Read Vute Màtíyò 28 Bible Online

Màtíyò 28 - Vute bible

Màtíyò 28

¹Kpíí cùr Sàbáà, ye sóndèè yekɨ́rɨ̀b, mvii fó̧nɨ á Màríyà nò Màkdàláà ɓe Màríyà kù mwi̧í̧ yi gi pénɨ sèè.

²Ɗɔ̀ɔ́b yi jɨɨɓaá ɓe nyòme. Dùgal Kékéé yi sówotɨ́ còóm, ŋgə́ ɨ́ pɨ́ɨ̀ŋhó̧kî sɨɨ gə́nȩ̀ȩ́ ɗà ŋgə́ ɨ́ dùrê ya.

³Síí nóò yaá sánnɨ njakɨ́kɨ́. Júúb noò yaácè mɨ̀vɨ́rì tóóm.

⁴Àm kɨ́ á vùù ya bɨɓa sójààb cei. Ŋgáb ɨ́ yà nɨ̀ɨ̀ŋnɨ, ŋgáb ɨ́ gùùsê ɗàá hȩ fɨ́nɨ́b rɨ u̧.

⁵Á dùgal lè tana nɨ̀gub lè ɨnè: «Nyí nɨ vùù ô. Mɨ ɗəəŋtɨ́ nyí má Yésù nò kùb tɨ kpáaŋwú bɨ̧̀ɨ̧́ rè á.

⁶Ŋgə́ nɨ hò̧ ɗàcɨ̀wá, ŋgə́ səəmcuhó̧tɨ́ nɨ́ hȩ ŋgə́ yi taré. Gonáam pénɨ yɨ́ kùb tɨ kɨ́k ŋgéé.

⁷Gɨkɔ́ɔnáam tànànɨ nɨ̀fuùb ŋgéé ɨnè: ‹ŋgə́ səəmcuhó̧tɨ́ nɨ́ mvókín nɨ̀kwíbí, ŋgə́ yatɨ́ nɨ́ gùr tíí gìnɨ Gàlìlê. Ku á nyí ɓa ŋgə́ kwànɨ ru.› Nɨ́m mɨ tɨ ɗú nyí tànàniì á kí.»

⁸Nɨ̀gub kɨ́ ɨ́ éíwòkɔ́ɔ̀ nyàbȩ́ȩ́ ku, vùù péín mwi̧, mɨ̀tù péín mwi̧. Ŋgáb ɨ́ lùgàìn nɨ̀fuùb Yésùù kìn kɨ́ tànànɨ.

⁹Ŋgáb pə́cì na Yésù ɓo tíí yɨ̀rààhó̧, ŋgə́ ɨ́ tànà ŋgáb: «Nyí jə́ə́b yàà!» Ɓwâ ŋgáb yi ók u̧nèé, á ŋgáb yi ŋgɨɨwo gín no síhé, ŋgáb ɨ́ cáàmsê ɗàá no tíí, ŋgáb ɨ́ bì ŋgə́ gurub ŋgə́ jə̀ŋnɨ, ŋgáb ɨ́ ɗôm ŋgə́.

¹⁰Kí á Yésù yi tanagi ŋgáb ɨnè: «Nyí nɨ vùù ô, gɨnáam tànànɨ mwin yàáb moò, ŋgáb gɨ̀ Gàlìlê, ku á nɨ́me ŋgáb ɓa ɓànnɨ.»

¹¹Ɓwâ nɨ̀gub kɨ́ yi duye gìnɨ jȩ̀nè, á nùb kù tɨŋtɨ̀ŋ nùb yi du sèè gə́tɨ̀niì yi gɨcu kwé, átɨ̀nànɨ mvènnɨ́b nùb na satɨgàà nɨ́ɨ́b tɨ ndóŋndé lâs.

¹²Kí á mvènnɨ́b nùb na satɨgàà ɓáhe ɓe kɨ̀jííb. Cùr ŋgáb yi lə́ kúúr, ŋgáb ɨ́ dù ɓɔ̧ mwi̧í̧ á ŋgáb luuŋna sójààb mòné.

¹³Ŋgáb ɨ́ tànà sójààb kɨ́ ɨnè: «Nyí a tì tà: Nɨ̀fuùb ŋgéé tɨ gotɨ́ bɨ́ mɨ̀sɨ́mnìín yínɨ fín ŋgéé nɨ́m á cè wum.

¹⁴Àm kɨ́ ɨ́ lê gómnàà tó̧ó̧, nɨ́m ɓa ɗə̀ə̀ŋnɨ hȩ nɨ́m ɓa nyí kààŋnɨ, jábɨ́r kù á dù nɨ́ nyí féínnàre á.»

¹⁵Kí á sójààb kɨ́ gam mwèìn kɨ́, ŋgáb ɨ́ ndɨ̀ŋ hàrák hȩ nɨ́m kùb tɨ ta ŋgáb ndɨ̀ŋte. U̧ á sà̧à̧ kɨ́ yi ahe mvókín Jwîf ɓoò, yànɨ ɓwâ kɨ́ há̧á̧ mwáín.

¹⁶Nɨ̀fuùb cóóŋ ɨ́ mwi̧ yi te rè ɨ́ gì Gàlìlê, ɓe Yésù ya túumsona ŋgábè ya.

¹⁷Ɓwâ ŋgáb yi pə́ ŋgéé, ŋgáb ɨ́ ɗôm ŋgə́, ɨ́dù nùb kù yaáháyè ɓe mɨ̀sə́ndɨ̀r.

¹⁸Yésù ɨ́ ŋgɨ̀ɨ̀résò ŋgáb no, ŋgə́ ɨ́ tànà ŋgáb ɨnè: «Mèín yi naá mɨ nyòme lâs ɓɨllin ɓe ɗɔ̀bín.

¹⁹Gɨ̀náhácɨ̀ yɨ́ nɨ̀vɨ́tɨ̀bì, gbàŋ ɗɔ̀bɨ́nné lâs no, nyí a sə̀tè ŋgáb nɨ̀fuùb moò, nyí a kɔ̀hè ŋgáb kɔ ə́mní ɓe ɨ́r Táà, ɓe Muní, ɓe Nyéhè Sarɨ́nne.

²⁰Tɔ̀ɔ̀nàná ŋgáb jə̧̀ə̧́ nɨ́ɨ́b lâs mɨ ya nyinna nyínè. Ɗəəŋnáɓam ɨnayâna mɨ tɨ̀ dulɨ́ŋ ɓe nyí tɨ́k há̧á̧ cáŋhȩ̀ ɗɔ̀bí.»