Read Vute Máàrk 7 Bible Online

Máàrk 7 - Vute bible

Máàrk 7

¹Fàrísààb ɓe nɨ̀gááŋ káàtàbì yi éíwoó Yèrúsàlèm, ŋgáb ɨ́ gò ɓáànɨ yá Yésùù.

²Ŋgáb ɨ́ pê nɨ̀fuùb Yésùù tàŋnɨ cɔŋ ɓe jɨ́nɨ̀m ŋgáré, ŋgáár nàtɨ̀wá; u̧ kɨ́ ɓíì ə́mní yi nɨ́ ɗúnɨ u̧ ɗàà.

³Jwîf bɨ lâs ɓà, dùgɨ̀ nùb du Fàrísààb, ŋgáb bɨ tàŋnɨ cɔŋ ɓè ŋgáb du ŋgáár mîn nàtɨ̀wáá ɗàà, hȩ ɗɨ́m tákɨ̀rɨ́b ya tɔɔkɨ́soré.

⁴Ɓwâ Jwîf bɨ cuwolɨ́ŋ mɨ̀tɨ̧̀ɨ̧́ rɨ, ŋgáb bɨ cɔŋ tàŋnɨ ɗàwá ɓè ŋgáb du mvúm kɔ̀kyèwáá. Ŋgáb á gwà gə́tɨ̀nɨ ɓe jɨ̧ cúk mɨ̀ɗɨ́mɗɨ̀m kàtɨ́b kù nɨ̀vɨ́tɨ̀b ya mare ɓe kíí hȩ ɓíì rɨ u̧ (sèkíì tóóbì, njííb ɓe súwábí).

⁵Kí á Fàrísààb ɓe nɨ̀gááŋ káàtàbì ya fɔ́ Yésù: «Àm níì á nɨ̀fuùb woò du bɨ́ jààŋkɨ́nɨ tɔ̀ɔ́ ya tákɨ̀rɨ́bí? Ŋgáb á bɨ tàŋnɨ cɔŋ u̧ ŋgáár nàtɨ̀yàyèwá.»

⁶Yésù ɨ́ pììnà ŋgáb ɨnè: «Nɨ́m Mèín ya nyin ɓe ɨ́r nyínè Èsáyà ya tɨin ndè á ɓà hàrák, mɨ̀yooɗíím ndè. Ɓetí ŋgə́ ya tɨintɨ́ ɨnè: ‹Gbàŋ kɨ́ dɨɨmɗóo nɨ mɨ nyindí ɓɔ̧ne ya á, njɔ̧̀ ŋgábè á nɨ cóo ɓe mɨ.

⁷Ŋgáb ndáŋ bɨ́ mɨ ŋgə̀mnɨ sam á, ɓetí nɨ́ɨ́b ŋgáb du tɔ̀ɔ̀nànɨ nɨ̀vɨ́tɨ̀bì du nɨ ɓíhɨ̀b nùb ɗɔ̀bɨ́nné á.›

⁸Nyí á nɨ mbɨ́ksénɨ ɓíì Mèèín ɗàá, nyí a gə́tɨnyaaŋce ɗíím juu nɨ̀vɨ́tɨ̀bì.»

⁹Yésù ɨ́ tàgwà: «Nɨ́m nyí ɗəəŋɓa mɨ́nne á lèèkî ɓíì Mèèín àm nyí gə́te tɔ̀ɔ́ nyí nɨ̀mibi.

¹⁰Ɓetí Mòyîs yi taá ɨnè: ‹Jə̀ŋ tá woò ɓe yà wóò›, ŋgə́ ɨ́ tàgwà: ‹Nò andɨ tá noò, kɨ́ kù yà nóò, á ɗúnɨ kùb kwíìkɨ́ ŋgə́.›

¹¹Ɨ́dù kɨ́ nyínè, nyí á tànɨ ɨnayâna nò kù ɨ́ tànà tá noò, kɨ́ kù yà nóò kè ɨnè: ‹kpɨ́kpɔ́ mɨ tɨ du wu kpɔ́kniì, mɨ mɨ wu kpɔ́kcɨ̀nɨ ɗàà, ɓetí du nɨ kòrbâŋ á› na, (Kí ta ‹nyər ók ɓe Dúú Mèèín› na á).

¹²Nyí a mbɨ́kmècè nò kɨ́ ndɨ̀ŋ u̧.

¹³Ɓe ndɨ̧̀ɨ̧́ u̧ kɨ́ á nyí du kwíìláàŋkɨ́nɨ Nyindí Mèèín ɓe tɔ̀ɔ́ nyí du nàtèènɨ mvókín nyínè noò ru. Nyí á ndɨ̀ŋɓwênɨ nɨ́ɨ́b kù ví̧i̧ fɨ́te kíí.»

¹⁴Kí á Yésù ya ɓécuwo nùb ya du ɓe ŋgáb ɓèé lâs, ŋgə́ ɨ́ tànà ŋgáb: «Gə́əŋnáam tó, nyí lâs. Nyí a ô àm ndè.

¹⁵Nɨ́ɨ́b lâs du lénɨ nɨ̀vɨ́tèé ɓɔ̧ne nɨ ndɨ̀ŋnɨ ŋgə́ sèì nò ɓáŋhîn ɗàà, ɨ́dù nɨ́ɨ́b fó̧ ŋgéé ɓɔ̧ɔ̧ yàhô̧ sumíì ɨ́ fɨ́tɨ ŋgə́ ɓáàŋkɨ́nɨ ru.

¹⁶[Óknáɓam mîn ɓè nyí du ɓe tó ók àmnì!]»

¹⁷Ɓwâ Yésù yi éíkɨ́ mɨ̀kwìn kɨ́ no, ŋgə́ ɨ́ lê yóò, á nɨ̀fuùb noò yi fɔ́ ŋgə́ njàb gɨ̀gàìn kíì.

¹⁸Ŋgə́ ɨ́ tànà ŋgáb ɨnè: «Nyí nɨ ɓe kɨ̀cáàb ɗàɓwêwá ye? Nyí nɨ ɗə̀ə̀ŋwá ɨnayâna nɨ́m lə́ nɨ̀vɨ́tèé ɓɔ̧ɔ̧ lȩ́ne nɨ ndɨ̀ŋnɨ ŋgə́ sèì nò ɓáŋhîn ɗàwá à?

¹⁹Ɓetí nɨ́m kɨ́ nɨ lénɨ no sumí ɗàà, ŋgə́ lə́ nɨ́ tóbȩ́ȩ́ á, a tì fó̧ndóŋcè nɨ́?» (Nyindí kɨ́ no Yésù yi ɗú tànɨ kùb tàŋ nɨ́ɨ́b cɔɔ̀ŋ lâs na á.)

²⁰Ŋgə́ ɨ́ tàgwà ɨnè: «Nɨ́m fó̧ nɨ̀vɨ́tèé ɓɔ̧ne ɨ́ du nɨ́ ŋgə́ ɓáàŋkɨ́nɨ ru.

²¹Ɓetí àm gwínhó̧ nɨ́ nɨ̀vɨ́tèé ɓɔ̧ɔ̧ á, no sumí á mɨ̀lə́m ndɨ̧̀ɨ̧́ nɨ́ɨ́b ɓáŋhɨ́b hȩ: ŋguùŋ du nànɨ sə̀réé, yúk, kwíhèé nɨ̀rì,

²²mààŋ, sunɨ̀b, ɓíí, mbááŋ, ju jɨ́mnîn ɗàwáá, ɓi̧í̧, tàtùùb, wútè síhé ɓe ŋgwé ɓáŋhîn du bɨ́ fó̧nɨ ru.

²³Vùùm nɨ́ɨ́b ɓáŋhɨ́b kɨ́ lâs gwínhó̧ nɨ̀vɨ́tèé ɓɔ̧ɔ̧ á, ŋgə́ a sèì nò ɓáŋhîn.»

²⁴Cùr kɨ́ no, Yésù ɨ́ éì ɓè, ŋgə́ ɨ́ gì ŋgɨ̀ŋgɨ́ŋ ɗɔ̀ɔ́b Tíìr no. Ŋgə́ ɨ́ lê dúú kù no. Ŋgə́ yi nɨ́ ɗúwa kùb ɗə̀ŋhɨ̀ ní á ɓè, ɨ́dù ŋgə́ yi nɨ́ nȩ̀ȩ́ dùwá ɓè nɨ̀vɨ́tɨ̀b ɗəŋhɨ ŋgə́ á ɓèé.

²⁵Nɨ̀gwi kù nɨ̀wàtɨ̀b yi du jáàbnɨ muní, yi óó kùb nyìnnɨ àm Yésùù, ɓè mu̧u̧ ŋgə́ ɨ́ lùgàìnsò Yésù, ŋgə́ ɨ́ gùsê ŋgéé ɓusiín.

²⁶Nɨ̀gwi kɨ́ yi nɨ́ nɨ̀gúr á, kùb ya fein ŋgə́ Fènìsî á, ɗɔ̀ɔ́b Sìríì no. Ŋgə́ ɨ́ yôŋ Yésù jùkɨ́ nɨ̀wàtɨ̀b muní sóò.

²⁷Ɨ́dù Yésù ɨ́ tànà ŋgə́ ɨnè: «Mbɨ́kye mucutɨ́b fùbyèe mbáb. Nɨ nyɔ̧ɔ̧́ ɗàà kùb áá cɔŋ mucutɨ́bí lèènànɨ lɨ̀r.»

²⁸Ŋgə́ ɨ́ tàcùnà Yésù ɨnè: «I̧i̧, Kéké, ɨ́dù dugií u̧, lɨ̀r á lénɨ tə́bə̀rè siín tàŋnɨ kumsiì cɔɔ̀ŋ mucutɨ́bí.»

²⁹Kí á Yésù tana ŋgə́ ɨnè: «Ɓe ɨ́r nyindí wu nyin kíì, gɨm, nɨ̀wàtɨ̀b éíhó̧kíí mwin wóò só.»

³⁰Ŋgə́ ɨ́ gɨ̀cùgì no yó, ŋgə́ ɨ́ kwà mwin nóò kòó gwîn, nɨ̀wàtɨ̀b tɨ éíhó̧kíí no só.

³¹Yésù ya éíkɨ́tɨ́ ɗɔ̀ɔ́b Tíìr no, ŋgə́ ɨ́ ààŋndôŋ Sìdôŋ. Ŋgə́ ya gain ɓáí Gàlìlê á, ŋgə́ ɨ́ ndóŋɓà ɗɔ̀ɔ́b kùb ɓé «Kwɨ́ì cóóŋ» ndɨ no tə̧ə̧́.

³²Kùb ɨ́ gèwònà ŋgə́ nɨ̀ŋgwá ya du njɨ̀mgbòŋtóo yi duɓwéhe mùkàà; ŋgáb ɨ́ yóŋɓà ŋgə́ ɨnayâna ŋgə́ hèìwú ŋgárɨ̀b ŋgéé nɨ̀ŋgwá kíì ŋgwéé.

³³Kí á Yésù ya ɗamhó̧ ŋgə́ gə́nȩ̀ȩ́, cóo ti ɓe mɨ̀kwìn nɨ̀vɨ́tɨ̀bì. Ŋgə́ ɨ́ sèìtèèrê nɨ̀ŋgwá rè mbə́re tó̧ó̧, ŋgə́ ɨ́ túŋhô̧ cwàá, ŋgə́ ɨ́ sà yúum nɨ̀ŋgwá rèè ya.

³⁴Kí á Yésù ya ŋgeewú ɓɨllin, ŋgə́ ɨ́ fì mèèìn, ŋgə́ ɨ́ tànà ŋgə́: «Èfátà!» (Kí ta: «kumnɨm!» na á.)

³⁵Ɓè mu̧u̧, tóòb nɨ̀ŋgwá kíì ya kuumtɨ́; yúum ŋgéé ɨ́ wáŋhȩ̀, ɗà ŋgə́ ɨ́ yàrê wèìɓanɨ ɓɔ̧ mîn.

³⁶Yésù ɨ́ tànà ŋgáb ɨnayâna nò kù àm kɨ́ tíí tàndóŋwa yáá. Ɨ́dù ɓwâ ŋgə́ ya duɓagɨ ŋgáb kààŋnɨ kɨ́ á ŋgáb ya duɓace ɓéènɨ cei nɨ́ɨ́b ŋgə́ ndɨŋndé.

³⁷Ŋgáb ya gbɨɨŋɓatɨ́ ə́r ŋgéé cei, ŋgáb ɨ́ yà tànɨ ɨnè: «Nɨ́ɨ́b ŋgə́ du ndɨ̀ŋniì lâs á nyɔ̧ɔ̧́ cei, ŋgə́ á ndɨ̀ŋnɨ nùb yi du njɨ̀mgbòŋtóo ókcù tó̧ó̧, nùb ya du mùkàà wèìcù ɓɔ̧!»