Read Vute Lúkàs 17 Bible Online

Lúkàs 17 - Vute bible

Lúkàs 17

¹Yésù ɨ́ tànà nɨ̀fuùb noò ɨnè: «Nɨ́ɨ́b geré nɨ̀vɨ́tɨ̀b cumí kwá dulɨ́ŋhá nɨ́. Ɨ́dù jábɨ́r kwá du ɓe nò njóoré kùŋ noò cumí!

²Kɨ́ nò kíì, nyɔ̧ɔ̧́ á kùb kóllé ŋgə́ jùm kù ya lèrénɨ mɨ̀kwehɨ̀rí, ɨ́ ndôŋ kɨ́ ŋgə́ njóoré kùŋ noò cumí.

³Gə́tɨná nɨ! «Mwin yàá woò ɨ́ ndɨ̀ŋ ɓáŋhîn, yetɨɓam ŋgə́. Ŋgə́ ɨ́ ô, wu a tɨ́ì ŋgə́.

⁴Mvii mwi̧í̧ no, ŋgə́ ndɨ̀ŋgɨ̀ ɓáŋhîn gwì meeb ŋgə́ a goce wu ɓwèìnɨ tɨ́ɨ́r, tɨ́í ŋgə́.»

⁵Nùb tómé ɨ́ tànà Kéké ɨnè: «Taamnam nɨ́m ə́ə́m nɨ́mè!»

⁶Á Kéké tana ŋgáb ɨnè: «Ə́ə́m nyínè tɨ dùháyè tamnì ti, yè tɨ á sàmàìn nyí tana yɔ̀ rè: ‹Éíkɨ́ɨm ɓè, wu a gì dùnɨ mɨ̀kwehɨ̀rí›, yɔ̀ kɨ́ a éíkɨ́mè.»

⁷«Nɨ́m tàpéyè mvókín nyínè no, nɨ̀mwi̧ á ɓe nò ə́ré du ŋgə́ mwar ɗȩ̀nɨ̀nàniì, kɨ́ kù du ŋgə́ nyèém noò gə́tɨ̀nàniì. Ɓwâ ŋgə́ ɓa pénɨ nò ə́ré kɨ́ cùwònɨ mwa̧né, ŋgə́ tɨ̀ nɨ ŋgə́ ɓè mu̧u̧, ‹Gom cɔŋ tàŋnɨ› na tànàwá.

⁸Nɨ́m ŋgə́ ɓa ŋgə́ tànàniì á: ‹Sina mɨ cɔŋ, wu a cə́ndè júk. Wu a gèwònà mɨ cɔŋ kɨ́ mɨ tàŋtɨ. Mɨ taŋcáaŋtɨ́, wu a gòcùcè kɨ́ woò tàŋnɨ.›

⁹Wu tɨ̀ wu nò wo ə́ré kɨ́ sáktɨ̀wá àm ŋgə́ tɨ ndɨŋ nɨ́m wu tɨ ta ŋgə́ ndɨ̀ŋte.

¹⁰Kɨ́ nyínè duɓwée u̧ á. Ɓwâ nyí ndɨŋ nɨ́m Mèín ta nyí ndɨ̀ŋte, tanáam: ‹Nɨ́m du nɨ nùb ə́ré saai á, nɨ́m ndɨŋháce nɨ́ nɨ́m kùb ta nɨ́m ndɨ̀ŋte á.› »

¹¹Yésù yaá gìnɨ Yèrúsàlèm. Ŋgə́ ɨ́ téínsê ɗɔ̀ɔ́b Gàlìléè gìnɨ ɓàŋsénɨ ɗɔ̀ɔ́b Sàmàríì.

¹²Féín gín kwɨ́í kù, á njɨ̀ŋjə́ə̀b cóóŋ gainso Yésù. Ŋgáb ɨ́ ə́ə̀ŋsò bɨ́ cóo.

¹³Ŋgáb ɨ́ ya kɨ́ŋsònɨ ɨnè: «Yésù! Yée tá, ók nɨ́m mwàm!»

¹⁴Yésù pə́so ŋgáb, ŋgə́ ɨ́ tàsò: «Gɨnáam túùmnànɨ nùb na satɨgàà síí.»[3] Ŋgáb gɨ̀sénɨ á ŋgáb sɨ̀rɨ̀cì na njɨ̀ɨ̀b ŋgábè sutií nɨ́.

¹⁵Ɨ́dù nɨ̀mwi̧ mvókín ŋgábè noò, hȩ ŋgə́ pénɨ njɨ̀ɨ̀b níì sutií nɨ́ rèé, ŋgə́ ɨ́ ɓàndɨ̀cùwò nɨ́ cùrì, ŋgə́ a mgbíice Mèín kúu còóm.

¹⁶Ŋgə́ ɨ́ gò gùcáàmsénɨ Yésùù ɓusiín ŋgə́ sáktɨ̀nɨ. Nò yi cuwo nɨ́ kɨ́ yɨɨ́mcè nɨ́ nò Sàmàríì á.

¹⁷Yésù ɨ́ tà: «Ína njɨ̀njə́ə̀b cóóŋ lâs, njɨ̀ɨ̀b ŋgábè sutɨhaá ye! Nùb ɓwécɔ̧́ kù rè á cè bɨ́ ŋga?

¹⁸Kí du nò kù nɨ lə́ə̀mwá ní cùwòyè sáktɨ̀nɨ Mèèín, sé nò du nɨ́ nɨ̀gúr lè hàye?»

¹⁹Á Yésù tana nɨ̀ŋgwá Sàmàríì rè ɨnè: «Eíwúum còóm, gɨ wu nɨ́m wóò! Ə́ə́m wóò ɓátií wu.»

²⁰Fàrísààb ɨ́ fɔ̂ Yésù ɓwâ ŋge á Ŋgɔ̧́ɔ̧̀ Mèèín kɨ́ ɓa féínnɨ. Á Yésù piina ŋgáb ɨnè: «Ŋgɔ̧́ɔ̧̀ Mèèín nɨ nɨ́m kùb fɨ́tɨ pénɨ gòɓànɨ laŋtɨ̧né nɨ sé.

²¹Kùb tɨ̀ bɨ nyí tànàwá: ‹Pə́náye ŋgə́ á hò̧!› kɨ́ kù ‹Ŋgə́ á péín ndɨ!› na. Nɨ́m mwi̧, ɗəəŋnáɓam ɨnayâna Mèín á cɨ̀ nɨ nyí ya ŋgáŋnɨ.»

²²Á Yésù tana nɨ̀fuùb ɨnè: «Kwá du u̧u̧, nyí a tà: ‹Ɓwâ Mwin Nɨ̀rì ɓa cùwònɨ kɨ́, ɓè nɨ́me ŋgáb tɨ duhó̧háye mvii mwi̧í̧ naa›, ɨ́dù nyí a dù nɨ́ ŋgə́ pə̂r.

²³Kùb kwá tana nyí ɨnè: ‹Pə́sonáye péín ndɨ!› ‹Pə́náye hò̧!› nyí nɨ ku gɨ̀r, nyí cè nɨ́ ku lùgè.

²⁴Hȩ nyə́ŋhȩ̀ȩ́ nàhí du kùb sɨ̀rɨ̀nɨ mwa kɨ́ a gàkî ɗɔ̀ɔ́b bɨ̂ŋ ndɨ, u̧ á ɓwê cùwòó Mwin Nɨ̀rì ɓa dùnɨ fɨ́sɨɨm ɗà àm kɨ́ a gàkî ɗɔ̀ɔ́b lè bɨ̂ŋ.

²⁵Nɨ́m mwi̧, ɗú ŋgə́ pə́ɓàyè jábɨ́r cei á, nùb jíìb mwánnè a mvúlèhè ŋgə́.

²⁶Nɨ́m ɓa ndɨ̀ŋnɨ ɓwâ Mwin Nɨ̀rì ɓa cùwòniì tɨ̀ duɓwéece hȩ kɨ́ ya ndɨŋ ɓwâ ya Nòwéè rɨ.

²⁷Nɨ̀vɨ́tɨ̀b yaá tàŋnɨ ŋgáb a meice, ŋgáb yaá ɓùtèènɨ gùúm, há̧á̧ hȩ ye Nòwê lə́ kwánnè ya go ɗóòniì. Mbɨ̀ɨ̀ŋ kàm ndè ɨ́ gògì nɨ̀vɨ́tɨ̀b ndùùkɨ́nɨ.

²⁸Ɓa dùɓwênɨ hȩ ɓwâ ya Lóòt á: Nɨ̀vɨ́tɨ̀b yaá tàŋnɨ ŋgáb a meice, ŋgáb yaá gùrɨ̀nɨ nɨ́ɨ́b ŋgáb a sə́rɨce, ŋgáb yaá ɗòŋnɨ nɨ́ɨ́b ŋgáb a óoŋteece dúhɨ́b;

²⁹Ɨ́dù ye Lôt ya éíhó̧kɨ́ Sòdóòm, wa ɨ́ ndììsówò ɓɨllin, ɨ́ gò ndùùkɨ́nɨ nùb lâs.

³⁰Ye Mwin Nɨ̀rì ɓa mgbíí noò túùmniì, nɨ́m kɨ́ kwá ndɨŋɓwée u̧.

³¹«Ye Mwin Nɨ̀rì kwá cuwo kɨ́, nò kwá du ŋgwé dúhéé sótɨ́ ə́llénɨ, ŋgə́ nɨ yó lə́cuyè árɨ̀nɨ nɨ́ɨ́b noò; wu dùgɨ̀ mwa̧á̧ yoo, wu wu yó cùwòyè.

³²Lə́əmcunáam nɨ́m ya ndóŋ ɓe gwi Lóòt.

³³Ɓetí nò kwá má ɓátɨ̀nɨ mè noò, kwá məm mè no kɨ́. Ɨ́dù no məm mè noò ɓe ɨ́r moò kwá céín mè no kɨ́.

³⁴Mɨ tanaɓa nyí àmɨɨr wááŋ á, ɓwâ kɨ́ nɨ̀vɨ́tɨ̀b bɨrɨ́b ɨ́ dù kòó gwîn, kùb a hàìnhô̧ nɨ̀mwi̧, nɨ̀mwi̧ a mècê.

³⁵Nɨ̀gub bɨrɨ́b ɨ́ dù gwìí, kùb a hàìnhô̧ nɨ̀mwi̧, nɨ̀mwi̧ a mècê. [

³⁶Nɨ̀ŋgwáàb bɨrɨ́b ɨ́ dù mwa̧á̧, kùb a hàìnhô̧ nɨ̀mwi̧, nɨ̀mwi̧ a mècê.]»

³⁷Á nɨ̀fuùb Yésùù fɔ́ ŋgə́ ɨnè: «Kéké, nɨ́ɨ́b kɨ́ kwá ndɨŋce bɨ́ ŋga?» Á ŋgə́ piina ŋgáb ɓe gɨ̀gàìn ɨnè: «Yɨ́ fín nyèmì səmndé, yɨ́ gbə́ ɓáaceré á ye.»