Read Vute Máàrk 1 Bible Online

Máàrk 1 - Vute bible

Máàrk 1

¹Yààr Kìn Nyɔ̧ɔ̧́ Yésù Krístù Mwin Mèèín á rè.

²Èsáyà, tɨ́kìn Mèèín wáatɨ́ káàtà noò no ɨnayâna Mèín taá ɨnè: «Tɨ́kìn moò á mɨ tómso wo tíí ɗàrɨ́, ŋgə́ gɨ̀ wu njáínkɨ́nànɨ jɨ̀r.

³Ŋgwàì ndɨ̀ŋnì tə̧ə̧́, kúu nyindíí kù á kɨ́ŋɓéwònɨ ɨnè: Nyaaŋkɨ́náam jɨ̀r Kékéé, nyaaŋnáɓam jìíb ɗɨ́ɗɨ̧́!»

⁴Á Jâŋ ya féín ŋgwàì ndɨ̀ŋnì ku, ŋgə́ ɨ́ yà kɔ̀ɔ̀nɨ nɨ̀vɨ́tɨ̀b kɔ ə́mní, ŋgə́ a tanace ŋgáb ɨnè: «Ɓandɨnáam sum, nyí a ndɨ̀ŋ kùb kɔ̀ɔ̀ nyí kɔ ə́mní ɗà Mèín a tɨ́ínà nyí cuum nyínè.»

⁵Ɗà nɨ̀vɨ́tɨ̀b ví̧i̧ ɗɔ̀ɔ́b Jùdéè ɓe kwɨ́í Yèrúsàlèèm ɨ́ yà gáíwònɨ ŋgə́, ŋgáb ɨ́ yà vììnɨ cuum ŋgábè mɨ̀kùnín, Jâŋ a kɔɔce ŋgáb kɔ ə́mní mvúm kùb ɓé Jùrdə̧̂ no.

⁶Júk Jáàŋ sóò yaá nyaŋhîn ɓe mvɨ̀tí ŋgɨ̀rɨ̀màà, lí ŋgù̧né noò yaá ɓe kwa, cɔŋ noò yaá mɨ̀nánè ɓe lamé.

⁷Ŋgə́ ɨ́ yà tànànɨ nɨ̀vɨ́tɨ̀b ɨnè: «Nò kù ɓa mɨ tùwònɨ cùrì á, ŋgə́ á nɨ tamnì ndóóŋ nɨ́ mɨ; mɨ ɓàcéyè mɨ ɗóhîn njèìkɨ́nànɨ ŋgə́ tə́b gure ɗàɓàwá.

⁸Kɨ́ moò, mɨ tɨ kɔɔ nyí kɔ ə́mní ɓe mvúm á, ɨ́dù kɨ́ noò, ŋgə́ ɓa nyí kɔ̀ɔ̀nɨ ɓe Nyéhè Sarîn á.»

⁹Mvókín kɨ́ no Yésù ya éíwotɨ́ Nàsàrêt, ti Gàlìléè no, ŋgə́ ɨ́ gò kwànɨ Jâŋ; ɗà Jâŋ ɨ́ kɔ̀hè ŋgə́ kɔ ə́mní mvúm kùb ɓé Jùrdə̧̂ no.

¹⁰Hȩ Yésù ya du fó̧cùnɨ mvúmné, ɓɨɨr ɨ́ nə̀tè, Yésù pée na Nyéhè Sarîn á sówònɨ ŋgə́ ya hȩ mbɨmbɨm ndɨ́ u̧.

¹¹Ŋgə́ ɨ́ ô kúu kù tàsówònɨ còóm ɨnè: «Wu mwin ɗûnɨ́mí moò á, mɨ̀tɔ̀k moò lâs á wu ya.»

¹²Cùr kɨ́ no ɓè mu̧u̧ á Nyéhè yi ge ŋgə́ ŋgwàì ndɨ̀ŋnì.

¹³Ŋgə́ yi jə́btɨ́ ŋgwàrí ku jíì vii bɨrɨ́b, Sátàìn a kəhɨce ŋgə́. Ŋgə́ yaá dùtèènɨ mvókín nyèèmí. Nùb yi go ŋgə́ ə́r éínàniì á dùgallɨb Mèèín.

¹⁴Cùr kùb yi kɨ́klé Jâŋ dúú nìrì á Yésù gɨ ɗɔ̀ɔ́b Gàlìléè no, ŋgə́ ɨ́ yà ɓéènɨ Kìn Nyɔ̧ɔ̧́ Mèín yi tómworé.

¹⁵Ŋgə́ ɨ́ tà: «Jíìb ɗóotɨ́, ɓetí Ŋgɔ̧́ɔ̧̀ Mèèín ŋgóobtɨ́ ɓe nyí ɗàrò. Ɓandɨnáam sum, nyí a ə́mnè Kìn Nyɔ̧ɔ̧́ rè!»

¹⁶Hȩ Yésù ya du ɓàŋndóŋnɨ gín ɓáí Gàlìléè, ŋgə́ ɨ́ pê Sìmôŋ ɓe mwin yàá noò Àndɨ̀rê wàànɨ mvɨ́njá. Ŋgáb yaám nùb bɨ həréé á.

¹⁷Yésù ɨ́ tànà ŋgáb: «Tùná mɨ, mɨ á nyí nànɨ nyòm ɓáaró nɨ̀vɨ́tɨ̀b mo cùrì hȩ mvɨ́njá du ɓáànɨ həréé.»

¹⁸Ɓè mu̧u̧, ŋgáb ɨ́ mbɨ́kkɨ́sò mvɨ́njááb ŋgábè, ŋgáb ɨ́ tù Yésù.

¹⁹Yésù ɨ́ gɨ̀sòkwà tíí ŋgób, ŋgə́ ɨ́ pə́kwà Jâk ɓe wɨ́í nóò Jâŋ, munɨ́b Sèbèdéè ya duɓwéhe kwáí ŋgábè no mvɨ́njááb ɓoò nyààŋcùniì.

²⁰Ɓè mu̧u̧ Yésù ɨ́ ɓésò ŋgáb. Á ŋgáb ya mbɨ́kkɨ́so tá ɓoò ɓe nùb ŋgéé ə́ré kwáìn, ɗà ŋgáb ɨ́ tù Yésù.

²¹Yésù ɓe nɨ̀fuùb noò ya gií féínnɨ kúr kùb du ɓénɨ Kàpèrnàwûm no. Yaám ye Sàbáà á, ŋgə́ ɨ́ gì dúú mɨ̀yú̧ú̧ no tɔ̀hí.

²²Nùb yi du ɓèé ɨ́ gbɨ̀ɨ̀ŋɓà bɨ́ cei ónɨ tɔ̀ɔ́ ŋgéé kɨ́, ɓetí ŋgə́ ya nɨ́ tɔ̀ɔ̀nɨ hȩ nɨ̀gááŋ káàtàbì ɗàà, ɨ́dù tɔ̀ɔ́ ŋgéé yaá nɨ ɓe sɨr Mèín yi naré ŋgə́ sóò.

²³Tɨŋtɨ̀ŋ nɨ̀vɨ́tɨ̀b ya ɓáhe dúú mɨ̀yú̧ú̧ no óknɨ tɔ̀ɔ́ ŋgéé kíì, nɨ̀ŋgwá kù nɨ̀wàtɨ̀b ya njáaŋkɨ́ré ɨ́ kɨ́ŋhô̧.

²⁴«Nɨ́me nyí yaye ní ya, Yésù nò Nàsàréèt lè? Wu go wu nɨ́m ndùùkɨ́nɨ á à? Mɨ ɗəəŋɓatɨ́ wu mîn, wu du nò járkɨ́ták Mèín tómworé á!»

²⁵Yésù ɨ́ pâm nɨ̀wàtɨ̀b kɨ́, ŋgə́ ɨ́ tà: «Kí ɓè lók. Éíkɨ́ɓam nɨ̀ŋgwá rèè só!»

²⁶Nɨ̀wàtɨ̀b kɨ́ ɨ́ mgbɨ́ktɨ̀ɓà nɨ̀ŋgwá njáŋnîn ndè cei, ɗà ŋgə́ ɨ́ éíkî ŋgə́ yá ɓe kɨ́ɨ́ŋ kàm ɓɔ̧ɔ̧.

²⁷Nɨ̀vɨ́tɨ̀b ɨ́ gbɨ̀ɨ̀ŋɓà, ŋgáb ɨ́ yà fɔ́tèènɨ mvókín ŋgábè no ɨnè: «Kí ma cè ní? Tɔ̀ɔ́ heé ŋge á ŋgə́ du ɓéènɨ ɓe sɨr lè. Há̧á̧ ŋgə́ á pámɓàcéyènɨ nɨ̀wàtɨ̀b, ŋgáb a jə̀ŋ ŋgə́!»

²⁸Yàrénɨ ɓwâ kɨ́, ɨ́í Yésùù ɨ́ wûm ɗɔ̀ɔ́b Gàlìléè no ɓandȩ́ȩ nják.

²⁹Fô̧ ŋgábè dúú mɨ̀yú̧ú̧ kwe, Yésù, Jâk ɓe Jâŋ ɨ́ gì Sìmôŋ ɓe Àndɨ̀réè yó.

³⁰Mɨgwìn Sìmóòŋ yaá yó ku kò yə́bì ya, ŋgə́ yaá yábnɨ cɨ̀mcɨ̀m. Lə́sòó ŋgábè, ɓè mu̧u̧, kùb ɨ́ tànà Yésù àm yáb kíì.

³¹Yésù ɨ́ ŋgóòbsò gín kò nɨ̀yə́bìí, ŋgə́ ɨ́ ɗàmwû ŋgə́ còóm. Cɨ̀mcɨ̀m ŋgéé ɨ́ cɔ̧̂; nɨ̀yáb lè ɨ́ yàcùrê ə́rɨ́b.

³²Lɨ́tɔ̧ɔ̧́, ɓwâ mvii yi lə́ré, á ŋgáb ya du ŋgə́ gèwònànɨ nɨ̀yáàb ɓe nùb nɨ̀wàtɨ̀b ya njáaŋkɨ́ré.

³³Kúr bɨ̂ŋ ɨ́ ɓáhè ɓavɨ̀rì ku.

³⁴Yésù ɨ́ wáŋhȩ̀ vùùm nɨ̀yáàb mɨ̀kúúŋ mɨ̀kúúŋ ndè lâs, ŋgə́ ɨ́ jùkî nɨ̀wàtɨ̀b, ŋgə́ a kaaŋce ŋgáb wòré ɓɔ̧ɔ̧ àm ŋgáb du bɨ́ nùb ɗəŋhȩ ŋgéé.

³⁵Yesərì, Yésù ɨ́ ɗókhô̧. Ŋgə́ ɨ́ gì yá nɨ̀vɨ́tɨ̀b ya du ɗàwáá, Mèín yóŋnɨ.

³⁶Sìmôŋ ɓe ɓwàjììb noò ɨ́ yà ŋgə́ mánɨ.

³⁷Ɓwâ ŋgáb ya kwacu ŋgéé, ŋgáb ɨ́ tànà ŋgə́: «Nɨ̀vɨ́tɨ̀b lâs á wu mánɨ.»

³⁸Ɨ́dù Yésù ɨ́ tànà ŋgáb: «Nɨ́m gɨ̀ndóŋná kwɨ́ì tíí no, á ɗúnɨ mɨ ɓéèɓwê Kìn Nyɔ̧ɔ̧́ ku; ɓetí Mèín yi tómwo nɨ mɨ àm kíí á.»

³⁹Ŋgə́ ɨ́ yà gèrɨ̀nɨ ɗɔ̀ɔ́b Gàlìléè no lâs ŋgə́ a ɓéegece Kìn Nyɔ̧ɔ̧́ dúhɨ́b mɨ̀yú̧ú̧ no, ŋgə́ a ŋgɨ́íháce nɨ̀wàtɨ̀b nɨ̀vɨ́tɨ̀bì sóò.

⁴⁰Ye kù, nɨ̀ŋgwá njɨ̀njə́ kù ɨ́ gàìngè Yésù. Ŋgə́ ɨ́ gùcáàmsê Yésùù ɓusiín, ŋgə́ ɨ́ yóŋɓà ɨnè: «Ɓè wu tɨ ɗúɓayeré naa, wu á ɓàhá ɓe nyòm wu cáaŋkɨ́na mɨ njɨ̀ɨ̀b mo rèè, mɨ a dù járkɨ́ták.»

⁴¹Yésù ɨ́ ô nɨ̀ŋgwá kɨ́ mwàm: ŋgə́ ɨ́ dì̧nè ŋgə́, ɗà ŋgə́ ɨ́ tà: «Mɨ ɗúmetɨ́ u̧, ducum járkɨ́ták!»

⁴²Ɓè mu̧u̧, njɨ̀ɨ̀b nɨ̀ŋgwá rèè ɨ́ sùtè, ŋgə́ ɨ́ sàrè járkɨ́ták.

⁴³Yésù ɨ́ tànàɓà ŋgə́ ɓe nyòme, ŋgə́ ɨ́ tà:

⁴⁴«Kpáb, wu nò kù àm kɨ́ tànàwá. Ɨ́dù gɨm túùmnànɨ nò na satɨgàà hȩ wu duré. Ɓwâ kɨ́ wu a nà satɨgà Mòyîs yi ta kùb nàte, àm nɨ̀vɨ́tɨ̀b lâs a ɗə̀ŋhȩ̀ yáb woò cɔ̧́tɨ́.»

⁴⁵Dugɨ u̧, ɓwâ nɨ̀ŋgwá rè ya gɨré, nɨ̀ŋgwá kɨ́ ɨ́ yàrê àhèé àm kíì. Jɨ̀r Yésù gɨndóŋɓa kúr kù ya mvihɨnne ɨ́ yɔ̂ ŋgə́; ŋgə́ ɨ́ yà dùtèènɨ gə́nȩ̀ȩ́ gə́nȩ̀ȩ́ yɨ́ nɨ̀vɨ́tɨ̀b du ɗàwáá. Ɨ́dù nùb yá lâs yaá ŋgə́ gáínɨ.