Read Vute Máàrk 12 Bible Online

Máàrk 12 - Vute bible

Máàrk 12

¹Kí á Yésù yi yaré ŋgáb nyìnnànɨ ɓe gɨ̀gàìn ɨnè: «Ŋɨ̀ŋgwá kù ya ɗȩȩtɨ́ mwai yɔ̀ gum na súmé, ŋgə́ ɨ́ màkɨ̀rè mwai kɨ́, ŋgə́ ɨ́ nyàŋhȩ̀ cɨ̀cè ɗáín súmé, ɗà ŋgə́ ɨ́ ôŋ sáré gààìbì. Ŋgə́ ɨ́ ɗòblékɨ́sò tɨ́ɗèìn bɨ mwai kɨ́ no. Ŋgə́ ɨ́ gì nɨ́ gùrí.

²Hȩ ɓwâ kò̧ó̧ gum kíì yi ɗóoré, ŋgə́ ɨ́ tómsò nò ə́ré no kù yɨ́ tɨ́ɗèìn bɨ kíì, ŋgáb nàwòcé ní kɨ́ ɗóhe ɓe níì yáá.

³Ɨ́dù tɨ́ɗèìn bɨ ɨ́ bì bɨ́ nò ə́ré no kɨ́, ŋgáb ɨ́ jɨ̀m ŋgə́, ŋgáb ɨ́ ŋgɨ́ícù ŋgə́ ŋgáár sam.

⁴Ŋgə́ ɨ́ tómsònàkwà ŋgáb nò no ə́ré ji, ŋgáb ɨ́ wòmɨ̀ɓwê nò kɨ́ ŋgwéé, ŋgáb a andɨce ŋgə́.

⁵Tá mwarí ɨ́ tómsònàkwàhâ ŋgáb nò kù, ŋgáb ɨ́ kwíìkî nò kɨ́. Ŋgáb ɨ́ ndɨ̀ŋɓwê nɨ́m mwi̧ kɨ́ ɓe nùb ə́ré ví̧i̧ kù, ŋgáb ɨ́ jɨ̀m nùb kù, ŋgáb ɨ́ kwíìcè nùb kù.

⁶Nò mwi̧ yi meré yaá mwin ɗûnɨ́mí noò. Ŋgə́ ɨ́ tómcáàŋsò nò kɨ́ ɓetí ŋgə́ yaá lə́ə̀mnɨ ɨnè: ‹Ŋgáb ɓa jə̀ŋnɨ mwin mó rè á.›

⁷Ɨ́dù tɨ́ɗèìn bɨ ɨ́ tà mvókín ŋgábè no: ‹Nò kwá me ɓe nɨ́ɨ́b kwíhɨ̀bì á ɗàrɨ́, Gonáam! Nɨ́m kwíìná ŋgə́, nɨ́ɨ́b kwíhɨ̀b kɨ́ a ô ɓe nɨ́m!›

⁸Kí á ŋgáb bɨkwíikɨ́ɓwéhe ŋgə́, ŋgáb ɨ́ lèèsò ŋgə́ cóo ɓe mwar.

⁹«Ɓe vùùm nɨ́ɨ́b ndóŋ kɨ́ lâs, ní á tá mwarí ɓa ndɨ̀ŋnɨ? Ŋgə́ ɓa gònɨ á, ŋgə́ a ndùùkî tɨ́ɗèìn bɨ kɨ́, ɗà ŋgə́ a ɗòbcùrê nùb ji mwai kɨ́ no.

¹⁰Mɨ lə́mne nyí fainɓwéeháá nɨ́m káàtà Mèèín du tànɨ ɨnè rè: ‹Sɨ̀ne nùb óŋ dúhéé ya leehó̧kɨ́ gə́nȩ̀né á yi sei jù̧ú̧ dúhéé.

¹¹Ə́r Kékéé á kí, kúúŋ nyààŋ kíì nɨ́mè íhín!› »

¹²Kí á mvènnɨ́b Jwîf yaré mánɨ i̧ á vúm ɓa ndɨ̀ŋnɨ vúm a bì Yésù, ɓetí ŋgáb ya ɗəəŋtɨ́ ɨnayâna Yésù átɨ sà̧à̧ rè lèènɨ vúm nyindí só á, ɨ́dù vùù ɨ́ bì ŋgáb ɓe kùŋkùŋ nɨ̀vɨ́tɨ̀bì yi du ɓèé, á ŋgáb lumbɨ́kkɨ́so ŋgə́.

¹³Kùb yi tómsoó Fàrísààb ɓe nùb yi du Hèrôdə̀ cùrìì yɨ́ Yésùù, gìnɨ ŋgə́ fɔ́nòòmhó̧nɨ àm ɓɔ̧ɔ̧, àm vúm bɨ ŋgéé.

¹⁴Ŋgáb ɨ́ gì ŋgə́ tànànɨ ɨnè: «Tá tɔ̀hí, nɨ́m ɗəəŋtɨ́ wu á tànɨ àmɨrì, wu cè wú lùnɨ íí nò kwè ɗàwá, ɓetí àm woò nɨ ɓe ju jíri nɨ̀vɨ́tèé ɗàà. Ɨ́dù ɓe àmɨɨr cúk wu á tɔ̀ɔ̀nɨ ɗɨ́m juu Mèín ɗúré. Tanaye nɨ́m, ɓíì nɨ́mè á tànɨ kùb gòmnà Sèsáàr mvèìn kàm jíri làmpô kèè, kùb gòmwá? Nɨ́m ma gòmtɨ kèè nɨ́m nɨ gòm?»

¹⁵Ɨ́dù hȩ Yésù yi ɗəŋhȩ ŋgáb bɨ mɨ̀yooɗíím á rèé, ŋgə́ ɨ́ tànà ŋgáb: «Nyí fɔ́noomhó̧ce nɨ́ mɨ àm ɓɔ̧ɔ̧ ɓe ní? Gewonanáye mɨ mwèìn sure mwi̧ mɨ péyèe.»

¹⁶Ŋgáb ɨ́ gèwònà ŋgə́. Á ŋgə́ fɔ́ ŋgáb: «Ɓɨ̀m du yá hò̧ ɓe ɨ́r du yá tɨín ndè, kɨ́ naà á?» Ŋgáb ɨ́ tà: «Kɨ́ Sèsáàr á.»

¹⁷Kí á Yésù tanagi ŋgáb ɨnè: «Àhâ̧, nanáam Sèsáàr nɨ́m ók ɓe ŋgéé, nyí a nàhàcè nɨ́ Mèín nɨ́m ók ɓe Mèèín ye.» Ŋgáb ɨ́ gbɨ̀ɨ̀ŋɓà bɨ́ cei àm pìí nó kíì.

¹⁸Sàdúsààb yaá bɨ tànɨ nɨ̀kwííb kwá bɨ sə̀ə̀mcùhô̧. Ŋgáb ɨ́ gàìnwò Yésù gònɨ ŋgə́ fɔ́nɨ ɨnè:

¹⁹«Tá tɔ̀hí, ɓíì Mòyíìs tanaá nɨ́m ɨnè: ‹Nɨ̀ŋgwá kù ɨ́ dù ɓe gwi, ŋgə́ ɨ́ kû ŋgáb mwin fèìnwá, á ɗúnɨ mwin yàá noò ácù gwi kɨ́, ŋgə́ a fènnà nɨ̀kúr mwin.›

²⁰Mwin yàáb kù yaá ku ŋgáb tɨ́ɓaám. Nò tíí yi ɓuú gwi, ŋgə́ kúmbɨ́kkɨ́sò gwi kɨ́ ŋgáár sam, mwin ɗàà.

²¹Nò bɨrɨ́bí ɨ́ ácù gwi kɨ́, ŋgə́ ɨ́ kúmbɨ́kkɨ́sòɓwê ŋgə́ u̧. Nɨ́m mwi̧ kɨ́ ɨ́ ndɨ̀ŋɓwê ɓe nò taarɨ́bí.

²²Há̧á̧ vùùm ɓoò tɨ́ɓaám lâs ɨ́ kû mwin ɗàà. Cùr kɨ́ no, nɨ̀gwi ɨ́ kútèrécáŋhȩ̀.

²³Ɓwâ nɨ̀kwííb kwá səəmcuhó̧ré, ŋgə́ ma kwá duhó̧bɨ́ɨŋ gwi naà? Ɓetí ŋgáb tɨ́ɓaám lâs yi ɓuú ŋgə́!»

²⁴Yésù ɨ́ pììnà ŋgáb ɨnè: «Nyí mbáaŋɓa nɨ síí á, nyí ɗəŋhi̧í̧ àm níì á nyí mbáaŋɓa síí à? Àm nyí du nɨ́ ɗə̀ə̀ŋwá nɨ́m du tɨín káàtà Mèèín noò, nyí duɓwée nɨ́ ɗə̀ə̀ŋwá nyòm Mèín du ɓe kíí rè á.

²⁵Kí du ɓwâ nɨ̀kwííb kwá səəmcuhó̧ cwéé, ɓùú gùmní kwá nɨ dùcɨ̀r. Nɨ̀ŋgwá ɓe nɨ̀gwi kwá ducɨ bɨ ɓɨllin hȩ dùgallɨb Mèèín.

²⁶Duceé kɨ́ sə̀ə̀mcùhô̧ cwéé nɨ̀kwíbí, nyí ya fainhaá káàtà Mòyíìs no, yɨ́ du tɨín ɓe ɨ́r mvɨ́njè yɔ̀ɔ wa ya laihó̧ noò ye! Á hà yɨ́ kɨ́ tɨín ɨnayâna Mèín yi tahó̧naá Mòyîs ɨnè: ‹Mɨ Mèín Ábɨ̀ràháàm á, Mèín Ìsáàk ɓe Yákòòb ɓwê!› ye.»

²⁷Yésù ɨ́ tàkwà: «Mèín nɨ Mèín nùb jááŋ á, ŋgə́ nɨ Mèín nɨ̀kwíbí sé. Nyí á ɓa nɨ kumí tə̧ə̧́.»

²⁸Nɨ̀gáŋ káàtàbì kù ya óó ŋgáb ndáŋnɨ, ŋgə́ ɨ́ ô hȩ Yésù ya piinyaaŋnaɓa Sàdúsààbì, á ŋgə́ ŋgɨɨso gín Yésùù fɔ́nɨ ŋgə́ ɨnè: «Ɓíì jíri ndóŋ kɨ́b lâs á cè kɨ́ ŋge?»

²⁹Kí á Yésù ya piina ŋgə́ ɨnè: «Ɓíì jíri ndóŋ kɨ́b lâs á rè: ‹Nùb Ísràyéèl, óknáye, Mèín nò du Kéké nɨ́mè ɨ́ du Kéké mwi̧ ndúk.

³⁰Á ɗúnɨ wu ɗú Kéké nò du Mèín wóò ɓe sum wóò lâs, ɓe mè woò lâs, ɓe kɨ̀cáàb woò lâs, ɓe nyòm woò lâs.›

³¹Ɓíì turé kí yáà á rè: ‹Wu a ɗúɓwéhè kùŋ ɓwà woò hȩ wu ɗú síí wu nɨ̀mɨrí.› Ɓíì kù jíri ndóŋ kɨ́b ɗàríì nɨ ɗàà.»

³²Á nɨ̀gáŋ káàtàbì tana Yésù: «Á mè u̧ tá, wu á ɓe àmɨɨr tànɨ Mèín á nɨ mwi̧ ndúk, Mèín kù nɨ ɗàdóŋcɨ̀wá.

³³Ɗûú Mèín ɓe njɔ̧̀ lâs, ɓe kɨ̀cáàb lâs, ɓe nyòme lâs, ɓe ɗûú kùŋ ɓwà woò hȩ síí wu nɨ̀mɨrí ndóŋtɨ́ satɨgààb nɨ́m du nànɨ Mèín ɓe yíhèé nyèèmí, dùgɨ̀ kɨ́ nɨ́m du ánɨ nyə̀m mwi̧ bɨ̂ŋ móbnɨ ŋgə́ no rɨ.»

³⁴Hȩ Yésù ya pə́ nɨ̀ŋgwá rè ya ləmɓatɨ́ nɨ́ àm kɨ́ mɨ́nne, á ŋgə́ tana nɨ̀ŋgwá kɨ́ ɨnè: «Ŋgɔ̧́ɔ̧̀ Mèèín ɓe wu cóo ɗàà.» Nò kù ɨ́ dù nɨ́ Yésù nɨ́m kù fɔ́cɨ̀wá.

³⁵Hȩ Yésù yi du Dúú Jíri Mèèín no tɔ̀hí, ŋgə́ ɨ́ fɔ̂ fɔ́ rè: «I̧ á cè nɨ̀gááŋ káàtàbì fɨ́tɨ tànɨ ɨnayâna Mèsî du mwin Dàvíìt yóò á?

³⁶U̧ rɨ ɓe nyòm Nyéhè Sarɨ́nne, Dàvît nɨ̀mɨr yi taá ɨnè: ‹Mèín nò du Kékéé ya tanaá Kéké móò ɨnè: Gom ŋgáŋnɨ mo ŋgáár lame há̧á̧ hȩ mɨ ɓa ndɨ̀ŋnɨ wu ɗèìkɨ́ nùb wo ɓi̧ní.›

³⁷Dàvît nɨ̀mɨr ɓé ŋgə́ ‹Kéké› á, i̧ á cè ŋgə́ ɓa dùcùnɨ nyȩ Dàvíìt yóò?» Mɨ̀kwìn kàm nɨ̀vɨ́tɨ̀bì yaá ónɨ Yésù ɓe mɨ̀tù cúk.

³⁸Ŋgə́ yaá tɔ̀ɔ̀nɨ nɨ̀vɨ́tɨ̀b, ŋgə́ a tace: «Gə́tɨnáam ɓe nɨ̀gááŋ káàtàbì, ŋgáb á ɗúnɨ yə̀ŋtèènɨ ɓe gâŋ kàtɨ́b só, ŋgáb a ɗû kùb nyìndɨ̀ vúm laŋtaaŋ kàtɨ́b jííbí.

³⁹Dúhɨ́b mɨ̀yú̧ú̧ no, ŋgáb a ɗû ju tíí, yá cɔŋ jùrúbí ŋgáb a cà ju kàtɨ́b dɨmɨri.

⁴⁰Ŋgáb á pɨ̀ɨ̀mkɨ́nɨ nɨ́ɨ́b cutɨ́b mámkwíbí ŋgáréè, ŋgáb á ŋgòòŋnɨ mɨ̀yú̧, túùmnɨ vúm nùb nyɔ̧ɔ̧́ á. Jábɨ́r ŋgábè kwá ndóŋ kɨ́ nùb lâs!»

⁴¹Yésù yaá du̧ú̧ Dúú Jíri Mèèín, gín kɨr múbí. Ŋgə́ ɨ́ yà pénɨ hȩ nɨ̀vɨ́tɨ̀b du lèèrénɨ mòné kɨr kɨ́ nokwe. Nùb njɔdìì yaákòm lèènɨ mònɨ̀b kàtɨ́b cei.

⁴²Á nɨ̀gwi ti mámkwííb kù ndóŋwo, ŋgə́ ɨ́ lèèrê sure cutɨ́b mònéè bɨrɨ́b.

⁴³Kí á Yésù tana nɨ̀fuùb noò ɨnè: «Mɨ tanaɓa nyí àmɨɨr wááŋ á: nɨ̀gwi ti mámkwííb lè natɨ́ ndóóŋ nùb lâs,

⁴⁴ɓetí nùb kɨ́ tɨ nakom bɨ mwèìn tɨ du ŋgáb nɨ́m kù ə́nnànɨ ɗàwáá á, ɨ́dù kɨ́ ŋgéé, ŋgə́ nakɨ́ɓatɨ́ cáŋhȩ ti tɨ du ŋgéé ŋgáréè lâs.»