Read Vute Lúkàs 18 Bible Online

Lúkàs 18 - Vute bible

Lúkàs 18

¹Yésù ɨ́ gà̧à̧nà nɨ̀fuùb noò gɨ̀gàìn, tànànɨ ŋgáb ɨnayâna ɗú ŋgáb yóŋ Mèín ɓe mɨ̀súktéín á.

²Gɨ̀gàìn kɨ́ á ɨnè: «Kwɨ́í kù no, tɨ́ŋgù̧ú̧ kù yaá ku. Ŋgə́ yi nɨ́ Mèín jə̀ŋnɨ ɗàà, ŋgə́ yɨɨ́mɓwê pénɨ kùb mvɨ̀tí ŋgwéé ɗàà.

³Mámkwííb kù yaá ɓwê kwɨ́í kɨ́ no. Ŋgə́ yaá gòlɨ́ŋnɨ yɨ́ tɨ́ŋgù̧ú̧ rèè, ŋgə́ a tànà ŋgə́ ɨnè: ‹Àm nɨ́me nò mo ɓi̧ní rè, ténnàhá mɨ.›

⁴Ɓwâ lâs, tɨ́ŋgù̧ú̧ rè ya nɨ́ ɗúháwa àm kɨ́ ténnɨ, á ye rè ŋgə́ ta: ‹Mɨ ma á rè Mèín jə̀ŋ, kùb mvɨ̀tí ŋgwéé pə̂r;

⁵ɨ́dù mɨ á nɨ̀gwi rè ténnàhánɨ àm no rè, ɓetí ŋgə́ ndóoŋtɨ́ mɨ. Duú u̧ ɗàà, ŋgə́ ɓahá nɨ́ mɨ jábɨ̀lɨ́ŋnɨ á.› »

⁶Á Kéké tagi ɨnè: «Óknáɓaye nɨ́m tɨ́ŋgù̧ú̧ ɓáŋhîn ndè nyinndé.

⁷Tɨ́ŋgù̧ú̧ rè a tɨ ə́ə̀mgɨ̀ kpɔ́knɨ mámkwííb lè, ɗóògɨ̀ Mèín à? Ɓwâ nùb ŋgə́ ya caré du ŋgə́ kɨ́ŋɓénɨ cɨ́m ɓe mvii cúú, ŋgə́ ɓa ɗà̧nɨ̀nɨ kpɔ̂ ŋgábè á à?

⁸Mɨ tànàɓà nyí wááŋ, ŋgə́ ɓa ŋgáb kpɔ́kɓànɨ kɔ́klîn á. Ɨ́dù ɓwâ Mwin Nɨ̀rì kwá cuworé, ŋgə́ kwá kwaɓacéye nùb ə́mne Mèèín yá?»

⁹Nùb du pénɨ vúm á bɨ ɗɨ́ɗɨ̧́ ŋgáb a pə́tə̀ə̀ŋkî kùb ɓoò rɨ, Yésù ɨ́ gà̧à̧nà ŋgáb gɨ̀gàìn ɨnè:

¹⁰«Nɨ̀ŋgwáàb bɨrɨ́b yi gií Dúú Jíri Mèèín no, gùr mɨ̀yú̧ú̧. Nɨ̀mwi̧ yɨɨ́m Fàrísà á, nɨ̀mwi̧ kù cè nò ɓáhɨ làmpóò.

¹¹Fàrísà rè ɨ́ ə́ə̀ŋwúsò tíí, ŋgə́ ɨ́ yà yóŋnɨ no sumí ɨnè: ‹Mèín móò, mɨ á wu sáktɨ̀nɨ ɓetí yúk yoo, nɨ́ɨ́b ɓáŋhɨ́b yoo, dùgɨ̀ mààŋ kùb ndɨŋtee rɨ́, nɨ́ɨ́b kɨ́ lâs mɨ mɨ ndɨ̀ŋnɨ ɗàà. Mɨ cè mɨ́ hȩ nò ɓáhɨ làmpóò rè ɗàɓwêwá.

¹²Sóndè mwi̧í̧ no, mɨ á jìnɨ ɓɔ̧ gwì bɨrɨ́b. Nɨ́m mɨ du kwàniì lâs, mɨ á wu kwàtɨ̀hó̧nànɨ kɨ́ du ɗúnɨ mɨ nà we.›

¹³Nò ɓáhɨ làmpóò rè ɨ́ ə́ə̀ŋsò nɨ́ kɨ́ noò cùrì, ŋgə́ ɨ́ tɨ̀ɨ̀msékî nɨ́ ɗàá, ŋgə́ ɨ́ bì kàmé, ŋgə́ a tace: ‹Yée Mèín, ók mɨ mwàm, ɓetí mɨ cɨcóm á.›

¹⁴Yésù ɨ́ tàkwà: Mɨ tànà nyí, nò ɓáhɨ làmpóò rè, ŋgə́ gɨ̀cùnɨ no yó, Mèín átɨ́ nɨ́ ŋgə́ nò ɗɨ́ɗɨ̧́, ɨ́ ndôŋ Fàrísà rè. Ɓetí nò gewú síí nóò còmné, Mèín ɓa gèsénɨ nò kɨ́ ɗàá á. Nò geséce síí nóò ɗàá, Mèín ɓa nò kɨ́ gèwúnɨ còóm á.»

¹⁵Kùb ya gewonaɓwéetɨ́ Yésù mucutɨ́b, dùgɨ̀ nánááb, ŋgə́ hèìwú ŋgáb ŋgáár só, fàmnɨ ŋgáb. Nɨ̀fuùb ɨ́ hàrè bɨ́ nùb kɨ́.

¹⁶Ɨ́dù Yésù ɨ́ tà kùb gèndóŋwò mucutɨ́b, ɗà ŋgə́ ɨ́ tà: «Mbɨ́knáam mucutɨ́b, ŋgáb gò yɨ́ moò, nyí ŋgáb hàrɨ̀wá ɓetí Ŋgɔ̧́ɔ̧̀ Mèèín ók ɓe nùb fɨ́te ŋgábè á.

¹⁷Mɨ tana nyí àmɨɨr wááŋ á, nò du Ŋgɔ̧́ɔ̧̀ Mèèín ə́ə̀mwá hȩ mutíí kwá nɨ Mèèín hamnin ku lə́ɓàr.»

¹⁸Kɨ̀jíri kù yi du Jwîf ɨ́ fɔ̂ Yésù ɨnè: «Tá tɔ̀hí nyɔ̧ɔ̧́, ní á ɗú mɨ ndɨ̀ŋtɨ ɗà mɨ a kwà mè mɨ̀cɨ̧̀?»

¹⁹Á Yésù pihe ɨnè: «Àm níì á wu ɓéce mɨ tá tɔ̀hí nyɔ̧ɔ̧́? Nò kù nɨ nyɔ̧ɔ̧́ ɗàà, sé Mèín mwi̧.

²⁰Wu ɗəəŋhaá ɓíhɨ̀b du tànɨ: ‹Wu mààŋ ndɨ̀ŋ, wu nɨ̀vɨ́tè kwíhɨ̀r, wu yúk yɨ̂r, wu mɨ̀námé kum gè, jə̀ŋ tá woò ɓe yà wóò› rɨ ye.»

²¹Á nɨ̀ŋgwá rè ta: «Mɨ ndɨŋtɨ́ nɨ́ɨ́b kɨ́ lâs yàwû mó mutíí.»

²²Hȩ Yésù ónɨ u̧nèé, ŋgə́ ɨ́ tànà nɨ̀ŋgwá rè: «Menatɨ́ wu nɨ́m mwi̧. Sə́rɨkɨ́ɨm njɔdì woò lâs, wu a gɔ̀knà nùb tiri mwèìn kɨ́, ɗà wu a gò mɨ tùnɨ. Wu ɓa kwànɨ njɔdì ɓɨllin á.»

²³Ɨ́dù ɓwâ nɨ̀ŋgwá rè ók nyindí kíì, ŋgə́ ɨ́ kpáì nɨ́ tí, ɓetí ŋgə́ yaáɓà nɨ ɓe njɔdì cei.

²⁴Hȩ Yésù pə́ nɨ̀ŋgwá rè kpáttɨ́ nɨ́ tí rèé, á ŋgə́ ta: «Ɓa nɨ dùɓà nɨ ɓí ɓe nò njɔdìì lénɨ Haam Mèèín no á yáà.

²⁵Á ɓí ŋgɨ̀rɨ̀mà ndóŋhó̧ mvì batallì no, ɨ́dù kɨ́ nò njɔdìì lə́ Haam Mèèín noò á ndóŋɓàgɨ̀ ɓí.»

²⁶Nùb yi du ɓèé ɨ́ tà: «Na ma ɨ́ ɓa ɓáíhó̧bɨ̂ŋnɨ?»

²⁷Á Yésù piina ŋgáb: «Nɨ́m yɔ́k nɨ̀vɨ́tɨ̀bì nɨ yɔ́knɨ Mèín ɗàà.»

²⁸Á Píyéèr tana Yésù: «Kɨ́ nɨ́mè, nɨ́m ma tɨ mbɨ́ktɨ́ nɨ́ɨ́b nɨ́mè lâs àm nɨ́m tu wé.»

²⁹Á Yésù tana ŋgáb: «Mɨ tanaɓa nyí àmɨɨr wááŋ á, nɨ̀vɨ́tè ɨ́ mbɨ́kkɨ́sò dúú nóò, gwi noò, mwin yàá bɨ noò, tá noò ɓe yà nóò ɓe munɨ́b noò àm Ŋgɔ̧́ɔ̧̀ Mèèín,

³⁰jíì mwánnè no, ŋgə́ ɓa kwàcùnɨ a ndôŋ kí á, ŋgə́ a kwàɓwêcè mè mɨ̀cɨ̧̀ cɨ́m yȩné.»

³¹Yésù ɨ́ ɓéhô̧ nɨ̀fuùb no cóóŋ ɨ́ bɨrɨ́b lè gɨ́ní, ŋgə́ ɨ́ tànà ŋgáb: «Ɗàrò nɨ́m wúíná Yèrúsàlèm á, ku á cè nɨ́ɨ́b tɨ́kɨ̀nɨ́b Mèèín ya tɨin ɓe ɨ́r Mwin Nɨ̀rì ɓa fó̧nɨ hàrák.

³²Nɨ̀gwííb du bɨ́ Jwîf séé ŋgáré á kùb ɓa ŋgə́ nàrénɨ ru. Nùb kɨ́ a kə́hè ŋgə́, ŋgáb a àndè ŋgə́, ŋgáb a túùŋwû ŋgə́ cwàá só.

³³Ŋgáb ɓa ŋgə́ jɨ̀mnɨ ɓe lòré á, ŋgáb a kwíhè ŋgə́. Jíì taarɨ́bí, Mèín a tì sə̀ə̀mcùhô̧ ŋgə́.»

³⁴Ɨ́dù nɨ̀fuùb ɨ́ dù bɨ́ ókwa àm níì á Yésù yi nyin u̧. Njàb nyindí kíì yaá nà nɨ ŋgáb yo̧ó̧, ŋgáb ɨ́ dù bɨ́ ókwa.

³⁵Yésù yi ŋgóobtɨ́ ɓe Yèríkò. Ɓùɓú̧ ti tiri kù yaácè du̧ú̧ gín jɨ̀rì, ju ɓoréé.

³⁶Hȩ ŋgə́ ók wùúm nɨ̀vɨ́tɨ̀b du ndóŋniì, á ŋgə́ fɔ́ kóo, ní ɨ́ du nɨ́ ku yàà?

³⁷Kùb ɨ́ tànà ŋgə́ Yésù nò Nàsàréèt ɨ́ du ndóŋnɨ ru yáá.

³⁸Á ŋgə́ kɨ́ŋso, ŋgə́ ɨ́ tà ɨnè: «Yésù, Nyȩ Dàvíìt, ók mɨ mwàm!»

³⁹Nùb yi du ŋgwé gùrí ɨ́ yà ŋgə́ páámɨ̀nɨ, ŋgə́ ɗèìn ɓɔ̧, ɨ́dù ŋgə́ ɨ́ yà nɨ́ kɨ́ŋndóŋɓàgɨ̀nɨ tíí tíí: «Nyȩ Dàvíìt, ók mɨ mwàm!»

⁴⁰Kí á Yésù ə́ŋhȩ, ŋgə́ ɨ́ tà kùb ɗààmwònà ní ŋgə́ yáá. Ɓwâ ŋgə́ féín gín Yésùù, á Yésù fɔ́ ŋgə́:

⁴¹«Wu ɗúce mɨ ndɨ̀ŋnà wu ní?» Nɨ̀ŋgwá rè ɨ́ tà: «Kéké, ndɨŋ mɨ pə́cù íhín.»

⁴²Á Yésù tana ŋgə́: «Pə́cum íhín, ə́ə́m wóò ɓátií wu.»

⁴³Ɓè mu̧u̧, nɨ̀ŋgwá rè ɨ́ yàrê pénɨ. Ŋgə́ ɨ́ yàrê tùnɨ Yésù, ŋgə́ a mgbíigece Mèín. Hȩ nùb yi du ɓèé pénɨ nɨ́m yi ndóŋ kíì, ŋgáb ɨ́ yàrê ŋgə̀mnɨ Mèín.