jì̧í̧ nóò mbȩ́ȩ́, ŋgə́ ɨ́ téínkî nò ə́ré nɨ̀gáŋ satɨgàà tó.

⁵²Kí á Yésù ya tana ŋgə́ ɨnè: «Kɨ́kcurə́əm jì̧í̧ wóò mbȩ́ȩ́, ɓetí, nùb lâs kwíhe ɓe jì̧ní kwá ndukɓwéece ɓe jì̧í̧.

⁵³Wu ɗə̀ə̀ŋwá tɨ á nyòm mɨ ɓé Tá moò ŋgə́ kpɔ́k mɨ, ɗàrò mu̧u̧ ŋgə́ a tómwònàɓà mɨ kúùŋ dùgallɨbi noò cóóŋ ɨ́ bɨrɨ́b aŋhîn à?

⁵⁴Ɨ́dù mɨ ɨ́ ndɨ̀ŋ u̧, i̧ á nyindí du tɨín káàtà Mèèín noò ɓace fó̧nɨ hàrák? Ɓetí á tɨín ɨnayâna nɨ́m kɨ́ ndɨ̀ŋ u̧.»

⁵⁵Kí á Yésù tana nùb yi go ŋgə́ bìnɨ kɨ́ ɨnè: «Ɓe ɨ́r nyí bɨ̀ me, tɨ á nyí ɗúnàyènɨ jì̧í̧ ɓe ŋgɨ́ɨ̀ŋ hȩ kùb gɨce bìnɨ ŋgàyɨ́r à? Ye lâs mɨ yaá du̧ú̧ Dúú Jíri Mèèín no mɨ a tɔɔce, nyí mɨ bɨ̀wá.

⁵⁶Ɨ́dù, nɨ́m kɨ́ ndɨŋ u̧ àm nɨ́ɨ́b tɨ́kɨ̀nɨ́b Mèèín ya tɨnndé káàtà Mèèín noò a fô̧ hàráá á.» Ɓwâ kɨ́ á nɨ̀fuùb lâs ya lumbɨ́kkɨ́so Yésù.

⁵⁷Nùb ya bɨ Yésù rè ɨ́ gè ŋgə́ Kàyîf nɨ̀gáŋ satɨgàà tíí, yá nɨ̀gááŋ káàtàbì ɓe kɨ̀jííb ti̧né ya du ɓáhɨ́nne.

⁵⁸Píyéèr ɨ́ yà tùsònɨ Yésù ŋgə́ a ə́əŋsoce cóo, há̧á̧ nɨ̀gáŋ satɨgàà hamnin. Ŋgə́ ɨ́ lə́sò ku. Ŋgə́ ɨ́ dùrê ɓe nùb ə́ré hamnin kwe, pénɨ nɨ́m ɓa ndóŋniì.

⁵⁹Mvènnɨ́b nùb na satɨgàà ɓe nùb ɓáhɨ́r ŋgwìn jírií lâs yaá máhánɨ nyindí kù vúm téínwú Yésù só ɗà vúm a kwíhè ŋgéé.

⁶⁰Ŋgáb ɨ́ dù bɨ́ nɨ́m kù kwàwá, dugɨ hȩ nùb kù ví̧i̧ ya ə́ŋhȩ mɨ̀nám kàŋnì Yésù ya kwe. Cáŋhɨ̀rí á nɨ̀ŋgwáàb bɨrɨ́b kù gogɨ ə́ə̀ŋnɨ.

⁶¹Ŋgáb ɨ́ tà: «Nɨ̀ŋgwá rè ya taá ɨnè: ‹Á sàmàìn mɨ ɓətɨkɨ́ Dúú Jíri Mèèín, mɨ a óŋcù jíì taarɨ́b.› »

⁶²Nɨ̀gáŋ satɨgàà ɨ́ éíwî còóm, ŋgə́ ɨ́ fɔ̂ Yésù ɨnè: «Wu wu wèìnɨ ɓɔ̧ ɗàwá à, àm nùb lè du wu só nyìnwúnɨ rè á cè i̧?»

⁶³Ɨ́dù Yésù ɨ́ dùɓà néín. Nɨ̀gáŋ satɨgàà ɨ́ tànàgwà ŋgə́: «Ɓe ɨ́r Mèèín nò du jááŋ, tanaɓaye nɨ́m wááŋ, Mèsî, Mwin Mèèín ndè hà wu á ye?»

⁶⁴Yésù ɨ́ pììnà ŋgə́ ɨnè: «Á hȩ wu ta kɨ́. Ɨ́dù mɨ tanaɓa nyí wááŋ á: yànɨ ɗàrò, nyí ɓa pénɨ Mwin Nɨ̀rì ŋgáŋnɨ Mèèín ŋgáár lame á; Mèín nò du ɓe nyòme ndóŋ nyòm lâs. Nyí a pə́kwà ŋgə́ sónɨ ɓàk kù no ɓɨllin.»

⁶⁵Kí á nɨ̀gáŋ satɨgàà ya amkɨ́ júk nó sóò,[7] ɗà ŋgə́ ɨ́ tà: «Ŋgə́ nyinɓáaŋha nɨ́ Mèèín só rè ye! Nɨ́m ma mándóŋkwacɨ mɨ̀námé ɓe ní! Nyí nɨ̀miib nyí ókhaá hȩ ŋgə́ ɗóhe síí ɓe Mèín ye!

⁶⁶Nyí lə́əmce ɨna?» Ŋgáb ɨ́ pìhè: «Àm bií ŋgə́, á ɗúnɨ ŋgə́ kútɨ.»

⁶⁷Ɗà ŋgáb ɨ́ njéèwû ŋgə́ cwàá tíí, ŋgáb a womɨce ŋgə́; nùb kù ɨ́ láhè ŋgə́ ɓɔ̧ɔ̧.

⁶⁸Ŋgáb a tace: «Wu nò du Mèsî rè, tanam nɨ́m, mvókín nɨ́mè no na ɨ́ wom wu!»

⁶⁹Píyéèr yaá lúu du̧ú̧, hamnin ku. Nɨ̀gwi ə́ré nɨ̀gáŋ satɨgàà ɨ́ ŋgɨ̀ɨ̀sò gín nóò, ŋgə́ ɨ́ tà: «Wu rè, wu tɨ á ɓwê ɓe Yésù nò Gàlìléè.»

⁷⁰Ɨ́dù ŋgə́ ɨ́ càmɓà Yésù nɨ̀vɨ́tɨ̀bì tíí, ɗà ŋgə́ ɨ́ tà: «Mɨ mɨ ɗə̀ə̀ŋwá nɨ́m wu ɗú tànɨ kɨ́.»

⁷¹Ɗà ŋgə́ ɨ́ gàìncùgè ɓɔ̧ hamni. Nɨ̀gwi ə́ré kù ɨ́ pə́gwàhâ nɨ́ ŋgə́, ŋgə́ ɨ́ ɓê nùb ya du ɓèé, ŋgə́ ɨ́ tà: «Nɨ̀ŋgwá rè tɨ á ɓe Yésù nò Nàsàréèt.»

⁷²Píyéèr ɨ́ càmkwàhâ ŋgə́, ŋgə́ ɨ́ ta: «Ɓe ɨ́r Mèèín, mɨ nɨ̀ŋgwá kɨ́ ɗə̀ə̀ŋwá.»

⁷³Cùr kɨ́ no ŋgób, nùb ya du ɓèé ɨ́ ŋgɨ̀ɨ̀sò gín Píyéèr, ŋgáb ɨ́ tànà ŋgə́: «Á mè ɓà àmɨɨr, wu nò ŋgéé kpánéné á mè, nɨ́m ɗəəŋ wu kúu nyindíí woò ya á.»

⁷⁴Píyéèr ɨ́ tà: «Mèín káí mɨ, ɓè mɨ téín kàŋnì. Ɓe tàá àmɨrìí, mɨ mɨ nɨ̀ŋgwá kɨ́ ɗə̀ə̀ŋwá!» Ɓè mu̧u̧, cene ɨ́ tôŋ.

⁷⁵Á Píyéèr lə́əmcu nɨ́m Yésù tɨ tana ŋgə́ ɨnayâna: «Cein tíí gònɨ tóŋnɨ rɨ, wu tacií há̧á̧ gwì taarɨ́b ní mɨ ɗə̀ə̀ŋwá á» na rè. Ŋgə́ ɨ́ fô̧, ɗà ŋgə́ ɨ́ kɨ́íɓà nɨ́ cei.