Read Vute Màtíyò 8 Bible Online

Màtíyò 8 - Vute bible

Màtíyò 8

¹Ɓwâ Yésù ya sócu ɓeè, kùŋkùŋ nɨ̀vɨ́tɨ̀bì ɨ́ tù ŋgə́.

²Kí á njɨ̀njə́ kù gainwo Yésù, ŋgə́ ɨ́ gùcáàmsê ŋgéé ɓusiín, ŋgə́ ɨ́ yóŋɓà ŋgə́ ɨnè: «Kéké, ɓè wu tɨ ɗúɓayeré naa, wu á ɓà há ɓe nyòm wu cáaŋkɨ́na mɨ njɨ̀ɨ̀b mo rèè, mɨ a dùcù járkɨ́ták.»

³Kí á Yésù namne ŋgáár, ŋgə́ ɨ́ dì̧nè ŋgə́, ŋgə́ ɨ́ tà: «Mɨ ɗúmetɨ́ u̧, ducum járkɨ́ták!» Ɓè mu̧u̧, njɨ̀ɨ̀b nɨ̀ŋgwá rèè ɨ́ sùtè.

⁴Kí á Yésù tana ŋgə́: «Ókɓam mîn, wu nò kù àm kɨ́ tànàwá. Ɨ́dù, gɨm túùmnànɨ nò na satɨgàà hȩ wu duré. Ɓwâ kɨ́ wu a na satɨgà Mòyîs ya ta kùb nàte, àm nɨ̀vɨ́tɨ̀b lâs a ɗə̀ŋhȩ̀ yáb woò cɔ̧́tɨ́.»

⁵Ɓwâ Yésù ya féín Kàpèrnàwúùm, mvèìn sójàbì kù ɨ́ gàìnwò Yésù, ŋgə́ kpɔ́k ní yáá.

⁶Ŋgə́ ɨ́ tànà Yésù ɨnè: «Kéké, nò mo ə́ré, yə́b karɨséé ŋgə́ ɗàá, ŋgə́ á ɗàá ku gwíin ɓók ɓók.»

⁷Á Yésù tana ŋgə́: «Mɨ á gìnɨ ŋgə́ wáàŋnɨ.»

⁸Kí á mvèìn sójàbì kɨ́ yi ta ɨnè: «Kéké, mɨ mɨ ɓe nyòm mɨ ta wu lə́ mo yóò ɗàà, ɨ́dù nyinɗóhɨm nyindí mwi̧ ɗà nò mo ə́ré a ɓáì.

⁹Mɨ nɨ̀mɨr, nùb kɨ́k mé á ku; mɨ á ndóŋcé ɓe nùb mɨ kɨ́klé. Mɨ ɨ́ tànà nɨ̀mwi̧: ‹Gɨm!› ŋgə́ a gì; mɨ ɨ́ tànàcè nò kù: ‹Gom!› ŋgə́ a gò; mɨ ɨ́ tànà nò mo ə́ré: ‹Ndɨŋ nɨ́m ndè!› ŋgə́ a ndɨ̀ŋ.»

¹⁰Hȩ Yésù ya ók nyindí kíì, ŋgə́ ɨ́ dùkɨ́ɓà néín; ɗà ŋgə́ ɨ́ tànà nùb ya du ŋgə́ tùniì: «Mɨ tanaɓa nyí àmɨɨr wááŋ á, ti Ísràyéèl no, mɨ ə́ə́m kàm kù hȩ kɨ́ rè pə́kɨ́yèwá.

¹¹Mɨ tànà nyí, nɨ̀vɨ́tɨ̀b ví̧i̧ kwá go péín mvii fó̧ré ɓe péín mvii lə́ré tàŋɓáànɨ cɔŋ ɓe Àbɨ̀ràhâm, Ìsâk, ɨ́ Yákòb, Haam Mèèín no.

¹²Ɨ́dù, nùb yi ɓa óknɨ ɓe Haam Mèèín, kùb kwá njókhó̧ ŋgáb lúu yá sɨ́mnɨ̀rí, ɗà ŋgáb a yà kɨ́ínɨ, ŋgáb a ŋgáíce nyíín njù̧ú̧.»

¹³Ɓwâ kɨ́ á Yésù tanagi mvèìn sójàbì ɨnè: «Gɨcum wo yó, nɨ́m kɨ́ ndɨ̀ŋnà wu hȩ ə́ə́m wóò duceré!» Ɓwâ kɨ́ á nò ə́ré mvèìn sójàbì rè wáŋhȩ.

¹⁴Yésù ya gií Píyéèr yó, ŋgə́ ɨ́ kwà mɨgwìn Píyéèr kòó gwíin; cɨ̀mcɨ̀m yaá ŋgə́ ndɨ̀ŋnɨ.

¹⁵Ŋgə́ ɨ́ dì̧nè ŋgáár nɨ̀gwi rèè, ɗà cɨ̀mcɨ̀m kɨ́ ɨ́ cɔ̧̂. Nɨ̀gwi kɨ́ ɨ́ éíwî còóm, ɗà ŋgə́ ɨ́ yàcùrê ə́rɨ́b.

¹⁶Lɨ́tɔ̧ɔ̧́, ɓwâ mvii ya lə́ré, kùb ɨ́ gèwònà Yésù nɨ̀vɨ́tɨ̀b ví̧i̧ nɨ̀wàtɨ̀b ya njáaŋkɨ́ré. Yésù ɨ́ jùkî nyéhɨ̀b kɨ́ ɓe nyindí nó ɓɔ̧ne, ɗà ŋgə́ ɨ́ wáàŋkɨ́ɓwéhè nɨ̀yáàb lâs.

¹⁷Ŋgə́ ya ndɨŋ nɨ́m kɨ́ àm nyindí Èsáyà tɨ́kìn Mèèín ya nyinndé a fô̧ hàráá á. Ŋgə́ ya taá ɨnè: «Ŋgə́ ákíí ŋgɨŋgəmné nɨ́mè sóò, ɗà ŋgə́ ɨ́ cìhè yáàb nɨ́mè.»

¹⁸Hȩ Yésù ya pə́ kùŋkùŋ nɨ̀vɨ́tɨ̀bì ŋgə́ kɨ̀rɨ̀niì, á ŋgə́ tana nɨ̀fuùb noò vúm pè bɨ ɓáá cəə́r yáá.

¹⁹Kí á nɨ̀gáŋ káàtàbì kù ŋgɨɨwo gín nóò, ŋgə́ ɨ́ tànà ŋgə́: «Tá tɔ̀hí, mɨ á wu tùnɨ yɨ́ lâs wu ɓa gìniì.»

²⁰Yésù ɨ́ tàcùnà ŋgə́ ɨnè: «Gáŋgbòróóŋ á ɓe ŋgwɨi ŋgábè; gààì á cè bɨ́ ɓe óŋnɨ́b ŋgábè; ɨ́dù Mwin Nɨ̀rì nɨ ɓe yɨ́ ùhí ɗàà.»

²¹Nɨ̀fuùb no kù mwi̧ ɨ́ tà: «Tá, mbɨ́k mɨ gɨ̀yè tá moò vɨ́rɨ̀nɨ.»

²²Yésù ɨ́ tàcùnà ŋgə́: «Tùwòbɨ̂ŋ wu mɨ, kí nɨ ə́r wóò sé.»

²³Yésù ya léé kwáìn, nɨ̀fuùb noò ɨ́ háhè ŋgə́.

²⁴Tií na, kəŋmbə́r kàm kù ɨ́ yàrê lámwònɨ, mvúm ɨ́ yà fò̧rénɨ kwáìn, Yésù nɨ̀mɨr á cè nɨ́ wumí.

²⁵Nɨ̀fuùb noò ɨ́ ŋgɨ̀ɨ̀sò, ɗà ŋgáb ɨ́ sə̀mmè ŋgə́, ŋgáb ɨ́ tà: «Kéké, ɓátɨm nɨ́m, nɨ́m ɓa ndùknɨ á!»

²⁶Kí á Yésù fɔ́cu ŋgáb: «Àm níì á nyí du óknɨ vùù? Nùb ə́ə́m gó̧o̧ rè!» Á ŋgə́ éíwú còóm, ŋgə́ ɨ́ pâm kəŋmbə́r ɓe ɓáá rè, ɗà nɨ́ɨ́b lâs ɨ́ kèrè ɗóóŋ.

²⁷Nɨ̀vɨ́tɨ̀b yi gbɨɨŋɓatɨ́, ŋgáb a tace: «kúúŋ nò rèè mayè na? Nò kəŋmbə́r ɓe ɓáá duye bɨ́ jə̀ŋnɨ rè.»

²⁸Ɓwâ Yésù yi gɨ féínnɨ péín cəré, ɗɔ̀ɔ́b Gàdàráà no, á nɨ̀ŋgwáàb bɨrɨ́b yi du ɓe nɨ̀wàtɨ̀b sóò fó̧wo nyàbȩ́ȩ́, ŋgáb ɨ́ gàìnwò Yésù. Ŋgáb yaáɓà nyȩ́ȩ. Yi nɨ́ sàmàìn nò kù ndóŋɓa péín kíì ɗàà.

²⁹Ŋgáb ɨ́ yàrê kɨ́ŋnɨ, ŋgáb a tace: «Nɨ́me náb yaye ní ya, Mwin Mèèín? Wu go hò̧ nɨ́m jábɨ̀nɨ ɓwâ ɗóòyèwá á à?»

³⁰Tíí sò ŋgób, kpáín ŋgwèéb kù yaá njwìntèènɨ ɗɔ̀ɔ́b, mánɨ nɨ́m ŋgáb taŋndé.

³¹Nɨ̀wàtɨ̀b ya nɨ̀ŋgwáàb lè sóò ɨ́ yà yóŋnɨ Yésù, ŋgáb a tace: «Óo wu ɗúú nɨ́m ŋgɨ́ínɨ, tómndésò nɨ́m kpáín ŋgwèéb lè no.»

³²Ŋgə́ ɨ́ tànà ŋgáb: «Éíkɨ́náam!» Ŋgáb ɨ́ éíkî, ɗà ŋgáb ɨ́ gì lénɨ ŋgwèéb lè só. Ŋgwèéb kɨ́ ɨ́ ndììsê lùú cɨ́ŋcɨ̧́ɨ̧́ ŋgáb a guuréndóŋce ɓárín; ŋgáb lâs ɨ́ tɨ̀m.

³³Nùb ya gə́tɨkom ŋgwèéb kíì ɨ́ lù, ŋgáb ɨ́ gì kwé átɨ̀sénɨ nɨ́ɨ́b tɨ ndóŋndé ɓe nɨ́ɨ́b tɨ féínna nɨ̀ŋgwáàb bɨrɨ́b ya du ɓe nɨ̀wàtɨ̀b só rèè.

³⁴Kí á nùb kwɨ́í kɨ́ noò lâs yi fó̧ gànnɨ Yésù. Ɓwâ ŋgáb yi pə́ ŋgéé, ŋgáb ɨ́ yôŋ ŋgə́, ŋgə́ éíhó̧kɨ́nɨ vúmè ɗɔ̀bín yáá.