Read Vute Máàrk 10 Bible Online

Máàrk 10 - Vute bible

Máàrk 10

¹Yésù ɨ́ éì ɓè, ŋgə́ ɨ́ gì ɗɔ̀ɔ́b Jùdéè, ŋgə́ ɨ́ pèndôŋ Jùrdə̧̂. Kùŋkùŋ nɨ̀vɨ́tɨ̀bì ɨ́ ɓáàkɨ̀rɨ̀cùgwà ŋgə́. Ŋgə́ ɨ́ yàrê ŋgáb tɔ̀ɔ̀nɨ hȩ ŋgə́ yi ndɨŋlɨ́ŋkomndé.

²Fàrísààb ɨ́ gàìnsò Yésù ŋgə́ kə̀hɨ̀nɨ, ŋgáb ɨ́ fɔ̂ ŋgə́ ɨnè: «Ɓíì á tànɨ nɨ̀ŋgwá ŋgɨ́í gwi noò à?»

³Yésù ɨ́ pììnà ŋgáb ɓe fɔ́ rè: «Mòyîs ya tɨnnaá nyí ɨna?»

⁴Ŋgáb ɨ́ pììnà ŋgə́ ɨnè: «Mòyîs ya naá nyòm nɨ̀ŋgwá ŋgɨ́í gwi noò, ɨ́dù ŋgə́ a tɨ̀nndê ŋgə́ káàtà gùúm cɔ̧́ré ŋgáré.»

⁵Yésù ɨ́ tàcùnà ŋgáb: «Yaám ɓe àm tamnjɔ̧̀ nyínè rèè á ŋgə́ ya nyin u̧ ru.

⁶Ɨ́dù yààr ɗɔ̀bí, ɓwâ Mèín ya nyaŋhȩ tií, ‹ŋgə́ ya nyaŋhi̧í̧ nɨ̀ŋgwá ɓe nɨ̀gwi›.

⁷Ɓe àm kɨ́ á ‹nɨ̀ŋgwá kwá mbɨ́k yà nóò ɓe tá noò, ŋgə́ a gì dùnɨ ɓe gwi noò

⁸ŋgáb a dùcì bɨ́ mwi̧.› Ɓè kɨ́ ŋgáb tɨ̀ bɨ bɨrɨ́b dùcɨ̀r, ŋgáb ɓa cɨ bɨ dùnɨ mwi̧ á.

⁹Àm kɨ́ á du: nɨ́m Mèín ɓanndé, nɨ̀vɨ́tè nɨ gɔ̀ɔ̀kɨ̂r.»

¹⁰Ɓwâ ŋgáb yi du yóò á nɨ̀fuùb noò fɔ́cugwahe ŋgə́ àm kɨ́,

¹¹ŋgə́ ɨ́ pììnà ŋgáb: «Nò ŋgɨ́íɓa gwi noò àm ŋgə́ ɓucu kɨ́ jií, ndɨŋtɨ́ mààŋ gwi yàyɨ̀rí kɨ́ tíí.

¹²Nɨ̀gwi ɨ́ mvúcê ŋgwáá noò àm ŋgə́ ɓucu kɨ́ jií, ŋgə́ ndɨŋtɨ́ mààŋ ŋgwáá yàyɨ̀rí kɨ́ tíí.»

¹³Kí á kùb gewona Yésù mucutɨ́b mɨ̀tâín, àm ŋgə́ dì̧nɨ̀ ŋgábè, ɨ́dù nɨ̀fuùb ɨ́ hàrè bɨ́ nùb kɨ́.

¹⁴Hȩ Yésù ya pə́ u̧nèé, ŋgə́ ɨ́ ókɓà njù̧, á ŋgə́ tana ŋgáb: «Mbɨ́knáam mucutɨ́b, ŋgáb gò yɨ́ moò, nyí ŋgáb hàrɨ̀wá, ɓetí Ŋgɔ̧́ɔ̧̀ Mèèín ók ɓe nùb fɨ́te ŋgábè á.

¹⁵Mɨ tana nyí àmɨɨr wááŋ á: nò du Ŋgɔ̧́ɔ̧̀ Mèèín* ə́ə̀mwá hȩ mutíí kwá nɨ Mèèín hamnin ku lə́ɓàr.»

¹⁶Á ŋgə́ yaré mucutɨ́b kùklɨ̀nɨ, ŋgə́ a heiwúce ŋgáb ŋgáár ŋgwéé, fàmnɨ ŋgáb.

¹⁷Hȩ Yésù ya ə́llé gùrí, á nɨ̀ŋgwá kù éíwo lùú, ŋgə́ ɨ́ gò cáàmsénɨ Yésùù tíí, ɗà ŋgə́ ɨ́ fɔ̂ Yésù: «Tá tɔ̀hí nyɔ̧ɔ̧́, ní á du ɗúnɨ mɨ ndɨ̀ŋtɨ, ɗà mɨ a kwà mè mɨ̀cɨ̧̀?»

¹⁸Kí á Yésù fɔ́ ŋgə́: «Àm níì á wu ɓéce mɨ nò nyɔ̧ɔ̧́? Nò kù nɨ nyɔ̧ɔ̧́ ɗàà, sé Mèín mwi̧.

¹⁹Wu ɗəəŋhaá ɓíhɨ̀b du tànɨ: ‹wu nɨ̀vɨ́tè kwíhɨ̀r, wu mààŋ ndɨ̀ŋ, wu yúk yɨ̂r, wu mɨ̀námé kum gè, wu kààŋ ndɨ̀ŋ, jə̀ŋ tá woò ɓe yà wóò› rɨ ye.»

²⁰Á nɨ̀ŋgwá rè ta: «Tá, mɨ ndɨŋtɨ́ nɨ́ɨ́b kɨ́ lâs, yàwû mó mutíí.»

²¹Yésù ɨ́ góòmkî ŋgə́ u̧u̧, nɨ̀ŋgwá rè ɨ́ nyàŋɓà ŋgə́ sumí, á ŋgə́ tana nɨ̀ŋgwá kɨ́ ɨnè: «Menatɨ́ wu nɨ́m mwi̧. Gɨm, sə́rɨkɨ́ɨm njɔdì woò lâs, wu a gɔ̀knà nùb tiri mwèìn kɨ́, ɗà wu a gò mɨ tùnɨ. Wu ɓa kwànɨ njɔdì ɓɨllin á.»

²²Hȩ nɨ̀ŋgwá rè ónɨ nyindí kíì, yəré ɨ́ bì ŋgə́. Ŋgə́ ɨ́ ə́llê nɨ́ gùrí tí kpáin, ɓetí ŋgə́ yaáɓà nɨ ɓe njɔdì cei.

²³Kí á Yésù ŋgerɨtee nɨ̀fuùb noò, ŋgə́ ɨ́ tànà ŋgáb: «Ɓa nɨ dùɓà nɨ ɓí ɓe nùb njɔdìì lénɨ Haam Mèèín no á yáà!»

²⁴Nɨ̀fuùb ɨ́ gbɨ̀ɨ̀ŋɓà bɨ́ àm kɨ́ cei, á Yésù tanakwa ŋgáb ɨnè: «Munɨ́b moò, lénɨ Mèèín Hamnin á náɓà nɨ ɓí yoo!

²⁵Á ɓí ŋgɨ̀rɨ̀mà ndóŋhó̧ mvì batallì no, ɨ́dù kɨ́ nò njɔdìì lə́ Haam Mèèín noò á ndóŋɓàgɨ̀ ɓí.»

²⁶Kí á nɨ̀fuùb Yésùù gbɨɨŋɓa bɨ́ àm kɨ́ cei, ŋgáb ɨ́ tà: «Na ma ɨ́ ɓa ɓáíhó̧bɨ̂ŋnɨ?»

²⁷Á Yésù góomkɨ́ ŋgáb u̧u̧, ŋgə́ ɨ́ tà: «Nɨ́m kɨ́ du nɨ yɔ́klîn péín nɨ̀vɨ́tɨ̀bì á. Kɨ́ Mèèín, nɨ́m yɔ́k ŋgéé nɨ ɗàà.»

²⁸Á Píyéèr tana Yésù ɨnè: «Kɨ́ nɨ́mè, nɨ́m ma tɨ mbɨ́ktɨ́ nɨ́ɨ́b nɨ́mè lâs àm nɨ́m tu wé.»

²⁹Yésù ɨ́ tàcùnà ŋgə́: «Mɨ tanaɓa nyí àmɨɨr wááŋ á: ɓe ɨ́r moò, ɓe àm Kìn Nyɔ̧né, nɨ̀vɨ́tè ɨ́ mbɨ́kkɨ́sò dúú nóò, mȩȩ́gwi̧nɨ́b, tɨ́ŋgwáhin bɨ noò, tá noò ɓe yà nóò kè, kɨ́ kù munɨ́b noò, dùgɨ̀ mwaai noò lâs,

³⁰jíìb mwánnè no, dúhɨ́b kɨ́, mȩȩ́gwi̧nɨ́b ɓe tɨ́ŋgwáhin bɨ kɨ́, yàáb ɓe munɨ́b ɓe mwaai kɨ́ lâs, nò kɨ́ ɓa kwàɓààrénɨ gwì təmərì á, ŋgə́ a pə́ɓwê jábɨ́r, ɗà cɨ́m yȩné ŋgə́ a tì kwà mè mɨ̀cɨ̧̀.

³¹Ɨ́dù nɨ̀vɨ́tɨ̀b ví̧i̧ du tíí ɗàròò, ɓa dùcùnɨ cùrì á. Nùb duce cùrì ɗàròò, ɓa cuce dùnɨ tíí á.»

³²Ŋgáb yaá jȩ̀ȩ̀, wúínɨ Yèrúsàlèm. Yésù yaá gìnɨ ŋgábè tíí, nɨ̀fuùb noò ɓe nùb yi tuso ŋgéé lâs yaá vùù kɨ́ vùù. Yésù ɨ́ ɓéhô̧ nɨ̀fuùb no cóóŋ ɨ́ bɨrɨ́b lè gɨ́ní, ŋgáb tànànɨ nɨ́m ɓa ŋgə́ féínnàniì.

³³Ŋgə́ ɨ́ tànà ŋgáb: «Pə́náye, nɨ́m wúíná Yèrúsàlèm á, yɨ́ kùb ɓa sə́rɨ̀kɨ́nànɨ nùb na satɨgàà ɓe nɨ̀gááŋ káàtàbì Mwin Nɨ̀rì. Ŋgáb ɓa ŋgə́ ŋgwìnnɨ, ŋgáb a nàrê ŋgə́ nɨ̀gwííb du bɨ́ Jwîf séé ŋgáré, ŋgáb kwíì ŋgə́ á.

³⁴Nùb kɨ́ ɓa ŋgə́ kə́ə̀nɨ á, ŋgáb a njéèwî ŋgə́ cwàá só, ŋgáb a jɨ̀m ŋgə́ ɓe lòré, ɗà ŋgáb a kwíhè ŋgə́. Jíì taarɨ́bí, Mèín a tì sə̀ə̀mcùhô̧ ŋgə́.»

³⁵Jâk ɓe Jâŋ munɨ́b Sèbèdéè, ɨ́ gàìnsò Yésù, ŋgáb ɨ́ tànà ŋgə́: «Tá, nɨ́m ɗúú wu ə́ə̀mnà nɨ́m ɓoré rè.»

³⁶Kí á ŋgə́ fɔ́ ŋgáb: «Nyí ɗúce mɨ ndɨ̀ŋnà nyí ní?»

³⁷Ŋgáb ɨ́ pììnà ŋgə́: «Ə́ə̀mnà nɨ́m, nɨ́m dù, nɨ̀mwi̧ wo ŋgáár lame, nɨ̀mwi̧ wo ŋgáár pène, ŋgɔ̧́ɔ̧̀ jíri wóò no.»

³⁸Yésù ɨ́ tàcùnà ŋgáb: «Nyí nɨ ɗə̀ə̀ŋwá nɨ́m nyí du ɓwèìniì. Jábɨ́r mɨ ɓa pénɨ du hȩ tob yînɨ́mí rè, á sàmàìn nyí jíiɓwéeceré à, kèè kɔ jábɨ́rí kùb ɓa mɨ kɔ̀ɔ̀nɨ rè, á sàmàìn nyí jíiɓwée kùb kɔ̀ɔ̀ nyínè à?»

³⁹Kí á ŋgáb piina ŋgə́ ɨnè: «Á sàmàìn nɨ́m jíiɓwéeré.» Á Yésù tacuna ŋgáb: «Nyí ɓahá mèìɓwênɨ tob kɨ́ á, nyí a jíìɓwê kɔ kɨ́.

⁴⁰Ɨ́dù kɨ́ ju ŋgáár lame ɓe ŋgáár pèneè, nɨ mɨ sé ɨ́ du nànɨ, ɓetí nùb kùb ya nyaaŋkɨ́na mɨ̀yɨ́ kíì á bɨ ku.»

⁴¹Ɓwâ nɨ̀fuùb cóóŋ ndè ya ók nyindí kíì, ŋgáb ɨ́ yàrê ŋgùùŋnɨ Jâk ɓe Jáàŋ,

⁴²á Yésù ɓé ŋgáb, ŋgə́ ɨ́ tànà ŋgáb ɨnè: «Nyí ɗəəŋtɨ́ nùb kùb du pénɨ hȩ mvènnɨ́b tií á kɨ́ɨ́nɨ ɓe ŋgɨ́ŋgɔ̧́ ŋgábè, nùb jííb á túmnè nyòme ŋgábè.

⁴³Ɨ́dù mvókín nyínè no, nɨ u̧ ɗàà. Ɓàcéyè nò ɗú dùnɨ jírií, dù nò ə́ré nyínè.

⁴⁴Nò ɗúce dùnɨ tíí dù mbɔ́ɔ́ nùb lâs.

⁴⁵Ɓetí Mwin Nɨ̀rì nɨ gòwá àm kùb éínà ŋgéé, ŋgə́ go nɨ kùb éínànɨ á, ŋgə́ a kàìkɨ́ɓwê mè noò ɓe ɨ́r cénnèé nɨ̀vɨ́tɨ̀b ví̧ne.»

⁴⁶Yésù ɓe nɨ̀fuùb noò ɨ́ kùŋkùŋ nɨ̀vɨ́tɨ̀bì ɨ́ féìn Yèríkò. Hȩ ŋgáb yi du kwé fó̧niì, nɨ̀ŋgwá ɓùɓú̧ kù yaá gín jɨ̀rì du̧ú̧ ju ɓoréé. Ɨ́r ŋgéé yaá Bàrtìmê, ŋgə́ yɨɨ́mcè mwin Tìméè á.

⁴⁷Hȩ ŋgə́ ya ók Yésù nò Nàsàréèt ɨ́ du ndóŋnɨ ru na, á ŋgə́ yaré kɨ́ŋnɨ ŋgə́ a tace: «Yésù, Nyȩ Dàvíìt, ók mɨ mwàm!»

⁴⁸Nɨ̀vɨ́tɨ̀b ví̧i̧ ɨ́ yà ŋgə́ páámɨ̀nɨ, ŋgə́ ɗèìn ɓɔ̧, ɨ́dù, ŋgə́ ɨ́ yà nɨ́ kɨ́ŋndóŋ ɓàgɨ̀nɨ tíí tíí: «Nyȩ Dàvíìt, ók mɨ mwàm!»

⁴⁹Kí á Yésù ə́ŋhȩ, ŋgə́ ɨ́ tà: «Ɓéwonáam ŋgə́.» Á ŋgáb ɓéwo nɨ̀ŋgwá rè, ŋgáb ɨ́ tànà ŋgə́: «Səŋ gíí, éíwúum còóm, ŋgə́ á wu ɓénɨ.»

⁵⁰Á nɨ̀ŋgwá rè leekɨ́so júk nóò, ŋgə́ ɨ́ sɨ́mwû lùgàìnnɨ Yésù.

⁵¹Á Yésù fɔ́ ŋgə́: «Wu ɗúce mɨ ndɨ̀ŋnà wu ní?» Nɨ̀ŋgwá rè ɨ́ tà: «Tá, ndɨŋ mɨ pə́cù íhín.»

⁵²Á Yésù tana ŋgə́: «Ə́ə́m wóò ɓátií wu, gɨ̀ wu.» Ɓè mu̧u̧ íí ŋgéé ɨ́ kùùmcù, ŋgə́ ɨ́ lê kpáín nɨ̀fubì no, tùɓwênɨ Yésù.