Read Vute Lúkàs 11 Bible Online

Lúkàs 11 - Vute bible

Lúkàs 11

¹Ye kù Yésù yaá Mèín yóŋnɨ mɨ̀yɨ́ kù nò, ɓwâ ŋgə́ yi cáaŋndé á nɨ̀fuùb no kù mwi̧ tana ŋgə́ ɨnè: «Kéké, tɔɔnam nɨ́m yô̧ Mèèín hȩ Jâŋ ya tɔɔnaɓwée nɨ̀fuùb noò rɨ u̧.»

²Á Yésù tana ŋgáb: «Ɓwâ nyí du Mèín yóŋniì, tanáam ɨnè: ‹Tá, ɨ́r woò dù ɓe sɨr sɨsaréé; Ŋgɔ̧́ɔ̧̀ woò gòtɨ.

³Nà nɨ́m cɔŋ ɗóhe ɓe nɨ́mè ye lâs.

⁴Tɨ́ínà nɨ́m cum nɨ́mè hȩ nɨ́m nɨ̀miib duce tɨ́ínànɨ nùb lâs ndɨŋ nɨ́m ɓáŋhɨ́nne. Wu wu kɨhɨr bɨ̀ nɨ́m na mbɨ́ɨ.› »

⁵Yésù ɨ́ tànàkwà ŋgáb ɨnè: «Nɨ́m tàpéyè ɨnè: Nɨ̀mwi̧ mvókín nyínè noò á ɓe ɓwàjìrí noò. Ŋgə́ a gì ŋgə́ kùtɨ̀rénɨ cɨ́m tə̧ə̧́, ŋgə́ a tànà ŋgə́: ‹Ɓwàjìrí moò, naye mɨ cɔŋ.

⁶Ɓwàjìrí mo kù féínwotɨ́ yó ku, mɨ cè ɓe cɔŋ mɨ na ŋgéé ɗàà.›

⁷Nò kɨ́ a tàcùhó̧nà ŋgə́ yó tə̧ə̧́ ku ɨnè: ‹Mbɨ́k mɨ nyɔ̧́ɔ̧̀! Ɓavɨ̀r á cɨ̀ nɨ kpaín, nɨ́me munɨ́b moò á cɨ̀ nɨ ɗàá gwîn; sàmàìn mɨ éíwú mɨ́ wu nànɨ cɔŋ kíì nɨ ɗàà.›

⁸Mɨ tànàɓà nyí, ŋgə́ tɨ̀ nɨ éíwúwa nànɨ kùŋ noò cɔŋ kɨ́ àm du ɓwàjìrí noò, ŋgə́ ɓacɨ nɨ ŋgə́ nànɨ àm nò kɨ́ du nɨ́ ŋgə́ jábɨ̀niì á.

⁹Àm kɨ́ á mɨ tana nyí: ɓweináam, kùb ɓa nyí nànɨ á; mánáam, nyí ɓa kwànɨ á; kutɨnáam ɓavɨ̀r, kùb ɓa nyí kùùmnànɨ á.

¹⁰Ɓetí, nò ɓollé kùb a nà ŋgə́, nò máré a kwà, kùb á cè kùùmnànɨ nò kutɨré ɓavɨ̀rì.

¹¹Hȩ nyí du ɗàrɨ́, na ɨ́ fɨ́tɨ nànɨ mwin nóò nyó̧ó̧ ɓè ŋgə́ ɓwei həréé?

¹²Kɨ́ kù ŋgə́ a nà mwin nó kɨ́ mɨ̀nyà̧ ɓè ŋgə́ ɓwei ŋgə́ vuŋni?

¹³Nyí nùb ɓáŋhɨ́b nyí ma ɗə̀ə̀ŋgɨ̀ nànɨ munɨ́b nyínè nɨ́ɨ́b du nyɔ̧né, ɗóògɨ̀ kɨ́ Tá nyínè du ɓɨllɨnne fɨ́tɨ nànɨ nùb ɓwei ŋgéé Nyéhè Sarîn à!»

¹⁴Nɨ̀wàtɨ̀b ya lámkíí nɨ̀ŋgwá kù ɓɔ̧, Yésù ɨ́ ŋgɨ́íhó̧kî nɨ̀wàtɨ̀b kɨ́ nɨ̀ŋgwá kíì só. Ɓwâ nɨ̀wàtɨ̀b kɨ́ yi éíkɨ́ré, nɨ̀ŋgwá rè ɨ́ yàcùrê wèìnɨ ɓɔ̧. Nɨ̀vɨ́tɨ̀b ɨ́ gbɨ̀ɨ̀ŋɓà bɨ́ cei.

¹⁵Ɨ́dù nùb kù ɨ́ tà: «Bèlsèbûl, mvèìn nɨ̀wàtɨ̀bì ɨ́ na ŋgə́ nyòm ŋgə́ ŋgɨ́í nɨ̀wàtɨ̀b kíì ru!»

¹⁶Nùb kù ɨ́ ɗû ŋgə́ kə̀hɨ̀nɨ. Ŋgáb ɨ́ tà ŋgə́ túùmnà vúm lìím kù ɓa túùmnɨ ɨnayâna nyòm noò gomeɓa yɨ́ Mèèín á.

¹⁷Ɨ́dù Yésù yi ɗəəŋtɨ́ nɨ́ mɨ̀lə́m ŋgábè, á ŋgə́ tana ŋgáb ɨnè: «Tɨb lâs nùb nokwe du lɨ̀ŋcùnɨ ŋgáb kɨ́ ŋgáb lɨ, du nɨ ti lɔ̧́ɔ̧ á. Dúhɨ́b ti kɨ́ noò ɓa tə̀ə̀mɨ̀sénɨ ɗàá kùŋ ya, kùŋ ya á.

¹⁸Sátàìn ɨ́ yà lɨ̀ŋcùnɨ ɓe ŋgə́ nɨ̀mɨr, i̧ á cè ŋgɔ̧́ɔ̧̀ noò fɨ́tɨ yə̀ŋnɨ, hȩ nyí ta nɨ́ mɨ ju mɨ nɨ̀wàtɨ̀b ɓe nyòm Bèlsèbúùl á rè?

¹⁹Nyí ɨ́ tà nɨ́ mɨ ju mɨ nɨ̀wàtɨ̀b ɓe nyòm Bèlsèbúùl á, na ma ɨ́ nace nùb nyínè kpánéné nyòm jukɨ́ ŋgábè? Nùb nyínè kpánéné kɨ́ nɨ̀miib ɨ́ ɓa nyí ŋgwìncùɓànɨ ru.

²⁰Ɨ́dù hȩ mɨ du mɨ́ jùnɨ nɨ̀wàtɨ̀b ɓe nyòm Mèèín ndèé, kí du Ŋgɔ̧́ɔ̧̀ Mèèín féínwocií nɨ́ yɨ́ nyínè na á.»

²¹«Ɓwâ nɨ̀ŋgwá tamnì du ɓe túúŋ suu noò lâs àm gə́tɨ dúú nóò rɨ, njɔdì no yóò lâs á gə́tîn mîn.

²²Ɨ́dù, nò ndóŋ ŋgə́ nyòmeè kù ɨ́ féínwò, nò kɨ́ ɨ́ ɓèì ŋgə́ su, nò kɨ́ á gànɨ túúŋ suu ŋgéé ŋgə́ tɨ səŋkom gíí yaà lâs, ŋgə́ a gɔ̀kkî nɨ́ɨ́b ŋgə́ tɨ garé lâs.

²³Nò du ɓe mɨ kúu mwi̧ ɗàwáá nɨ nò mo ɓi̧ní á; nò du mɨ kpɔ́kwa ɓáhèé nɨ̀vɨ́tɨ̀bì, ndiikɨ́ nɨ́ ŋgáb ndihîn á.»

²⁴«Ɓwâ nyéhè ɓáŋhîn kù éíhó̧ nɨ̀vɨ́tèé só rɨ, ŋgə́ a yà yə̀ŋtèènɨ yɨ́ cɨ́ŋni mátèènɨ yɨ́ ùhí. Ŋgə́ ɨ́ dù nɨ́ yɨ́ kɨ́ kwàwá, ŋgə́ a tà: ‹Mɨ gɨ̀cùyè mo yó yɨ́ mɨ tɨ éíhó̧ré.›

²⁵Ŋgə́ féíncuú ku, ŋgə́ a kwà dúhé ihîn, nyaŋhîn mîn.

²⁶Ɓwâ kɨ́ á ŋgə́ ɓa gɨ̀cùnɨ gèwònɨ nyéhɨ̀b kù tɨ́ɓaám ndóŋ ŋgə́ nyòmeè. Vùùm ŋgábè lâs, ŋgáb a gò ɓè dùnɨ. U̧nè á ɗɨ́m juu nò kíì ɓa dùɓàgɨ̀nɨ ɓáŋhîn cei a ndôŋ ɓwâ yàllì.»

²⁷Ɓwâ Yésù yi nyin u̧nèé, nɨ̀gwi kù ɨ́ tàhó̧nà ŋgə́ mɨ̀kwìn kɨ́ no ɨnè: «Mɨ̀tù á ɓe nɨ̀gwi ya hain ɓur woò há̧á̧ ŋgə́ ɨ́ màhè wé!»

²⁸Ɨ́dù Yésù ɨ́ tàcùnà ŋgə́ ɨnè: «I̧i̧! Á mè u̧, ɨ́dù mɨ̀tù dubɨ́ɨŋ nɨ ɓe nùb du óknɨ kìn Mèèín ŋgáb a jə̧̀ə̧́ á!»

²⁹Hȩ nɨ̀vɨ́tɨ̀b ya du ɓáàkɨ̀rɨ̀wònɨ Yésùù, ŋgə́ ɨ́ yà ŋgáb tànànɨ ɨnè: «Nùb ɗàròò bɨ nùb ɓáŋhɨ́b á, ŋgáb á ɓwèìnɨ Mèín ndɨ̀ŋnà vúm lìím, túùmnɨ ɨnayâna ŋgə́ ɨ́ tówomeɓa mɨ ru. Ɨ́dù ŋgə́ tɨ̀ nɨ ŋgáb lìím mwi̧ ɓà rɨ ndɨ̀ŋnàr, jɔ̀sé kɨ́ ŋgə́ ya ndɨŋ ɓe Jónàs lɨ.

³⁰Ɓetí hȩ ɗɨ́m juu Jónàs ya duna nùb Nìnîvə̀ lìím ndɨ, u̧ á ɓwê Mwin Nɨ̀rì ɓa dùnɨ lìím ɓe ɨ́r nùb jíìb mwánnè.

³¹Ye Mèín kwá ŋgwin nɨ̀vɨ́tɨ̀bì, màm péín sɨnné kwá ə́ŋhɨ nùb ɗàròò tíí gbándɨ̀nɨ ŋgáb, ɓetí ŋgə́ ya éíwo ti cóo ɗɔ̀bɨ́nné no, gònɨ óknɨ nyindí Sàlòmóòŋ ɓɔ̧ne ya du yúklîn ɓe kɨ̀cáblì á. Nò ndóŋ Sàlòmóòŋ á cè hò̧.

³²Ye Mèín kwá ŋgwin nɨ̀vɨ́tɨ̀bì, nùb Nìnîvə̀ kwá ə́ŋhɨ nùb ɗàròò tíí, gbándɨ̀nɨ ŋgáb, ɓetí nùb Nìnîvə̀ ya ɓandií sum ŋgábè ɓwâ ŋgáb ya ók sóóŋ Jónàs ɓɔ̧ne. U̧ kɨ́ nò ndóŋ Jónàs á cè hò̧!»

³³«Kùb bɨ tòŋnɨ lámbà kùb a yòkkî, kɨ́ kù kùb a fúùsékî nu ya ɗàà. Ɨ́dù kùb á ŋgə́ dɨ̀ɨ̀nɨ lantɨ̧ɨ̧́ àm nùb ló yóò lâs a pê mwahí.

³⁴Íí woò ɨ́ du lámbà síí wóò ru. Íí ɨ́ dù pə́ɓànɨ mîn, síí wóò ɓaɓwée dùnɨ mwahín á. Ɨ́dù íí woò ɨ́ dù nɨ́ ɓáŋhîn, síí wóò bɨ̂ŋ á cè sɨ́mnɨ̀rí tə̧ə̧́.

³⁵Àà! Wu ma gə́tìi, mwa du wu no kɨ́ tɨ̀ sei sɨ́mnɨ̀r.

³⁶Síí wóò ɨ́ dù mwahín yá ti kù sɨ́mnɨ̀rí ɗàà, síí wó kɨ́ bɨ̂ŋ ɓa dùɓà nɨ mwahín hȩ ɓwâ wu duré mwa lámbàà du ɓə̀ə̀ɓànɨ mɨ́nne noò á.»

³⁷Ɓwâ Yésù yi nyincáaŋndé, Fàrísà kù ɨ́ ɓê ŋgə́ gò cɔɔ̀ŋ níì yó. Yésù ɨ́ lə́sò, ɗà ŋgə́ ɨ́ dùrê cɔɔ̀ŋ.

³⁸Fàrísà rè ɨ́ gbɨ̀ŋnè ɓwâ ŋgə́ pə́ Yésù yaréé cɔŋ ŋgə́ ŋgáár nàtɨ̀wáá.

³⁹Á Yésù tana ŋgə́ ɨnè: «Nyí á ɓà u̧, nyí Fàrísààb lè: nyí á sèhó̧ɗóònɨ tobè ɓe súwá péín njumíì; ɨ́dù péín tə̧né, njɔ̧̀ nyínè á njɔ̧̀ hàŋfìí ɓe njɔ̧̀ ɓírí.

⁴⁰Ína nùb yɨŋmɨ́b lè, Mèín ya nyaŋhȩ péín laŋtɨ̧né rè nɨ sé nyaaŋɓwée péín tə̧né à?

⁴¹Nànábɨ̂ŋ nùb tiri nɨ́m du tobè ɓe súwá nyínè no kwe, ɗà nɨ́ɨ́b lâs a dùnà nyí nyɔ̧ɔ̧́.

⁴²«Jábɨ́r á ɓe nyí Fàrísààb lè! Nyí á kwàtɨ̀hó̧nɨ nɨ́m mííb ɓe jɔ́ɔ́, dùgɨ̀ ke fèhí cutɨ́b kù tèè móbnɨ Mèín ɓe kí, nyí a mbɨ́kce ju ɗɨ́ɗɨ̧́, nyí cè nɨ́ Mèín ɗúɓwênɨ ɗàà, u̧ kɨ́ nɨ́ɨ́b tɨ ɗú nyí ndɨ̀ŋyàte á kí. Kɨ́b meré a tùrégì.

⁴³«Jábɨ́r á ɓe nyí Fàrísààb lè! Nyí á ɗúnɨ ju kàtɨ́b tíí dúhɨ́b mɨ̀yú̧ú̧ no, nyí a ɗû kùb nyìndɨ̀ vúm ɓe jɨ̧ cúk laŋtaaŋ jííb ya.

⁴⁴Jábɨ́r á ɓe nyí! Nyí nùb du hȩ sèrɨ̀b lábtîn kùb du ɗèìndóŋnɨ ya, kùb ɗə̀ə̀ŋwá ɓè du sèrì!»

⁴⁵Kí á nɨ̀gáŋ káàtàbì kù tana Yésù ɨnè: «Tá tɔ̀hí, ɓwâ wu du wú nyìnnɨ u̧ kɨ́, wu ma andɨɓwéeha wu nɨ́m á ye!»

⁴⁶Á Yésù tacuna ŋgə́ ɨnè: «Jábɨ́r á ɓe nyí nɨ̀gááŋ káàtàbì! Nyí á kɨ́kwúnànɨ nɨ̀vɨ́tɨ̀b hain lúhɨ́b njumí, nyí a mvû ŋgáb kpɔ́knɨ, dugɨ dì̧nɨ̀ɗóònɨ di̧nîn.

⁴⁷Jábɨ́r á ɓe nyí! Nyí á mànànɨ tɨ́kɨ̀nɨ́b Mèèín sèrɨ̀b nyɔ̧ɔ̧́. Tɨ́kɨ̀nɨ́b Mèèín tákɨ̀rɨ́b nyínè ya ndɨŋ kùb kwíìkíi ɗàrɨ́!

⁴⁸Nyí ndɨŋ u̧ túùmnɨ ɨnayâna vúm ə́əmɓatɨ́ nɨ́m tákɨ̀rɨ́b vúmè ya ndɨŋ kɨ́ na á. Ŋgáb ya ndɨŋtɨ́ kùb kwíì tɨ́kɨ̀nɨ́b, kɨ́ nyínè, nyí mace sèrɨ̀b tɨ́kɨ̀nɨ́b kíì á.

⁴⁹Àm kɨ́ á, Mèín, ɓe kɨ̀cáàb ŋgə́ ya du ɓe kíí, ya taɓa wááŋ ɨnè: ‹Mɨ ɓa ŋgáb tómnànɨ tɨ́kɨ̀nɨ́b ɓe nùb tómé á, ɨ́dù kùb ɓa kwíìnɨ nùb kù, kùb a jóktɨ̀cè nùb kù á.›

⁵⁰Hȩ du u̧ kɨ́, Mèín ɓa túùmnɨ nùb jíìb mwánnè jábɨ́r ɓe ɨ́r tɨ́kɨ̀nɨ́b kùb ya kwíhe ɓwâ yààr ɗɔ̀bí,

⁵¹Yàwòó cwá Àbéèl há̧á̧ gò féínnɨ kɨ́ Càkɨ́ríyà kùb ya kwíhe Dúú Jíri Mèèín no, mvókín tə́bə̀rè múbí ɓe leè yɨ́ sarɨ́nne rɨ ya á. Mɨ tànàɓà nyí, Mèín ɓa túùmnɨ nùb jíìb mwánnè jábɨ́r ɓe àm kɨ́ á!

⁵²«Jábɨ́r á ɓe nyí nɨ̀gááŋ káàtàbì! Nyí yoonaá nɨ̀vɨ́tɨ̀b ɗɨɨ́ŋ jɨ̀r gɨ yɨ́ Mèèín. Nyí nɨ̀miib nyí jɨ̀r kɨ́ tùwá. Nùb ɗúce tùnɨ jɨ̀r kíì, nyí a hàrè ŋgáb.»

⁵³Ɓwâ Yésù yi éíhó̧ ɓèé, nɨ̀gááŋ káàtàbì ɓe Fàrísààb ɨ́ óknàɓà ŋgə́ njù̧, á ŋgáb yaré ŋgə́ fɔ́tèènɨ fɔ́ kwin kwin.

⁵⁴Ŋgáb ya fɔ́kom ŋgə́ vùùm fɔ́ kíì mánɨ sɨ̀ɨ̀ŋ nyindíí vúm ɓa ŋgə́ ya bìniì á.