Read Vute Màtíyò 9 Bible Online

Màtíyò 9 - Vute bible

Màtíyò 9

¹Yésù ya léé kwáìn, ŋgə́ ɨ́ pècù ɓáá cəə́r, gɨ̀cùnɨ no kwé.

²Kí á kùb hainwona ŋgə́ kɨ̀ɓók kù pàmnɨ̀rí gúndîn. Hȩ Yésù pénɨ ə́ə́m ŋgábè sumíì, ŋgə́ ɨ́ tànà kɨ̀ɓók lè: «Tamnɨm njɔ̧̀, mwin móò, cuum woò á tɨ́in!»

³Nɨ̀gááŋ káàtàbì kù ɨ́ yà lə́ə̀mnɨ ŋgábè sumí ɨnè: «Nɨ̀ŋgwá rè á nyìnɓáàŋnɨ ɓe ɨ́r Mèèín.»

⁴Hȩ Yésù yi ɗəŋhȩ nɨ́m ŋgáb yi du lə́ə̀mniì rèé, ŋgə́ ɨ́ fɔ̂ ŋgáb ɨnè: «Àm níì á nyí du ɓe mɨ̀lə́mkáín ɓáŋhɨ́b nyínè sumí?

⁵Kɨ́ ŋge ma ɨ́ dubɨ́ɨŋ kə́sə́k tànànɨ nɨ̀ŋgwá rè? ‹Cuum wóò á tɨ́in›, kèè ‹Éíwúum còóm ɗà wu a gì gùr›?

⁶Ɨ́dù, mɨ ɗú nyí ɗə̀ŋhɨ̀ ɨnayâna Mwin Nɨ̀rì á ɗàá hò̧ne ɓe nyòm ŋgə́ tɨ́í cumbi.» Á ŋgə́ tanagi kɨ̀ɓók lè: «Éíwúum còóm, áam pààm woò, gɨcum wo yó!»

⁷Nɨ̀ŋgwá rè ɨ́ éíwû còóm, ŋgə́ ɨ́ gì no yó.

⁸Hȩ nɨ̀vɨ́tɨ̀b pénɨ u̧nèé, vùù ɨ́ bɨ̀ɓà ŋgáb cei, ɗà ŋgáb ɨ́ mgbíhè Mèín nò na nɨ̀vɨ́tɨ̀b kúúŋ nyòm kíì.

⁹Éíndôŋ ɓèé, Yésù yaá ndóŋnɨ, ŋgə́ ɨ́ pê nɨ̀ŋgwá kù ɨ́r yi du Màtíyò, ɗàá du̧ú̧ yá kùb njáblɨ làmpóò, ŋgə́ ɨ́ tàndóŋnà ŋgə́: «Tuwom mɨ!» Màtíyò ɨ́ éíwû còóm, ŋgə́ ɨ́ tù Yésù.

¹⁰Cùr kɨ́ no, Yésù yaá cɔɔ̀ŋ Màtíyò yó. Nɨ̀fuùb noò ɓe nùb ɓáhɨ làmpóò ví̧i̧ ɨ́ nùb ɓáŋhɨ́b yaá tàŋɓwênɨ ɓe ŋgə́.

¹¹Ɓwâ Fàrísààb yi pə́ u̧nèé, ŋgáb ɨ́ fɔ̂ nɨ̀fuùb Yésùù ɨnè: «Àm níì á Tá tɔ̀hí nyínè du tàŋɓáànɨ cɔŋ ɓe nùb ɓáhe làmpóò ɨ́ nùb ɓáŋhɨ́b?»

¹²Yésù ɨ́ ôk nɨ́m ŋgáb yi ta kɨ́, kí á ŋgə́ tana ŋgáb: «Nùb du síí wááŋ bɨ tɨ́ŋgar gáínɨ ɗàà; nɨ̀yáàb ɨ́ du bɨ́ tɨ́ŋgar gáínɨ ru.

¹³Gɨnáam mánɨ njàb nɨ́m du tɨín káàtà Mèèín no ɨnè rè: ‹Mɨ ɗú mɨ́ nyàŋnjɔ̧̀ á, ɨ́ ndôŋ satɨgààb nyèèmí.› Ɓetí mɨ ya mɨ́ gòwá ɓénɨ nùb ɗɨ́ɗɨ̧́. Mɨ ya go mɨ ɓénɨ nùb ɓáŋhɨ́b á.»

¹⁴Nɨ̀fuùb Jâŋ nò kɔhɨ kùb kɔ ə́mní ɨ́ ŋgɨ̀ɨ̀wò gín Yésùù, ŋgáb ɨ́ fɔ̂ ŋgə́: «Àm níì á cè nɨ́me Fàrísààb du bɨ́ jɨ̀lɨ́ŋnɨ ɓɔ̧, kɨ́ nɨ̀fuùb woò ŋgáb cè bɨ́ jìnɨ ɗàwá?»

¹⁵Kí á Yésù piina ŋgáb, ŋgə́ ɨ́ tà: «Nyí lə́mne ye gùmní, ɓwâ nɨ̀ŋgwá gùmní du ɓe ɓwàjììb noò ŋgə́ tɨ ɓéworé, ɓwàjììb no kɨ́ a ô yeré ɓwâ ŋgə́ duye ɓe ŋgábè à? Ŋgáb bɨ sàmàìn óklé ɗàà. Ɨ́dù ye kù kwá sai, kùb a hàìnhó̧kî nɨ̀ŋgwá gùmní ŋgábè tɨŋtɨ̧̀ɨ̧́, ye kɨ́ á ŋgáb ɓa jɨ̀gɨ̀nɨ ɓɔ̧.

¹⁶«Kùb bɨ lààmnɨ júk fìn ɓe pɨ́cî júk hehí ɗàà, ɓetí óo kùb ndɨŋtɨ́ u̧, júk heé ɓa nɨ nyə́ə̀mcùnɨ á, ɗà ŋgə́ a àmyátɨ̀kî nɨ́ kɨ́ fìn.

¹⁷Kùb cè bɨ́ fòŋndénɨ súm heé sɨ̀ɓɨ̀ŋ fɨ̀nní ɗàà, ɓetí óo kùb ndɨŋtɨ́ u̧, sɨ̀ɓɨ̀ŋ ɓa nɨ ɔ̀knɨ á, súm a sékî ɗàá kùb a mə̀mɓwê sɨ̀ɓɨ̀ŋ. Ɗúhá nɨ́ kùb fòŋndé súm heé sɨ̀ɓɨ̀ŋ hehí á, ɓwâ kɨ́ kùb a bɨ̀jɨ́mnè nɨ́ɨ́b lâs mîn.»

¹⁸Yésù á cè ŋgáb nyìnkɨ́nànɨ nyindí kɨ́, á mvèìn Jwîf kù féínwo, ŋgə́ ɨ́ gùcáàmsê Yésùù tíí, ɗà ŋgə́ ɨ́ tà: «Mwin móò nɨ̀gwi kúú ɗàrò, ɨ́dù yée! Gom hèìwúnɨ ŋgə́ ŋgáár só, ŋgə́ a dùcù ɓe mè.»

¹⁹Kí á Yésù éíwú còóm ŋgə́ ɓe nɨ̀fuùb noò ɨ́ tùgè nɨ̀ŋgwá kɨ́.

²⁰Nɨ̀gwi kù ŋgáár ɓandîn ya meré só há̧á̧ dáín cóóŋ ɨ́ bɨrɨ́b, yi goó Yésùù cùrì, ŋgə́ ɨ́ dì̧nè tó júú ŋgéé.

²¹Ɓetí ŋgə́ yaá tàɓànɨ no njɔ̧̀ɔ̧ ɨnè: «Mɨ ɨ́ dì̧hó̧ɗóhè júk ŋgéé só rɨ, mɨ ɓa ɓáínɨ á».

²²Kí á Yésù ɓandɨcu cùrì, ŋgə́ ɨ́ pê nɨ̀gwi rè, á ŋgə́ ta: «Tamnɨm njɔ̧̀, mwin móò! Ə́ə́m wóò ɓátií wu.» Ɓè mu̧u̧ nɨ̀gwi kɨ́ ɨ́ wáŋnè.

²³Ɓwâ Yésù ya féín mvèìn kíì yóò, hȩ ŋgə́ pə́ mɨ̀wɔɔfín ɓe vùùm nɨ̀vɨ́tɨ̀b yi du síí lòmɨ̀tèènɨ ɓe kɨ́ŋnɨ́bí,

²⁴Ŋgə́ ɨ́ tà: «Fó̧náam lúu, ɓetí mutí nɨ̀gwi rè nɨ kúwa, ŋgə́ gwín nɨ́ wum á.» Ŋgáb ɨ́ yà ndɨ̀ŋnànɨ Yésù mɨ̀cə́ŋkáín ɓe nɨ́m ŋgə́ yi ta kɨ́.

²⁵Ɓwâ kùb yi kpɔ́ɔcáaŋhó̧ nɨ̀vɨ́tɨ̀b lúu lâs, Yésù ɨ́ lê lúmnìn, ŋgə́ ɨ́ ɗàmwû mutí, ɗà mutí ɨ́ éíwû còóm.

²⁶Á àm kɨ́ erɨ ɗɔ̀ɔ́b kɨ́ bɨ̂ŋ.

²⁷Yésù ɨ́ éíndôŋ ɓè. Ŋgə́ gɨ̀sénɨ, á ɓùɓú̧ù̧b bɨrɨ́b yaré ŋgə́ tùnɨ, ŋgáb a kɨ́ŋsonace ŋgə́ ɨnè: «Ók nɨ́m mwàm, Nyȩ Dàvíìt!»

²⁸Ɓwâ Yésù ya féín yóò, ɓùɓú̧ù̧b lè ɨ́ gàìnwò ŋgə́. Ŋgə́ ɨ́ fɔ̂ ŋgáb ɨnè: «Nyí ə́mnií mɨ á sàmàìn ndɨŋ u̧nèé à?» Á ŋgáb piina ŋgə́: «Nyɔ̀ɔ́m! Kéké.»

²⁹Kí á Yésù ya di̧ne ŋgáb íí ɗà ŋgə́ ɨ́ tà: «Nɨ́m kɨ́ ndɨ̀ŋnà nyí hȩ ə́ə́m nyínè ɗúré!»

³⁰Á íí ŋgábè kumne. Yésù ɨ́ kpɔ̀ɔ̀nàɓà ŋgáb, ŋgə́ ɨ́ tà: «Óknáɓam mîn, kpáb! Nò kù àm kɨ́ tíí ókndóŋwa.»

³¹Ɨ́dù ŋgáb ɨ́ gì bɨ́ ààtèèsénɨ àm Yésùù ɗɔ̀ɔ́b kɨ́ bɨ̂ŋ.

³²Ɓwâ ŋgáb ya du fó̧cùniì, kùb ɨ́ gèwònà Yésù nɨ̀ŋgwá kù. Nɨ̀ŋgwá kɨ́ yaá mùkà àm nɨ̀wàtɨ̀b ya du nó sóò.

³³Ɓwâ Yésù ya jukɨ́ nɨ̀wàtɨ̀b kíì, mùkà rè ɨ́ yàcùrê ɓɔ̧ wèìnɨ. Nɨ̀vɨ́tɨ̀b ɨ́ gbɨ̀ɨ̀ŋɓà bɨ́ cei, ŋgáb a tace: «Nɨ́m nɨ kúúŋ nɨ́m ndèè ɗɔ̀ɔ́b Ísràyéèl no péyèwá!»

³⁴Ɨ́dù kɨ́ Fàrísàbì, ŋgáb yaácè bɨ́ tànɨ ɨnè: «Mvèìn nɨ̀wàtɨ̀bì ɨ́ du ŋgə́ nànɨ nyòm ŋgə́ ŋgɨ́í nɨ̀wàtɨ̀b kíì ru!»

³⁵Yésù yaá ndóŋtèènɨ kwɨ́ì jííb ɓe kɨ́b mɨ̀tâín lâs no, ŋgə́ a tɔɔce àm Mèèín dúhɨ́b mɨ̀yú̧ú̧ ŋgábè no. Ŋgə́ a ɓéenace ŋgáb Kìn Nyɔ̧ɔ̧́ du ɓe ɨ́r Ŋgɔ̧́ɔ̧̀ Mèèín. Ŋgə́ a wáaŋce yáàb ɓe ɗíím lâs.

³⁶Mwàm ɨ́ bɨ̀ɓà ŋgə́ ɓe nɨ̀vɨ́tɨ̀b ŋgə́ ya pə́komndé, ɓetí njɔ̧̀ yi fettɨ́ ŋgáb. Ŋgáb yaá ɓà yeín cei hȩ jírɨ́b du ɓe nò gə́tɨ ŋgábè ɗàwáá rɨ u̧.

³⁷Kí á ŋgə́ tanagi nɨ̀fuùb noò: «Nàám á mwa̧á̧ cei, ɨ́dù nùb ə́ré cè bɨ́ ví̧i̧ ɗàà.

³⁸Yóŋnáam Tá mwarí, ŋgə́ tómwòkwà nùb ə́ré, ŋgáb gò nàám kɨ́ kárȩ́ȩ́ ɓáàrénɨ.»