Read Vute Máàrk 5 Bible Online

Máàrk 5 - Vute bible

Máàrk 5

¹Ŋgáb ɨ́ féìn ɓáí Gàlìléè cəə́r, ɗɔ̀ɔ́b nùb Jèràsèníì no.

²Sówòó Yésù kwánnè, ɓè mu̧u̧, nɨ̀ŋgwá kù nɨ̀wàtɨ̀b ya njáaŋkɨ́ré ɨ́ fó̧wò nyàbȩ́ȩ́ gàìnwònɨ ŋgə́.

³Ŋgə́ ya duteelɨ́ŋce nɨ́ nyàbȩ́ȩ́ ku á. Nò kù yi nɨ́ sàmàìn bɨ ŋgə́ kwéínɨ dugɨ ɓe lí tú̧ú̧ ɗàà.

⁴Ɓwâ kù kùb yaá ŋgə́ kwéínɨ gurùb ɓe ŋgárɨ̀b ɓe lí tú̧ú̧ ɨ́dù ŋgə́ a tȩ́ȩ̀kî lâs. Nò kù ya nɨ́ ɓe nyòm bɨ ŋgéé ɗàcɨ̀wá.

⁵Ɓwâ lâs, sɨ́mnìín ɓe mvihin cúk, ŋgə́ yaá yə̀ŋtèènɨ nyàbȩ́ȩ́ ɓe ɓəbì ɓwê, ŋgə́ a kɨ́ɨŋteece, ŋgə́ a ɗə́əmteece síí nóò ɓe sɨɨ.

⁶Ɓwâ nɨ̀ŋgwá kɨ́ yi pə́so Yésù cóo, ŋgə́ ɨ́ lùsò, ŋgə́ ɨ́ gì cáàmsénɨ ɗàá no tíí.

⁷Ŋgə́ ɨ́ kɨ̂ŋ kúu còóm, ŋgə́ ɨ́ tà: «Nɨ́me wu yaye ní ya, wu Yésù, Mwin Mèín nò du còóm cóo? Mɨ yóóŋ wu ɓe ɨ́r Mèèín, wu wu mɨ jábɨ́r nàr.»

⁸(Ŋgə́ yi ta u̧ àm Yésù yi ta nyéhè ɓáŋhîn du ŋgéé sóò fó̧tɨ rè á.)

⁹Kí á Yésù yi fɔ́ nɨ̀ŋgwá kɨ́ ɨnè: «Ɨ́r woò á i̧?» Á ŋgə́ piina Yésù: «Ɨ́r moò á ‹kùŋkùŋ›, ɓetí nɨ́m á nɨ ví̧i̧.»

¹⁰Á ŋgə́ yóŋɓa Yésù ɨnè: «Wu wu nyéhɨ̀b kɨ́ ti rè no jùkɨ̂r.»

¹¹Gín yɨ́ ŋgáb ya du kɨ́, kpáín kàm ŋgwèé yaá gurùb ɓeè mátèènɨ cɔŋ.

¹²Kí á nɨ̀wàtɨ̀b lè ya yóŋ Yésù, ŋgáb ɨ́ tà: «Tómndésom nɨ́m ŋgwèéb lèè só!»

¹³Yésù ɨ́ ə́ə̀mnà ŋgáb. Kí á nɨ̀wàtɨ̀b lè ya fó̧ nɨ̀ŋgwá kíì só, ɗà ŋgáb ɨ́ gì lénɨ ŋgwèéb lèè só. (Ŋgwèéb kɨ́ yaá sàmàìn ndɨŋ tɔ́sìn bɨrɨ́bí). Ŋgáb ɨ́ ndììsê lùú cɨ́ŋcɨ̧́ɨ̧́, ŋgáb a guuréndóŋce ɓárín, ɗà ŋgáb lâs ɨ́ tɨ̀m.

¹⁴Nùb yi du gə́tɨ̀nɨ ŋgwèéb kíì ɨ́ lù, ŋgáb ɨ́ gì nùb kwɨ́í jírií ɓe nùb kwɨ́ì cutɨ́bí átɨ̀nànɨ àm kɨ́. Kí á nɨ̀vɨ́tɨ̀b ví̧i̧ yi go pénɨ hȩ nɨ́m kɨ́ yi ndɨŋndé.

¹⁵Ŋgáb ɨ́ gì féínnɨ yɨ́ Yésùù, ŋgáb ɨ́ kwà nò yi du ɓe nɨ̀wàtɨ̀b só ɗéé rè nɨ síí sam ɗàcɨ̀wá, ŋgə́ á cɨ̀ nɨ du̧ú̧ ɓe júk só, kɨ̀cáàb ŋgwȩ́ȩ́ hàrák. Vùù ɨ́ bì ŋgáb.

¹⁶Kí á nùb yi pə́ nɨ́m yi ndóŋndé átɨna ŋgáb nɨ́m yi féínna nɨ̀ŋgwá rè ɓe ŋgwèéb lèè lâs.

¹⁷Kí á ŋgáb ya yóŋ Yésù ŋgə́ éíkɨ́nɨ vúmè ɗɔ̀bín yáá.

¹⁸Ɓwâ Yésù yi du lénɨ kwánnè, nɨ̀ŋgwá ŋgə́ yi jukɨ́na nɨ̀wàtɨ̀b só rè ɨ́ tànà ŋgə́ ɨnè: «Mɨ ɗúú nɨ́me wu dùtèènɨ.»

¹⁹Yésù ɨ́ mvû, ɨ́dù ŋgə́ ɨ́ tànà nɨ̀ŋgwá kɨ́: «Gɨcum wo yó, yɨ́ nùb woò, wu a átɨ̀nà ŋgáb nɨ́m Kéké ndɨŋna wé, hȩ ŋgə́ ók wu mwàmí.»

²⁰Kí á nɨ̀ŋgwá kɨ́ yi gi átɨ̀tèènɨ nɨ́ɨ́b Yésù yi ndɨŋna ŋgéé lâs ŋgɨ̀ŋgɨ́ŋ ɗɔ̀ɔ́b kùb ɓé «Kwɨ́ì cóóŋ» ndɨ no, hȩ Yésù yi ɓátɨ ŋgéé. Nùb yi ók àm kíì lâs ɨ́ gbɨ̀ŋnè.

²¹Yésù ɨ́ pècùwò ɓáá kwáìn. Fénnè ŋgə́ féíncuré, nɨ̀vɨ́tɨ̀b ɨ́ dùkɨ̀rè ŋgə́ gín ɓárí ɓè.

²²Jàhìrûs, mvèìn dúú mɨ̀yú̧ú̧ kù ɨ́ féínsò. Hȩ ŋgə́ ya pə́ Yésùù, ŋgə́ ɨ́ gùsê ŋgéé ɓusiín.

²³Ŋgə́ ɨ́ yóŋɓà ŋgə́, ŋgə́ ɨ́ tà: «Mwin móò nò nɨ̀gwi á ku ndáŋnɨ ɓe cwé, mɨ yóŋtɨ́ wu, goye ŋgə́ ŋgáár ŋgwéé hèìwúnɨ, ŋgə́ wáàŋtɨ, ɗà ŋgə́ á dùcù ɓe mè!»

²⁴Kí á ŋgə́ ɓe Yésù ya gi. Nɨ̀vɨ́tɨ̀b ya du ŋgə́ tùgèniì yaá ví̧i̧ cei, hȩ ŋgáb ɓa ŋgə́ ɗèìtə̀mkɨ́nɨ.

²⁵Mvókín kɨ́ no, nɨ̀gwi kù ŋgáár ɓandîn ya meré só há̧á̧ dáín cóóŋ ɨ́ bɨrɨ́b yaá ɓè.

²⁶Nɨ̀gwi kɨ́ ya pə́ɓatɨ́ jábɨ́r ɓe yáb no kɨ́ cei ɓà. Ŋgatɨ́b kùb ya ndɨŋnakom ŋgéé ya nɨ́ kpɔ́knɨ ɗàà. Ŋgə́ ya ɓáaŋɓatɨ́ mòné ví̧i̧, yə́b ndoóm ti sam ndɨ́ ndòmwá, yə́b gɨndóŋháce tíí tíí.

²⁷Hȩ nɨ̀gwi kɨ́ ya ók nɨ́m kùb ya du nyìntèènɨ ɓe ɨ́r Yésùù, ŋgə́ ɨ́ nȩ́ȩ̀tèèsò Yésùù cùrì, ɗà ŋgə́ ɨ́ dì̧nè júk ŋgéé.

²⁸Ŋgə́ yaá tàɓànɨ no njɔ̧̀ɔ̧ ɨnè: «Mɨ ɨ́ dì̧hó̧ɗóhè júk ŋgéé só rɨ, mɨ ɓa ɓáínɨ á.»

²⁹Hȩ ŋgə́ ya di̧ne júk Yésùù, ɓè mu̧u̧, tɨ́m ɨ́ téìn. Ŋgə́ ɨ́ ɗə̀ə̀ŋɓà ɨnayâna yáb níì cɔ̧́tɨ́.

³⁰Ɓè mu̧u̧, Yésù ɨ́ ɗə̀ŋhȩ̀ ɨnayâna nyòm kù fó̧tɨ́ níì só. Ŋgə́ ɨ́ ɓàndɨ̀cùrê kùŋkùŋ nɨ̀vɨ́tɨ̀bì rè no, ɗà ŋgə́ ɨ́ fɔ̂ ɨnè: «Na ɨ́ di̧ne júk móò?»

³¹Nɨ̀fuùb noò ɨ́ tànà ŋgə́: «Wu á pə́ɓànɨ vùùm kàm nɨ̀vɨ́tɨ̀bì du wu ɓálɨ̀nɨ rè, wu á fɔ́cùgwàcì nò di̧nɨ wé à?»

³²Yésù ɨ́ yà góòmtèènɨ no gín síhé, mánɨ ɗə̀ə̀ŋnɨ nò tɨ di̧nɨ ŋgéé.

³³Kí á nɨ̀gwi rè, nɨ̀ɨ̀ŋkɨ́nɨ kpák kpák ɓe vùù, ɓe ɗɨɨ́ŋ nɨ́m ŋgə́ kwaré sumí, ŋgə́ ɨ́ gò gùcáàmsénɨ Yésùù ɓusiín. Ŋgə́ ɨ́ átɨ̀nà Yésù àm àmɨrì noò lâs.

³⁴Kí á Yésù tana ŋgə́ ɨnè: «Mwin móò, ə́ə́m wóò ɓátií wu. Gɨm dùnɨ ju ɗóóŋ, yáb wo kɨ́ cɔ̧́tɨ́.»

³⁵Yésù á cè nyìnkɨ́yènɨ, á nùb éíwo Jàhìrúùs yóò féínwo, gònɨ tànànɨ Jàhìrûs ɨnè: «Mwin wóò kútɨ́, wu jábɨgwacɨ tá tɔ̀hí ɓe ní?»

³⁶Ɨ́dù Yésù ɨ́ dù nɨ́ àm kɨ́ ɓɔ̧ɔ̧ gàmndéwa. Ŋgə́ ɨ́ tànà Jàhìrûs ɨnè: «Wu wu vùù ô, sə̀ŋɗóò gíí ɓe ə́ə́m.»

³⁷Ŋgə́ nɨ́ nɨ̀vɨ́tɨ̀b ví̧i̧ tùgè ní na mbɨ́kcɨ̀wá, jɔ̀sé Píyéèr, Jâk ɓe wɨ́í nóò Jâŋ.

³⁸Ŋgáb ɨ́ gì féínnɨ mvèìn dúú mɨ̀yú̧ú̧ rè yó. Yésù ɨ́ pê nɨ̀vɨ́tɨ̀b sakɨnii, nùb kɨ́kɨ́íbí ɓe nùb du kɨ́ɨ̀ŋniì.

³⁹Ŋgə́ ɨ́ lê yó, ɗà ŋgə́ ɨ́ tànà ŋgáb: «Àm níì á nyí du sakɨnii nyí a kɨ́íteece ɨnè? Mwɨi lè nɨ kúri ɗàà; ŋgə́ gwín nɨ́ wum á.»

⁴⁰Ŋgáb ɨ́ yà ndɨ̀ŋnànɨ Yésù mɨ̀cə́ŋkáín, á ŋgə́ ta nɨ̀vɨ́tɨ̀b lâs fó̧kɨ́yè lúu yáá. Ŋgə́ ɨ́ ɓégè tá muní ɓe yà muní, ɨ́ nɨ̀fuùb tɨ háaso ŋgéé; ŋgə́ ɓe ŋgáb ɨ́ léndôŋ yá mutí ya duré.

⁴¹Ŋgə́ ɨ́ ɗàmwû mutí, ɗà ŋgə́ ɨ́ tà: «Tàlítà kûm.» (Kí ta: «Mutí nɨ̀gwi, mɨ ɨ́ tana wu ru, éíwú còóm!» na á.)

⁴²Kí á mutí nɨ̀gwi ya éícuwú còóm ɓè mu̧u̧, ɗà ŋgə́ ɨ́ yàcùrê gèrɨ̀tèènɨ. (Ŋgə́ yaá ɓe dáín cóóŋ ɨ́ bɨrɨ́b). Ɓwâ nɨ̀vɨ́tɨ̀b yi pə́ nɨ́m kíì, ŋgáb ɨ́ sɨ̀rɨ̀ɓà cei.

⁴³Ɨ́dù Yésù ɨ́ tànà ŋgáb kpáb, ŋgáb nò kù àm kɨ́ tàndóŋnàwá. Ŋgə́ ɨ́ tàgì kùb nà ŋgə́ cɔŋ yáá.