Read Vute Máàrk 8 Bible Online

Máàrk 8 - Vute bible

Máàrk 8

¹Ye kù, kùŋkùŋ nɨ̀vɨ́tɨ̀bì yi ɓáacuwotɨ́ yɨ́ Yésùù. Hȩ ŋgáb yi du ɓe nɨ́m cɔɔ̀ŋ ɗàwáá á Yésù yi ɓéwo nɨ̀fuùb noò, ŋgə́ ɨ́ tànà ŋgáb ɨnè:

²«Mwàm á mɨ bìnɨ ɓe nùb lè, ɓetí á cɨ̀ mwáín jíì taarɨ́b á ŋgáb du ɓe mɨ rè, ŋgáb cè bɨ́ ɓe cɔŋ ɗàcɨ̀wá.

³Mɨ ɨ́ mbɨ̂ ŋgáb gɨ̀cùnɨ u̧, ŋgáb ɓa gìnɨ gùnnɨ jé jȩ̀ȩ̀ á, ɓetí nùb kù tɨŋtɨ̀ŋ ŋgábè noò go bɨ cóo á.»

⁴Kí á nɨ̀fuùb Yésùù yi fɔ́ ŋgə́ ɨnè: «Ŋgwàì ndɨ̀ŋnì hò̧, nɨ́m tɨ̀ kwace nɨ́m nɨ́m líhɨ ŋgáb ɓe kíí ŋga?»

⁵Kí á Yésù yi fɔ́ ŋgáb: «Nyí á ɓe bɨ̀rê meeb?» Ŋgáb ɨ́ tà: «Nɨ́m á ɓe kí tɨ́ɓaám.»

⁶Á ŋgə́ ta nɨ̀vɨ́tɨ̀b dùré ɗàá. Ŋgə́ ɨ́ â bɨ̀rê tɨ́ɓaám ndè, ŋgə́ ɨ́ sáktè Mèín, ŋgə́ ɨ́ kùùmè, ŋgə́ ɨ́ nà nɨ̀fuùb* noò ŋgáb gɔ̀knà nɨ̀vɨ́tɨ̀b yáá. Kí á nɨ̀fuùb* yi gɔkna ŋgáb.

⁷Nɨ̀fuùb no kɨ́ yaá ɓwê ɓe hərɨ́b cutɨ́b kù. Kí á Yésù yi sáktɨkwa Mèín ɓe ɨ́r hərɨ́b kíì, ŋgə́ ɨ́ tà ŋgáb gɔ̀knàɓwê nɨ̀vɨ́tɨ̀b.

⁸Vùùm ŋgábè ɨ́ tàŋ, ɗà ŋgáb ɨ́ fùb. Nɨ̀fuùb Yésùù ɨ́ yúhè lɨ̀ŋtɨ̧̀ tɨ́ɓaám ɗéé ɗéé ɓe kumsiì ya meré.

⁹Nùb ya taŋ cɔŋ kíì yaá sàmàìn féín tɔ́sìn nààsɨ̀b. Cùr kɨ́ no, Yésù ɨ́ tà ŋgáb gɨ̀cù bɨ.

¹⁰Ŋgə́ ɓe nɨ̀fuùb noò ɨ́ lê kwáìn, ɗà ŋgáb ɨ́ gì bɨ́ ɗɔ̀ɔ́b Dàlmànútà no.

¹¹Fàrísààb kù féín, ŋgáb ɨ́ yàrê mɨ̀sə́ndɨ̀r ɓe Yésù. Hȩ ŋgáb ya ɗú ŋgə́ kə́hɨ̀niì, ŋgáb ɨ́ tà ŋgə́ túùmnà vúm lìím kù ɓa túùmnɨ ɨnayâna nyòm noò gomeɓa yɨ́ Mèèín á yáá.

¹²Kí á Yésù ya fi mèèìn, ŋgə́ ɨ́ tà: «Àm níì á nùb jíìb mwánnè du ɗúnɨ mɨ túùmnà vúm lìím kù? Mɨ tanaɓa nyí àmɨɨr wááŋ á, mɨ tɨ̀ mɨ ŋgáb lìím mwi̧ nɨ̀ mwi̧ rɨ́ túùmnàɓàr!»

¹³Kí á ŋgə́ yi éíkɨ́ nɨ́ ɓè, ŋgə́ ɨ́ lə́cù kwáìn gìnɨ péín ɓáá cəré.

¹⁴Nɨ̀fuùb Yésùù ya cəmlááŋ ánɨ cɔŋ, nɨ́m ŋgáb ya du ɓe kí kwánnè á bɨ̀rê mwi̧ ɗóò.

¹⁵Kí á ŋgə́ yi du ŋgáb tànànɨ ɓe nyòme, ŋgə́ ɨ́ tà: «Í̧ì̧! Gə́tɨnáam ɓe mvùŋ Fàrísàbì ɓe kɨ́ Hèrôdə̀ yoo.»

¹⁶Nɨ̀fuùb ɨ́ yà nyìnnɨ mvókín ŋgábè no ɨnè: «Ŋgə́ nyin u̧ àm nɨ́m du ɓe bɨ̀rê ɗàwáá á.»

¹⁷Kí á Yésù yi ɗəŋhȩ nɨ́m ŋgáb yi taré, ŋgə́ ɨ́ fɔ̂ ŋgáb ɨnè: «Àm níì á nyí tace: ‹Àm nɨ́m du ɓe bɨ̀rê ɗàwáá á?› Nyí nɨ pénɨ ɗàwá ye? Nyí nɨ óknɨ ɗàwá ye? Kɨ̀cáàb nyínè á nɨ́ mbɨ̀m ye?

¹⁸Nyí á ɓe íí, nyí ɨ́ dù nɨ́ pénɨ ɗàwá ye? Nyí á ɓe tó nyí ɨ́ dù nɨ́ óknɨ ɗàwá ye, sàmàìn nyí lə́əmkɨ́ nɨ́mí ɗàwá à?

¹⁹Ɓwâ mɨ tɨ kuume bɨ̀rê ŋgiì rɨ, lɨ̀ŋtɨ̀ɨ̀ŋ meeb á nyí tɨ yúhe ɓe kumsiì tɨ meré?» Ŋgáb ɨ́ tà: «Lɨ̀ŋtɨ̧̀ cóóŋ ɨ́ bɨrɨ́b.»

²⁰Yésù ɨ́ fɔ́kwà ŋgáb: «Ɓwâ mɨ tɨ kuume bɨ̀rê tɨ́ɓaám nànɨ nɨ̀vɨ́tɨ̀b tɔ́sìn nààsɨ̀b lɨ, nyí tɨ yúutɨ́ lɨ̀ŋtɨ̧̀ meeb ɓe kumsiì tɨ meré?» Ŋgáb ɨ́ pìhè: «tɨ́ɓaám.»

²¹Kí á Yésù fɔ́ ŋgáb: «Nyí ókháyèwá à?»

²²Yésù ɓe nɨ̀fuùb noò ɨ́ gì féínnɨ Bètsáyídà. Kí á kùb gewona ŋgə́ ɓùɓú̧ kù, kùb ɨ́ yà yóŋnɨ Yésù dì̧nɨ̀ ŋgə́.

²³Kí á Yésù bɨge ɓùɓú̧ rè ŋgáré, ŋgə́ ɨ́ gèhô̧ ŋgə́ kúr gɨ́ní. Ŋgə́ ɨ́ sàwû ŋgə́ cwàá íhé, ɗà ŋgə́ ɨ́ kɨ́ksê ŋgə́ ŋgárɨ̀b ŋgwéé, ŋgə́ ɨ́ fɔ̂: «Wu á pénɨ nɨ́m kù à?»

²⁴Ɓùɓú̧ ɨ́ ŋgèrɨ̀wû còóm ŋgə́ ɨ́ tà: «Mɨ á pénɨ nɨ̀vɨ́tɨ̀b, mɨ á ŋgáb pénɨ hȩ yɨ̀ɨ́b, ɨ́dù ŋgáb á gìnɨ gùr.»

²⁵Yésù ɨ́ dì̧cùgwà íí nɨ̀ŋgwá rèè, ɗà nò kɨ́ ɨ́ gômsòɓà no tíí, yáb noò ɨ́ cɔ̧̂, ŋgə́ ɨ́ yà pə́ɓànɨ fèín.

²⁶Kí á Yésù ta ŋgə́ gɨ̀cù no yó; ŋgə́ nɨ kwé lə́cɨ̀r yáá.

²⁷Kí á Yésù ɓe nɨ̀fuùb noò ə́llé, gìnɨ péín kwɨ́ì yi du gín Sèsàrê du Fìlíìb lɨ́ no: féín jȩ̀ȩ̀ á ŋgə́ fɔ́ ŋgáb: «Kɨ́ nɨ̀vɨ́tɨ̀bì ŋgáb á tàcénɨ mɨ macè na?»

²⁸Nɨ̀fuùb ɨ́ pììnà ŋgə́ ɨnè: «Nùb kù á tànɨ wu Jâŋ nò kɔhɨ kùb kɔ ə́mní á, kɨ́ nùb kù wu Èlî á, nùb kù cè wu tɨ́kìn Mèèín kù á.»

²⁹Yésù ɨ́ fɔ́kwà ŋgáb: «Kɨ́ nyínè, nyí taceé mɨ macè na?» Píyéèr ɨ́ pììnà ŋgə́ ɨnè: «Wu Mèsî á, nò Mèín ya wúrɨna gbám mvènnì.»

³⁰Á Yésù ta kpáb! Ŋgáb nò kù àm kɨ́ tàndóŋnàwá.

³¹Ɓwâ kɨ́ á Yésù yacuré tɔ̀ɔ̀nɨ nɨ̀fuùb noò, ŋgə́ ɨ́ tà ɨnè: «Á ɗúnɨ Mwin Nɨ̀rì pə́ jábɨ́r cei; kɨ̀jííb ɓe mvènnɨ́b nùb na satɨgàà ɨ́ nɨ̀gááŋ káàtàbì ɓa ŋgə́ mvúnɨ á, kùb á kwíhè ŋgə́. Cùr jíì taarɨ́bí, Mèín a tì sə̀ə̀mcùhô̧ ŋgə́.»

³²Yésù ya nyinkomɓa laŋtɨ̧ɨ̧́ á. Nɨ́m kɨ́ á Píyéèr ya ɓéhó̧ Yésù gɨ́ní, ŋgə́ ɨ́ yàrê ŋgə́ yètɨ̀nɨ.

³³Ɨ́dù Yésù ɨ́ ɓàndɨ̀cùwò, ŋgə́ ɨ́ góòmsò nɨ̀fuùb noò, ŋgə́ ɨ́ pámɓà Píyéèr, ŋgə́ ɨ́ tà ɨnè: «Éí ɓè, Sátàìn ndè, mɨ̀lə́m wó sumíì nɨ hȩ kɨ́ Mèèín ɗàà, nɨ kɨ́ nɨ̀vɨ́tɨ̀bì á.»

³⁴Kí á ŋgə́ ɓéwo nɨ̀fuùb noò ɓe kùŋkùŋ nɨ̀vɨ́tɨ̀bì, ŋgə́ ɨ́ tà: «Nò ɗú mɨ tùniì, nò kɨ́ mvúyàyè síí ŋgə́ nɨ̀mɨrí, ŋgə́ a â bàŋ noò, ŋgə́ a tùwò mɨ,

³⁵ɓetí nò ɗú ɓátɨ̀nɨ mè noò ɓa mə̀mnɨ mè no kɨ́ á, ɨ́dù nò məm mè noò ɓe ɨ́r moò ɓe ɨ́r Kìn nyɔ̧né, ɓa cénnɨ mè no kɨ́ á.

³⁶Nɨ̀vɨ́tè ɨ́ kɨ̂ nɨ́ɨ́b ɗɔ̀ɔ́b lè noò lâs, ɗà ŋgə́ ɨ́ mə̀m mè noò, ní ɨ́ kpɔ́khó̧ce ŋgə́ no?

³⁷Nɨ́m kù nɨ̀vɨ́tè fɨ́tɨ nànɨ àm ŋgə́ céín mè noò ɓe kíí á ku à?

³⁸Nò kù ɨ́ ô sə̀ré ɓe mɨ, ɓe nyindí móò mvókín nùb jíìb mwánnè du bɨ́ jə̀ŋnɨ Mèín ɗàà, ŋgáb a ndɨŋce nɨ́ɨ́b ɓáŋhɨ́b lɨ, Mwin Nɨ̀rì ɓa ɓwéece ónɨ sə̀ré ɓe nò kɨ́ á, ɓwâ ŋgə́ kwá cuwo nyòm Tá noò no ɓe dùgallɨb sarɨ́b Mèèín ndɨ.»