Read Vute Màtíyò 3 Bible Online

Màtíyò 3 - Vute bible

Màtíyò 3

¹Mvókín kù no á Jâŋ nò kɔhɨ kùb kɔ ə́mní ya féínwo, ŋgə́ ɨ́ yà ɓéènɨ àm Mèèín ŋgwàì ndɨ̀ŋnì ók ɓe Jùdéè no,

²ŋgə́ yaá tànɨ ɨnè: «Ɓandɨnáam sum, ɓetí Ŋgɔ̧́ɔ̧̀ Mèèín ŋgóobwotɨ́.»

³Nò Èsáyà, tɨ́kìn Mèèín ya nyinkom ɓe ɨ́r ŋgéé ɓwâ ŋgə́ ya ta: «Kúu nyindíí kù á kɨ́ŋɓéwònɨ ŋgwàì ndɨ̀ŋnì, a tace: Nyaaŋkɨ́náam jɨ̀r Kékéé, nyaaŋnáɓam jìíb ɗɨ́ɗɨ̧́!» Na rè, Jâŋ kɨ́ á.

⁴Júk Jáàŋ sóò yaá nyaŋhîn ɓe mvɨ̀tí ŋgɨ̀rɨ̀màà, lí ŋgù̧né noò yaá ɓe kwa; cɔŋ noò yaá mɨ̀nánè ɓe lamé.

⁵Nùb Yèrúsàlèèm ɓe nùb ti Jùdéè bɨ̂ŋ, ɓe nùb ya dukom gíngín mvúm kùb ɓé Jùrdə̧̂ lâs yaá ŋgə́ gáíwònɨ.

⁶Ŋgáb ya viikomɓa cum ŋgábè mɨ̀kùnín, Jâŋ a kɔɔce ŋgáb kɔ ə́mní mvúm Jùrdə̧̂ kɨ́ no.

⁷Ɨ́dù ɓwâ ŋgə́ yi pə́ Fàrísààb ɓe Sàdúsààb ví̧i̧ gáíwònɨ ŋgə́, ŋgə́ kɔ̀ɔ̀ vúm kɔ ə́mní na, ŋgə́ ɨ́ tànà ŋgáb ɨnè: «Nyí, kpáín nyó̧nɨ́bí rè, nò tana nyí nyí ɓa ɓáíhó̧nɨ ŋgwìn Mèèín ŋgóble rè noò ma na?

⁸Nyí ma dùhácɨ̀ ɓe ɗɨ́m nò ɓandɨ sumí du ɓe kíí kà.

⁹Nyí nɨ gíí sə̀ŋkɨ̂r nyí a tà: ‹Nɨ́m nɨ nyȩrɨ́b Àbɨ̀ràháàm yóò á.› Ɓetí mɨ tànàɓà nyí wááŋ, Mèín á ɓe nyòm ndɨŋ sɨɨ bɨ rè sèì nyȩrɨ́b Àbɨ̀ràháàm.

¹⁰Kùb ɓóobcií bɨ́ fár àm sárɨkɨ́ yɨ̀bí. Yɔ̀ lâs du gum nyɔ̧ɔ̧́ jáàbwáá, kùb ɓa ŋgə́ cə́bsékɨ́nɨ ɗàá á, kùb a tòŋkî ŋgə́.

¹¹Kɨ́ moò mɨ kɔɔ nyí kɔ ə́mní ɓe mvúm àm túmnɨ ɨnayâna nyí ɓandií sum na á, nɨ́m mwi̧, nò kù á mɨ tùwònɨ cùrì, ŋgə́ ɓa nyí kɔ̀ɔ̀nɨ ɓe Nyéhè Sarîn ɨ́ wa á. Ŋgə́ á nɨ tamnì ndóóŋ nɨ́ mɨ; mɨ ɓàcéyè mɨ ɗóhîn njèìkɨ́nànɨ ŋgə́ tə́b gure ɗàɓàwá.

¹²Ŋgə́ á ɓe tɨmwà nóò ŋgáré. Ŋgə́ ɓa fɨ́ínɨ mvéín á, ŋgə́ a kɨ́klê no kárȩ́ȩ́, ŋgə́ a tòŋkɨ́cè orɨ́b kɨ́ wa du lɨ́ɨ̀mnɨ lɨ́mîn ɗàwáá no.»

¹³Mvókín Kɨ́ no á Yésù éíwo ɗɔ̀ɔ́b Gàlìléè, gìnɨ swaàr Jùrdə̧́ə̧̀. Ŋgə́ ɨ́ féìn gín Jáàŋ, àm ŋgə́ kɔ̀ɔ̀ ní kɔ ə́mní.

¹⁴Jâŋ ɨ́ ɗû mvúnɨ, ŋgə́ ɨ́ tànà Yésù ɨnè: «Wu ɨ́ du nò fɨ́tɨ mɨ kɔ̀ɔ̀nɨ kɔ ə́mní ru, wu á gàìncùwòcì wú mɨ à!»

¹⁵Kí á Yésù tacuna ŋgə́: «Ə́mnɨm u̧ ɗàrò; ɓetí u̧nè á nɨ́ɨ́b lâs Mèín ɗúré ɓa fó̧nɨ hàrák.» Á Jâŋ ya ə́əmgɨ ŋgə́ kɔ̀ɔ̀nɨ.

¹⁶Jɔ̀ kùb kɔ̀ɔ̀cáàŋnɨ Yésù kɔ ə́mní, ŋgə́ ɨ́ fô̧ mvúúm. Ɓè mu̧u̧, ɓɨɨr ɨ́ nə̀tɨ̀nà ŋgə́; ŋgə́ ɨ́ pə́cì na Nyéhè Mèèín á sówònɨ ŋgə́ yá hȩ mbɨmbɨm ndɨ́ u̧.

¹⁷Á kúu kù nyinsówogɨ ɓɨllin, kúu kɨ́ ɨ́ tà ɨnè: «Nò rè mwin ɗûnɨ́mí moò mɨ caré á; mɨ̀tɔ̀k moò lâs á ŋgə́ ya.»