Read Vute Máàrk 16 Bible Online

Máàrk 16 - Vute bible

Máàrk 16

¹Kpíí cùr Sàbáà á Màríyà nò Màkdàláà, ɓe Sàlòmê ɨ́ Màríyà yà Jâk yi gwɨi làmɨ́ndà àm gɨ mììwúnɨ fín Yésùù yaà.

²Ye sóndèè, yekɨ́rɨ̀b, mvii fó̧nɨ á ŋgáb ya gi nyàbȩ́ȩ́.

³Ŋgáb ɨ́ yà tànɨ ɨnè: «Na ɨ́ ɓa nɨ́m pɨ́ɨ̀ŋkɨ́nànɨ sɨɨ kàm du ɓɔ̧ sèrì rɨ?»

⁴Ɨ́dù ŋgáb góomso tíí, ŋgáb ɨ́ pê sɨɨ kàm tɨ hwè á nɨ́ gə́nȩ̀ȩ́ pɨ́ɨŋkí̧i̧, sɨɨ kɨ́ ya nɨ́ sɨɨ ŋgóbti nɨ sé.

⁵Ŋgáb ɨ́ lə́sò sèrìn, ŋgáb ɨ́ pê wàánjí kù ɓo ŋgáár lame ɗàá du̧ú̧, júk mɨ̀vɨ́rì só. Ɗà vùù ɨ́ bɨ̀ɓà ŋgáb cei.

⁶Kí á wàánjí kɨ́ tana ŋgáb: «Nyí nɨ vùù óo, mɨ ɗəəŋtɨ́ nyí má Yésù nò Nàsàréèt kùb tɨ kpáaŋwú bɨ̧̀ɨ̧́ rɨ á, Mèín səəmcuhó̧tɨ́ nɨ́ ŋgə́, ŋgə́ nɨ hò̧ ɗàcɨ̀wá. Pə́náye yá kùb tɨ kɨ́k ŋgéé á rè.

⁷Gɨnáam tànànɨ nɨ̀fuùb ŋgéé, dùgɨ̀ Píyéèr ɨnayâna: ‹Ŋgə́ yatɨ́ nɨ́ gùr tíí gìnɨ Gàlìlê, ku á nyí ɓa ŋgə́ kwànɨ hȩ ŋgə́ ya tana nyínè.› »

⁸Ŋgáb ɨ́ éílùhô̧ sèrìn ŋgáb a bɨ́ndɨgece. Ŋgáb ɨ́ gbɨ̀ɨ̀ŋɓà. Ŋgáb ɨ́ dù bɨ́ nò kù àm kɨ́ tànàwá, ɓetí vùù ya bɨɓatɨ́ nɨ́ ŋgáb cei. [

⁹Ye sóndèè, yekɨ́rɨ̀b, ye mwi̧ ŋgə́ ya səəmcuhó̧ mvókín nɨ̀kwíbí rɨ á ŋgə́ ya túumnayaye Màríyà nò Màkdàláà ŋgə́ ya juhó̧kɨna nɨ̀wàtɨ̀b tɨ́ɓaám só rɨ síí.

¹⁰Nɨ̀gwi kɨ́ ɨ́ gì àm kɨ́ tànànɨ nùb lâs ya gerɨteekom ɓe Yésùù, yi du dùnɨ ju jábɨ́r kíì ŋgáb a kɨ́íce rɨ.

¹¹Ɨ́dù ɓwâ nɨ̀gwi rè ya tana ŋgáb ɨnayâna Yésù á jáŋ, ní pə́ɓatɨ́ ŋgə́ na rè, ŋgáb ɨ́ dù bɨ́ ə́ə̀mwá.

¹²Cùr kɨ́ no, á ŋgə́ túumnakwa nɨ̀fuùb no bɨrɨ́b kù síí, ŋgáb á cè jȩ̀ȩ̀ gìnɨ kwɨ́í ti kù no, ɨ́dù ɓe ɓɨ̀ɨ̀m ji.

¹³Ŋgáb ɨ́ cùwò átɨ̀nànɨ nùb meré àm kɨ́, ɨ́dù nùb kɨ́ dù bɨ́ ə́ə̀mɓwêwá.

¹⁴Kɨ́ cáŋhɨ̀rí, Yésù ɨ́ túùmnà nɨ̀fuùb cóóŋ ɨ́ mwi̧ rè síí ɓwâ nùb kɨ́ ya du cɔɔ̀ŋ, ŋgə́ ɨ́ yètè ŋgáb ɓe tam njɔ̧̀ mɨ̀sə́ndɨ̀rí ŋgábè ə́ə́m ɗàwá kɨ́, àm ŋgáb ya mvú ə́ə̀mnɨ nɨ́m nùb ya pə́ ŋgə́ jááŋ ya taré.

¹⁵Á ŋgə́ ɨ́ tànà ŋgáb ɨnè: «Gɨnáam ŋgɨ̀ŋgɨ́ŋ ɗɔ̀bí no bɨ̂ŋ, nyí a ɓéènà nùb lâs Kìn Nyɔ̧ɔ̧́.

¹⁶Nò lâs kwá ə́əmndé, ɨ́ kɔ̀kcê kɔ ə́mní, kwá ɓáí. Nò kwá duce ə́ə̀mwáá, kwá meré nì̧ì̧ cumí ŋgéé no.

¹⁷Nɨ́ɨ́b sɨ̀sɨ̀rí nùb ə́mne mé kwá ndɨŋndé á rè: ɓe ɨ́r moò ŋgáb kwá jukɨ́ nyéhɨ̀b ɓáŋhɨ́b, ŋgáb kwá nyin nyindɨ́b heé.

¹⁸Ŋgáb ɨ́ bì nyó̧nɨ́b ɓe ŋgáár, kɨ́ kù ŋgáb tàŋndégɨ̀ mvùtù nyȩ́ȩ ɓɔ̧ɔ̧ yoo, nɨ́m ɓáŋhîn kù tɨ̀ nɨ ŋgáb ndɨ̀ŋ; ŋgáb kwá heiwú nɨ̀yáàb ŋgárɨ̀b só ɗà nùb kɨ́ a wáŋhȩ̀.»

¹⁹Cùr Yésù ya nyincáŋhȩ nyindí kíì á ŋgə́ ya wúú còóm ɗà ŋgə́ ɨ́ gì dùnɨ Mèèín ŋgáár lame.

²⁰Nɨ̀fuùb noò ɨ́ gɨ̀cè ɓéètèèsénɨ Kìn Nyɔ̧ɔ̧́ yá lâs, Kéké a kpɔ́kgece ŋgáb ə́rɨ́b ŋgábè kɨ́ no; ŋgə́ a túumce ɨnayâna nɨ́ɨ́b ŋgáb du nyìnnɨ kɨ́ á àmɨɨr, ɓe nɨ́ɨ́b sɨ̀sɨ̀rí ŋgáb ya ndɨŋkomndé.]