Read Vute Màtíyò 7 Bible Online

Màtíyò 7 - Vute bible

Màtíyò 7

¹«Wu wu nɨ̀vɨ́tè ŋgwìn, Mèín tɨ̀ ŋgwinɓwée nɨ́ wu.

²Ɓetí Mèín kwá ŋgwinɓwée wu hȩ wu ŋgwin kùŋ woò. Jɨ̀r wu téín kùŋ woò àm ŋgwéné, Mèín kwá téínɓwéece kɨ́ wo ŋgwéné u̧.

³Àm níì á wu pə́hó̧ɗóo wú kpárè úndií mwin yàá woò íhɨ́nné, wu cè wú kɨ́ɨ̀ŋ kàm wo íhín ndè pə́yàyèwá?

⁴I̧ á wu fɨ́tɨ tànànɨ mwin yàá woò: ‹gom mɨ ákɨ́nà wu kpárè úndií wo íhín ndè›, u̧ kɨ́ kɨ́ɨ̀ŋ kàm kù á wo íhín?

⁵Mɨ̀yooɗíím ndè, ákɨ́yaye kɨ́ɨ̀ŋ kàm wo íhín ndè, ɗà wu a pə́nyààŋɓàgì kpárè úndií ti wu ɓa ákɨ́nànɨ mwin yàá woò íhɨ́nné.

⁶«Nɨ́m lì du nɨ́ ɗúwa rɨ, wu wu ŋgə́ nàr, ŋgə́ tɨ̀ ɓandɨcuré nɨ́ wu no, àm ŋgə́ nóm wé. Wu wu sɨ̀ɨ̀ŋ njàrábì woò ŋgwèé bɨ tíí lèhɨ̀r, ŋgáb tɨ̀ ɗerɨɓáaŋkɨ́ bɨ́.»

⁷«Ɓweináam, kùb ɓa nyí nànɨ á; mánáam, nyí ɓa kwànɨ á; kutɨnáam ɓavɨ̀r, kùb ɓa nyí kùùmnanɨ á.

⁸Ɓetí, nò ɓollé kùb a nà ŋgə́. Nò máré a kwà; kùb á cè kùùmnànɨ nò kutɨré ɓavɨ̀rì.

⁹Hȩ nyí du ɗàrɨ́, na ɨ́ fɨ́tɨ nànɨ mwin nóò sɨɨ, ɓè ŋgə́ ɓwei bɨ̀réè?

¹⁰Kɨ́ kù na ɨ́ fɨ́tɨ nànɨ mwin nóò nyó̧ó̧, ɓè ŋgə́ ɓwei həréé?

¹¹Nyí nùb ɓáŋhɨ́b nyí ma ɗə̀ə̀ŋgɨ̀ nànɨ munɨ́b nyínè nɨ́ɨ́b du nyɔ̧né, ɗóògɨ̀ kɨ́ Tá nyínè du ɓɨllɨnne fɨ́tɨ nànɨ nùb ɓwei ŋgéé nɨ́ɨ́b nyɔ̧ɔ̧́ à?

¹²«Ndɨŋnanáɓwéem kùb nɨ́ɨ́b lâs nyí ɗú kùb ndɨ̀ŋnàcé nyínè, u̧nè á ɓíì Mòyíìs ɓe káàtààb tɨ́kɨ̀nɨ́b Mèèín du tànɨ.»

¹³«Lə́ndóŋnáam ɓavɨ̀r háŋnɨ́nne. Ɓetí ɓwâ ɓavɨ̀r du yánne, jɨ̀r gɨ yɨ́ nɨ̀r lɔ̧́ré á cè jíri, u̧nè á ɓwêcé nùb tu jɨ̀r kíì du ví̧i̧.

¹⁴Ɨ́dù ɓwâ ɓavɨ̀r du háŋnɨ́nne, jɨ̀r gɨ yɨ́ nɨ̀r ɓállé á cè yɔ́klîn, u̧nè á ɓwêcé nùb tu jɨ̀r kíì du ŋgób.»

¹⁵«Gə́tɨnáam ɓe tɨ́kɨ̀nɨ́b kàŋnì. Ŋgáb á nyí no lónɨ, só ma jíí, sumí ma màŋgù.

¹⁶Nyí tɨ̀ ɗəəŋcuɓa tɨ́kɨ̀nɨ́b kɨ́ ɓe nɨ́ɨ́b ŋgáb du ndɨ̀ŋniì. Kùb bɨ kòŋnɨ loob yɔ̀ ŋgamɨ́rí ya ɗàà. Kùb cè bɨ́ kòŋnɨ sáá ɗə̀b lúŋmbí ya ɗàà.

¹⁷Yɔ̀ nyɔ̧ɔ̧́ nahá nɨ́ gum nyɔ̧ɔ̧́; yɔ̀ ɓáŋhîn cè gum ɓáŋhîn.

¹⁸Yɔ̀ nyɔ̧ɔ̧́ sàmàìn na gum ɓáŋhîn ɗàà. Sàmàìn yɔ̀ ɓáŋhîn nace gum nyɔ̧ɔ̧́ ɗàà.

¹⁹Yɔ̀ lâs du gum nyɔ̧ɔ̧́ nàwáá, kùb a téínlèèrékî ŋgə́ wa̧á̧.

²⁰U̧nè á nyí ɓa ɗə̀ə̀ŋcùɓànɨ tɨ́kɨ̀nɨ́b kàŋnì kɨ́ ɓe nɨ́ɨ́b ŋgáb du ndɨ̀ŋniì.»

²¹«Nɨ nùb lâs taɗóo ɓe ɓɔ̧: ‹Kéké, Kéké› rɨ sé ɨ́ ɓa lénɨ Haam Mèèín no, jɔ̀sé nùb ndɨŋ nɨ́m Tá moò du ɓɨllɨnne ɗúré.

²²Ɓwâ ye ŋgù̧ní kɨ́ kwá sallé, nùb kù ví̧i̧ kwá tana mɨ ɨnè: ‹Kéké, Kéké, ɓe ɨ́r woò nɨ́m ya aaɓatɨ́ Kìn Mèèín. Ɓe ɨ́r woò nɨ́m ya juɓatɨ́ nɨ̀wàtɨ̀b nɨ̀vɨ́tɨ̀bì sóò. Ɓe ɨ́r woò nɨ́m ya ndɨŋɓatɨ́ nɨ́ɨ́b sɨ̀sɨ̀rí ví̧i̧!›

²³Ɓwâ kɨ́ á mɨ ɓa ŋgáb tànànɨ ɨnè: ‹Mɨ ya mɨ́ nyí ɗə̀ə̀ŋwá. Éíkɨ́ná mɨ íhín, nyí nùb ya ndɨŋkom nɨ́ɨ́b ɓáŋhɨ́bí!› »

²⁴«U̧nè á nò lâs ókɓa nyindí mɨ ta kɨ́, ɗà nò kɨ́ ɨ́ ndɨ̀ŋcè nɨ́ɨ́b kíì, nò kɨ́ á fɨ́tîn ɓe nò kɨ̀cáblì kù ya óŋsé dúú nóò ɓéhí.

²⁵Nà̧á̧ ya natɨ́, ɗà mvúm ɨ́ yûk, kəŋmbə́r ɨ́ fùɓà cei, ɨ́dù dúú kɨ́ ɨ́ dù nɨ́ mùŋwá, ɓetí kùb ya cɨ́ɨmsé bɨ́ ŋgə́ ɓéhí á.

²⁶Ɨ́dù nò lâs ókɓa nyindí mɨ ta kɨ́, ɗà nò kɨ́ ɨ́ dùcè ndɨ̀ŋwá nɨ́ɨ́b kíì, nò kɨ́ á fɨ́tîn ɓe nɨ̀yɨɨ̀ŋ kù ya óŋ dúú nóò saséé rɨ u̧.

²⁷Nà̧á̧ ya natɨ́, ɗà mvúm ɨ́ yûk, kəŋmbə́r ɨ́ fùɓà cei, dúú kɨ́ ɨ́ mùŋ, ɗà ɨ́ ɓə̀tɨ̀kɨ́ɓà lâs.»

²⁸Ɓwâ Yésù ya nacáŋhȩ ŋgáb sóóŋ kíì, nɨ̀vɨ́tɨ̀b ɨ́ gbɨ̀ɨ̀ŋɓà mɨ̀kúúŋ tɔ̀ɔ́ ŋgéé kíì,

²⁹ɓetí ŋgə́ ya nɨ́ tɔ̀ɔ̀nɨ hȩ nɨ̀gááŋ káàtàbì ɗàà; ŋgə́ yaá nɨ tɔ̀ɔ̀nɨ ɓe sɨr Mèín yi naré ŋgə́ sóò.