Read Vute Lúkàs 14 Bible Online

Lúkàs 14 - Vute bible

Lúkàs 14

¹Ye Sàbáà kù, mvèìn Fàrísàbì kù ɨ́ ɓésò Yésù cɔŋ no yó. Nùb yi du yó kwe ɨ́ yà góòmnyààŋnɨ Yésù pénɨ nɨ́m ŋgə́ ɓa ndɨ̀ŋniì.

²Nɨ̀ŋgwá kù yáb ɓɔ̧ne yi du ndɨ̀ŋniì ɨ́ gò ə́ə̀ŋnɨ Yésùù tíí.

³Á Yésù fɔ́ nɨ̀gááŋ káàtàbì ɓe Fàrísààb ɨnè: «Ɓíì Mòyíìs á tànɨ kùb wáàŋ nɨ̀vɨ́tè ye Sàbáà kèè kùb bɨ wáŋhɨ̀r?»

⁴Ŋgáb yɨrɨ́b. Á Yésù ɗaamndóŋwo nɨ̀yáb lè, ŋgə́ ɨ́ wáŋnè ŋgə́, á ŋgə́ tana nɨ̀ŋgwá rè: «Gɨ̀ wu!»

⁵Yésù ɨ́ fɔ̂ ŋgáb: «Mvókín nyínè no, nò kù duú ɓe mwin, kɨ́ kù ndèìn, ɨ́ gùrê lááŋ mvúmí no, ŋgə́ tɨ̀ nɨ ŋgə́ ɓè mu̧u̧ ɗàmcùhó̧wa àm tɨ du nɨ́ ye Sàbáà à?»

⁶Pìí fɔ́ kíì ɨ́ yɔ́kkwàhâ ŋgáb.

⁷Hȩ Yésù yi pə́ nùb kùb yi ɓéworé jùndɨ̀nɨ ju tíí, á ŋgə́ nyinna nɨ̀vɨ́tɨ̀b ɓe gɨ̀gàìn ɨnè:

⁸«Ɓwâ nò kù ɓé wu cɔŋ jùrúb gùmní rɨ, wu wu ju tíí jùndɨ̀r, kɨ́ kù kùb yè tɨ ɓéɓwéetɨ́ bɨ́ nò ndóŋ wé kè.

⁹Ɗà nò tɨ ɓéwoɓáhe nyíne nò kíì a gò wu tànànɨ ɨnè: ‹Mbɨ́knam ŋgə́ mɨ̀yɨ́ juù kɨ́.› ɗú wu éícùwúcɨ̀ ɓè sə̀ré ŋgwȩ́ȩ́ gìnɨ dùrénɨ ju cùrìì ya á.

¹⁰Kùb ɨ́ ɓê bɨ́ wu cɔŋ jùrúb gùmní, gɨ̀ wu dùrénɨ ju cùrìì ya, àm ɓwâ nò tɨ ɓé wé ɓa féínwòniì, ŋgə́ a tànà wu: ‹Á! Ɓwàjìrí moò, wu duce wú cùrì ɓe ní, gòm dùnɨ tíí hò̧.› Yɨ́ kɨ́ ɓè, nùb kùb tɨ ɓéɓáhe nyíne ŋgábè lâs, wu ɓa dùnɨ ɓe dɨmɨɨr ŋgábè tíí á.

¹¹Ɓetí nò gewú síí nóò còmné, Mèín ɓa nò kɨ́ gèsénɨ ɗàá á. Nò geséce síí nóò ɗàá, Mèín ɓa nò kɨ́ gèwúnɨ còóm á.»

¹²Á Yésù tana nò tɨ ɓé ŋgə́ cɔɔ̀ŋ ɨnè: «Ɓwâ wu si cɔŋ jùrúbí, nɨ ɗúwa wu ɓé ɓwàjììb woò, dùgɨ̀ nùb wo gbàŋné, dùgɨ̀ nùb njɔdìì wo gín síhé; wu ɓétɨ́ ŋgáb, ŋgáb tɨ̀ ɓécuɓwéeháce bɨ́ wu ye kù ɓáàbnɨ nyər kɨ́.

¹³Ɨ́dù ɓwâ wu si cɔŋ jùrúbí, ɓébɨ̂ŋ wu nùb tiri, nùb ɗə́əm, nùb cəə́ŋ cə̧né ɓe ɓùɓú̧ù̧b.

¹⁴Wu ɓa dùnɨ ɓe mɨ̀tù á, ɓetí sàmàìn ŋgáb ɓa wu ɓáàbnɨ nyər kíì ɗàà. Mèín nɨ̀mɨr kwá ɓáabna wu ɓwâ ŋgə́ ɓa sə̀ə̀mcùhó̧nɨ nùb ya ndɨŋ nyɔ̧né cwéé rɨ.»

¹⁵Á nɨ̀mwi̧ kpáín nùb ya du cɔɔ̀ŋ ya ók nyindí kíì, tana Yésù ɨnè: «Mɨ̀tù á ɓe nò kwá taŋ cɔŋ noò Haam Mèèín nokwe!»

¹⁶Kí á Yésù nyinna ŋgə́ ɓe gɨ̀gàìn ɨnè: «Nɨ̀ŋgwá kù ya sií cɔŋ ví̧i̧, ŋgə́ ɨ́ ɓê nɨ̀vɨ́tɨ̀b ví̧i̧ gò tàŋnɨ.

¹⁷Ɓwâ cɔɔ̀ŋ ɨ́ ɗóhè, ŋgə́ ɨ́ tôm nò no ə́ré gɨ̀ tànànɨ nùb ŋgə́ tɨ ɓéré ɨnè: ‹Á sàmàìn nyí gocɨré, ɓetí nɨ́ɨ́b lâs á cɨ̀ nyaaŋkí̧i̧.›

¹⁸Ɨ́dù vùùm nùb ŋgə́ tɨ ɓéré lâs ɨ́ tà bɨ́ sàmàìn vúm goré ɗàà. Nò tíí ɨ́ tà: ‹Mɨ guttɨ́ mwar, ɗúce mɨ gɨ̀ pénɨ mwai kɨ́ á, mɨ yóóŋ wu, tɨ́í mɨ.›

¹⁹Nò kù mwi̧í̧ ɨ́ tà: ‹Mɨ guttɨ́ ndèìn cóóŋ àm ɗȩ̀hí̧, á ɗúnɨ mɨ gɨ̀ ŋgáb kə̀knɨ pénɨ hȩ ŋgáb ɓa ə́nniì. Mɨ yóóŋ wu, tɨ́í mɨ.›

²⁰Nò mwi̧ kù ɨ́ tàcè: ‹Mɨ á yè mɨ náámbè, àm kɨ́ á du sàmàìn mɨ goré ɗàà ru.›

²¹Nò ə́ré rè ɨ́ gècùwònà tá no ə́ré pénè bɨ kɨ́ lâs. Á tá no ə́ré kɨ́ ókɓa njù̧, ŋgə́ ɨ́ tànà nò no ə́ré rè ɨnè: ‹Kɔ́klîn, gɨm laŋtaaŋ jííbí ɓe jìíb kwé tə̧né lâs no, wu a ɓétèèwò nùb tiri, nùb ɗə́əm, ɓùɓú̧ù̧b ɓe nùb cəə́ŋ cə̧né.›

²²Mvin ti ŋgób, nò ə́ré ɨ́ cùwò tànànɨ tá no ə́ré ɨnè: ‹Tá, mɨ ndɨŋtɨ́ hȩ wu tɨ taré, ɨ́dù mɨ̀yɨ́ juù á ɓàyè nɨ ku.›

²³Á nɨ̀ŋgwá rè tana nò no ə́ré: ‹Gɨm jìíb kwɨ́íbɨ̀nnè ɓe jìíb mwaibɨnne lâs, kpɔ́ɔwom nɨ̀vɨ́tɨ̀b ŋgáb gò lénɨ. Á ɗúnɨ dúú mó rè yúktɨ.

²⁴Nɨ́m duré á, nùb mɨ tɨ ɓéyaye ɨ́ nyàhȩ̀ gònɨ rɨ, dugɨ nɨ̀mwi̧ tɨ̀ nɨ cɔŋ mo rè kə̧ə̧́ rɨ kə̀kkɨ́ɓàr!› »

²⁵Yésù yaá gùrí jȩ̀ȩ̀ ɓe kùŋkùŋ kàm nɨ̀vɨ́tɨ̀bì, á ŋgə́ ɓandɨ́curé ŋgáb no, ŋgə́ ɨ́ tà:

²⁶«Nò ɗú mɨ tùniì, nò kɨ́ ɗú mɨ a ŋdôŋ tá noò, yà nóò, gwi noò, munɨ́b noò, mwin yàáb noò nɨ̀ŋgwáàb ɓe nɨ̀gub, dùgɨ̀ síí ŋgə́ nɨ̀mɨrí. Duú u̧ ɗàà, sàmàìn ŋgə́ du nɨ̀fuùb moò ɗàà.

²⁷Nò du bàŋ noò hàìnwá mɨ tùniì, sàmàìn nò kɨ́ du nɨ̀fuùb moò ɗàà.

²⁸Nɨ̀mwi̧ mvókín nyínè noò ɨ́ ɗû óŋnɨ dúú kàm jíri, ŋgə́ ɓaye dùrénɨ ɗàá á, ŋgə́ a mâ ɗə̀ə̀ŋnɨ vùùm mwèìn du ŋgə́ ɗúnànɨ ɓe ɨ́r ə́r kíì. Ŋgə́ a pê kɨ́ no ŋgáréè, yè á sàmàìn cáŋhȩ ə́r kíì kè.

²⁹Ɓetí ŋgə́ ɨ́ yàrê ə́r dúú kíì, ŋgə́ ɨ́ dù nɨ́ cáàŋwá, nùb lâs ɓa pénɨ ə́r kíì ɓa ŋgə́ kə́ə̀nɨ á.

³⁰Ŋgáb a tà: ‹Kɨ́ rè yaré ɓaháá ə́r dúhéé hò̧ hȩ nɨ̀vɨ́tè, féín tə̧ə̧́ yɔ́kléci nɨ́ ŋgə́!›

³¹Nɨ́m mwi̧ ɓwê ɓe mvèìn jíri, ɓwâ ŋgə́ ɗú gànnɨ kùŋ noò mvèìn su rɨ, ŋgə́ á dùréyènɨ ɗàá mánɨ pénɨ yè á sàmàìn ní gainme nò kɨ́ su ɓe nɨ̀vɨ́tɨ̀b tɔ́sìn cóóŋ kè. U̧ kɨ́ nò kɨ́ á cɨ̀ nɨ gònɨ jȩ̀ȩ̀ ɓe nɨ̀vɨ́tɨ̀b tɔ́sìn vɨríí.

³²Ŋgə́ ɨ́ pê ɓa nɨ ní yɔ́knɨ á, ŋgə́ á tómsònànɨ kùŋ noò mvèìn tɨ́pénɨ̀b ɓwâ ŋgə́ duye nɨ́ cóo rɨ, tànànɨ nò kɨ́ vúme ŋgə́ nyààŋkɨ́ àm.»

³³Á Yésù ɓaaré, ŋgə́ ɨ́ tà: «Àm kɨ́ á mɨ tana nyí, nò du nɨ́ sàmàìn mbɨ́kkɨ́so nɨ́ɨ́b noò lâs ɗàwáá, sàmàìn du nɨ̀fuùb moò nɨ ɗàà ru.»

³⁴«Mbeè duɓa nɨ́m nyɔ̧ɔ̧́ á, ɨ́dù ɗɨ́ɗóme ŋgéé ɨ́ cɔ̧̂, ɨna á kùb ɓa ndɨ̀ŋnɨ ŋgə́ a ɗómcù?

³⁵Sàmàìn kùb kɨ́kléɓacéye ŋgə́ ɗɔ̀bín kɨ́ kù kùkùní àm nɨ́m ɗo̧ó̧ a hàm ɓe kíí ɗàà. Kùb a wààhó̧sòkî bɨ́ lúu. Nò du ɓe tó ók àmnì, óknyààŋtɨ!»