Read Vute Lúkàs 19 Bible Online

Lúkàs 19 - Vute bible

Lúkàs 19

²Nɨ̀ŋgwá kù yaácè kwé ku, ɨ́r noò yaá Sàsê. Ŋgə́ yɨɨ́m mvèìn nùb ɓáhɨ làmpóò á, ŋgə́ yaácè ɓe njɔdì.

³Ŋgə́ yaá mánɨ pénɨ nò kùb ɓé Yésù rè, ɨ́dù hȩ ŋgə́ yi du nɨ́ mbɨ̀m ndèé, yi nɨ́ sàmàìn ŋgə́ pə́so ŋgéé ɗàà ɓe víì nɨ̀vɨ́tɨ̀bì.

⁴Á ŋgə́ lusokɔ́ɔ tíí, wúíkɨ́nɨ yɔ̀ kù ya, móŋnɨ pénɨ Yésù, ɓetí ŋgə́ yi ɓa ndóŋnɨ ɓè á.

⁵Ɓwâ Yésù féín mɨ́cin yɔ̀ rèè, ŋgə́ ɨ́ góòmwúsò còóm, á ŋgə́ tana Sàsê ɨnè: «Sówom kɔ́klîn, ɓetí ɗú mɨ gwín wo yó mwáín á.»

⁶Sàsê ɨ́ sókɔ́ɔ̀hácè, ɓe kùùŋ ɨ́ gì yó. Ŋgə́ ɨ́ gàmɓà Yésù ɓe mɨ̀tù cúk.

⁷Nùb lâs yi pə́ nɨ́m Yésù yi ndɨŋ kíì ɨ́ ô ɓáŋhîn, ŋgáb ɨ́ yà tànɨ mvókín ŋgábè no ɨnè: «Àmɨɨr à! Nɨ̀ŋgwá rè gií gúnnɨ nò ɓáŋhîn ndè yó à!»

⁸Sàsê ɨ́ ə́ŋhȩ̀ Yésùù tíí, ŋgə́ ɨ́ tà: «Kéké, péye, gbɨ́ktèìn njɔdìì moò mɨ á gɔ̀kkɨ́nànɨ nùb tiri. Duceé ɓè mɨ yi pɨmne nò kù mònéè, mɨ á ɓáànɨ fain mwèìn mwi̧ kɨ́, nààsɨ̀b mɨ a nàcù ŋgə́.»

⁹Á Yésù tana ŋgə́ ɨnè: «Nùb dúú rè noò kwatɨ́ ɓə́r mwáín, àm nɨ̀ŋgwá rè duɓwée nyȩ Àbɨ̀ràháàm ndè.

¹⁰Ɓetí Mwin Nɨ̀rì yi go nɨ mánɨ nùb ya lɔ̧́ lɔ̧́ne á, ŋgə́ a ɓátɨ̀ɓwê ŋgáb.»

¹¹Hȩ nɨ̀vɨ́tɨ̀b yi du yɨrɨ́b ónɨ nɨ́m Yésù yi du nyìnniì rèé, á ŋgə́ átɨnakwa ŋgáb sà̧à̧, gà̧à̧nànɨ ŋgáb gɨ̀gàìn no. Yèrúsàlèm yaácè nɨ́ kə́sə́k ɓe kwɨ́í ŋgáb yi du nó kɨ́, á nɨ̀vɨ́tɨ̀b yi lə́mne bɨ́ ɨnayâna vúm ɓa bɨ pénɨ Mèín ŋgáŋnɨ ɓè mu̧u̧ á.

¹²Sà̧à̧ ŋgə́ yi átɨna ŋgáb kɨ́ á ɨnè: «Yèrɨ́mà kù yi gií ti kù no cóo. Ŋgə́ yi gɨ àm mvèìn ndóŋ kùb mvènnɨ́bí bɨwútɨ́ ní mvènnì naá, ní a cùwò ŋgáŋnɨ níì ti̧í̧ na á.

¹³Ŋgə́ ɓànɨ ə́llénɨ, ŋgə́ ɨ́ ɓéhô̧ nɨ̀vɨ́tɨ̀b cóóŋ mvókín nùb no ə́ré no ku. Ŋgə́ ɨ́ gɔ̀knà ŋgáb mòné, ŋgə́ ɨ́ tà: ‹Ndɨŋnáam mákə́tì ɓe kí, fə̀nndɨ̀nɨ mwèìn kɨ́ há̧á̧ hȩ mɨ ɓa cùwòniì.›

¹⁴Ɨ́dù, nùb no ti̧né yaá bɨ ŋgə́ ɓə̀ndɨ̀nɨ, á ŋgáb tómteeso nɨ̀vɨ́tɨ̀b no cùrì, gɨ̀ tànànɨ mvèìn jíri kɨ́ ɨnè: ‹Àm nɨ̀ŋgwá ɗàrɨ́ dù mvèìn nɨ́mè, nɨ́m nɨ mvó.›

¹⁵Ɨ́dù, kùb ɨ́ bɨ̀mèhâ bɨ́ ŋgə́ mvèìn, á ŋgə́ cuwo no ti̧í̧. Ŋgə́ ɨ́ tà kùb ɓéwònà ní nùb ə́ré ní yi narékɨ́so mòné ŋgáré rè, ŋgáb túùmnà ní kɨ́ ŋgáb kwaɓaaréré yáá.

¹⁶Nò tíí ɨ́ féínwò, ŋgə́ ɨ́ tà: ‹Tá, mwèìn wu tɨ nakɨ́so mé mɨ kwaɓaaréé fain mwèìn mwi̧ kɨ́ u̧ cóóŋ.›

¹⁷Á mvèìn tana ŋgə́ ɨnè: ‹Á mîn, wu nò ə́ré nyɔ̧ɔ̧́ á. Hȩ wu gə́tɨ̀nyààŋɓànɨ nɨ́m ti ŋgóbti hàráá, mɨ bií wu gómnà. Wu á kɨ́ɨ́nɨ kwɨ́ì cóóŋ ti mó rè no.›

¹⁸Nò bɨrɨ́bí ɨ́ gò, ŋgə́ ɨ́ tà: ‹Tá, mwèìn wu tɨ nakɨ́so mé, mɨ kwaɓaaréé fain mwèìn mwi̧ kɨ́ u̧ ŋgiì.›

¹⁹Á mvèìn tana nò kɨ́: ‹Mɨ bɨɓwéetɨ́ wu gómnà, wu á kɨ́ɨ́nɨ kwɨ́ì ŋgiì ti mó rè no.›

²⁰Nò ə́ré kù mwi̧í̧ ɨ́ gò, ŋgə́ ɨ́ tà: ‹Tá, mwèìn woò á nɨ rè. Mɨ tɨ ɓomndéé mɨ́ nábkèèìn, mɨ ɨ́ yòksò mɨ́ ku.

²¹Vùù tɨ ánɨ mɨ ndɨ̀ŋnɨ ɓe wu, ɓetí wu wu nò ɓí á. Nɨ́m nɨ́ kùbè wu áhá wú á̧a̧. Mwar nɨ́ mwar wóò sé, wu a lê wú no cɔŋ ánɨ.›

²²Á mvèìn tana ŋgə́: ‹Nò ə́ré ɓáŋhîn ndè, nyindí wu nyin ndè ya á mɨ ɓa ténnɨ àm wo sóò ru. Wu tɨ ɗəəŋtɨ́ mɨ nò ɓí á, mɨ á ánɨ nɨ́m nɨ́ kùbè, mwar du nɨ́ kɨ́ moò séé, mɨ a lê no cɔŋ ánɨ.

²³Àm níì ma á wu tɨ duce wú gɨ̀wá kɨ́klénɨ mwèìn mo kɨ́ báàŋ? Hȩ mɨ cuwo rè, mɨ yè tɨ ácuhó̧ó̧ mɨ́ mwèìn mo kɨ́ ɓe mvúm ti yá.›

²⁴Á mvèìn ndè tanagɨ nùb yi du ɓèé ɨnè: ‹Áhó̧kɨ́náam ŋgə́ mwèìn kɨ́ ŋgáré, nyí a nàsòkî nò tɨ kwaɓaaré fain mònéè cóóŋ ndɨ.›

²⁵Á nùb yi du ɓèé tacuna mvèìn ɨnè: ‹Tá, ŋgə́ á cɨ̀ ɓe mòné ví̧i̧!›

²⁶Á mvèìn ndè ta: ‹Nò du ɓe nɨ́m kwè, kùb a nàɓààrê ŋgə́. Nò duce ɓe nɨ́m kù ɗàwáá, dùgɨ̀ kɨ́ ti nó ŋgáréè, kùb ɓa ákɨ́nɨ á.

²⁷Kɨ́ nùb mo ɓi̧ní tɨ duce ɗúwa mɨ dù mvèìn ndè, géwonáam ŋgáb lâs kwíìnɨ mo tíí hò̧.› »

²⁸Hȩ Yésù nyìncáàŋnɨ u̧nèé, ŋgə́ ɨ́ ɗàm jɨ̀r gìnɨ Yèrúsàlèm.

²⁹Bètfàjê ɓe Bètànî yaá gín ŋgòm kùb yi ɓékom «Ɓe Òlìvíyéè» rɨ. Yésù yi ŋgóobsoceé ku, á ŋgə́ tómsoyaye nɨ̀fuùb bɨrɨ́b tíí, ŋgə́ ɨ́ tà:

³⁰«Gɨnáam kwɨ́í tíí hò̧ rè no, lə́sònɨ kwé, nyí ɓa kwànɨ mwin tɨ́ha̧ní nò kù du yá wɨ́íkɨ́yèwáá lí̧í̧ súuŋ á. Pàrɨ̀wònàná mɨ ŋgə́.

³¹Nò kù ɨ́ fɔ̂ nyí: ‹Nyí parɨge ŋgə́ ŋga?› Tananáam nò kɨ́: ‹Kéké ɨ́ du ɗúnɨ ru.› »

³²Nɨ̀fuùb bɨrɨ́b lè ɨ́ ə́llê, ŋgáb ɨ́ kwàhácè mwin tɨ́ha̧ní rè hȩ Yésù tɨ tana ŋgábè.

³³Ŋgáb pàrɨ̀nɨ mwin tɨ́ha̧ní rè, á nɨ̀miib kíí fɔ́ ŋgáb: «Nyí parɨge ŋgə́ ŋga?»

³⁴Ŋgáb ɨ́ pìhè ɨnè: «Kéké ɨ́ du ɗúnɨ ru.»

³⁵Á ŋgáb ɗamgena Yésù mwin tɨ́ha̧ní kɨ́. Ŋgáb ɨ́ àìwû júúb ŋgábè tɨ́ha̧ní njumí. Yésù ɨ́ wû dùrénɨ ya.

³⁶Ŋgə́ gɨ̀sénɨ, nɨ̀vɨ́tɨ̀b a aigece júúb ŋgábè jȩ̀ȩ̀, ŋgə́ ŋdóŋ ya.

³⁷Ŋgə́ yi ndóŋwo jɨ̀r du sónɨ ɓe Òlìvíyéè ya rɨ á, ŋgə́ yi ŋgóobce ɓe Yèrúsàlèm. Mɨ̀kwìn nɨ̀fubì, ɓe mɨ̀tù sumí, yaá mgbíìnɨ Mèín kúu còóm, ɓe ɨ́r nɨ́ɨ́b sɨ̀sɨ̀rí lâs ŋgáb ya pə́ré.

³⁸Ŋgáb a tace: «Mèín nò du Kékéé, fàm mvèìn ŋgə́ tómwo ɗàrɨ́. Mgbíí ɓe ju ɗóóŋ dù ɓe Mèín há̧á̧ ɓɨllin còóm cóo!»

³⁹Fàrísààb kù yi du ɓèé ɨ́ tànà Yésù ɨnè: «Tá tɔ̀hí, tanam nɨ̀fuùb woò ŋgáb dù néín.»

⁴⁰Á Yésù tacu: «Mɨ tanaɓa nyí wááŋ á, nùb lè ɨ́ dù néín, sɨɨ bɨ ɨ́ ɓa kɨ́ɨ̀ŋnɨ ru!»

⁴¹Yésù ya ŋgóobcií ɓe Yèrúsàlèm. Ɓwâ ŋgə́ pə́so kúrì, ŋgə́ ɨ́ yà kɨ́nnànɨ nùb Yèrúsàlèm kɨ́ noò.

⁴²Ŋgə́ a tace: «Nyí nùb Yèrúsàlèèm, ɓè nyí tɨ fɨ́tɨ ɗə̀ə̀ŋɓwênɨ mwáín nɨ́m fɨ́tɨ nyí nànɨ ju ɗóóŋ naa. Ɨ́dù ɗàrò, nɨ́m kɨ́ á nànɨ nyí yo̧ó̧.

⁴³Ɓetí ye kù kwá sai, nùb nyínè ɓi̧ní a gò nyí ɗèndɨ̀nɨ su.

⁴⁴Ŋgáb kwá nduukɨ́ nyí lâs ɓe kwɨ́í nyínè cúk; dùgɨ̀ dúhé mwi̧ kwá nɨ còóm mèɓàr. Ɓetí ɓwâ Mèín tɨ go nyí ɓátɨ̀niì, nyí tɨ nɨ ɗə̀ə̀ŋcùwá!»

⁴⁵Yésù ɨ́ gì lénɨ Dúú Jíri Mèèín, ŋgə́ ɨ́ yà jùhó̧kɨ́nɨ nùb ŋgə́ yi kwa sə́rɨ̀nɨ nɨ́ɨ́b yó kwe.

⁴⁶Ŋgə́ ɨ́ tànà ŋgáb: « ‹Dúú móò kwá du dúú mɨ̀yú̧ú̧›, Mèín taá u̧ káàtà noò no. Ɨ́dù kɨ́ nyínè, nyí setɨkíí dúú kɨ́ mgbàŋ ŋgàyíbì!»

⁴⁷Ye lâs Yésù yaá tɔ̀hí Dúú Jíri Mèèín no. Mvènnɨ́b nùb na satɨgàà ɓe nɨ̀gááŋ káàtàbì ɨ́ nùb jííb ti̧né ɨ́ yà mánɨ kwíìnɨ Yésù.

⁴⁸Ŋgáb ɨ́ dù bɨ́ ɗə̀ə̀ŋwá i̧ á vúm fɨ́tɨ ndɨ̀ŋnɨ, ɓetí nùb gbàŋné lâs yaá bɨ ɗúlɨ́ŋɓànɨ óknɨ tɔ̀ɔ́ nóò.