Read Vute Lúkàs 21 Bible Online

Lúkàs 21 - Vute bible

Lúkàs 21

¹Yésù yaá Dúú Jíri Mèèín no, ŋgə́ ɨ́ yà góòmtèènɨ, ŋgə́ ɨ́ yà pénɨ hȩ nùb njɔdìì yi leerékom nyər ŋgábè kɨr múbí noò.

²Ŋgə́ ɨ́ pə́ɓwê mámkwííb tiri ti kù lèèrénɨ sure cutɨ́b mònéè bɨrɨ́b.

³Á Yésù ta: «Mɨ tanaɓa nyí àmɨɨr wááŋ á: mámkwííb ti rè natɨ́ ndóóŋ nùb lâs.

⁴Ɓetí nùb kɨ́ tɨ nakom bɨ mwèìn tɨ du ŋgáb nɨ́m kù ə́nnànɨ ɗàwáá á. Ɨ́dù kɨ́ nɨ̀gwi rèè, ŋgə́ nakɨ́ɓatɨ́ nɨ́m ti tɨ du nó ŋgáréè lâs.»

⁵Nùb kù yaá nyìnnɨ àm Dúú Jíri Mèèín yi duɓa ó̧o̧ mîn ɓe nyààŋ kàtɨ́b sɨɨ, ɓe nɨ́ɨ́b nyaŋhɨ́b kùb ya móbna Mèèín ya du yó kwe. Ɨ́dù Yésù ɨ́ tà ɨnè:

⁶«Ye kù kwá sai, nɨ́ɨ́b nyí pə́kɨ́ rè lâs ɓa lùùŋnɨ á. Sɨɨ kù kwá nɨ kùùŋ ya kpɔklîn mè.»

⁷Nùb yi du ɓe Yésù ɓè kɨ́ ɨ́ fɔ̂ ŋgə́ ɨnè: «Tá tɔ̀hí, ɓwâ ŋge á nɨ́ɨ́b kɨ́ kwá ndɨŋ? Lɨ̀m ŋge ɨ́ ɓace túùmnɨ ɨnayâna nɨ́ɨ́b kɨ́ ɓa ndɨ̀ŋnɨ á?»

⁸Á Yésù pihe, ŋgə́ ɨ́ tà: «Gə́tɨnáam, nò kù tɨ̀ mbáŋhɨ nɨ́ nyí! Ɓetí nɨ̀vɨ́tɨ̀b ví̧i̧ kwá go, ŋgáb a tà vúm Mèsî á, ŋgáb a tàkwà ‹cáŋhȩ̀ ɗɔ̀bí ŋgóobtɨ́.› Nyí nɨ ə́mnɨ̀r.

⁹Ɓwâ nyí kwá ók àám suu ɓe kɨ́b nɨ̀vɨ́tɨ̀b du ə́tɨ̀wúnɨ ɓe mvènnɨ́b ɓoò rɨ, nyí nɨ vùù ô; ɗú nɨ́ɨ́b kɨ́ ndɨ̀ŋyàyè u̧ á, ɨ́dù tɨ̀ nɨ cáŋhȩ̀ ɗɔ̀bí dùtàm.»

¹⁰Á ŋgə́ takwa: «Gbɨ̧̀ kwá leecu su ɓe kùùŋ, ɗà ti a gàìnɓwê kùùŋ su.

¹¹Jɨ̀hèé kàm ɗɔ̀bí kwá du. Tɨb kù no, ŋgàk ɓe yáàb a gùtèè. Nɨ́ɨ́b na kùb vùklì kwá du, kùb a pə́ɓwê lìím kàtɨ́b kù ɓɨllin.

¹²Ɨ́dù nɨ́ɨ́b kɨ́ ɓànɨ féínnɨ, kùb ɓa nyí bìnɨ á, kùb a túmnè nyí jábɨ́r, kùb a nàrê nyí mvènnɨ́bí ŋgáré ŋgáb ŋgwìn nyí dúhɨ́b mɨ̀yú̧ú̧ no, ɗà kùb a kɨ́klê nyí dúú nìrì. Ɓe àm moò á kùb ɓa nyí dɨ̀ɨ̀nɨ mvènnɨ́bí ɓe gómnààbì tíí ru.

¹³Mvókín nyí ɓa ə́ə̀ŋnɨ mɨ̀námé ɓe ɨ́r moò á kí.

¹⁴Ɗəəŋnáɓam, nɨ ɗúwa nyí mákɨ́ nɨ́m nyí ɓa nyìnnɨ kààŋnɨ síí nóò má̧a̧.

¹⁵Mɨ ɓa nyí nànɨ kɨ̀cáàb ɓe nyindí ɓa yɔ́knɨ nùb nyínè àmnì sə̧̀niì á.

¹⁶Dùgɨ̀ tá nyínè, yà nyínè ɓe mwin yàáb nyínè, nùb nyínè gbàŋné ɓe ɓwàjììb nyínè ɓa nyí nàrénɨ nùb kɨ́ɨ́ tií ŋgáré, ŋgáb ŋgwìn nyí á. Kùb ɓa kwíìnɨ nùb ví̧i̧ mvókín nyínè no á.

¹⁷Nùb lâs ɓa nyí ɓə̀ndɨ̀nɨ ɓe àm moò á.

¹⁸Ɨ́dù nɨ́m kù tɨ̀ nɨ nyí ndɨ̀ŋ.

¹⁹Jíináam! Ɓe ə́ŋhȩ̀ȩ́ kpéín á nyí ɓa ɓátɨ̀nɨ mè nyínè ru.»

²⁰«Ɓwâ nyí kwá pə́ sójààb kɨ̀rɨ̀nɨ Yèrúsàlèm ndɨ, nyí a ɗə̀ə̀ŋgì ɓè kwɨ́í kɨ́ ɓa ndùkniì.

²¹Ɓwâ kɨ́ á du ɗúnɨ nùb du ti Jùdéè lùùwú ɓəbì. Nùb kwá du Yèrúsàlèm tə̧né lùùkíi. Nùb kwá duce mwaibɨnne bɨ kwé tə̧ə̧́ lə́cùr.

²²Ɓetí jíìb kɨ́ no á Mèín ɓa gbàŋ noò lɔ̧̀nɨ, ɗà nɨ́ɨ́b du tɨín káàtà Mèèín noò a fô̧ hàrák.

²³Jábɨ́r kwá du ɓe mámɓwii, ɓe nùb du munɨ́b mà̧à̧nɨ jíìb kɨ́ noò. Jábɨ́r kàm jíri kwá féín ti Jwîf bɨ no ɗà Mèín a túmnè njùŋ noò gbàŋ kɨ́ ya.

²⁴Kùb ɓa ŋgáb cébɨ̀nɨ ɓe jì̧í̧ á, nùb kù kùb a bììgè ŋgáb nìrì kùbè ti̧í̧. Nùb Mèín mɨr ɗə̀ə̀ŋwáá ɓa kpóknɨ Jwîf bɨ ŋgwé ɗàá há̧á̧ hȩ ŋgɨ́ŋgɔ̧́ ŋgábè ɓa cɔ̧́niì á.»

²⁵«Kùb kwá pə́ lìím ɓɨllin bɨ̂ŋ. Tɔkain mɨ̀kwehɨ̀rí ɓa ndɨ̀ŋɓànɨ wùúm cei á, ɗà njɔ̧̀ a lòmndê nùb ɗɔ̀bɨ́nné ɓɔ̧ɔ̧.

²⁶Nɨ̀vɨ́tɨ̀b ɓa kúnɨ ɓe vùù ɓwâ ŋgáb ɓa lə́ə̀mnɨ nɨ́ɨ́b ɓa féínnɨ ɗɔ̀bɨ́nné á. Ɓetí nɨ́ɨ́b ɓɨllɨnne lâs ɓa dùnɨ sumkí̧i̧ á.

²⁷Kùb a pə́gì Mwin Nɨ̀rì gònɨ ɓàk kù ya ɓe nyòme lâs, ɓe mgbíí cúk.

²⁸Ɓwâ nɨ́ɨ́b kɨ́ kwá yaréré, ɗə́əŋwúnáam còóm, nyí a góòmsò, ɓetí ɓwâ Mèín céín nyínè ŋgóobtɨ́.»

²⁹Á Yésù tana ŋgáb ɨnè: «Pə́náye yɔ̀ sáá ɓe yɨ̀ɨ́b kù lâs,

³⁰ɓwâ nyí pə́ kehɨ́b òndɨ̀cùhó̧nɨ rɨ, nà̧á̧ ma ŋgóobtɨ́ á.

³¹U̧ á ɓwê ɓwâ nyí kwá pə́ nɨ́ɨ́b kɨ́ yàréniì, ɗəəŋnáam Ŋgɔ̧́ɔ̧̀ Mèèín ŋgóobtɨ́.

³²Mɨ tanaɓa nyí àmɨɨr wááŋ á: nùb jíìb mwánnè ɓa péyènɨ nɨ́ɨ́b kɨ́ ndɨ̀ŋnɨ á, ŋgáb a kúcáàŋgì.

³³Ɓɨɨr ɓe ɗɔ̀ɔ́b ɓa bɨ cɔ̧́nɨ á, ɨ́dù nyindí móò tɨ̀ nɨ cɔ̧̂.»

³⁴«Gə́tɨnáam, nyí nɨ síí nyínè jùrúbí ɓe mɨlli tə̧ə̧́ lèèrée, dùgɨ̀ mɨ̀lə́mkáín ju mèè no. Duú u̧ ɗàà, ye Mèín ɓa ŋgùnnɨ nɨ̀vɨ́tɨ̀bì ɓa nyí sɨ̀rɨ̀nɨ hȩ ndù á.

³⁵Ɓetí ŋgə́ ɓa bìnɨ nɨ̀vɨ́tɨ̀b lâs á.

³⁶Dukɨ́náam jáŋ, nyí a yôŋ Mèín ɓwâ lâs, àm nyí a kwà nyòm nyí ɓa ɓáíhó̧nɨ nɨ́ɨ́b lâs ɓa nyí féínnàniì no, nyí a gòɓwê ə́ə̀ŋnɨ ŋgù̧ní Mwin Nɨ̀rì tíí.»

³⁷Mvihin, Yésù yaá tɔ̀ɔ̀nɨ nɨ̀vɨ́tɨ̀b Dúú Jíri Mèèín no. Ɨ́dù lɨ́tɔ̧ɔ̧́, ŋgə́ a gì nɨ́ gwíncùwònɨ ŋgòm kùb du ɓénɨ «Ɓe Òlìvíyéè» rɨ ya.

³⁸Nùb gbàŋné lâs yaá ɗóksòlɨ́ŋnɨ Dúú Jíri Mèèín no kɨ́rɨ̀b kɨ́rɨ̀b, gìnɨ óknɨ tɔ̀ɔ́ ŋgéé.