Read Vute Lúkàs 22 Bible Online

Lúkàs 22 - Vute bible

Lúkàs 22

¹Jùrúb kùb taŋ bɨ̀rê mvùùŋ no ɗàwáá, kùb du ɓénɨ Páskà rɨ, yi ŋgóobtɨ́.

²Mvènnɨ́b nùb na satɨgàà ɓe nɨ̀gááŋ káàtàbì ɨ́ yà mánɨ kɨ̀cáàb kù ŋgáb kwíhe Yésù noò, ɓetí ŋgáb yaá bɨ ónɨ vùù nɨ̀vɨ́tɨ̀bì.

³Yúdàs kùb ya ɓékom Ìskàrìyôt rè yaá ɓwê kpáín nɨ̀fuùb cóóŋ ɨ́ bɨrɨ́b Yésùù no. Á Sátàìn yi lə́ no sumí.

⁴Ŋgə́ ɨ́ gì kwànɨ mvènnɨ́b nùb na satɨgàà ɓe mvènnɨ́b nùb yi gə́tɨkom Dúú Jíri Mèín, tànànɨ ŋgáb hȩ ní ɓa ŋgáb Yésù sə́rɨ̀kɨnàniì.

⁵Nùb kɨ́ ɨ́ ókɓà mɨ̀tù cei ɓe àm kɨ́, á ŋgáb ɓwáí nànɨ Yúdàs mòné.

⁶Yúdàs ɨ́ ə́mnè, á ŋgə́ yaré mánɨ mvókín ŋge no á ní ɓa ŋgáb sə́rɨ̀kɨ́nànɨ Yésù, kùb a dù bɨ́ ɗə̀ŋhɨ̀r.

⁷Yɨɨ́m jíì jùrúb taŋ bɨ̀rê mvùùŋ no ɗàwáá á. Ye kùb yi du ténnɨ mwin ndèɗúú sìnɨ cɔŋ Páskàà noò ɨ́ ɗóhè.

⁸Á Yésù tóm Píyéèr ɓe Jâŋ, ŋgə́ ɨ́ tà: «Gɨnáam nɨ́m nyààŋkɨ́nànɨ cɔŋ Páskàà.»

⁹Á ŋgáb fɔ́ Yésù ɨnè: «Ŋga á wu ɗú nɨ́m gɨ̀ nyààŋkɨ́nɨ cɔŋ kɨ́?»

¹⁰Yésù ɨ́ pììnà ŋgáb: «Óknáye, lə́sònɨ kwé lȩ́ȩ, nyí ɓa ɓànnɨ ɓe nɨ̀ŋgwá kù nɔk mvúmí ŋgwéé á, tunáam ŋgə́ há̧á̧ dúú ŋgə́ ɓa nó léniì no.

¹¹Nyí a tànà tá dúú kíì ɨnè: ‹Tá tɔ̀hí ta nɨ́m gò wu fɔ́nɨ: Lúùm nɨ́me nɨ̀fuùb moò ɓa cɔŋ Páskàà no tàŋniì á ŋga?›

¹²Ŋgə́ ɓa nyí túùmnànɨ lúùm kù du ɓe nɨ́ɨ́b du nɨ́m ɗúnàniì lâs no ku, dúú còmné no á, ɓè á nyí ɓa nɨ́m nyààŋkɨ́nànɨ cɔŋ Páskàà ru.»

¹³Ŋgáb ɨ́ gì, ŋgáb ɨ́ kwàmè nɨ́ɨ́b lâs hȩ Yésù tɨ tasona ŋgábè, ŋgáb ɨ́ nyààŋkɨ́hácè cɔŋ Páskàà kɨ́ yó ku.

¹⁴Hȩ ɓwâ cɔɔ̀ŋ yi ɗóoré, Yésù ɓe nùb tómé ɨ́ dùrê cɔɔ̀ŋ.

¹⁵Ŋgə́ ɨ́ tànà ŋgáb ɨnè: «Cɔŋ Páskàà rè, mɨ ɗúɓa nɨ́me nyí tàŋ ɨnè á, ɗà mɨ a pə́gì jábɨ́r mɨ ɓa nó kúnɨ rè.

¹⁶Ɓetí mɨ tànàɓà nyí wááŋ, mɨ tɨ̀ mɨ cɔŋ Páskàà ɓe nyí tàŋcɨ̀r há̧á̧ hȩ Mèín ɓa túùmnɨ njàb cɔŋ kíì ŋgɔ̧́ɔ̧̀ noò no kwe.»

¹⁷Á ŋgə́ gamwo tob súmé, ŋgə́ ɨ́ sáktè Mèín, ŋgə́ ɨ́ tà: «Gamnáam tob lè, meináɓwéem súm no kɨ́.

¹⁸Ɓetí mɨ tànà nyí wááŋ, yànɨ ɗàrò, mɨ tɨ̀ mɨ súm mèìcɨ̀r, háá̧ hȩ Ŋgɔ̧́ɔ̧̀ Mèèín ɓa féínniì.»

¹⁹Cùr kɨ́ no, ŋgə́ ɨ́ â bɨ̀rê, ŋgə́ ɨ́ sáktè Mèín, ŋgə́ ɨ́ kùm. Ŋgə́ ɨ́ nà nɨ̀fuùb noò, ŋgə́ a tace: «Nɨ́m ndè síí móò mɨ na ɓe ɨ́r nyínè á. Ndɨ̀ŋlɨ́ŋná u̧, nyí a vùŋhȩ̀ mɨ no.»

²⁰Ŋgáb taŋcáŋhȩ cɔŋ, Yésù ɨ́ nàkwà ŋgáb tob súmé, ŋgə́ ɨ́ tà: «Tob lè du túúm jin nyàáŋ heé Mèín kwéí ɓe tɨ́m moò sú ɓe ɨ́r nyínè rè á.

²¹Ɨ́dù mɨ tànà nyí, nò ɓa mɨ sə́rɨ̀niì á hò̧ nɨ́me ŋgə́ cɔŋ ndè tàŋɓáànɨ.

²²Á mè u̧, Mwin Nɨ̀rì ɓa kúnɨ hȩ Mèín ya ɓwállé á, ɨ́dù jábɨ́r á ɓe nò ɓa ŋgə́ sə́rɨ̀nɨ kɨ́!»

²³Á nɨ̀fuùb yaré fɔ́tèènɨ mvókín ŋgábè no ɨnè: «Na ɨ́ cábye nɨ́ ndɨ̀ŋnɨ kúúŋ nɨ́m kíì?»

²⁴Mɨ̀sə̧̀ə̧́ ɨ́ gù mvókín nɨ̀fubì àm ju tíí. Ŋgáb yaá mánɨ ɗə̀ə̀ŋnɨ na ɨ́ du tíí mvókín vúmè no.

²⁵Á Yésù tana ŋgáb ɨnè: «Mvènnɨ́b jííb á kɨ́ɨ́nɨ nɨ̀vɨ́tɨ̀b, nùb geé tií á cè ɗúnɨ kùb ɓé vúm nùb ‹nyɔ̧ɔ̧́.›

²⁶Ɨ́dù kɨ́ nyínè, nɨ ɗúwa nyí ndɨ̀ŋ u̧. Ɗú nɨ́ nò tíí, dù hȩ nò cáŋhɨ̀rí á. Nò duce kɨ́ɨ́niì a dù hȩ nò éína kùbè.

²⁷Nɨ̀vɨ́tɨ̀b ɨ́ dù bɨrɨ́b, nɨ̀mwi̧ á tə́bə̀rè móŋnɨ cɔŋ, nò kù cè nò gewo gȩné, nò du tíí duha nò du tə́bə̀rè móŋnɨ cɔɔ̀ŋ á ye! Àà kɨ́ moò, mɨ ma du mɨ nò éína nyínè á.

²⁸Kɨ́ nyínè, nyí tɨ jíitɨ́ jábɨ́r ɓe mɨ.

²⁹Mɨ á nyí nàɓwênɨ ŋgɨ́ŋgɔ̧́ hȩ Tá moò yi nace mé.

³⁰Nɨ́me náb ɓa tàŋnɨ á, nɨ́m a mèì ɓwâ mɨ ɓa dùnɨ ŋgɔ̧́ɔ̧̀ moò no kwe. Nyí a dùtèèrê kò ŋgù̧ní ya, ŋgùnnɨ gbàŋ Ísràyéèl cóóŋ ɨ́ bɨrɨ́b lè.»

³¹«Ókye, Sìmôŋ, Sátàìn tɨ ɓottɨ́ fɨ́ínɨ nyí hȩ kùb fɨ́íce mvéín ndɨ u̧, kùb ɨ́ ə́ə̀mnà ŋgə́.

³²Ɨ́dù mɨ yóŋtɨ́ ɓe ɨ́r woò àm ə́ə́m wóò tɨ̀ guré. Ɓwâ wu ɓace féíncùnɨ gín mó síhé, tamnɨm mwin yàáb woò njɔ̧̀.»

³³Á Píyéèr tana Yésù: «Kéké, kùb kɨ́klégɨ̀ wu nìrì, kùb kwíìgɨ̀ wu kwíhîn, mɨ á wo cùrì.»

³⁴Yésù ɨ́ tàcùnà ŋgə́ ɨnè: «Mɨ tanaɓa wu wááŋ á Píyéèr, mwáín ɓàcéyè, cein tíí gònɨ tóŋnɨ rɨ, wu tacií há̧á̧ gwì taarɨ́b ní nɨ mɨ ɗə̀ə̀ŋwá á.»

³⁵Á Yésù fɔ́ nɨ̀fuùb noò ɨnè: «Ɓwâ mɨ tɨ tóm nyí u̧ pósà ŋgáré ɗàà, càká ŋgáré ɗàà, tə́b guré ɗàà rɨ, nɨ́m kù tɨ tuŋtɨ́ nyí à?» Á ŋgáb ta: «Ɗàà.»

³⁶Á ŋgə́ tacuna ŋgáb: «Ɗàrò, nò du ɓe pósà, dùgɨ̀ càká, átɨ. Nò duce ɓe jì̧í̧ ɗàwáá sə́rɨ̀kɨ́ júk ndoŋnɨri noò, ŋgə́ a gwì jì̧í̧ kɨ́ ɓe kí.

³⁷Ɓetí mɨ tana nyí wááŋ á, á ɗúnɨ nɨ́m du tɨín káàtà Mèèín no ɓe ɨ́r moò rè fó̧ó̧ hàrák. Ɓetí á tɨín ɨnè: ‹Kùb ya fainndéé ŋgə́ kpáín nùb ɓáŋhɨ́bí no.› »

³⁸Nɨ̀fuùb ɨ́ tà: «Kéké, nɨ́m á ɓe jì̧í̧ bɨrɨ́b.» Á Yésù ta: «Dùkɨ́cɨ̀ u̧.»

³⁹Yésù ɨ́ fô̧ gìnɨ ɓe Òlìvíyéè ya, hȩ ŋgə́ yi ndɨŋlɨ́ŋkomndé. Nɨ̀fuùb noò ɨ́ háàgè ŋgə́.

⁴⁰Ɓwâ ŋgáb féín ɓeè kwe, ŋgə́ ɨ́ tànà ŋgáb ɨnè: «Yóŋnáam Mèín, àm kɨhɨr tɨ̀ kwa nyínè.»

⁴¹Á ŋgə́ ŋgɨɨndóŋso tíí ŋgób; ŋgə́ ɨ́ cáàmsê ɗàá, ŋgə́ ɨ́ yàrê Mèín yóŋnɨ ɨnè:

⁴²«Yée Bɨ̀bá, ɓè wu ɗúré, ndɨŋ jábɨ́r yînɨ́mí rè nɨ mɨ kwà. Ɨ́dù nɨ́m kɨ́ nɨ hȩ mɨ ɗúré ndɨ̀ŋ, ndɨ̀ŋhánɨ hȩ wu ɗúré.» [

⁴³Á dùgal Mèín tómsóworé go ŋgə́ tààmcùnànɨ njɔ̧̀.

⁴⁴Yésù ɨ́ yà yóŋndóŋɓàgɨ̀nɨ Mèín tíí, ɓetí vùù ya bɨɓatɨ́ ŋgə́. Ɗà ɨ́lɨ́b ɨ́ yà ŋgə́ njèènɨ jòb jòb hȩ tɨ́m súséce ɗàá.]

⁴⁵Ŋgə́ yóŋcáŋhȩ Mèín, ŋgə́ ɨ́ éícùwû, ŋgə́ ɨ́ gàìncù nɨ̀fuùb noò, ŋgə́ ɨ́ kwà nɨ́ ŋgáb wumí, ɓetí njɔ̧̀ yi fettɨ́ nɨ́ ŋgáb.

⁴⁶Ŋgə́ ɨ́ tànà ŋgáb: «Nyí gwín nɨ́ wum á hàye! Éíwúnáam còóm, nyí a yôŋ Mèín àm nyí tɨ̀ guré kɨhɨri.»

⁴⁷Ŋgə́ á cè nyìnkɨ́nɨ, á kùŋkùŋ nɨ̀vɨ́tɨ̀bì féínso. Yúdàs, nò yi du kpáín nɨ̀fuùb cóóŋ ɨ́ bɨrɨ́b lè noò yi ɨ́ duce ŋgwé gùrí ru. Á ŋgə́ ŋgɨɨréso Yésù no, ɗúnɨ ŋgə́ kùùnɨ àm nyìndíí.

⁴⁸Á Yésù tana ŋgə́ ɨnè: «Yúdàs, wu ɗú kùùnɨ Mwin Nɨ̀rì àm wu sə́rɨsokɨ́na ŋgə́ nùb no ɓi̧ní á hàye?»

⁴⁹Hȩ nùb tɨ du ɓe Yésùù pə́ bɨ́ àm ɓáaŋtɨ́ nɨ́ rèé, ŋgáb ɨ́ fɔ̂ Yésù ɨnè: «Kéké, wu ɗú nɨ́m ə́tɨ̀ ŋgáb ɓe jì̧í̧ à?»

⁵⁰Yésù ɗúnɨ pììnɨ, nɨ̀mwi̧ tɨ suŋce nɨ́ jì̧í̧ su̧ú̧ kúríí, ŋgə́ ɨ́ téínkî nò ə́ré nɨ̀gáŋ satɨgàà tó ŋgáár lame.

⁵¹Ɨ́dù, Yésù ɨ́ tà: «Ní á kí? Kí yɨ́klé ɓè.» Á ŋgə́ di̧so yɨ́ tó nɨ̀ŋgwá rèè tɨ duré, ɗà ɨ́ èrɨ̀cù hàrák.

⁵²Ɗà Yésù ɨ́ tànà mvènnɨ́b nùb na satɨgàà, ɓe mvènnɨ́b nùb gə́tɨ Dúú Jíri Mèèín, ɨ́ kɨ̀jííb yi go ŋgə́ bìniì ɨnè: «Ɓe ɨ́r nyí gò mɨ bìniì, tɨ á nyí ɗúnàyènɨ jì̧í̧ ɓe ŋgɨ́ɨ̀ŋ hȩ kùb gɨce bìnɨ ŋgàyɨ́r à?

⁵³Ye lâs nɨ́me nyí yaá Dúú Jíri Mèèín no, nyí mɨ bɨ̀wá. Ɨ́dù ɗàrò, ndɨŋnáhácɨm nɨ́m nyí ɗú ŋdɨ̀ŋniì. Ɓwâ Sátàìn éí ə́r nó mɨ̀sɨ́mnɨ̀rí ɨ́ ɗóhe ru.»

⁵⁴Ɓwâ ŋgáb yi bɨ Yésùù, ŋgáb ɨ́ gè ŋgə́ nɨ̀gáŋ satɨgàà yó. Píyéèr ɨ́ yà nɨ́ gɨ̀tèsònɨ cùrì.

⁵⁵Laŋtaŋ dúú kíì ya, kùb yi latií wa kàm kù, nɨ̀vɨ́tɨ̀b ɨ́ yà ònnɨ. Píyéèr ɨ́ gì dùrésòɓwênɨ wa kɨ́ ònnɨ.

⁵⁶Nɨ̀gwi kù yi éíkom yó kwe ɨ́ pê ŋgə́ gín wa kíì, ŋgə́ ɨ́ góòmkî Píyéèr u̧u̧, ŋgə́ ɨ́ tà: «Nɨ̀ŋgwá rè ɓwê nɨ̀fuùb Yésùù á!»

⁵⁷Ɨ́dù Píyéèr ɨ́ càm, ŋgə́ ɨ́ tà: «Éì, mɨ mɨ ŋgə́ ɗə̀ə̀ŋndóŋwa.»

⁵⁸Mvin ŋgób, nò kù ɨ́ pê ŋgə́, nò kɨ́ ɨ́ tà: «Wu ɓwê, wu nò kpáín ŋgábè noò á!» Ɨ́dù Píyéèr ɨ́ tàcùnà nɨ̀ŋgwá rè: «Éì, mɨ mɨ no ɗàndóŋwa.»

⁵⁹Tií na, nò kù ɨ́ nòmhâ, nò kɨ́ ɨ́ tà: «Ndɨŋgií i̧, nɨ̀ŋgwá rè taá ɓwê ɓe Yésù, ɓetí ŋgə́ nò Gàlìléè á.»

⁶⁰Á Píyéèr tacuna nò kɨ́ ɨnè: «Ɨna àm kù kèè nɨ́me wu, ní á wu duye nyìnnɨ kɨ́.» Nyindí ŋgə́ ɓɔ̧ɔ̧ cɔ̧́hó̧wa, á cene tóŋ.

⁶¹Kéké ɨ́ góòmcùwò íí cùrì, ŋgə́ ɓe Píyéèr ɨ́ ɓàìn mɨ̀ŋgeè íhé, á Píyéèr lə́əmcu nɨ́m Kéké tɨ tana ŋgə́ ɨnayâna: «Mwáín ɓàcéyè, cein tíí gònɨ tóŋnɨ rɨ, wu tacií há̧á̧ gwi taarɨ́b ní mɨ ɗə̀ə̀ŋwá á» na rè.

⁶²Píyéèr ɨ́ fô̧, ɗà ŋgə́ ɨ́ kɨ́íɓà nɨ́ cei.

⁶³Nùb yi du Yésù gə́tɨ̀nɨ àm ŋgə́ tɨ̀ luré, ɨ́ yà ŋgə́ kə́ə̀nɨ, ŋgáb a womɨce ŋgə́.

⁶⁴Ŋgáb yaá ŋgə́ ɓòmkɨ́nànɨ íí, ŋgáb a fɔ̂ ŋgə́ ɨnè: «Wu nò du tɨ́kìn Mèèín* ndè, tanam nɨ́m, mvókín nɨ́mè no, na ɨ́ wom wu?»

⁶⁵Ŋgáb ɨ́ àndɨ̀ɓà bɨ́ Yésù nyèìn ví̧i̧.

⁶⁶Ɓwâ ye yi sallé, kɨ̀jííb Jwîf ɓoò, mvènnɨ́b nùb na satɨgàà ɨ́ nɨ̀gááŋ káàtàbì ɨ́ ɓáhè. Ŋgáb ɨ́ ndɨ̀ŋ kùb gèwò Yésù ɓáhɨ́r ŋgwìn jírií ŋgábè no.

⁶⁷Á ŋgáb fɔ́ Yésù ɨnè: «Tanaye nɨ́m, wu Mèsî á à?» Ŋgə́ ɨ́ pììnà ŋgáb ɨnè: «Mɨ tanaá nyí, nyí tɨ̀ nɨ ə́mnɨ̀r.

⁶⁸Mɨ ɨ́ fɔ́cê nyí fɔ́ mwi̧, nyí tɨ̀ nɨ mɨ pììnàr.

⁶⁹Ɨ́dù, yànɨ ɗàrò Mwin Nɨ̀rì ɓa ŋgáŋnɨ Mèèín ŋgáár lame á, Mèín nò du ɓe nyòme ndóŋ nyòm lâs.»

⁷⁰Á ŋgáb lâs ta: «Àm ndè wu wu Mwin Mèèín á hàye?» Ŋgə́ ɨ́ pììnà ŋgáb: «Á hȩ nyí ta kɨ́, mɨ mwin nóò á.»

⁷¹Á tɨ́ŋgù̧ú̧ bɨ ta: «Nɨ́m ma mándóŋkwacɨ mɨ̀námé ɓe ní? Nɨ́m nɨ̀miib, nɨ́m ókhaá nɨ́ nɨ́m ŋgə́ nɨ̀mɨr taɓaré ye!»