Read Vute Máàrk 14 Bible Online

Máàrk 14 - Vute bible

Máàrk 14

¹Jùrúb Páskàà ɓe jùrúb kùb taŋ bɨ̀rê mvùùŋ no ɗàwáá yí metɨ́ jíì bɨrɨ́b. Kí á mvènnɨ́b nùb na satɨgàà ɓe nɨ̀gááŋ káàtàbì yi yaré mánɨ kɨ̀cáàb vúm bɨ Yésù yoó ɗà vúm a kwíhè ŋgéé.

²Ŋgáb yaá tànɨ: «Nɨ ɗúwa nɨ́m bɨ̀ɗóòré ŋgə́ ɓwâ jùrúbí rè, àm nɨ̀vɨ́tɨ̀b tɨ̀ ə́tɨwú nɨ́m yaà.»

³Yésù yaá Bètànî, yɨ́ Sìmóòŋ, nɨ̀ŋgwá kù njɨ̀ɨ̀b noò yi sutɨré. Ɓwâ ŋgáb yi du cɔŋ tàŋniì á nɨ̀gwi kù yi lə́so ɓe njɨ́b kù kùb yi nyaŋhȩ ɓe sɨɨ kùb ɓé àlbâtɨ̀rè. Làmɨ́ndà kùb du gùnnɨ ɓe mòné ceí yaá no. Làmɨ́ndà kɨ́ kùb nyaaŋ ɓe gum yɔ̀ kùb ɓé náàr á. Kí á nɨ̀gwi rè yi ɓeikɨ́ ŋgwé njɨ́b kíì, ŋgə́ ɨ́ swìwúnà Yésù làmɨ́ndà kɨ́ ŋgwéé.

⁴Nùb kù tɨŋtɨ̀ŋ nùb yi du ɓèé ɨ́ ô bɨ́ ɓáŋhîn, ŋgáb ɨ́ yà ŋgùùŋnɨ mvókín ŋgábè no ɨnè: «Ŋgə́ ɓáaŋkɨ́ce nɨ́ làmɨ́ndà rè ɓe ní?

⁵Kùb yè sə́rɨkɨ́bɨ̂ŋ sə́rîn sàmàìn mwèìn sure təmərì taarɨ́b á, mwèìn kɨ́ kùb a gɔ̀knà nùb tiri!»[3] Ŋgáb ɨ́ yà yòtɨ̀ɓànɨ nɨ̀gwi kɨ́ cei.

⁶Ɨ́dù Yésù ɨ́ tà: «Mbɨ́knáam ŋgə́ nyɔ̧́ɔ̧̀. Àm níì á nyí du ŋgə́ jábɨ̀nɨ? Nɨ́m ŋgə́ ndɨŋ ɓe mɨ́ kɨ́ á mîn.

⁷Ɓetí nyíne nùb tiri kwá dulɨ́ŋ bɨ́ tɨ́k, ɓwâ nyí ɗúré lâs, á sàmàìn nyí ndɨŋ ŋgáb mɨ́nne; ɨ́dù kɨ́ moò, nɨ́me nyí tɨ̀ nɨ ɓwâ lâs dùr.

⁸Ŋgə́ ndɨŋtɨ́ nɨ́m ŋgə́ tɨ fɨ́tɨ ndɨ̀ŋniì. Ŋgə́ swiwúkɨ́nacií nɨ́ mɨ làmɨ́ndà lêé sèrɨ̀nnè só.

⁹Mɨ tanaɓa nyí àmɨɨr wááŋ á. Yɨ́ lâs kùb ɓa tànɨ Kìn Nyɔ̧ɔ̧́ ɗɔ̀ɔ́b lè noò, kùb ɓa nyìnɓwêcénɨ àm nɨ̀gwi rèè á, kùb a lə́mnè ŋgə́ no.»

¹⁰Kí á Yúdàs Ìskàrìyôt, nɨ̀vɨ́tè mwi̧ tɨŋtɨ̀ŋ nɨ̀fuùb Yésùù cóóŋ ɨ́ bɨrɨ́b lè noò yi gi tànànɨ mvènnɨ́b nùb na satɨgà dúú Mèín noò, ní ɗúú ŋgáb sə́rɨ̀kɨ́nànɨ Yésù yáá.

¹¹Ŋgáb ɨ́ ókɓà mɨ̀tù ɓe nɨ́m ŋgə́ yi tana ŋgáb kɨ́, á ŋgáb ɓwáí ŋgə́ nànɨ mòné ɓè ŋgə́ ndɨŋme u̧nèé. Yàrê ɓwâ kíì á Yúdàs yi yaré mánɨ mvókín ŋgé no á ŋgə́ ɓa ndɨ̀ŋnɨ ɗà kùb a bì Yésù.

¹²Ye tíí jùrúb kùb taŋ bɨ̀rê du mvùùŋ no ɗàwá rɨ no, ye mwi̧ kùb tȩ́ȩkom ndèɗúúb satɨgà Páskàà rɨ á, nɨ̀fuùb Yésùù ɨ́ fɔ̂ ŋgə́: «Ŋga á wu ɗú nɨ́m gɨ̀ wu nyààŋkɨ́nànɨ cɔŋ Páskàà?»

¹³Kí á Yésù ya tómhó̧ nɨ̀fuùb bɨrɨ́b, ŋgə́ ɨ́ tà: «Gɨ̀ná kwé hi̧i̧, nyí ɓa ɓànndénɨ ɓe nɨ̀ŋgwá kù du hàìngènɨ nɔk mvúmí ŋgwéé á. Tùgèná ŋgə́.

¹⁴Yá ŋgə́ ɓa lénɨ rɨ, tànàná nɨ̀mɨr dúú kíì ɨnè: ‹Tá taá nɨ́m gò wu fɔ́nɨ kóo, lúùm dúhéé vúme nɨ̀fuùb níì ɓa tàŋnɨ Páskà nokwe á ŋga yàà?›

¹⁵Ŋgə́ ɓa nyí túùmnànɨ dúú còmné no, lúùm dúhéé duɓa yáin, duce nyaŋhîn ɓe ɨ́r cɔɔ̀ŋ ndɨ á, lúùm kɨ́ no á nyí ɓa sìnɨ cɔŋ kɨ́ ru.»

¹⁶Nɨ̀fuùb ɨ́ ə́llê, ŋgáb ɨ́ gì féínnɨ kwé ku, ŋgáb ɨ́ kwàhácè lúùm kɨ́ hȩ Yésù yi tana ŋgábè. Ŋgáb ɨ́ nyààŋkɨ́hácè cɔŋ Páskàà kɨ́.

¹⁷Ɓwâ lɨ́tɔ̧ yi kerɨré á Yésù ɓe nɨ̀fuùb no cóóŋ ɨ́ bɨrɨ́b lè yi féínwo.

¹⁸Ɓwâ ŋgáb yi duré ɗàá cɔŋ tàŋniì á Yésù ta: «Nyí nùb du tàŋnɨ cɔŋ ɓe mɨ rè, nɨ̀vɨ́tè mwi̧ mvókín nyínè noò ɓa mɨ sə́rɨ̀nɨ á.»

¹⁹Yəré ɨ́ bɨ̀ɓà nɨ́ nɨ̀fuùb Yésùù ɓe nyindí kɨ́, kí á ŋgáb yaré ŋgə́ fɔ́nɨ tùré tùré ɨnè: «Nò kɨ́ ɓa nɨ dùnɨ mɨ kèè?»

²⁰Yésù ɨ́ pììnà ŋgáb: «Nɨ̀vɨ́tè mwi̧ tɨŋtɨ̀ŋ nyí cóóŋ ɨ́ bɨrɨ́b lè á, nò kɨ́ nɨ́me ŋgə́ á hə̀lə́ɓáànɨ kɨr mwi̧í̧.

²¹Á mè u̧, Mwin Nɨ̀rì ɓa kúnɨ ɗóhîn ɓe nɨ́m káàtà Mèèín yi ta ɓe ɨ́r ŋgéé á; ɨ́dù jábɨ́r á ɓe nò ɓa sə́rɨ̀nɨ Mwin Nɨ̀rì kɨ́! Ɓe ɨ́r ŋgə́ ndɨ̀ŋ u̧nèé, kùb kè ya du bɨ́ ŋgə́ fèìn ɓàcéyè!»

²²Ɓwâ cɔɔ̀ŋ, Yésù ɨ́ â bɨ̀rê, ŋgə́ ɨ́ sáktè Mèín; ŋgə́ ɨ́ kùm, ɗà ŋgə́ ɨ́ nà nɨ̀fuùb noò ŋgə́ a tace: «Gamnáam, nɨ́m ndè síí móò á.»

²³Cùr kɨ́ no, ŋgə́ ɨ́ â tob súmé, ŋgə́ ɨ́ sáktè Mèín, ɗà ŋgə́ ɨ́ nà ŋgáb; ŋgáb lâs ɨ́ mèì.

²⁴Yésù ɨ́ tànà ŋgáb: «Nɨ́m ndè tɨ́m moò á, tɨ́m kɨ́ sú túùmnɨ jin nyàáŋ Mèín kwéí ɓe nɨ̀vɨ́tɨ̀b ví̧ne á.

²⁵Mɨ tanaɓa nyí àmɨɨr wááŋ á: yànɨ ɗàrò, mɨ tɨ̀ mɨ súm mèìcɨ̀r, há̧á̧ hȩ nɨ́me nyí kwá meicu súm heé Haam Mèèín nokwe.»

²⁶Ŋgáb ɨ́ sòŋ wààì ŋgáb kúmnɨ Mèín ɓe kíí. Cùr kɨ́ no, ŋgáb ɨ́ gì ɓe Òlìvíyéè ya wɨ́ínɨ.

²⁷Yésù ɨ́ tànà nɨ̀fuùb noò ɨnè: «Nyí lâs, sə̀ré ɓa nyí bìnɨ á, nyí ɓa mɨ lùmbɨ́kkɨ́sònɨ á, ɓetí á tɨín káàtà Mèèín no ɨnè: ‹Mɨ ɓa kwíìkɨ́nɨ nò gə́tɨ jírɨ́bí á, ɗà jírɨ́b a njàkî lâs.›

²⁸Ɨ́dù, kɨ́ moò, ɓwâ mɨ ɓa sə̀ə̀mcùhó̧nɨ sèrɨ̀nnè, mɨ ɓa gìnɨ nyí móŋnɨ ɗɔ̀ɔ́b Gàlìléè no á.»

²⁹Á Píyéèr tana ŋgə́: «Nùb lâs tií lumbɨ́kkɨ́sogɨ wu, kɨ́ moò, mɨ tɨ̀ mɨ u̧ ndɨ̀ŋɓwêwá.»

³⁰Yésù ɨ́ pììnà ŋgə́: «Mɨ tana wu àmɨɨr wááŋ á, sɨ́mnɨ̀r mwánnè no ɓà, cein tíí gònɨ tóŋnɨ rɨ, wu tacií há̧á̧ gwì taarɨ́b ní mɨ ɗə̀ə̀ŋwá á.»

³¹Á Píyéèr tacuɓagɨ ɨnè: «Tàgɨ̀ nɨ́me wu kú cúk, sàmàìn mɨ tahó̧ɓa mo ɓɔ̧ɔ̧ mɨ wu ɗə̀ə̀ŋwáá ɗàà.» Nɨ̀fuùb kù rè ɨ́ tàɓwê nɨ́m mwi̧ kɨ́.

³²Yésù ɓe nɨ̀fuùb noò ɨ́ gì féínnɨ Gètsémànè, ŋgə́ ɨ́ tànà ŋgáb: «Móŋkɨ́náye mɨ ɓè, mɨ yóŋwòyè Mèín.»

³³Ŋgə́ ɨ́ gɨ̀ndôŋ ɓe Píyéèr, Jâk ɓe Jâŋ. Vùù ɓe yəré yînɨ́mí ɨ́ yàrê ŋgə́ bìnɨ.

³⁴Ŋgə́ ɨ́ tànà ŋgáb: «Mɨ á ɓe yînɨ́m njɔ̧̀ hȩ mɨ ɓa kúnɨ. Móŋkɨ́ná mɨ ɓè, nyí a dù jáŋ.»

³⁵Ŋgə́ ɨ́ gɨ̀sò tíí ŋgób, ŋgə́ ɨ́ gùsê ɗàá fúhîn, ŋgə́ ɨ́ yôŋ Mèín, yè á sàmàìn tob yînɨ́mí kɨ́ peindóŋ níì kè.

³⁶Ŋgə́ ɨ́ tà: «Yée bɨ̀bá, wu á ɓe nyòm ndɨŋ nɨ́ɨ́b lâs hȩ wu ɗúré; ndɨŋ tob yînɨ́mí rè nɨ mɨ kwà. Ɨ́dù nɨ nɨ́m mɨ ɗúré ndɨ̀ŋ, ndɨ̀ŋhá nɨ́m wu nɨ̀mɨr wu ɗúré.»

³⁷Ŋgə́ cuwo, ŋgə́ ɨ́ gò kwànɨ nùb taarɨ́b lè wumí, á ŋgə́ tana Píyéèr: «Sìmôŋ, wu á wu wumí à? Sàmàìn wu duhó̧háce jáŋ mvókín ti ŋgób ɗàwá à?

³⁸Dunáam jáŋ, nyí a yôŋ Mèín, àm kɨhɨr tɨ̀ kwa nyínè. Njɔ̧̀ nɨ̀vɨ́tèé á ɗúnɨ ndɨ̀ŋnɨ nyɔ̧ɔ̧́, ɨ́dù síí nóò á nɨ ɓe mɨ̀góòsɨ́m.»

³⁹Ŋgə́ ɨ́ gɨ̀cùkwà yóŋnɨ Mèín, ŋgə́ a tace nɨ́m tɨ mwi̧ kɨ́.

⁴⁰Ŋgə́ ɨ́ cùwò, ŋgə́ ɨ́ kwàcùhâ nɨ́ ŋgáb wumí, ɓetí ya nɨ́ sàmàìn ŋgáb jíiɓa dùnɨ jááŋ ɗàà, wènnànɨ Yésù ɓɔ̧ ɨ́ yɔ̂ ŋgáb.

⁴¹Kɨ́ gwì taarɨ́bí ŋgə́ cuworé, ŋgə́ ɨ́ tà: «Nyí á háyè ùwèènɨ nyí a gwínce wum à? Nɨ́ɨ́b lâs ɗóotɨ́! Pə́náye, ɓwâ kùb ɓa nàrénɨ Mwin Nɨ̀rì nùb ɓáŋhɨ́bí ŋgáréè ɗóotɨ́.

⁴²Éíwúnáam còóm! Nɨ́m gɨ̀náa! Pə́náye, nò sə́rɨ mé féínwotɨ́!»

⁴³Mvókín Yésù yi du nyindí kɨ́ no nyɨ̀nniì á Yúdàs nò yi du kpáín nɨ̀fuùb cóóŋ ɨ́ bɨrɨ́b noò féínso. Kúùŋ kàm nɨ̀vɨ́tɨ̀bì, mvènnɨ́b nùb na satɨgàà ɓe nɨ̀gááŋ káàtàbì ɨ́ kɨ̀jííb kù yi ɗoblé ŋgéé cùrìì yaá ɓe ŋgɨ́ɨ̀ŋ ŋgáré ŋgáré, nùb kù cè ɓe jì̧í̧.

⁴⁴Yúdàs nò yi du sə́rɨ̀nɨ Yésùù yi takɨ́natɨ́ kúùŋ nɨ̀vɨ́tɨ̀bì rè nɨ́m ŋgə́ ɓa ndɨ̀ŋnɨ ɗà ŋgáb a ɗə̀ŋhȩ̀ Yésùù, ŋgə́ yi taá ɨnè: «Nò nyí pə́ mɨ ɓa kùùkɨ́nɨ rɨ, nò nyí má kɨ́ á. Bɨnáam ŋgə́, nyí a gè ŋgə́ gə́tîn mîn.»

⁴⁵Fénnè Yúdàs féínndé, ŋgə́ ɨ́ ŋgɨ̀ɨ̀sò gín Yésùù, ŋgə́ ɨ́ ta: «Tá tɔ̀hí!» Ɗà ŋgə́ ɨ́ kùùkî Yésù.

⁴⁶Kúùŋ nɨ̀vɨ́tɨ̀bì rè ɨ́ ɓáàrê Yésù ya, ŋgáb ɨ́ bì ŋgə́.

⁴⁷Ɨ́dù nɨ̀vɨ́tè mwi̧ tɨŋtɨ̀ŋ nɨ̀fuùb Yésùù yi du ɓèé ɨ́ ɗàmhô̧ jì̧í̧ nóò mbȩ́ȩ́, ŋgə́ ɨ́ téínkî nò ə́ré nɨ̀gáŋ satɨgàà tó.

⁴⁸Yésù ɨ́ tànà ŋgáb: «Ɓe ɨ́r nyí bɨ̀ me, tɨ á nyí ɗúnàyènɨ jì̧í̧ ɓe ŋgɨ́ɨ̀ŋ hȩ kùb gɨce bìnɨ ŋgàyɨ́r à?

⁴⁹Ye lâs nɨ́me nyí yaá Dúú Jíri Mèèín no, mɨ a tɔɔnace nyí àm Mèèín, nyí mɨ bɨ̀wá; ɨ́dù ɗàrò nɨ́m kɨ́ ndɨŋ u̧ àm nɨ́m du tɨín káàtà Mèèín noò a fô̧ hàráá á.»

⁵⁰Ɓwâ kɨ́ á nɨ̀fuùb lâs ya lumbɨ́kkɨ́so Yésù.

⁵¹Mutí wàánjí kù yaá Yésù tùgènɨ ɓe júk só fúhîn, kùb ɨ́ ɗû ŋgə́ bìnɨ.

⁵²Kí á ŋgə́ njeileerékɨ́so júk no kɨ́ ŋgábè ŋgáré, ŋgə́ ɨ́ lù nɨ́ síí sam.

⁵³Ŋgáb ɨ́ gè Yésù yɨ́ nɨ̀gáŋ satɨgàà, ɓè á mvènnɨ́b nùb na satɨgàà, ɓe kɨ̀jííb ɨ́ nɨ̀gááŋ káàtàbì ya ɓáhe.

⁵⁴Píyéèr ya gɨteesoó Yésù cùrì, há̧á̧ ŋgə́ ɨ́ gì lénɨ nɨ̀gáŋ satɨgàà hamnin, ŋgə́ ɨ́ dùrê ɓe nùb ə́ré hamnin kwe gín waá, ŋgə́ ɨ́ yàrê wa ònnɨ.

⁵⁵Mvènnɨ́b nùb na satɨgàà ɓe nùb ɓáhɨ́r ŋgwìn jírií lâs yaá máhánɨ nyindí kù vúm téínwú Yésù só ɗà vúm a kwíhè ŋgéé, ɨ́dù ŋgáb ɨ́ dù bɨ́ kwàwá.

⁵⁶Nɨ̀vɨ́tɨ̀b ví̧i̧ yaá Yésù àám ɓáŋhɨ́b só tȩ́ȩ̀wúnɨ, ɨ́dù ŋgáb ya bɨ́ ɓɔ̧ mwi̧ ɗàà.

⁵⁷Nùb kù ɨ́ éíwúgì còóm, ŋgáb ɨ́ téínwúsò Yésùù só ɨnè:

⁵⁸«Nɨ́m ya óó ŋgə́ tànɨ ní á ɓə̀tɨ̀kɨ́nɨ Dúú Jíri Mèèín nɨ̀vɨ́tɨ̀b yi óŋ ndè, jíì taarɨ́b, ní a óŋcù kɨ́ ji, ɨ́dù tɨ̀ nɨ ə́r nɨ̀vɨ́tɨ̀bì dùcɨ̀r.»

⁵⁹Ɨ́dù, dugɨ ɓe nyindí ŋgáb ya nyin u̧ kɨ́, ŋgáb yi bɨ́ ɓɔ̧ mwi̧ ɗàháwa.

⁶⁰Nɨ̀gáŋ satɨgàà ɨ́ éíwû còóm nɨ̀vɨ́tɨ̀bì tíí, ŋgə́ ɨ́ fɔ̂ Yésù ɨnè: «Wu wèìnɨ ɓɔ̧ ɓe ɨ́r nyindí nùb lè du wu nyìnwúnɨ só rè ɗàwá à?»

⁶¹Ɨ́dù Yésù ɨ́ dù nɨ́ ɓɔ̧ wèìwá. Kí á nɨ̀gáŋ satɨgàà rè fɔ́kwa ŋgə́: «Wu duha Mèsî, Mwin Mèín nɨ́m duce mgbíìniì á ye?»

⁶²Yésù ɨ́ pìhè ɨnè: «I̧i̧, mɨ Mèsî kɨ́ á. Nyí lâs, nyí ɓace pénɨ Mwin Nɨ̀rì du̧ú̧ Mèèín ŋgáár lame á; Mèín nò du ɓe nyòme ndóŋ nyòm lâs. Nyí a pə́kwà ŋgə́ sónɨ ɓàk kù no ɓɨllin.»

⁶³Kí á nɨ̀gáŋ satɨgàà rè amkɨ́ júk nó sóò,[4] ɗà ŋgə́ ɨ́ tà: «Nɨ́m ma mándóŋkwacɨ mɨ̀námé ɓe ní?

⁶⁴Nyí ókhaá hȩ ŋgə́ du nyìnɓáàŋnɨ ɓe ɨ́r Mèèín ye? Nyí lə́əmceé ɨna?» Nùb lâs ɨ́ tà ŋgə́ ndɨŋtɨ́ ɓáŋhîn, á ɗúnɨ kùb kwíìkɨ́ ŋgə́.

⁶⁵Kí á nùb kù yaré Yésù cwàá só túùŋwúnɨ, ŋgáb ɨ́ ɓòmkɨ́nà ŋgə́ íí, ŋgáb ɨ́ yà ŋgə́ wòmɨ̀nɨ. Ŋgáb ɨ́ fɔ̂ ŋgə́: «Na ɨ́ wom wu?» Kí á sójààb lè yi bɨ Yésù, ŋgáb ɨ́ yàrê ŋgə́ láànɨ ɓɔ̧ɔ̧.

⁶⁶Píyéèr yaá yè laŋtaŋ péín ɗàá no, á nɨ̀gwi tɨŋtɨ̀ŋ nùb ə́ré nɨ̀gáŋ satɨgàà ya go.

⁶⁷Ŋgə́ ɨ́ kwà Píyéèr á wa ònnɨ, ŋgə́ ɨ́ góòmkî Píyéèr, ŋgə́ ɨ́ tà: «Wu rè, wu tɨ á ɓwê ɓe Yésù nò Nàsàréèt lè.»

⁶⁸Ɨ́dù Píyéèr ɨ́ càm, ŋgə́ ɨ́ tà: «Mɨ mɨ ɗə̀ə̀ŋwá, mɨ mɨ óknɨ nɨ́m wu du tànɨ kɨ́ ɗàà.» Kí á ŋgə́ éíkɨ́ nɨ́ ɓè, ŋgə́ ɨ́ gì nɨ́ ə́ə̀ŋnɨ ɓɔ̧ hamni. Mvókín kɨ́ no, cene ɨ́ tôŋ.

⁶⁹Ɨ́dù nɨ̀gwi rè ɨ́ pê ŋgə́, ŋgə́ ɨ́ yàcùrê tànànɨ nùb yi du ɓèé ɨnè: «Nɨ̀ŋgwá rè nò kpáín ŋgábè noò á!»

⁷⁰Píyéèr ɨ́ càmkwà Yésù. Mvin ti ŋgób, nùb yi du ɓèé ɨ́ tànàkwà Píyéèr: «Á mè u̧, wu nò ŋgábè kpánéné á, ɓetí wu duɓwée nò Gàlìléè á.»

⁷¹Kí á Píyéèr ta: «Mèín káí mɨ, ɓè mɨ téín kàŋnì! Ɓe tàá àmɨrìí, mɨ mɨ nɨ̀ŋgwá nyí du tànɨ kɨ́ ɗə̀ə̀ŋwá.»

⁷²Mvókín kɨ́ no ɓè mu̧u̧, cene ɨ́ tôŋ kɨ́ gwì bɨrɨ́bí, kí a Píyéèr lə́əmcu nɨ́m Yésù tɨ tana ŋgə́ ɨnayâna: «Cein tíí gònɨ tóŋnɨ rɨ, wu tacií há̧á̧ gwì taarɨ́b ní mɨ ɗə̀ə̀ŋwá» á na rè. Kí á Píyéèr ɨ́ yàrê kɨ́kɨ́r.