Read Vute Lúkàs 16 Bible Online

Lúkàs 16 - Vute bible

Lúkàs 16

¹Yésù ɨ́ tànà nɨ̀fuùb noò ɨnè: «Nɨ̀ŋgwá njɔdìì kù yaá ɓe nò no ə́ré yi gə́tɨnakom ŋgə́ njɔdì no kíì. Á kùb go ŋgə́ tànànɨ naá, nò no ə́ré rè á nɨ njɔdì kɨ́ ɓáàŋkɨ́nɨ yáá.

²Tá no ə́ré ɨ́ ɓéwò ŋgə́, ŋgə́ ɨ́ fɔ̂ ŋgə́ ɨnè: ‹Nɨ́m mɨ ók wu du ndɨ̀ŋnɨ rè àmɨɨr á à! Tanaye mɨ nɨ́m wu ndɨŋ ɓe njɔdì moò, ɓetí wu tɨ̀ wu njɔdì mo kɨ́ gə́tɨ̀cɨ̀r.›

³Á nò ə́ré rè lə́əmɓa no sumí, ŋgə́ ɨ́ tà ɨnè: ‹Kùb ɓa mɨ ákɨ́nɨ ə́ré á. Mɨ ɓe nyòm ɗȩ̀hí̧ ɗàà. Mɨ mbàìntèècé mbàìn, àm sə̀réé á. Mɨ tɨ̀ ndɨŋ i̧?

⁴Àhâ̧! Mɨ ɗəəŋtɨ́ nɨ́m mɨ ɓa ndɨ̀ŋnɨ ɗà nɨ̀vɨ́tɨ̀b a pə́wû mɨ íí ya, ɓwâ kùb ɓa mɨ ákɨ́nɨ ə́ré!›

⁵Kí á nùb yi du ɓe nyamandì tá no ə́ré kɨ́ sóò lâs, ŋgə́ ɨ́ ɓétèèwò ŋgáb mwi̧í̧ mwi̧. Ŋgə́ ɨ́ fɔ̂ nò tíí ɨnè: ‹Tá mo ə́ré á wu tùnɨ meeb?›

⁶Nò kɨ́ ɨ́ tà: ‹Jôk kúrúmì təmərì mwi̧.› Á ŋgə́ tana nò kɨ́: ‹Káàtà nyamandìì woò á rè. Duréem ɗàá, wu a tɨ̀nndê vii bɨrɨ́b ɨ́ cóóŋ, kɔ́klîn.›

⁷Ŋgə́ ɨ́ fɔ̂ nò kù mwi̧í̧ ɨnè: ‹Kɨ́ woò á cè meeb?› Nò kɨ́ ɨ́ tà: ‹Kùtú mɨ́ŋgòŋnì vii ŋgiì.› Á ŋgə́ tana nò kɨ́: ‹Káàtà nyamandìì woò á rè, tɨnndéem vii nààsɨ̀b.›

⁸Á nɨ̀ŋgwá njɔdìì rè ya kúumɓa wóóŋ mutí no ə́ré ɓe nɨ́m ŋgə́ yi ndɨŋ kɨ́. Ɓetí nùb ɗɔ̀ɔ́b lè noò á bɨ wóŋnɨ́b cei mvókín ŋgábè no, ndóóŋ nɨ́ nùb ók ɓe Kékéé.»

⁹Á Yésù ta: «Ɨ́dù kɨ́ moò mɨ tànà nyí, njɔdì pɨ̀mní kɨ́, gɔknáam bìnɨ ɓwàjììb no, àm ɓwâ nɨ́ɨ́b kɨ́ ɓa nyí tùŋniì, Mèín a gèrê nyí haam noò no kɨ́ gwìí mwi̧í̧.

¹⁰Nò gə́tɨnyaaŋɓa nɨ́m ti ŋgóbtií á sàmàìn kùb səŋ gíí ŋgə́ ɓa gə́tɨ̀nɨ kɨ́ ví̧ne. Ɨ́dù nò geré wóóŋ nɨ́m ti ŋgóbtií noò, sàmàìn kùb səŋ gíí ŋgə́ ɓa gə́tɨ̀nɨ kɨ́ ví̧ne á na nɨ ɗàà.

¹¹Hȩ nyí gerékɨ́yaye wóóŋ mwèìn ɗɔ̀bɨ́nné du nyí mbáàŋnɨ rè no rè, i̧ á cè kùb ɓa nyí nàrénɨ njɔdì àmɨrìí ŋgáré nyí gə́tìi?

¹²Hȩ nyí gerékɨ́yaye wóóŋ njɔdì kùbè no rè, i̧ á cè kùb ɓa nyí nànɨ kɨ́ ók ɓe nyínè nyí gə́tìi?

¹³«Nɨ̀vɨ́tè mwi̧ sàmàìn éína ta ə́ré bɨrɨ́b ɗàà. Ŋgə́ tɨ̀ jɨhá nɨ̀mwi̧ ŋgə́ a ɗúcê nɨ̀mwi̧ kù. Ŋgə́ tɨ̀ jəŋhá nɨ̀mwi̧, nɨ̀mwi̧ kù ŋgə́ a sàkkî ŋgə́. Sàmàìn nyí éína Mèín ɓe mòné wùúm mwi̧í̧ nɨ ɗàà.»

¹⁴Hȩ Fàrísààb ya ɗúɓa bɨ́ àm mònéè cei lèé, ŋgáb ɨ́ yà sə̀rɨ̀nɨ Yésù ɓe nyindí ŋgə́ yi nyin kɨ́.

¹⁵Kí á Yésù tana ŋgáb: «Nɨ̀vɨ́tɨ̀bì tíí, nyí á ɗúnɨ túùmnɨ vúm nùb ɗɨ́ɗɨ̧́ á, ɨ́dù Mèín ɗəəŋtɨ́ njɔ̧̀ nyínè. Ɓetí nɨ́m nɨ̀vɨ́tɨ̀b du pə́ɓànɨ duna vúm nɨ́m jíri á rɨ, nɨ́m kɨ́ á Mèín du jìnɨ.

¹⁶«Ɓíhɨ̀b Mòyíìs ɓe káàtààb tɨ́kɨ̀nɨ́bí yi yəŋtɨ́ há̧á̧ ɓwâ ya Jâŋ nò kɔhɨ kùb kɔ ə́mní, yànɨ ɓwâ kɨ́ á cè kùb yaré àànɨ Kìn Nyɔ̧ɔ̧́ du ɓe ɨ́r Ŋgɔ̧́ɔ̧̀ Mèèín. Nò lâs á cè lɨ̀ɨ̀ŋhánɨ lénɨ Haam Mèèín no.

¹⁷Ɨ́dù, á kə́sə́k ɓɨɨr ɓe ɗɔ̀ɔ́b cɔ̧́tɨ. Nɨ́m mwi̧, kumsiì ti ɓíhì mwi̧ ɓà rɨ sàmàìn cɔ̧́ u̧nèé ɗàà.

¹⁸«Nò ŋgɨ́íɓa gwi noò ɗà ɨ́ ɓùcù kɨ́ jií, ndɨŋtɨ́ mààŋ. Nò ɓuce nɨ̀gwi ŋgwáá noò tɨ ŋgɨ́llé, ndɨŋtɨ́ mààŋ.»

¹⁹«Nɨ̀ŋgwá njɔdìì kù yaá ku. Júúb noò lâs yaá júúb kàtɨ́b mònéè. Ŋgə́ yaáɓà dùnɨ nyɔ̧ɔ̧́, ŋgə́ a taŋce nyɔ̧ɔ̧́ ye lâs.

²⁰Nɨ̀ŋgwá ti tiri kù yaá ɓwê ku, ɨ́r noò yaá Làjáàr. Síí nóò yaá ɓààì kɨ́ ɓààì. Ye lâs ŋgə́ yaá gònɨ nɨ̀ŋgwá njɔdìì rè ɓavɨ̀rì dùmóŋnɨ cɔŋ.

²¹Ŋgə́ yaá lə́ə̀mnɨ ɓè kùb tɨ waawonaɗóoháye ní kumsiì du sùtɨ̀sónɨ tə́bə̀rè rɨ naa. Lɨ̀r yaáɓàcê gònɨ nèèmɨ̀nɨ ɓààì no só rè.

²²Ɓwâ Làjáàr yi kúré, dùgallɨb Mèèín ɨ́ hàìngè bɨ́ ŋgə́ Haam Mèèín no, gín Àbɨ̀ràhâm. Nɨ̀ŋgwá njɔdìì rè ɨ́ kúɓwê kùb ɨ́ vɨ́rè ŋgə́.

²³Ŋgə́ á cè ko̧ó̧ yɨ́ jábɨ́rí á ŋgə́ pə́wúso Àbɨ̀ràhâm. Làjáàr cè gín Àbɨ̀ràhâm du̧ú̧.

²⁴Kí á ŋgə́ kɨ́ŋɓéwúso, ŋgə́ ɨ́ tà: ‹Yée bɨ̀bá, Àbɨ̀ràhâm, ók mɨ mwàm. Tanam Làjáàr ŋgə́ còbléwò mbə́re mvúúm, ŋgə́ a gò mɨ ndòòmnànɨ yúum, ɓetí wa rè ndóoŋtɨ́ mɨ.›

²⁵Ɨ́dù Àbɨ̀ràhâm ɨ́ tà: ‹Mwin móò, ɗəəŋcum ɨnayâna, mè woò no wu yaá dùnɨ ju nyɔ̧ɔ̧́, Làjáàr a pə́ce jábɨ́r. Ɗàrò, kùb na bɨ ŋgə́ ju nyɔ̧ɔ̧́ ŋgə́ uwènɨ uwehîn á. Wu a pə́cuce jábɨ́r.

²⁶Féínkwàcée, njaŋnjɨ̧ kàm kù á nɨ mvókín nɨ́me nábè, àm nùb nɨ́mè hò̧ne ɗú gɨ̀sònɨ kwe a dù bɨ́ ndôŋ. Nùb ɗúce éíwònɨ nyínè kwe gònɨ hò̧neè a dù bɨ́ ndóŋɓwê.›

²⁷Á nɨ̀ŋgwá njɔdìì rè ta ɨnè: ‹Bɨ̀bá, hȩ du u̧ kɨ́, tómsom Làjáàr tá moò yó,

²⁸mwin yàáb moò á ku ŋgiì. Ŋgə́ gɨ̀ ŋgáb tànànɨ ŋgáb gə́tìi, ŋgáb tɨ̀ goɓwée bɨ́ yɨ́ jábɨ́r yînɨ́mí rè.›

²⁹Àbɨ̀ràhâm ɨ́ tànà ŋgə́: ‹Ɓíhɨ̀b Mòyíìs ɓe káàtààb tɨ́kɨ̀nɨ́b Mèèín á ku, ɗú ŋgáb jə̀ŋ nɨ́ɨ́b kɨ́ á. Kí ɨ́ fɨ́tɨ tànànɨ ŋgáb, ŋgáb gə́tìi ru!›

³⁰Á nɨ̀ŋgwá njɔdìì rè tacu: ‹Dugɨ u̧, nɨ ɗóòwá, ɗúɓa nɨ nò cuhó̧ sèrɨ̀nnè gɨ̀ɓà ŋgáb tànànɨ á, ŋgáb a ɓàndɨ̀gì sum.›

³¹Ɨ́dù Àbɨ̀ràhâm ɨ́ tànà ŋgə́ ɨnè: ‹Ŋgáb ɨ́ dù bɨ́ ɓíì Mòyíìs ɓe káàtààb tɨ́kɨ̀nɨ́b Mèèín kɨ́ jə̀ŋwá, nò kù tií fó̧cugɨ sèrìn gònɨ ŋgáb nyìnnànɨ, ŋgáb tɨ̀ bɨ ô.› »