Read Vute Lúkàs 13 Bible Online

Lúkàs 13 - Vute bible

Lúkàs 13

¹Ɓwâ kɨ́ á nùb kù go átɨ̀nànɨ Yésù sà̧à̧ nùb Gàlìléè, Pìlât nò du gómnàà ya ndɨŋ kùb ndùùkɨ́ ɓwâ ŋgáb ya du Mèín nànɨ satɨgàà rɨ.

²Á Yésù tacuna ŋgáb: «Nyí lə́mne hȩ kùb ya nduukɨ́ nùb kɨ́ u̧ kɨ́, yɨɨ́m àm ŋgáb yi du cɨcóòm ndóóŋ nùb Gàlìléè yi meré á à?

³Ɗàwá, ɨ́dù mɨ tànà nyí, nyí ɨ́ dù sum ɓàndɨ̀wá, nyí á ndùkɓwênɨ hȩ ŋgáb u̧.

⁴Kɨ́ nùb cóóŋ ɨ́ sə́r dúú kàm nyáam Sìlòwê ya təmkɨ́ rɨ cè, nyí lə́mne yi du àm ŋgáb yi ndɨŋ ɓáŋhîn ndóóŋ nùb Yèrúsàlèm meré á à?

⁵Ɗàwá, ɨ́dù mɨ tànà nyí, nyí ɨ́ dù sum ɓàndɨ̀wá, nyí á ndùkɓwênɨ hȩ ŋgáb.»

⁶Á Yésù ga̧a̧na ŋgáb gɨ̀gàìn ɨnè: «Nɨ̀ŋgwá kù ya ɗoŋtɨ́ sáá no mwa̧á̧. Ye kù, ŋgə́ ɨ́ gò àm koŋ sáá. Ŋgə́ ɨ́ kwà sáá kɨ́ nɨ gòmwá.

⁷Á ŋgə́ tana nò gə́tɨ mwarí ɨnè: ‹Á cɨ̀ mwáín dáín taarɨ́b, mɨ á gònɨ àm mɨ koŋ sáá, mɨ a kwà ŋgə́ nɨ gòmwá. Cə́bkɨ̂m ŋgə́! Nɨ́m ŋgə́ duce mɨ̀yɨ́hé ɓè gànɨ samí á cè ní?›

⁸Ɨ́dù nò gə́tɨ mwarí ɨ́ tàcù ɨnè: ‹Tá, mbɨ́kkwaye ŋgə́ dáín ndè no; mɨ ɓa lùùŋndénɨ ɗɔ̀ɔ́b kùkùníì mɨ́cɨní á.

⁹Ŋgə́ yè tɨ̀ gom dáín cùrìì kè; ŋgə́ ɨ́ dùkwàhâ nɨ́ gòmwá, wu a tàgì kùb cə́bkíi.› »

¹⁰Ye Sàbáà kù, Yésù yaá tɔ̀hí dúú mɨ̀yú̧ú̧ no.

¹¹Nɨ̀gwi kù nyéhè ɓáŋhîn ya bɨrékɨ́ tɨmnîn á cɨ̀ dáín cóóŋ ɨ́ sə́r yaá yó ku. Ya nɨ́ sàmàìn ŋgə́ ə́əŋwúɓa ɗɨ́ɗɨ̧́ ɗàà.

¹²Ɓwâ Yésù pə́ nɨ̀gwi rèè, ŋgə́ ɨ́ ɓê ŋgə́ á ŋgə́ ta: «Yàáŋ, wu ɓáíhó̧tɨ́ yáb wo rè no.»

¹³Ŋgə́ ɨ́ hèìwû ŋgə́ ngáár ŋgwéé. Ɓè mu̧u̧, nɨ̀gwi rè ɨ́ ɗə́ə̀ŋwû còóm. Ŋgə́ ɨ́ yàrê mgbíìnɨ Mèín.

¹⁴Ɨ́dù mvèìn dúú mɨ̀yú̧ú̧ yi ónɨ ɓáŋhîn àm Yésù ya wáŋhȩ nɨ̀vɨ́tè ye Sàbáà kɨ́. Á ŋgə́ tana nɨ̀vɨ́tɨ̀b ɨnè: «Jíìb kùb éí ə́r nóò á tínmwi̧, gonáam kùb wáàŋnà nyí yáb nyínè jíìb kɨ́ no, ɨ́ ndôŋ ye Sàbáà!»

¹⁵Á Kéké tasona ŋgə́ ɨnè: «Mɨ̀yooɗíím bɨ rè, ye Sàbáà, nɨ̀mwi̧ á hà pàrɨ̀nɨ ndèìn noò kɨ́ kù tɨ́ha̧ nóò gènɨ ŋgə́ mvúm mènnɨ ye!

¹⁶Nɨ̀gwi rè cè, nyȩ Àbɨ̀ràháàm á, Sátàìn yi kóttɨ́ ŋgə́ á cɨ̀ mwáín dáín cóóŋ ɨ́ sə́r. Tɨ nɨ ɗúwa pàrɨ̀hó̧kɨ́ ŋgə́ lí kɨ́ no ye Sàbáà* à?»

¹⁷Pìí Yésùù kɨ́ ɨ́ nàɓà nɨ́ nùb ɓe ŋgə́ ya ndáŋkom kɨ́ sə̀ré; ɨ́dù nùb yi du ɓèé lâs yaá óknɨ mɨ̀tù ɓe nɨ́ɨ́b kàtɨ́b nyɔ̧ɔ̧́ Yésù ya ndɨŋkom kɨ́.

¹⁸Yésù ɨ́ tà: «Ŋgɔ̧́ɔ̧̀ Mèèín á fɨ́tîn ɓe ní? Ɓe ní á mɨ fɨ́tɨɓaye ŋgə́ ɗóònɨ?

¹⁹Ŋgɔ̧́ɔ̧̀ Mèèín kɨ́ á fɨ́tîn ɓe íì ti mùtáàrdə̀ nɨ̀ŋgwá kù áá, ŋgə́ ɨ́ ɗòŋ no mwa̧né. Íì kɨ́ ɨ́ sû, ŋgə́ ɨ́ sèìcɨ̀ nɨ́ yɔ̀, gààì ɨ́ gò óóŋ ɓoò taàm noò ya óŋnɨ.»

²⁰Yésù ɨ́ tàkwà: «Ɓe ní á mɨ fɨ́tɨ ɗóònɨ Ŋgɔ̧́ɔ̧̀ Mèèín?

²¹Ŋgə́ á fɨ́tîn ɓe mvùùŋ nɨ̀gwi kù áá, ŋgə́ ɨ́ yɨ̀ɨ̀mndê kílò fàrîn vɨríí ɨ́ ŋgiì no, ɗà fàrîn kɨ́ lâs ɨ́ mwîn.»

²²Yésù yaá gɨ̀sénɨ péín Yèrúsàlèm ŋgə́ a tɔɔséce kwɨ́ì jííb ɓe kɨ́b mɨ̀tâín yi du jȩ̀nè no.

²³Á nò kù fɔ́ ŋgə́ ɨnè: «Tá, nùb kwá ɓállé á ɗóò bɨ ŋgób à?» Yésù ɨ́ pìhè ɨnè:

²⁴«Mánáhá nɨ lə́ŋdóŋnɨ ɓavɨ̀r háŋnɨ́nne; ɓetí mɨ tànà nyí, nɨ̀vɨ́tɨ̀b ví̧i̧ ɓa mánɨ no lə́ndóŋnɨ á, a yɔ̂ nɨ́ ŋgáb.

²⁵«Ɓwâ tá dúhéé ɓa éíwúnɨ, ŋgə́ ɨ́ kpàìkî ɓavɨ̀rì, nyí ɓa mènɨ lúu á, nyí a yà kùtɨ̀nɨ ɓavɨ̀r nyí a tace: ‹Tá, kuumnam nɨ́m.› Ŋgə́ ɓa nyí tàcùhó̧nànɨ ɨnè á: ‹Mɨ ɗəəŋce nyí macè na bɨ!›

²⁶Ɓè á nyí ɓagɨ ŋgə́ tànànɨ ɨnè: ‹Nɨ́me náb yi taŋɓáatɨ́ cɔŋ, wu yi tɔɔteetɨ́ jɨ̀sɨ́b nɨ́mè kwéè no.›

²⁷Ŋgə́ ɓa nyí tànàkwànɨ ɨnè á: ‹Mɨ ɗəəŋce nyí macè na bɨ! Éíkɨ́ná mɨ íhín, nùb du ndɨ̀ŋnɨ ɓáŋhɨ́b ɗàrɨ́!›

²⁸Ɓè á nyí ɓa kɨ́ínɨ nyí a ŋgáíce nyíín njù̧ú̧, ɓwâ nyí ɓa pénɨ Ábɨ̀ràhâm, Ìsâk, Yákòb ɓe tɨ́kɨ̀nɨ́b Mèèín lâs Haam Mèèín no; kɨ́ nyínè, nyí á cè lúu rɨ!

²⁹Nɨ̀vɨ́tɨ̀b kwá go péín mvii fó̧ré ɓe péín mvii lə́ré, péín haré ɓe péín sunné, ŋgáb a gò dùrénɨ tə́bə̀rèè Haam Mèèín no tàŋnɨ cɔŋ.

³⁰Ɓwâ kɨ́ á gɨ̀ nùb kù tɨŋtɨ̀ŋ nùb du cùrì ɗàròò, kwá ducu tíí. Nùb kù duce tíí kwá ducuce cùrì.»

³¹Mvókín kɨ́ no, Fàrísààb kù ɨ́ gò tànànɨ Yésù ɨnè: «Éíkɨ́ wu hò̧, gɨndóŋ wu tíí, ɓetí Hèrôdə̀ á ɗúnɨ ndɨ̀ŋnɨ kùb kwíì wu.»

³²Yésù ɨ́ tàcùnà ŋgáb ɨnè: «Gɨnáam tànànɨ nyàm ti ɗàrɨ́ ɨnè: ‹Mɨ á jùnɨ nɨ̀wàtɨ̀b, mɨ a wáŋhȩ̀ nɨ̀yáàb mwáín ɓe yȩȩ́, jíì taarɨ́bí mɨ a cáŋhȩ̀ nɨ́m tɨ ɗú mɨ ndɨ̀ŋte.›

³³Ɨ́dù á ɗúnɨ mɨ gɨ̀ndóŋ tíí mwáín, yȩȩ́ ɓe yecùrì, ɓetí nɨ mîn kùb kwíì tɨ́kìn Mèèín yɨ́ kù ɗàà sé Yèrúsàlèm.

³⁴«Nùb Yèrúsàlèèm, nùb Yèrúsàlèèm, nyí nùb kwíikɨ́ tɨ́kɨ̀nɨ́b Mèèín nyí a lóòŋkwíìkî nùb Mèín tómwona nyínè ɓe sɨɨ rɨ́! Gwì meeb á mɨ ɗú nyí ɓáànɨ mo gín síhé hȩ cene ɓáace munɨ́b noò no ɓusɨnné, nyí ɨ́ mvû!

³⁵À pə́náye, Mèín ɓa nyí jì̧ì̧kɨ́sònànɨ kwɨ́í nyínè kɨ́ gwìí mwi̧í̧ mu̧u̧ á. Mɨ tanaɓa nyí wááŋ á. Yànɨ ɗàrò, nyí tɨ̀ nɨ mɨ pə́cɨ̀r há̧á̧ hȩ nyí ɓa tànɨ: ‹Mèín fàmɓà nò Kéké tómwo ɗàrɨ́!› »