Read Vute Máàrk 13 Bible Online

Máàrk 13 - Vute bible

Máàrk 13

¹Hȩ Yésù yi du fó̧nɨ Dúú Jíri Mèèín, á nɨ̀fuùb no kù tana ŋgə́: «Tá, péye kúúŋ nyààŋ sɨɨ rèè, kúúŋ dúhɨ́b kàtɨ́b rèè!»

²Kí á Yésù tana ŋgə́: «Wu péé dúhɨ́b kàtɨ́b lè! Nɨ́ɨ́b kɨ́ lâs ɓa lùùŋnɨ á, sɨɨ kù kwá nɨ kùùŋ ya kpɔklîn mè.»

³Yésù yaá ɗàá du̧ú̧ ɓe Òlìvíyéè ya, Dúú Jíri Mèèín á cè ŋgábè tíí, á Píyéèr, Jâk, Jâŋ ɓe Àndɨ̀rê yi tana ŋgə́ ɓwâ ŋgáb yi du ŋgáb kɨ́ ŋgábè ɨnè:

⁴«Tanam nɨ́m ɓwâ nɨ́ɨ́b kɨ́ kwá ndɨŋndé, lɨ̀m ŋge ɨ́ ɓace túùmnɨ ɨnayâna nɨ́ɨ́b kɨ́ ɓa ndɨ̀ŋnɨ á.»

⁵Kí á Yésù yaré ŋgáb tànànɨ ɨnè: «Gə́tɨnáam, nò kù tɨ̀ mbáŋhɨ nɨ́ nyí!

⁶Nɨ̀vɨ́tɨ̀b ví̧i̧ kwá go ɓe ɨ́r moò só, ŋgáb a tà: ‹Mɨ Mèsî á!› U̧nè á ŋgáb kwá mbáaŋɓa nɨ̀vɨ́tɨ̀b ví̧i̧.

⁷Ɓwâ nyí kwá ók àám su du kə́sə́ə́ ɓe péìn kɨ́b du cóo, nyí nɨ vùù ô ɗú nɨ́ɨ́b kɨ́ ndɨ̀ŋhá u̧ á. Ɨ́dù tɨ̀ nɨ cáŋhȩ̀ ɗɔ̀bí dùtàm.

⁸Gbɨ̧̀ kwá leecu su ɓe kùùŋ, ɗà ti a gàìnɓwê kùùŋ su; jɨ̀hèé ɗɔ̀bí kwá du mɨ̀yɨ́b ví̧i̧, ɗà ŋgàk a gù. Nɨ́ɨ́b kɨ́ kwá du hȩ yààr yíìnɨ́m fù̧ní.

⁹Gə́tɨ̀náɓà nɨ. Kùb ɓa nyí dɨ̀ɨ̀nɨ ŋgù̧ní á, kùb a jɨ̀m nyí ɓe lòré dúhɨ́b mɨ̀yú̧ú̧ no; ɓe ɨ́r moò á nyí ɓa fó̧nɨ gómnààb ɓe mvènnɨ́bí tíí, àm ə́ŋne mɨ̀námé móò ru.

¹⁰Á ɗúyàyènɨ kùb ɓéènà gbàŋ lâs Kìn Nyɔ̧ɔ̧́.

¹¹Ɓwâ kùb ɓa nyí bɨ̀gènɨ ŋgù̧ní, nyí nɨ nɨ́m nyí ɓa nyìnnɨ kwe máa mâ, ɨ́dù nyinnáam nyindí ɓa nyí gònɨ ɓɔ̧ɔ̧ ɓwâ kɨ́ rɨ, ɓetí nɨ nyí nɨ̀miib sé ɨ́ ɓa nyìnnɨ, Nyéhè Sarîn á nɨ ru.

¹²Nɨ̀vɨ́tè kwá gɔkkɨ́ kùŋ mwin yàá àm kwíhe ŋgéé, táàb mwinbi a ndɨ̀ŋɓwê u̧ ɓe munɨ́b ɓoò; munɨ́b a ə́ə̀ŋcùwúcè tábi ɓe yàbí ya ndɨ̀ŋnɨ kùb kwíì ŋgáb.

¹³Nùb lâs ɓa nyí ɓə̀ndɨ̀nɨ ɓe àm moò á. Ɨ́dù nò kwá jíhɨ há̧á̧ cáŋhɨ̀rí, kwá ɓáí.»

¹⁴«Nyí kwá pə́ ‹Nɨ́m kùb du ɓə̀ndɨ̀niì› gònɨ ɗɔ̀bín gwɨ̀ì ɓáàŋ: ŋgə́ kwá du yɨ́ du ɗúwa ŋgə́ dùte. (Wu nò du fàìnnɨ àm ndèè, gə́tɨm, wu a óknyààŋɓà mîn!) Ɓwâ kɨ́ á du ɗúnɨ nùb kwá du ti Jùdéè, lùùwú ɓəbì.

¹⁵Nò kwá du ŋgwé dúhéé, ŋgə́ sénɨ ə́llénɨ, ŋgə́ nɨ yó lə́cùyè ánɨ nɨ́m ŋgə́ ge ŋgáréè.

¹⁶«Nò kwá duce mwa̧né nɨ no yó gɨ̀cùyè júk ndoŋnɨri ánɨ.

¹⁷Jábɨ́r kwá du ɓe mámɓwii, ɓe nùb du munɨ́b mà̧à̧nɨ jíìb kɨ́ noò!

¹⁸Yóŋnáam Mèín àm nɨ́ɨ́b kɨ́ tɨ̀ féínɗóoré ɓwâ mbɨ̀ɨ̀ŋ!

¹⁹Ɓetí jábɨ́r nɨ̀vɨ́tɨ̀b kwá pə́ jíìb kɨ́ noò kwá ndóŋ kɨ́b ya ɗòŋ ndɨ̧̀ɨ̧́ yànɨ yàllì, ɓwâ Mèín ya nyaŋhȩ ɗɔ̀bí há̧á̧ ɗàrò, kùb kwá bɨ jábɨ́r kù ɗóhe ɓe kíí ɗɔ̀bín u̧ pə̂r.

²⁰Kéké ya dùyè jíìb kɨ́ mbə́ə̀mkɨ́wa naa, nò kù yè nɨ́ ɓáíwa. Ɨ́dù ŋgə́ ya mbə́əmkíí jíìb kɨ́ ɓe ɨ́r nùb ŋgə́ ya ca ók ɓe níì.

²¹Nò kù ɨ́ tànà nyí: ‹Pə́náye, Mèsî á hò̧!› kɨ́ kù ‹Pə́náye, ŋgə́ á péín ndɨ!› na, nyí nɨ àm kɨ́ ə́mnɨ̀r.

²²Ɓetí Mèsî bɨ kàŋnì ɓe tɨ́kɨ̀nɨ́b kàŋnì kwá go; ŋgáb a ndɨ̀ŋ lìím kàtɨ́b ɓe nɨ́ɨ́b sɨ̀sɨ̀rí, vúm yè tɨ̀ mbáaŋɓwéehá dùgɨ̀ nùb Mèín ya caré du bɨ́ sàmàìn kùb mbáaŋndé ɗàà rɨ kè.

²³Kɨ́ nyínè, nyí ma gə́tɨ̀há nɨ, ɓetí mɨ takɨ́nacií nyí.»

²⁴«Jíìb kɨ́ no, cùr vein kíì, mvii kwá nɨ sáíncɨ̀r, ŋgə́ kwá du ndùúŋ; njumi a dù nɨ́ ɓə̀ə̀cɨ̀r.

²⁵Káŋyerɨ̀b kwá guusówo, ɗà nɨ́ɨ́b ɓɨllɨnne lâs a dù sumkí̧i̧.

²⁶Ɓwâ kɨ́ á kùb kwá pə́ Mwin Nɨ̀rì gònɨ ɓàk kù ya ɓe nyòme lâs, ɓe mgbíí cúk.

²⁷Ŋgə́ kwá tómtee dùgallɨb Mèèín ŋgɨ̀ŋgɨ́ŋ ɗɔ̀bí no bɨ̂ŋ; ŋgáb kwá ɓáateewo nùb ŋgə́ ya caré, ndúkín ɗɔ̀bí lâs.»

²⁸«Óknáɓaye túúm yɔ̀ sáá du nàniì: Nyí ɨ́ pê kehɨ́b fɨ̀ìn sɨ̀nnɨ, ɗà kɨ́b heé ɨ́ yà òndɨ̀cùhó̧nɨ, nyí ɗə̀ə̀ŋtɨ nà̧á̧ ma ŋgóobtɨ́ á.

²⁹U̧ á ɓwê ɓwâ nyí kwá pə́ nɨ́ɨ́b kɨ́ yàréniì, ɗəəŋnáam Mwin Nɨ̀rì á cɨ̀ nɨ kə́sə́k.

³⁰Mɨ tanaɓa nyí àmɨɨr wááŋ á, nùb jíìb mwánnè ɓa péyènɨ nɨ́ɨ́b kɨ́ ndɨ̀ŋnɨ á, ŋgáb a kúcáàŋgì.

³¹Ɓɨɨr ɓe ɗɔ̀ɔ́b ɓa bɨ cɔ̧́nɨ á, ɨ́dù nyindí móò tɨ̀ nɨ cɔ̧̂.»

³²«Ɨ́dù ye ɓe mvókín nɨ́m kɨ́ ɓa nó féínniì; dùgɨ̀ dùgallɨb Mèèín, dùgɨ̀ mwin Mèèín, nò kù nɨ ɗə̀ə̀ŋwá, jɔ̀ sé Tá ɨ́ ɗəŋhȩ.

³³Nyí síí ɗàá lèèséwa, dùlɨ́ŋná nyaaŋkí̧i̧ ɓwâ lâs, ɓetí nyí tɨ̀ nɨ ɗə̀ə̀ŋwá ɓwâ nɨ́m kɨ́ kwá féínndé.

³⁴Kwá ndɨŋ nɨ hȩ nɨ̀ŋgwá kù ya du gìnɨ gùrí, ŋgə́ ɨ́ mbɨ́kkɨ́sò nùb ə́ré gə́tɨ̀nɨ nɨ́ɨ́b noò lâs; ŋgə́ ɨ́ gɔ̀ktèèkɨ́sònà ŋgáb ə́r, nò mwi̧ ɓe ə́r ɗóhe ɓe ŋgéé. Ŋgə́ ɨ́ tànà nò mwi̧ kù gə́tɨ̀ɓà dúhé mîn, ɗà ŋgə́ ɨ́ ə́llégì gùrí.

³⁵Àm kɨ́ á du ɗúnɨ nyí dùkɨ́ ɓwâ lâs jáŋ, ɓetí nyí nɨ ɗə̀ə̀ŋwá ɓwâ tá dúhéé ɓa gòcùniì; ŋgə́ yè ɓa gònɨ lɨ́tɔ̧ɔ̧́ kè, yè cɨ́m tə̧ə̧́ kè, kɨ́ kù yesə̀rì, kɨ́ kù yekɨ́rɨ̀b kè.

³⁶Gə́tɨnáam, á sàmàìn ŋgə́ féín ɓwâ nyí du lə́ə̀mkɨ́nɨ ɗàwáá, nyí á cè wumí.

³⁷Nɨ́m mɨ tana nyí ɗàrɨ́, mɨ tanaɓwée nɨ̀vɨ́tɨ̀b lâs á: dukɨ́náam jáŋ!»