Read Vute Máàrk 3 Bible Online

Máàrk 3 - Vute bible

Máàrk 3

¹Cùr kɨ́ no, Yésù ɨ́ lə́cù dúú mɨ̀yú̧ú̧, nɨ̀ŋgwá kù yaá yó ku ŋgáár mvə́ndîn.

²Nùb ya du yó kwe yaá góòmnyààŋnɨ Yésù, pénɨ ɓè ŋgə́ ɓa nɨ̀ŋgwá rè ŋgáár noò tààmcùnànɨ ye Sàbáà, àm vúm a dɨ̀hè Yésùù.

³Yésù ɨ́ tànà nɨ̀ŋgwá ŋgáár mvə́ndîn ndè ɨnè: «Éíwúum còóm, nùb lâs tíí ɓè.»

⁴Yésù ɨ́ fɔ̂ nùb yi du ɓèé ɨnè: «Ɓíì nɨ́mè á tànɨ kùb ndɨ̀ŋ ɓáŋhîn ye Sàbáà kèè kùb ndɨ̀ŋ nyɔ̧ɔ̧́? Kùb ɓátɨ̀ mè nɨ̀vɨ́tèé kèè kùb láàŋkɨ́ mè no kɨ́?» Ɓɔ̧ɔ̧̀b lâs yɨrɨ́b.

⁵Yésù ɨ́ yà ŋgáb góòmnɨ ɓe íí njù̧ú̧. Ŋgə́ yaá ɓe yíìnɨ́m sumí àm ŋgə́ yi pə́ ɓáŋnjɔ̧̀ ŋgábè. Kí á ŋgə́ tana nɨ̀ŋgwá rè ɨnè: «Naamwom ŋgáár.» Nɨ̀ŋgwá kɨ́ ɨ́ nààmsò, ɗà ŋgáár noò ɨ́ tàmcù.

⁶Fàrísààb ɨ́ fô̧ dúú mɨ̀yú̧ú̧ ɓè mu̧u̧, ŋgáb ɨ́ gì kwànɨ nùb yi du kúu ɓe Hèrôdə̀, àm ŋgáb má kɨ̀cáb ŋgáb kwíhe Yésùù.

⁷Yésù ɓe nɨ̀fuùb noò ɨ́ gɨ̀cù péín ɓáí Gàlìléè, ɗà kùŋkùŋ nɨ̀vɨ́tɨ̀bì ɨ́ tùsò ŋgə́. Ŋgáb yaá: Nùb go Gàlìléè ɓe nùb ti Jùdéè,

⁸Nùb Yèrúsàlèèm, nùb ti Ìdùméè, nùb Jùrdə̧̂ cəré ɓe nùb gín kwɨ́í Tíìr ɓe Sìdôŋ. Kùŋkùŋ nɨ̀vɨ́tɨ̀bì kɨ́ yi go yɨ́ Yésùù àm ŋgáb yi ók vùùm nɨ́ɨ́b ŋgə́ yi du ndɨ̀ŋniì lâs lè á.

⁹Kí á Yésù tana nɨ̀fuùb noò ŋgáb gèwò kór ní lə́ nɨ no, nɨ̀vɨ́tɨ̀b tɨ̀ ɓálɨ bɨ́ ní yáá.

¹⁰Ɓetí hȩ ŋgə́ yi du wáàŋnɨ nɨ̀yáàb ví̧ne, nùb yi du yábniì lâs yaá jùndɨ̀gènɨ àm di̧nɨ ŋgéé.

¹¹Ɓwâ nɨ̀wàtɨ̀b yi du ŋgə́ péniì, ŋgáb yaá ŋgéé ɓusiín gùùtèèsénɨ, ŋgáb a kɨ́ɨŋce ɨnè: «Wu Mwin Mèèín á!»

¹²Ɨ́dù Yésù ɨ́ pâm ŋgáb, ŋgə́ ɨ́ tà: «Kpáb! Nyí mɨ vììwá.»

¹³Kí á Yésù wúícu ɓeè còóm, ŋgə́ ɨ́ ɓéhô̧ nùb ŋgə́ yi du ɓéniì, ŋgáb ɨ́ gɨ̀sò yɨ́ ŋgéé.

¹⁴Ŋgə́ ɨ́ càhô̧ nɨ̀vɨ́tɨ̀b cóóŋ ɨ́ bɨrɨ́b, vúme ŋgáb dùu, àm ní a tôm ŋgáb ɓéènɨ àm Mèèín;

¹⁵Ní a nàgwà ŋgáb nyòm ŋgáb ŋgɨ́íkɨ́ nɨ̀wàtɨ̀bì yáá.

¹⁶Nùb cóóŋ ɨ́ bɨrɨ́b Yésù yi caré á rè: Sìmôŋ, (ŋgə́ yi bɨ́na ɨ́r Píyéèr),

¹⁷Jâk ɓe Jâŋ munɨ́b Sèbèdéè (Yésù yi bɨ́naá ŋgáb ɨ́r Ɓwànèèrgês: kí ta «munɨ́b fɨ́tɨ ɓe ɓɨɓanné nàhí» na á.)

¹⁸Àndɨ̀rê, Fɨ́lɨ̂b, Bàrtèlèmî, Màtíyò, Tòmâ, Jâk mwin Àlféè, Tàdê, Sìmôŋ nò yi du lɨ̀ɨ̀ŋnɨ ɓe ɨ́r tií,

¹⁹ɨ́ Yúdàs Ìskàrìyôt, nò yi sə́rɨcukɨ́ Yésùù.

²⁰Yésù ɨ́ lê dúú kù no, ɗà dúú kɨ́ ɨ́ yúkndóŋcè ɓe nɨ̀vɨ́tɨ̀b ɗéé, mvókín ŋgə́ ɓe nɨ̀fuùb noò taŋ cɔɔ̀ŋ sə̀mwá.

²¹Hȩ nùb Yésùù yi ók àm kíì, ŋgáb ɨ́ ə́llê gìnɨ ŋgə́ gècùwònɨ ɓetí ŋgáb ya taá bɨ́ ɨnayâna ŋgə́ yɨɨŋtɨ́ nɨ́.

²²Nɨ̀gááŋ káàtàbì ya sówo Yèrúsàlèèm yaá tàtèèɓànɨ ɨnè: «Bèlsèbûl nò du Sátààìn áɓatɨ́ nɨ́ ŋgə́!» Nùb kù ɨ́ tàcê ɨnè: «Ɓe nyòm mvèìn nɨ̀wàtɨ̀bì á ŋgə́ du nɨ̀wàtɨ̀b jùnɨ ru!»

²³Kí á Yésù ya ɓéwo ŋgáb, ɗà ŋgə́ ɨ́ nyìnnà ŋgáb ɓe gɨ̀gàìn ɨnè: «Ína á cè Sátàìn fɨ́tɨ jùnɨ ŋgə́ nɨ̀mɨr?

²⁴Tɨb lâs nùb nokwe du lɨ̀ŋcùnɨ ŋgáb kɨ́ ŋgáb lɨ, du bɨ lɔ̧́ɔ̧ á.

²⁵Gbààŋ lâs nùb nokwe du lɨ̀ŋcùnɨ ŋgáb kɨ́ ŋgáb lɨ, du bɨ lɔ̧́ɔ̧ á.

²⁶Óo Sátàìn ducií lèècùnɨ su ɓe síí ŋgə́ nɨ̀mɨrí, ti nóò ɨ́ ducɨ nɨ́ gɔklîn ndu, ŋgɔ̧́ɔ̧̀ noò tɨ̀ nɨ yə̀ŋcɨ̀wá, kɨ́ ŋgéé cɔ̧́tɨ́ nɨ́.

²⁷«Sàmàìn nò kù lə́ nò tamnìí yó nɨ́ɨ́b yínɨ ɓè ŋgə́ du nò tamnì kɨ́ kwéíyàyèwáá ɗàà.

²⁸Mɨ tanaɓa nyí àmɨɨr wááŋ á, Mèín kwá tɨ́ína nɨ̀vɨ́tɨ̀b cum ŋgábè lâs dùgɨ̀ nyindí ɓáŋhîn ŋgáb yi nyin ɓe ɨ́r Mèèín.

²⁹Ɨ́dù nò ɓa nyìnɓáàŋnɨ ɓe ɨ́r Nyéhè Sarɨ́nne, Mèín kwá nɨ nò kɨ́ tɨ̂r, ŋgə́ kwá dulɨ́ŋ ɓe ɓáŋhîn kɨ́ tɨ́k kɨ̀ tɨ́k.»

³⁰Yésù ya nyin u̧ ɓe àm ŋgáb ya tayaye ŋgə́ á ɓe nɨ̀wàtɨ̀b só na rè á.

³¹Yà ɓe mwin yàáb Yésùù ɨ́ féínsò; ŋgáb ɨ́ ə́ŋhȩ̀ lúu, ɗà ŋgáb ɨ́ tómndésò nò kù ɓéhó̧nà vúm Yésù yáá.

³²Nɨ̀vɨ́tɨ̀b ví̧i̧ ya dukɨrií ŋgə́; kùb ɨ́ tàndóŋnà ŋgə́ ɨnè: «Ókye, yà wóò ɓe mwin yàáb woò á lúu hò̧ wu mánɨ.»

³³Yésù ɨ́ fɔ́cù ŋgáb ɨnè: «Na ɨ́ du yà móò? Na bɨ ɨ́ duce mwin yàáb moò?»

³⁴Ŋgə́ ɨ́ ŋgèrè nùb tɨ dukɨre ŋgéé, ŋgə́ ɨ́ tà: «Pə́náye, yà móò ɓe mwin yàáb moò á hò̧ rè.

³⁵Ɓetí nò ndɨŋ nɨ́m Mèín ɗúré ɨ́ du tɨ́ŋgwáhin móò, mwingwi̧ móò ɓe yà móò ru.»