Read Vute Máàrk 15 Bible Online

Máàrk 15 - Vute bible

Máàrk 15

¹Ye kɨ́rɨ̀b kɨ́rɨ̀b, mvènnɨ́b nùb na satɨgàà, ɓe kɨ̀jííb, ɓe nɨ̀gááŋ káàtàbì ɨ́ nùb ɓáhɨ́r ŋgwìn jírií ɨ́ bì ɓɔ̧. Ŋgáb ɨ́ ndɨ̀ŋ kùb kwéí Yésù, ɗà ŋgáb ɨ́ gènà ŋgə́ Pìlât.

²Pìlât ɨ́ fɔ̂ Yésù ɨnè: «Wu ɨ́ du mvèìn jíri Jwîf ɓoò ru à?» Yésù ɨ́ pìhè ɨnè: «Á hȩ wu ta kɨ́.»

³Mvènnɨ́b nùb na satɨgàà ya tȩ́ȩwúú ŋgə́ àám kàtɨ́b só cei.

⁴Kí á Pìlât ya fɔ́kwa ŋgə́ ɨnè: «Wu wu mɨ ɓɔ̧ wèìnànɨ ɗàwá à, kèè wu wu óknɨ àám kàtɨ́b ŋgáb du wu só tȩ́ȩ̀wúnɨ rè ɗàà!»

⁵Ɨ́dù Yésù ɨ́ mwèìndóŋɓàgɨ̀ ɓɔ̧, á Pìlât yi gbɨɨŋɓagɨ cei.

⁶Ye jùrúb Páskàà lâs, Pìlât yaá ɓe ɗɨ́m ŋgə́ áhó̧kɨ́ nɨ̀vɨ́tè mwi̧ nìrì, nò nɨ̀vɨ́tɨ̀b ɓollé.

⁷Nɨ̀ŋgwá kù ɨ́r yi du Bàrábàs, ɓe kùb ɓwàjììb ya kwíhe nɨ̀vɨ́tè ɓe àm lɨ̀ɨ̀ŋhȩ̀ȩ́ tií yaá cè nìrì ku.

⁸Kí á nɨ̀vɨ́tɨ̀b ya gainwú Pìlât, gìnɨ ŋgə́ tànànɨ, ŋgə́ ndɨ̀ŋnà vúm nɨ́m ŋgə́ ndɨŋlɨ́ŋ fɨ̀nní.

⁹Pìlât ɨ́ pììnà ŋgáb ɨnè: «Nyí ɗúú mɨ mbɨ́kcùnà nyí mvèìn jíri Jwîf rè à?»

¹⁰U̧ kɨ́ ŋgə́ ya ɗəəŋɓatɨ́ ɨnayâna mvènnɨ́b nùb na satɨgàà ya gɔksokɨ́na ní Yésù ɓe ɓɨ̀ndí á.

¹¹Mvènnɨ́b lè ya wútɨceé bɨ́ nɨ̀vɨ́tɨ̀b ɨnayâna ŋgáb ɓwèì Pìlât áhó̧kɨ́nàbɨ̂ŋ vúm Bàrábàs nìrì.

¹²Pìlât ɨ́ fɔ́cùkwà ŋgáb ɨnè: «Nò nyí du ɓénɨ mvèìn jíri Jwîf rè, nyí ma ɗúce mɨ ndɨ̀ŋ ŋgə́ ní?»

¹³Kí á ŋgáb gbəmɓa: «Kpáaŋwúum ŋgə́ bɨ̧̀ɨ̧́!»

¹⁴Pìlât ɨ́ fɔ̂ ŋgáb: «Ɓáŋhîn ŋgə́ ndɨŋndé á cè ní?» Á ŋgáb gbəmndóŋɓagɨ tíí tíí: «Kpáaŋwúum ŋgə́ bɨ̧̀ɨ̧́!»

¹⁵Ɓe àm nɨ̀vɨ́tɨ̀b a óknà Pìlât mɨ́nne, Pìlât ɨ́ áhó̧kî Bàrábàs nìrì. Ŋgə́ ɨ́ nà nyòme ɨnayâna kùb jɨ̀m Yésù ɗà kùb a gè ŋgə́ kpáàŋwúnɨ bɨ̧̀ɨ̧́.

¹⁶Sójààb ɨ́ gèndóŋndê Yésù kpáksɨ́ ŋgù̧ní no gómnàà hamnin, ŋgáb ɨ́ ɓáàrésò kúùŋ sójàbì kpáksááŋ ku.

¹⁷Ŋgáb ɨ́ lə́rə́nà Yésù júk jandîn só; ŋgáb ɨ́ hàndɨ̀nà ŋgə́ kàŋ mvènnì ŋgáb tɨ jɨ́b jɨ́ɨm ɓe ɗə̀b lúŋbí.

¹⁸Ŋgáb ɨ́ yàrégì ŋgə́ kə́ə̀nɨ, ŋgáb a tace: «Ína mvèìn jíri Jwíìf, wèìhá ɓɔ̧ kà!»

¹⁹Ŋgáb womséé ŋgə́ ŋgɨ̧́ ŋgwéé, ŋgáb a túŋwúsò ŋgə́ cwàá só, ɗà ŋgáb a cáàmségì ɗàá no tíí.

²⁰Ɓwâ ŋgáb yi kə́əcáŋhȩ ŋgéé á ŋgáb yi njeikɨ́na ŋgə́ sàró yi nó só rè, ŋgáb ɨ́ lə́cùrénà ŋgə́ júúb noò, ɗà ŋgáb ɨ́ gèhô̧ ŋgə́ gìnɨ kpáàŋwúnɨ bɨ̧̀ɨ̧́.

²¹Nò Sìréèn kù ɨ́r yi du Sìmôŋ, tá Álèksândɨ̀rə̀ ɓe Rùfúùs, ŋgə́ yaá nɨ cùwònɨ mwa̧á̧, á sójààb ya kpɔ́he ŋgə́ hàìn bàŋ Yésùù.

²²Ŋgáb ɨ́ gè Yésù yá kùb du ɓénɨ Gòlgótà rɨ, kí ɗú tànɨ «Yɨ́ tum ŋgwéé» na á.

²³Ŋgáb ɨ́ ɗû ŋgə́ nànɨ súm yi du yɨmîn ɓe ŋgar njéin kù ɨ́r kɨ́ du míìr, ɨ́dù ŋgə́ ɨ́ mvû nɨ́ súm kɨ́ mènnɨ.

²⁴Ŋgáb ɨ́ kpáàŋwúgì ŋgə́ bɨ̧̀ɨ̧́, ŋgáb ɨ́ kàìkî júúb noò dùrí, nɨ̀mwi̧ ɗóhîn ɓe kɨ́ ŋgə́ ndóblé.

²⁵Ŋgáb ya kpáaŋwú ŋgə́ bɨ̧̀ɨ̧́ mvókín mvii ɓwécɔ̧́ yekɨ́rɨ̀bì á.

²⁶Ŋgáb ɨ́ tɨ̀ìnwû bàŋ ŋgéé kɨ́ ya «Mvèìn jíri Jwîf á rè» túùmnɨ nɨ́m ndɨŋ ŋgáb kwíhɨ̀ ŋgéé.

²⁷Ŋgáb ya kpáŋwúɓwéetɨ́ nùb ɓáŋhɨ́b bɨrɨ́b bàŋ ɓoò ya. Nò kù ŋgéé ŋgáár lame, nò kù cè ŋgéé ŋgáár pène.

²⁸[U̧ á nɨ́m yi du tɨín káàtà Mèèín no ɨnè rè yi fó̧ hàrák, ɓetí á tɨín ɨnè: «Kùb kwá fainndé ŋgə́ kpáín nùb ɓáŋhɨ́bí no.»]

²⁹Nùb yi du ndóŋnɨ ɓèé yaá ŋgə́ àndɨ̀nɨ, ŋgáb a mə̀ə̀ŋkî ŋgwé ŋgáb a tace ɨnè: «Heé! Wu nò tɨ ta ɨnayâna ní á ɓe nyòm ɓətɨkɨ́ Dúú Jíri Mèèín, ɗà ní a óŋcù jíì taarɨ́b hwè,

³⁰ɓátɨyem síí wu nɨ̀mɨ́rí ye, éísókɨ̂m bàŋ ndè ya kà!»

³¹mvènnɨ́b nùb na satɨgàà ɓe nɨ̀gááŋ káàtàbì lâs yaá ŋgə́ kə́ə̀ɓwênɨ, ŋgáb a tace mvókín ŋgábè no ɨnè: «Ŋgə́ ya ɓátɨɓaá nɨ̀vɨ́tɨ̀b, ŋgə́ ma dù nɨ́ ɓe nyòm ŋgə́ ɓátɨcuɓa síí ŋgə́ nɨ̀mɨrí ɗàwá ye!

³²Mèsî, mvèìn Ísràyéèl lè ma éísókɨ́ bàŋ ndè ya kà! Óo ŋgə́ sótɨ́, nɨ́m a ə́ə̀mhàgì nɨ́ ŋgə́ ye.» Dùgɨ̀ nùb kùb ya kpáaŋwúɓwée bɨ̧̀ɨ̧́ gín ŋgéé rè yaá ɓwê ŋgə́ àndɨ̀nɨ.

³³Mvii ŋgwéé, mɨ̀nɔ̂ɔ́m ɨ́ gù ti kɨ́ bɨ̂ŋ, há̧á̧ mvii taarɨ́b lɨ́tɔ̧né.

³⁴Mvii taarɨ́b kɨ́ á Yésù ya kɨ́ŋ kúu còóm ɨnè: «Èlówì, Èlówì, Lama sábàktànî?» (Kí ta: «Mèín móò, Mèín móò, wu ákɨ́cɨ wu mɨ íí ya ɓe ní?» na á.)

³⁵Kpáín nùb ya du óónɨ kɨ́ɨ́ŋ kíì no, nùb kù ɨ́ tà: «Óknáye, ŋgə́ á ɓénɨ Èlî nò du tɨ́kìn Mèèín!»

³⁶Nɨ̀vɨ́tè mwi̧ ŋgábè tɨŋtɨ̧̀ɨ̧́ ɨ́ lùgè á nɨ tùú kù, ŋgə́ ɨ́ sɨ́ndê súm kù no, ŋgə́ ɨ́ tɨ́bwû ŋgɨ̧́ kù ya, ŋgə́ ɨ́ swèìwúsònà Yésù ŋgə́ nyə́mhó̧ súm kɨ́, ŋgə́ ɨ́ tà: «Móŋnáye, nɨ́m pə́náyè Èlî yè ɓa gònɨ ŋgə́ ásónɨ ɗàá kè!»

³⁷Ɨ́dù Yésù ɨ́ kɨ́ŋɓàgì ɓe nyòme ɗà ŋgə́ ɨ́ kû.

³⁸Á sànjà júú kùb yi súŋtéínkɨ́ Dúú Jíri Mèèín noò yi amndə́ tə̧ə̧́ bɨrɨ́b yàsónɨ còóm há̧á̧ ɗàá.

³⁹Mvèìn sójàbì yi du nò Róòm yaá Yésùù tíí ə́ŋhîn. Hȩ ŋgə́ yi pə́ Yésù kúniì, á ŋgə́ ta: «Nɨ̀ŋgwá rè tɨm mèɓà Mwin Mèèín á!»

⁴⁰Nɨ̀gub kù yaá ɓwê ɓè góòmsònɨ cóo. Kpáín ŋgábè no yaá Màríyà nò Màkdàláà, Sàlòmê ɓe Màríyà yà Jòséè ɓe Jâk mɨ̀ténèé.

⁴¹Ŋgáb ya tuteekom Yésù ŋgə́ éínànɨ ɓwâ ŋgə́ ya dukom Gàlìléè. Nɨ̀gub kù ví̧i̧ ya wúwo ɓe ŋgə́ Yèrúsàlèèm yaá ɓwê ɓè.

⁴²Lɨ́tɔ̧ ya kerɨcií, yɨɨ́m cè ye nyààŋkî jùrúb Sàbáà yi ɓa fó̧nɨ ye sanné á.

⁴³Kí á Yòsə̂b nò kwɨ́í kùb du ɓénɨ Àrɨ̀màtê yi féín. Ŋgə́ yɨɨ́m ɓwê kɨ̀jíri ɓáhɨ́r ŋgù̧ní noò á, ŋgə́ yaá móŋɓwênɨ Ŋgɔ̧́ɔ̧̀ Mèèín, á ŋgə́ yi á kɨ̀ɓá̧á̧, ŋgə́ ɨ́ gì yɨ́ Pìláàt ɓwèìnɨ fín Yésùù.

⁴⁴Pìlât ɨ́ gbɨ̀ɨ̀ŋɓà nɨ́ óknɨ ɨnayâna Yésù tɨ kútamcií nɨ́, á ŋgə́ tóm kùb ɓénà ní mvèìn sójàbì fɔ́nɨ ŋgə́ Yésù yè tɨ kú kúríí á kè.

⁴⁵Hȩ ŋgə́ óknɨ pìí mvèìn sójàbì ya na ŋgéé, ŋgə́ ɨ́ mbɨ́knà Yòsə̂b fín Yésùù.

⁴⁶Á Yòsə̂b yi gi gùnnɨ ndómbó, ŋgə́ ɨ́ gì ásónɨ fín Yésùù bɨ̧̀ɨ̧́, ɓòmndénɨ ndómbó kɨ́ no. Ŋgə́ ɨ́ gì ŋgə́ kɨ́klénɨ sèè kù kùb ya ŋgei ɓéhíì no, ŋgə́ ɨ́ pɨ́ɨ̀ŋwò sɨɨ kàm kù ɗèìnkɨ́nɨ ɓɔ̧ sèè kíì no.

⁴⁷Màríyà nò Màkdàláà ɓe Màríyà yà Jòséè yaá ɓè, góòmsònɨ yɨ́ kùb tɨ kɨ́klé Yésùù.