Read Vute Màtíyò 27 Bible Online

Màtíyò 27 - Vute bible

Màtíyò 27

¹Yekɨ́rɨ̀b kɨ́rɨ̀b á mvènnɨ́b nùb na satɨgàà ɓe kɨ̀jííb ti̧né yi lə́ kúúr, ŋgáb ɨ́ bì ɓɔ̧, ŋgáb ɨ́ tà á ɗúnɨ vúm ndɨ̀ŋ kùb kwíì Yésù yáá.

²Á ŋgáb yi ndɨŋ kùb kwéí ŋgə́, ŋgáb ɨ́ gì ŋgə́ nàrénɨ Pìlât nò yi du gómnà yi go Róòm ŋgáré.

³Ɓwâ Yúdàs nò yi sə́re Yésùù yi pə́ kùb ténntɨ́ Yésù àm ŋgwéné á njɔ̧̀ yi lomgɨ ŋgə́; ŋgə́ ɨ́ gècùwònà mvènnɨ́b nùb na satɨgàà ɓe kɨ̀jííb ti̧né sure mònéè vɨríí ɨ́ cóóŋ ŋgáb yi na ŋgéé.

⁴Ŋgə́ ɨ́ tànà ŋgáb: «Mɨ tɨ comtɨ́ ɓe gɔ̀kkîí nò nɨ́m kù ɗə̀ə̀ŋwáré àm kùb kwíhe ŋgéé!» Ɨ́dù ŋgáb ɨ́ tànà ŋgə́ ɨnè: «Àm nɨ́mè nɨ no ku ɗàà, kí góomɓa nɨ wu á!»

⁵Kí á Yúdàs waakɨ́so mwèìn kɨ́ Dúú Jíri Mèèín* ɓè, ŋgə́ ɨ́ gì síí súŋkɨ́nɨ.

⁶Á mvènnɨ́b nùb na satɨgàà yi áre mwèìn kɨ́, ŋgáb ɨ́ tà: «Ɓíì Mòyíìs nɨ nɨ́m nàwá nyòm nɨ́m ɓáaré mwèìn kɨ́ kɨ́ Dúú Jíri Mèèín hò̧neè no, ɓetí kí du nɨ mwèìn tɨ́mé á.»

⁷Cùr ŋgáb yi lə́ kúúr ŋgáb ɨ́ dù ɓɔ̧ mwi̧í̧, á ŋgáb yi ɓwáí gùnnɨ mwai nɨ̀ŋgwá maá nuù kù ɓe mwèìn kɨ́, ndɨ̀ŋnɨ yɨ́ kɨ́ a dù nyàb nɨ̀gwíbí.

⁸Àm kɨ́ á há̧á̧ mwáín ɨ́r mwai kíì du: «Mwai tɨ́mé» ru.

⁹U̧ á nyindí Jèrèmíì tɨ́kìn Mèèín yi nyinndé yi fó̧gi hàrák, ŋgə́ yi taá ɨnè: «Ŋgáb yi áá sure mònéè vɨríí ɨ́ cóóŋ (yi du mwèìn nùb gbàŋ Ísràyéèl yi ɓwáí ŋgə́ gòmniì).

¹⁰Á ŋgáb yi gwɨi mwai nò maá nuù no, hȩ Kéké yi ta mɨ ndɨ̀ŋte.»

¹¹Kùb yi geé Yésù gómnàà tíí. Gómnà ɨ́ fɔ̂ ŋgə́ ɨnè: «Wu ɨ́ du mvèìn jíri Jwîf ɓoò ru à?» Yésù pìhè ɨnè: «Á hȩ wu ta kɨ́.»

¹²Cùr kɨ́ no, mvènnɨ́b nùb na satɨgàà ɓe kɨ̀jííb ti̧né yi tȩ́ȩwúú Yésù àám kàŋnì só, ɨ́dù ŋgə́ ɨ́ dù nɨ́ nɨ́m kù pììwá.

¹³Pìlât ɨ́ fɔ̂ ŋgə́: «Wu wu óknɨ àám ɓáŋhɨ́b ŋgáb du wu tȩ́ȩ̀wúnɨ só rè ɗàwá à?»

¹⁴Ɨ́dù Yésù ɨ́ mwèìndóŋɓàgɨ̀ ɓɔ̧, á gómnà yi gbɨɨŋɓagɨ cei.

¹⁵Ye jùrúb Páskàà lâs, gómnà yaá ɓe ɗɨ́m ŋgə́ áhó̧kɨ́ nɨ̀vɨ́tè mwi̧ nìrì, nò nɨ̀vɨ́tɨ̀b ɓollé.

¹⁶Ɓwâ kɨ́ nɨ̀ŋgwá wúmní kù ɨ́r yi du Yésù Bàrábàs yaácè nìrì ku.

¹⁷Á Pìlât fɔ́ nɨ̀vɨ́tɨ̀b ɨnè: «Na á nyí ɗú mɨ áhó̧nà nyí? Yésù Bàrábàs kèè, Yésù nò kùb ɓé Krístùù?»

¹⁸Ɓetí Pìlât yi ɗəəŋtɨ́ ŋgáb ya gɔksokɨ́na ní Yésù ɓe ɓɨ̀ndí á.

¹⁹Ɓwâ Pìlât yi du ŋgùnnɨ àm kíì, á gwi noò tómsona ŋgə́ pénè ɨnè: «Wu wu nɨ̀ŋgwá ɗàrɨ́ nɨ́m kù ndɨ̀ŋ, ŋgə́ nɨ nò ɗɨ́ɗɨ̧́ á. Mwáín mɨ̀sɨ́mnìín, mɨ péé jábɨ́r wuúm cei ɓe ɨ́r noò.»

²⁰Ɨ́dù mvènnɨ́b nùb na satɨgàà ɓe kɨ̀jííb yi sóoŋtɨ́ nɨ̀vɨ́tɨ̀b, ŋgáb ɓwèì kùb áhó̧nàbɨ̂ŋ vúm Bàrábàs, kùb a kwíìcè Yésù.

²¹Gómnà ɨ́ fɔ́cù ŋgáb ɨnè: «Tɨŋtɨ̀ŋ nùb bɨrɨ́b lè, na á nyí ɗú mɨ áhó̧nà nyí?» Á ŋgáb piina ŋgə́ ɨnè: «Áhó̧nàbɨ̂ŋ nɨ́m Bàrábàs!»

²²Ɓwâ ŋgáb yi ta u̧nèé, á Pìlât fɔ́kwa ŋgáb: «Yésù nò kùb ɓé Krístù rè, nyí ma ɗúce mɨ ndɨ̀ŋ ŋgə́ ní?» Ɓwâ kɨ́ á ŋgáb lâs, ŋgáb yi gbəmcu, ŋgáb ɨ́ tà: «Á ɗúnɨ kpáàŋwúkɨ́ ŋgə́ bɨ̧̀ɨ̧́!»

²³Pìlât ɨ́ fɔ́kwàhâ ŋgáb ɨnè: «Ɓáŋhîn ŋgə́ ndɨŋndé á cè ní?» Ɨ́dù ŋgáb ɨ́ gbə̀mdóŋɓàgɨ̀ tíí, ŋgáb a tace: «Á ɗúnɨ kpáàŋwúkɨ́ ŋgə́ bɨ̧̀ɨ̧́!»

²⁴Ɓwâ gómnà ya pə́ nɨ́m kù ní ndɨŋndóŋndé ɗàwá ɓetí nɨ̀vɨ́tɨ̀b á bɨ gbə̀mndóŋnɨ tíí tíí ŋgáb a tace nɨ́m mwi̧ kíì, á ŋgə́ á mvúm, ŋgə́ ɨ́ nàtɨ̀kî ŋgáár nɨ̀vɨ́tɨ̀bì tíí ɓè, ŋgə́ ɨ́ tà: «Àm cwá nɨ̀ŋgwá rèè nɨ mɨ góòmnɨ ɗàà, kí góomɓa nɨ nyí á!»

²⁵Á nɨ̀vɨ́tɨ̀b yi ta: «I̧i̧, cwá noò cùwú nɨ́me munɨ́b nɨ́mè lâs ŋgwéé!»

²⁶Kí á Pìlât yi áhó̧na ŋgáb Bàrábàs. Ŋgə́ ɨ́ ndɨ̀ŋ kùb jɨ̀m Yésù ɓe lòré. Ŋgə́ ɨ́ nàrê ŋgə́ sójàbì ŋgáré, ŋgáb gɨ̀ ŋgə́ kpáàŋwúnɨ bɨ̧̀ɨ̧́.

²⁷Sójààb ɨ́ gèndóŋndê Yésù kpáksɨ́ ŋgù̧ní no, ɗà sójààb lâs ɨ́ ɓáàkɨ̀rè ŋgə́.

²⁸Ŋgáb ɨ́ njèìkî júúb no sóò, ɗà ŋgáb ɨ́ lə́rə́nà ŋgə́ sàró jandîn kù.

²⁹Ŋgáb ɨ́ jɨ́bgì kàŋ mvènnì ɓe lúúŋ. Ŋgáb ɨ́ hàndɨ̀nà ŋgə́. Ŋgáb ɨ́ nàrê ŋgə́ túb ŋgáár lame. Ŋgáb ɨ́ cáàmségì ɗàá no tíí, ŋgáb a kə́əce ŋgə́ ɨnè: «Ɨna mvèìn jíri Jwíìf, wèìhá ɓɔ̧ kà!»

³⁰Ŋgáb yaá ŋgə́ cwàá só túùŋwúnɨ ŋgáb a ácuhó̧ce túb yi nó ŋgáré rè wòmcùsénɨ ŋgə́ ŋgwéé ɓe kí.

³¹Ɓwâ ŋgáb yi kə́əcáŋhȩ ŋgéé, á ŋgáb yi njeicukɨ́na ŋgə́ sàró yi ŋgéé só rè, ŋgáb ɨ́ lə́cùrénà ŋgə́ júúb noò. Ŋgáb ɨ́ gè ŋgə́ kpáàŋwúnɨ bɨ̧̀ɨ̧́.

³²Hȩ ŋgáb cáaŋhó̧ kúrì, á ŋgáb yi ɓain ɓe nò Sìrên kù ɨ́r yi du Sìmóòŋ. Ŋgáb ɨ́ kpɔ́hè nɨ̀ŋgwá kɨ́ hàìn bàŋ Yésùù.

³³Ɓwâ ŋgáb yi gi féínnɨ yɨ́ kùb yi du ɓénɨ Gòlgótà, kí ta «Yɨ́ tum ŋgwéé» na á.

³⁴Ŋgáb ɨ́ nà Yésù súm yi du yɨmnîn ɓe ŋgar njéin kù ɨ́r kɨ́ du fíyêl. Ɨ́dù ɓwâ ŋgə́ yi kək súm kíì, ŋgə́ ɨ́ mvû mènnɨ.

³⁵Ŋgáb ɨ́ kpáàŋwû ŋgə́ bɨ̧̀ɨ̧́, ɗà ŋgáb ɨ́ kàìkî júúb ŋgéé dùrí, nò ndóblé a â.

³⁶Kí á ŋgáb ya duré ɓè ŋgə́ dùmóŋnɨ.

³⁷Hȩ ŋgáb yi ɗú túùmnɨ nɨ́m yi ndɨŋ kùb kwíhɨ̀ ŋgéé, á ŋgáb tin bàŋ ŋgéé kɨ́ ya péín còmné ɨnè: «Nò rè Yésù mvèìn jíri Jwîf á.»

³⁸Kùb yi kpáaŋwúɓwéetɨ́ nùb ɓáŋhɨ́b bɨrɨ́b bɨ̧̀ɨ̧́, nɨ̀mwi̧ ŋgéé ŋgáár lame, nɨ̀mwi̧ cè ŋgéé ŋgáár pène.

³⁹Nùb yi du ndóŋnɨ ɓèé yaá ŋgə́ àndɨ̀nɨ, ŋgáb a mə̀ə̀ŋkî ŋgwé,

⁴⁰Ŋgáb a tace ɨnè: «Heé, wu nò tɨ ta ní á ɓə̀tɨ̀kɨ́nɨ Dúú Jíri Mèèín, ní á óŋcù jíì taarɨ́b na rè, ɓátɨm síí wu nɨ̀mɨrí ye, éísókɨ̂m bàŋ ndè ya, ɓè wu dumeɓa mwin Mèèín!»

⁴¹Mvènnɨ́b nùb na satɨgàà, ɓe nɨ̀gááŋ káàtàbì ɨ́ kɨ̀jííb yaá ŋgə́ kə́ə̀ɓwênɨ, ŋgáb a tace mvókín ŋgábè no ɨnè:

⁴²«Ŋgə́ ya ɓátɨɓaá nɨ̀vɨ́tɨ̀b, ŋgə́ ma dù nɨ́ ɓe nyòm ŋgə́ ɓátɨcuɓa síí ŋgə́ nɨ̀mɨrí ɗàwá ye. Ŋgə́ ɨ́ dumeɓahá mvèìn jíri Ísràyéèl ru à, ŋgə́ ma éísókɨ́ bàŋ ndè ya kà, nɨ́m a ə́ə̀mhàgì nɨ́ ŋgə́ ye!

⁴³Ŋgə́ yi səŋtɨ́ gíí ɓe Mèín, ŋgə́ ɨ́ tàɓà ní Mwin Mèèín á, ɗàrò nɨ́m pə́ná Mèín yè ɓa ŋgə́ ɓátɨ̀nɨ kè!»

⁴⁴Nùb bɨrɨ́b kùb yi kpáaŋwúɓwéhe bɨ̧̀ɨ̧́ gín ŋgéé rè yaá ɓwê ŋgə́ àndɨ̀nɨ nyèìn mwi̧ kɨ́.

⁴⁵Mɨ̀nɔ̂ɔ́m ɨ́ gù ti kɨ́ no bɨ̂ŋ yàrénɨ mvii ŋgwéé há̧á̧ ɨ́ gì féínnɨ mvii taarɨ́b lɨ́tɔ̧né.

⁴⁶Péín mvii taarɨ́b kɨ́ á Yésù ya kɨ́ŋ ɓe kúu còóm, ŋgə́ ɨ́ tà: «Èlî, Èlî, lama sábàktànî?» (Kí ta: «Mèín móò, Mèín móò, wu ákɨ́cɨ wu mɨ íí ya ɓe ní?» na á.)

⁴⁷Ɓwâ nùb kù yi du ɓèé yi ók ŋgə́ tànɨ u̧nèé, á ŋgáb ta: «Ŋgə́ á ɓénɨ Èlî nò du tɨ́kìn Mèèín!»

⁴⁸Ɓè mu̧u̧ á nɨ̀vɨ́tè mwi̧ ŋgábè tɨŋtɨ̧̀ɨ̧́ luge ánɨ tùú kù, ŋgə́ ɨ́ sɨ́ndê súm kù no, ŋgə́ ɨ́ tɨ́bwû ŋgɨ́ŋ kù ya, ŋgə́ ɨ́ sèìwúsònà Yésù ŋgə́ nyə́mhó̧ súm kɨ́.

⁴⁹Ɨ́dù nùb kù ɨ́ tà: «Móŋye, nɨ́m péyè Èlî yè ɓa gònɨ ŋgə́ ɓátɨ̀nɨ á kè!»

⁵⁰Ɓwâ kɨ́ á Yésù yi kɨ́ŋcukwa ɓe nyòme ɗà ŋgə́ ɨ́ kû.

⁵¹Fìí ŋgə́ cɔ̧́hó̧nɨ á sànjà júú jíri kùb yi súŋtéínkɨ́ Dúú Jíri Mèèín noò yi amndə́ tə̧ə̧́, yàsónɨ còóm há̧á̧ ɗàá. Ɗɔ̀ɔ́b yi jɨɨtɨ́ ɗà ɓéhɨ́b ɨ́ ká̧á̧nè.

⁵²Sèrɨ̀b yi kuumtɨ́, nɨ̀vɨ́tɨ̀b ví̧i̧ tɨŋtɨ̀ŋ nùb Mèèín yi kú kú̧ne yi səəmcutɨ́.

⁵³Nɨ̀kwííb yi fó̧cutɨ́ sèrìn. Cùr Yésù yi səəmcuhó̧ sèrɨ̀nnè á ŋgáb yi lə́ Yèrúsàlèm. Ku á nɨ̀vɨ́tɨ̀b ví̧i̧ yi pə́ ŋgáb.

⁵⁴Mvèìn sójàbì yi du nò Róòm ɓe sójààb yi du gə́tɨ̀nɨ Yésùù yi péé hȩ ɗɔ̀ɔ́b yi jɨɨré, dùgɨ̀ nɨ́m yi ndóŋndé lâs. Nɨ́m kɨ́ á ŋgáb yi ókɓagɨ vùù cei, ŋgáb ɨ́ tà: «Ŋgə́ tɨm mèɓà Mwin Mèèín á!»

⁵⁵Nɨ̀gub ví̧i̧ yaá ɓè. Ŋgáb ɨ́ ə́ə̀ŋsò cóo góòmsònɨ nɨ́ɨ́b yi du ndóŋniì. Ŋgáb yi tuwo Yésù yàwòó Gàlìlê àm ə́nna ŋgéé á.

⁵⁶Kpáín ŋgábè no, Màríyà nò Màkdàláà ɓe Màríyà yà Jâk ɓe Yòsə̂b yaá ɓè, ɨ́ gwi Sèbèdéè.

⁵⁷Ɓwâ lɨ́tɔ̧ ya kerɨré, á nɨ̀ŋgwá njɔdìì kù yi du nò Àrɨ̀màtéè yi féín, ɨ́r noò yaá Yòsə̂b. Ŋgə́ yɨɨ́mɓwê nɨ̀fuùb Yésùù á.

⁵⁸Ŋgə́ yi gií kwànɨ Pìlât, ɓwèìnɨ ŋgə́ fín Yésùù. Á Pìlât yi ta kùb nà ŋgə́ fín kɨ́.

⁵⁹Ŋgə́ ɨ́ hàìn fín. Ŋgə́ ɨ́ ɓòmndê ŋgə́ ndómbóó.

⁶⁰Ŋgə́ ɨ́ gì ŋgə́ kɨ́klénɨ sèè ŋgə́ nɨ̀mɨr ya ndɨŋ kùb ŋgə̀nnà ní ɓéhíì no. Ŋgə́ ɨ́ pɨ́ɨ̀ŋwò sɨɨ kàm kù, ɗèìnkɨ́nɨ ɓɔ̧ sèè kíì no, ŋgə́ ɨ́ gì nɨ́.

⁶¹Màríyà nò Màkdàláà ɓe Màríyà kù mwi̧í̧ yaá ɓè du̧ú̧ íí sèrìn.

⁶²Kpíí cùr cwá kíì, kí du ye Sàbáà na á, á mvènnɨ́b nùb na satɨgàà ɓe Fàrísààb yi ɓain ɓe Pìlât.

⁶³Ŋgáb ɨ́ tà: «Nɨ̀mɨr tií, nɨ́m lə́əmcutɨ́ tɨ́kàŋkɨ̧́ kɨ́ yi taá ɓwâ ŋgə́ yi duye jááŋ, ní ɓa kúnɨ á, gúnntɨ́ jíì taarɨ́b, ní a sə̀ə̀mcùhô̧ sèrìn.

⁶⁴Á ɗúnɨ wu ndɨ̀ŋ kùb gə́tɨ̀ sèè noò há̧á̧ gìnɨ féínnɨ jíì taarɨ́b, àm nɨ̀fuùb noò tɨ̀ go yínɨ fín nóò, ŋgáb a gò tànànɨ nùb ti̧né ɨnayâna Mèín səəmcuhó̧tɨ́ ŋgə́ mvókín nɨ̀kwíbí. Kààŋ ŋgáb ɓa kàŋnɨ cáŋhɨ̀rí kɨ́ ɓagɨ dùnɨ ɓí a ndôŋ kɨ́ tɨ tíí á.»

⁶⁵Kí á Pìlât yi tana ŋgáb: «Kɨ́ gə́tèé sèrì, sójààb á rè. Gɨnáam, nyí a ndɨ̀ŋ ŋgáb gə́tɨ̀ɓà sèè kɨ́ mîn hȩ nyí ɗúré.»

⁶⁶Á ŋgáb yi gɨgi, ŋgáb ɨ́ gì pə́nyààŋnɨ sèè, ŋgáb ɨ́ ɗèìnlə̀mkɨ́sò ɓe sɨɨ kɨ́ mîn, ɗà ŋgáb ɨ́ ɗòbkɨ́sògì sójààb kɨ́ ɓè.