Read Vute Lúkàs 23 Bible Online

Lúkàs 23 - Vute bible

Lúkàs 23

¹Nùb ɓáhɨ́r ŋgwìn jírií ɨ́ éíwû, ŋgáb ɨ́ tà kùb gèsò Yésù Pìláàt tíí yáá.

²Féín ku, ŋgáb ɨ́ yà ŋgə́ àám só tȩ́nɨ̀rénɨ ɨnè: «Nɨ́m péé nɨ́ nɨ̀ŋgwá rè á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn. Ŋgə́ ta nɨ́m nɨ mvèìn kàm jíri làmpô njáàbnàr. Ŋgə́ ɨ́ tàkwà, ní nɨ̀mɨr ní Mèsî á, kí ta mvèìn jíri na á.»

³Pìlât ɨ́ fɔ̂ Yésù ɨnè: «Wu ɨ́ du mvèìn jíri Jwîf ɓoò ru à?» Yésù ɨ́ pìhè ɨnè: «Á hȩ wu ta kɨ́.»

⁴Á Pìlât tana mvènnɨ́b nùb na satɨgàà ɓe nùb yi du ɓèé ɨnè: «Mɨ mɨ pə́wa ɓáŋhîn kù nɨ̀ŋgwá rè ndɨŋndé.»

⁵Ɨ́dù ŋgáb ɨ́ nòmhâ, ŋgáb ɨ́ tà: «Tɔ̀ɔ́ ŋgéé á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn. Ŋgə́ yawo Gàlìlê, ŋgə́ ɨ́ ndóŋtèèwò Jùdê bɨ̂ŋ, á ŋgə́ féínwo hò̧ rè.»

⁶Ɓwâ Pìlât yi ók nɨ́m nùb lè yi nyinndé á ŋgə́ ta: «Nɨ̀ŋgwá rè nɨ nò Gàlìléè á hàye?»

⁷Á kùb tana ŋgə́ Yésù nò Gàlìléè á yáá. Hèrôdə̀ nò yi du kɨ́ɨ́nɨ ɗɔ̀ɔ́b kíì yaácè Yèrúsàlèm ɓè jíìb kɨ́ noò, Pìlât ɨ́ tómndóŋsònà ŋgə́ Yésù.

⁸Hèrôdə̀ yaá óklɨ́ŋnɨ sà̧à̧ Yésùù, ŋgə́ ɨ́ yà mánɨ ŋgə́ ɗə̀ə̀ŋnɨ. Hȩ ŋgə́ pə́gɨ̀nɨ Yésùù, á ŋgə́ ókɓa mɨ̀tù cei, ŋgə́ ɨ́ yà lə́ə̀mnɨ ní ɓa pénɨ ŋgə́ ndɨ̀ŋnɨ nɨ́m sɨ̀sɨ̀rí kù á.

⁹Ŋgə́ ɨ́ fɔ́tèèɓà fɔ́ bɨ ví̧i̧, ɨ́dù Yésù ɨ́ dù nɨ́ nɨ́m kù pììwá.

¹⁰Mvènnɨ́b nùb nà satɨgàà yaá ɓè, pààŋɓànɨ, ténɨ̀wúhánɨ Yésù àám kàtɨ́b só.

¹¹Hèrôdə̀ ɓe sójààb noò ɨ́ pə́tə̀ə̀ŋkî Yésù, ŋgáb ɨ́ yà ŋgə́ kə́ə̀nɨ. Ŋgáb ɨ́ lə́rə́nà ŋgə́ nyààŋ kàm júk mvènnì kù só, ŋgáb ɨ́ tómcùnà ŋgə́ Pìlât.

¹²Hèrôdə̀ ɓe Pìlât yi bɨ́ nyàŋkòm, ɨ́dù ye kɨ́, ŋgáb ɨ́ sèì ɓwàjììb.

¹³Pìlât ɨ́ ɓê mvènnɨ́b nùb na satɨgàà, ɓe kɨ̀jííb Jwíìf, ɨ́ Jwîf bɨ kù, ŋgə́ ɨ́ tànà ŋgáb:

¹⁴«Nyí tɨ gewonaá mɨ nɨ̀ŋgwá rè, nyí ɨ́ tà ŋgə́ á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn na, mɨ ma fɔ́tɨ́ mɨ́ ŋgə́ fɔ́ nyínè tíí hò̧, ɓe ɨ́r àám nyí ténɨwú ŋgə́ só rè, mɨ ɨ́ pê mɨ́ ŋgə́ nɨ nɨ́m kù u̧ ndɨ̀ŋwá.

¹⁵Hèrôdə̀ tɨ pə́ɓwéetɨ́ ŋgə́ nɨ ɓáŋhîn kù ndɨ̀ŋwá, àm kɨ́ á ŋgə́ tómcuwona nɨ́m ŋgə́ hò̧ ru. Ɓáŋhîn kù nɨ̀ŋgwá rè ndɨŋ ɨ́ tà kùb kwíìkɨ́ ŋgéé nɨ ɗàà.

¹⁶Nɨ́m mwi̧ mɨ á tànɨ kùb jɨ̀m ŋgə́ ɓe lòré, ɗà mɨ a mbɨ́kcù mɨ́ ŋgə́.» [

¹⁷Jùrúb Páskàà lâs, Pìlât yaá ɓe ɗɨ́m áhó̧kɨ́ nɨ̀vɨ́tè mwi̧ nìrì. Nò kɨ́ yɨɨ́mcè nò nɨ̀vɨ́tɨ̀b ɓollé á.]

¹⁸Ɨ́dù ŋgáb ɨ́ yàrê gbə̀msònɨ ɨnè: «Kwíhɨm nɨ̀ŋgwá ɗàrɨ́, wu a áhó̧nàbɨ̂ŋ nɨ́m Bàrábàs!»

¹⁹(Nì̧ì̧ Bàrábàs kɨ́ yi du àm ŋgə́ yi du nɨ̀mwi̧ mvókín nùb yi ndɨŋ ŋgwé ɓáŋhîn kwéè, ɗà ŋgə́ ɨ́ kwíhè nɨ́ nɨ̀vɨ́tèé á.)

²⁰Pìlât ɨ́ nyìnnàhâ nɨ́ nɨ̀vɨ́tɨ̀b àm ní ɗú mbɨ́knɨ Yésùù.

²¹Ɨ́dù ŋgáb ɨ́ yà bɨ́ gbə̀mhánɨ, tànànɨ ŋgə́: «Kpáaŋwúum ŋgə́ bɨ̧̀ɨ̧́, kpáaŋwúum ŋgə́ bɨ̧̀ɨ̧́!»

²²Kɨ́ gwì taarɨ́bí, Pìlât ɨ́ gàmkwà nyindí, ŋgə́ ɨ́ tànà nɨ̀vɨ́tɨ̀b ɨnè: «Ɓáŋhîn ŋgə́ ndɨŋndé á cè ní? Mɨ mɨ pə́wa kum kù ŋgə́ ndɨŋ ɨ́ tà kwíìré ŋgə́ nó kwe. Mɨ á ndɨ̀ŋɗóònɨ kùb jɨ̀m ŋgə́ ɓe lòré, ɗà mɨ a mbɨ́kcù mɨ́ ŋgə́.»

²³Ɨ́dù ŋgáb ɨ́ yà bɨ́ gbə̀mndóŋhánɨ tíí tíí, tànɨ kùb kpáàŋwúhá Yésù bɨ̧̀ɨ̧́. Gbə̀mgbə̀m ŋgábè kɨ́ ɨ́ kɨ́kmè ŋgwé.

²⁴Pìlât ɨ́ tà ní á ŋgáb ə́ə̀mnànɨ ɓoré ŋgábè kɨ́.

²⁵Bàrábàs yi lə́ nìrì àm ŋgə́ yi ndɨŋ ŋgwé ɓáŋhîn ŋgə́ ɨ́ kwíìgwà nɨ̀vɨ́tè rè, hȩ nɨ̀vɨ́tɨ̀b yi ɓwei Pìlât áhó̧nà vúm ŋgéé, ŋgə́ ɨ́ áhó̧nàmè ŋgáb ŋgə́. Ŋgə́ ɨ́ mbɨ́ksònàcè ŋgáb Yésù, ŋgáb ndɨ̀ŋ bɨ ŋgə́ hȩ ŋgáb tɨ ɗúré.

²⁶Sójààb yaá gènɨ Yésù kpáàŋwúnɨ bɨ̧̀ɨ̧́. Jȩ̀ȩ̀, ŋgáb ɨ́ ɓàìn ɓe nɨ̀ŋgwá Sìréèn kù ɨ́r yi du Sìmôŋ, ŋgə́ yi cuwokom mwa̧á̧ á. Ŋgáb ɨ́ bì nɨ̀ŋgwá rè, njóòwúnànɨ ŋgə́ ha̧á̧ bàŋ Yésùù mbɨ̧́ɨ̧́, ŋgáb ɨ́ tà ŋgə́ tùrésò Yésù cùrì.

²⁷Kùŋkùŋ nɨ̀vɨ́tɨ̀bì ɨ́ yà tùsénɨ Yésù, nɨ̀gub á cè ŋgáár ŋgwéé saŋnîn kɨ́ígènɨ.

²⁸Á Yésù ɓandɨré ŋgáb íí no, ŋgə́ ɨ́ tànà ŋgáb ɨnè: «Nɨ̀gub Yèrúsàlèèm, nyí nɨ ɓe ɨ́r moò kɨ̂r, kɨ́ínábɨ̂ŋ ɓe ɨ́r nyíne munɨ́b nyínè.

²⁹Ɓetí jíìb kù kwá ɗóhɨ, kùb a tà: ‹Mɨ̀tù á ɓe mámmgbu̧ bɨ, ɓe nùb duye mwin fèìnkɨ́yèwáá!›

³⁰Ɓwâ kɨ́ á gɨ̀ nɨ̀vɨ́tɨ̀b ɓa tànànɨ ɓəb: ‹Təmkɨ́náam nɨ́m!› Ŋgáb a tànàɓwê ŋgòom: ‹Vɨ́rɨkɨ́náam nɨ́m!›

³¹Ɓetí kùb ma tómgɨ̀ yɔ̀ ŋgìn u̧, ɗóògɨ̀ yɔ̀ cɨ́ŋni à?»

³²Ɓwâ kùb yi du gènɨ Yésù kwíìniì, sójààb yi geɓwéetɨ́ nùb ɓáŋhɨ́b bɨrɨ́b, gìnɨ kwíìɓáànɨ ɓe Yésù.

³³Ŋgáb ɨ́ féìn yɨ́ kùb du ɓénɨ «Tum ŋgwéé». Ɓè á ŋgáb yi kpáaŋwú Yésù bɨ̧̀ɨ̧́. Ŋgáb ɨ́ kpáàŋwúɓwê nùb ɓáŋhɨ́b bɨrɨ́b lè gín Yésùù, nò kù ŋgáár lame, nò kù cè ŋgáár pène.

³⁴Á Yésù ta: «Bɨ̀bá, tɨ́í wu ŋgáb, ɓetí ŋgáb bɨ ɗə̀ə̀ŋwá nɨ́m ŋgáb du ndɨ̀ŋniì.» Sójààb ɨ́ kàìkî dùr ɓe júúb Yésùù, nò ndóblé a â.

³⁵Nɨ̀vɨ́tɨ̀b yaá ɓè ə́ŋhîn, pénɨ nɨ́m yi du ndóŋniì. Mvènnɨ́b ɨ́ yà kə́ə̀nɨ Yésù, ŋgáb a tace: «Ŋgə́ ya ɓátɨɓaá nɨ̀vɨ́tɨ̀b, ŋgə́ ma ɓátɨ̀cùcé síí ŋgə́ nɨ̀mɨrí kà, ɓè ŋgə́ dumeɓa Mèsî, nò Mèín ya caré!»

³⁶Sójààb yaá ŋgə́ kə́ə̀ɓwênɨ, ŋgáb ɨ́ ŋgɨ̀ɨ̀résò ŋgə́ nó, nànɨ ŋgə́ súm.

³⁷Ŋgáb ɨ́ tà: «Duú ɓe wu du mvèìn Jwîf ɓoò, ɓátɨm síí wu nɨ̀mɨrí ye!»

³⁸Bàŋ ndè ya péín còmné, kùb yi tɨnndéé ɨnè: «Nò rè, mvèìn jíri Jwîf ɓoò á.»

³⁹Nɨ̀mwi̧ mvókín nùb ɓáŋhɨ́b bɨrɨ́b kùb ya kpáaŋwúɓwée bɨ̧̀ɨ̧́ rè, ɨ́ yà àndɨ̀nɨ Yésù ŋgə́ a tace: «Wu wu Mèsî sé à? Ɓátɨm síí wu nɨ̀mɨrí kà, wu a ɓátɨ̀ɓwêcè wú nɨ́m!»

⁴⁰Ɨ́dù nò kù mwi̧í̧ ɨ́ yètè kùŋ noò, ŋgə́ ɨ́ tà: «Wu wu lùnɨ Mèín ɗàwá à? Jábɨ́r mwi̧ kɨ́ á nɨ́me wu duɓwéeha pénɨ rè ye.

⁴¹Kɨ́ nɨ́me wé ma gbák, nɨ́ɨ́b nɨ́m ya ɗòŋ ndɨ̧̀ɨ̧́ rè á nɨ́m ɓáb ɓe kí ru. Kɨ́ noò, ní á ŋgə́ ndɨŋce!»

⁴²Á nɨ̀ŋgwá rè tana Yésù ɨnè: «Yésù, ɓwâ wu ɓa gònɨ ŋgáŋnɨ nɨ̀vɨ́tɨ̀b yaà, pə́wúhá mɨ íí ya.»

⁴³Yésù ɨ́ pììnà ŋgə́ ɨnè: «Mɨ tanaɓa wu àmɨɨr wááŋ á: gùr mɨ du gìnɨ Pàràdî mwáín ndè, nɨ́me wu á gìnɨ cúk.»

⁴⁴Péín mvii ŋgwéé na, mvii ɨ́ lɨ̂m. Mɨ̀nɔ̂ɔ́m ɨ́ gù ti kɨ́ bɨ̂ŋ há̧á̧ mvii taarɨ́b lɨ́tɔ̧né, ɗà sànjà júú kùb yi súŋtéínkɨ́ Dúú Jíri Mèèín noò ɨ́ àmndê tə̧ə̧́ bɨrɨ́b.

⁴⁵

⁴⁶Á Yésù kɨ́ŋ kúu còóm ɨnè: «Bɨ̀bá, mɨ nacuréé wu nyéhè moò ŋgáré.» Nyìncáŋhȩ̀ȩ́ u̧nèé, ŋgə́ ɨ́ kû.

⁴⁷Mvèìn sójàbì yi péé nɨ́m yi ndóŋndé, á ŋgə́ mgbíhe Mèín, ŋgə́ ɨ́ tà: «Nɨ̀ŋgwá rè tɨm mèɓà nò ɗɨ́ɗɨ̧́ á!»

⁴⁸Nɨ̀vɨ́tɨ̀b ví̧i̧ yi ɓáawotɨ́ ɓè. Ŋgáb ɨ́ pê nɨ́m yi ndóŋndé. Á ŋgáb éícuré ɓe yəré sumí.

⁴⁹Ɓwàjììb Yésùù, ɓe nɨ̀gub ya háawo ŋgə́ éíwòó Gàlìléè, yaá ə́əŋso̧ó̧, pénɨ nɨ́m yi du ndóŋniì.

⁵⁰Nɨ̀ŋgwá kù yaá ku, ɨ́r noò yaá Yòsə̂b. Ŋgə́ yɨɨ́m nò Àrɨ̀màtéè á, kwɨ́í Jwîf ɓoò. Ŋgə́ yaá njɔ̧̀ nyɔ̧ɔ̧́, ŋgə́ yɨɨ́mcè nò ɗɨ́ɗɨ̧́ á. Ŋgə́ yaácè móŋnɨ Ŋgɔ̧́ɔ̧̀ Mèèín ɓe gíí. Ŋgə́ yɨɨ́mɓwê nò ɓáhɨ́r ŋgwìn jírií noò á. Ɨ́dù nɨ́m kùb noò tɨ́ŋgù̧ú̧ bɨ yi ndɨŋ ndè ɨ́ dù nɨ́ ŋgə́ sumí nyàŋwá.

⁵¹

⁵²Ŋgə́ ɨ́ gì yɨ́ Pìlât, ɓwèìnɨ fín Yésùù. Pìlât ɨ́ ə́ə̀mnà ŋgə́.

⁵³Á ŋgə́ go tànɨ kùb ásónà ní fín kɨ́. Ŋgə́ ɨ́ ɓòmndê ndómbóó, ŋgə́ ɨ́ gì ŋgə́ kɨ́klénɨ sèè kù kùb ya ŋgəllé ɓéhíì no. Sèè kɨ́ kùb ya bɨ́ fín no kɨ́kléyèwá.

⁵⁴Yɨɨ́m ye jumbarìì á, ye kùb du nyààŋnɨ jùrúb Sàbáà ɓa fó̧nɨ ye sanné.

⁵⁵Nɨ̀gub yi háawo Yésù yàwòó Gàlìléè yi gií ɓe Yòsə̂b sèrìn ku. Ŋgáb ɨ́ góòmndésò sèrìn, ŋgáb ɨ́ pê hȩ fín Yésùù ya du nó kɨ̧́ne.

⁵⁶Á ŋgáb gɨcu ŋgábè yó. Ŋgáb ɨ́ nyààŋkî kúrúm ɓe làmɨ́ndà ŋgáb ɓa gìnɨ mììnànɨ fɨ́nní. Ye Sàbáà, ŋgáb ɨ́ ùwèhácè hȩ ɓíì Mòyíìs yi du tàniì.