Read Vute Lúkàs 3 Bible Online

Lúkàs 3 - Vute bible

Lúkàs 3

¹Tìbéèr, mvèìn kàm jíri á cè dáín cóóŋ ɨ́ ŋgibì ŋgɔ̧́ɔ̧̀ nóò no, á nɨ́m kɨ́ ya ndóŋ. Póŋsə́ Pìlât yaá gómnà ti Jùdéè, Hèrôdə̀ a ŋgáŋce ɗɔ̀ɔ́b Gàlìléè. Mwin yàá noò Fɨ́lɨ̂b a kɨ́kce ɗɔ̀ɔ́b Ìtìréè ɓe Tɨ̀ràkòníìt. Lìsàníyâs á cè ŋgáŋnɨ ɗɔ̀ɔ́b Àbìléèn.

²Ánà ɓe Kàyîf á cè nɨ̀gááŋ satɨgàà. Á Kìn Mèèín ya lə́ Jâŋ, mwin Càkɨ́ríyàà ɓɔ̧ɔ̧, ŋgə́ a cè ŋgwàì ndɨ̀ŋnì.

³Ŋgə́ ɨ́ yà gèrɨ̀tèènɨ ŋgɨ̀ŋgɨ́ŋ ɗɔ̀ɔ́b yi du gín Jùrdə̧́ə̧̀ no, ŋgə́ a tanace nɨ̀vɨ́tɨ̀b ɨnè: «Ɓandɨnáam sum, nyí a ndɨ̀ŋ kùb kɔ̀ɔ̀ nyí kɔ ə́mní ɗà Mèín a tɨ́ínà nyí cum nyínè.»

⁴U̧ á nɨ́m Èsáyà, tɨ́kìn Mèèín yi tɨnndé no káàtà̧nè yi fó̧ hàrák. Ŋgə́ yi taá ɨnè: «Kúu nɨ̀ŋgwá kwè á kɨ́ŋɓéwo ŋgwàì ndɨ̀ŋnì ɗàrɨ́: nyaaŋkɨ́náam jɨ̀r Kékéé nyaaŋnáɓam jìíb ɗɨ́ɗɨ̧́!

⁵Njaŋnjɨ̧ bɨ lâs dù njákkí̧i̧, ɓəb ɓe ŋgòme lâs, nyí a njwìnkî. Nyí a ɗə́ə̀ŋcù jìíb ŋgəmkɨ́ni, kɨ́b ɓáŋhɨ́b nyí a nyààŋcù.

⁶Ɗà nùb lâs a pə́gì ɓə́r Mèín ɗú nɨ́m ɓátɨ̀niì.»

⁷Nɨ̀vɨ́tɨ̀b yaá gáíwònɨ Jâŋ, ŋgə́ kɔ̀ɔ̀ vúm kɔ ə́mní. Ŋgə́ yaá ŋgáb tànànɨ ɨnè: «Nyí, kpááŋwɔ̧ bɨ rè, nò tana nyí, nyí ɓa ɓáíhó̧nɨ ŋgwìn Mèèín ŋgóble rè noò ma na?

⁸Nyí ma dùhácɨ̀ ɓe ɗɨ́m nò ɓandɨ sumí du ɓe kíí kà. Nyí nɨ gíí sə̀ŋkɨ̂r nyí a tà: ‹Nɨ́m nɨ nyȩrɨ́b Àbɨ̀ràháàm yóò á› na, ɓetí mɨ tànàɓà nyí wááŋ, Mèín á ɓe nyòm ndɨŋ nyȩrɨ́b Àbɨ̀ràháàm fó̧ sɨɨ bɨ rè noò.

⁹Kùb ɓóobcií bɨ́ fár àm sárɨkɨ́ yɨ̀bí: yɔ̀ lâs du gum nyɔ̧ɔ̧́ jáàbwáá, kùb ɓa ŋgə́ téínlèèrékɨ́nɨ wa̧á̧ á.»

¹⁰Nɨ̀vɨ́tɨ̀b ɨ́ fɔ́gì ŋgə́ ɨnè: «Nɨ́m ma ndɨ̀ŋcé ɨna?»

¹¹Ŋgə́ ɨ́ pììnà ŋgáb ɨnè: «Nò du ɓe júk bɨrɨ́b lɨ, nà nò du ɓe kí ɗàwáá mwi̧. Nò duce ɓe cɔɔ̀ŋ, a nàɓwê nò du ɓe kí ɗàwáá.»

¹²Nùb ɓáhɨ làmpóò ɨ́ gòɓwê yɨ́ Jáàŋ, ŋgə́ kɔ̀ɔ̀ɓwê vúm kɔ ə́mní. Á ŋgáb fɔ́ ŋgə́: «Tá tɔ̀hí, nɨ́m ndɨ̀ŋ i̧?»

¹³Ŋgə́ ɨ́ tànà ŋgáb: «Mwèìn làmpóò ɓíì ya ɓwállé, nyí kɨ́ kù ya kpɔ̀ɔ̀wúwa.»

¹⁴Sójààb ɨ́ fɔ́ɓwê ŋgə́ ɨnè: «Kɨ́ nɨ́mè cè, nɨ́m ndɨ̀ŋ i̧?» Á ŋgə́ tana ŋgáb: «Nyí nò kù mòné ŋgáré gàwá, kɨ́ kù téínwúnɨ ŋgə́ kààŋ só àm pɨɨmhó̧ mwèìn no kíì. Gàmɗóònáhá nɨ mwèìn nyínè njumií.»

¹⁵Hȩ gbàŋ lâs ya móŋkomɓa Mèsî ɓe gíí sumí rèé, ŋgáb ɨ́ yà lə́ə̀mnɨ ɓo sumí Jâŋ ɓa nɨ dùnɨ Mèsî* kɨ́ kè.

¹⁶Jâŋ ɨ́ tànàgì ŋgáb lâs ɨnè: «Kɨ́ moò, mɨ kɔɔ nyí kɔ ə́mní ɓe mvúm á; nɨ́m mwi̧ nò kù ɓa mɨ tùwònɨ cùrì á, ŋgə́ ɓa nyí kɔ̀ɔ̀nɨ ɓe Nyéhè Sarîn ɨ́ wa á. Ŋgə́ á nɨ tamnì cei ŋgə́ ndóŋtɨ́ mɨ; mɨ ɓàcéyè mɨ ɗóhîn njèìkɨ́nànɨ ŋgə́ tə́b gure ɗàɓàwá.

¹⁷Ŋgə́ á ɓe tɨmwà no ŋgáré àm fɨ́í mvénní. Ŋgə́ ɓa kɨ́klénɨ mvéín kɨ́ no kárȩ́ȩ́ á, ŋgə́ a tòŋkɨ́cè orɨ́b kɨ́ wa du lɨ́ɨ̀mnɨ lɨ́mîn ɗàwáá no.»

¹⁸Ɓe sóóŋ bɨ kù ví̧i̧ á Jâŋ ya ɓéenakom nɨ̀vɨ́tɨ̀b Kìn Nyɔ̧ɔ̧́.

¹⁹Ɨ́dù Jâŋ ɨ́ yètè Hèrôdə̀ nò yi du mvèìn jírií ɓe àm ŋgə́ yi ɓucu Hèròdìyâdə̀, gwi mwin yàá noò, ɓe àm ŋgə́ ya ndɨŋɓwée nɨ́ɨ́b ɓáŋhɨ́b kù ví̧i̧.

²⁰Hèrôdə̀ ɨ́ ndɨ̀ŋndóŋɓàgì ɓáŋhîn ji ɓe kɨ́ ŋgə́ yi kɨ́klé Jâŋ nìrì rè.

²¹Cùr Jâŋ ya kɔɔcáŋhȩ nɨ̀vɨ́tɨ̀b kɔ ə́mní, ŋgə́ ɨ́ kɔ̀ɔ̀ɓwê Yésù. Mvókín Yésù yi du Mèín yóŋniì, á ɓɨɨr ya nəte.

²²Nyéhè Sarîn ɨ́ sô ŋgə́ ya hȩ mbɨmbɨm ndɨ u̧. Á kúu nyindíí tasówo ɓɨllin ɨnè: «Wu mwin ɗûnɨ́mí moò mɨ caré á, mɨ̀tɔ̀k moò lâs á wu ya.»

²³Ɓwâ Yésù yi yaré ə́r nóò, ŋgə́ yaá sàmàìn du ɓe dáín vɨríí ɨ́ cóóŋ. Kùb yaá lə́ə̀mnɨ ŋgə́ nɨ mwin Yòsə̂b nò yi du mwin Hèlíì á.

²⁴Hèlî yɨɨ́mndóŋcè mwin Màtáàt á. Màtât cè mwin Lèvíì, Lèvî cè mwin Mèèlkíì, Mèèlkî cè mwin Jànáyì, Jànáyì cè mwin Yòsə́ə̀b.

²⁵Yòsə̂b cè mwin Màtàtíyàs, Màtàtíyàs cè mwin Àmóòs, Àmôs cè mwin Nàhúùm, Nàhûm cè mwin Èslíì, Èslî cè mwin Nàgáyì,

²⁶Nàgáyì cè mwin Máàt, Mât cè mwin Màtàtíyàs, Màtàtíyàs cè mwin Sèmééìn, Sèméìn cè mwin Jòsə́ə̀k, Jòsə̂k cè mwin Jòdáà.

²⁷Jòdâ cè mwin Jwànáàŋ, Jwànâŋ cè mwin Résàà, Résà cè mwin Jòròbàbéèl, Jòròbàbêl cè mwin Sàlàtíyèèl, Sàlàtíyèl cè mwin Nérìì,

²⁸Nérì cè mwin Mèèlkíì, Mèèlkî cè mwin Àdíì, Àdî cè mwin Kòsáàm, Kòsâm cè mwin Èlmàdáàm, Èlmàdâm cè mwin Éèr,

²⁹Éèr cè mwin Yésùù, Yésù cè mwin Èlìyèséèr, Èlìyèsêr cè mwin Jòríìm, Jòrîm cè mwin Màtáàk, Màtâk cè mwin Lèvíì,

³⁰Lèvî cè mwin Sìmèyóòŋ, Sìmèyôŋ cè mwin Jùdáà, Jùdâ cè mwin Yòsə́ə̀b, Yòsə̂b cè mwin Jònáàm, Jònâm cè mwin Èlìyàkíìm,

³¹Èlìyàkîm cè mwin Mèlèyáà, Mèlèyâ cè mwin Mènnáà, Mènnâ cè mwin Màtátàà, Màtátà cè mwin Nàtáàŋ, Nàtâŋ cè mwin Dàvíìt, Dàvît cè mwin Jèséè,

³²Jèsê cè mwin Jòbéèd, Jòbêd cè mwin Bòwáàs, Bòwâs cè mwin Sàláà, Sàlâ cè mwin Nàsóòŋ,

³³Nàsôŋ cè mwin Àmìnàdáàb, Àmìnàdâb cè mwin Àdɨ̀míìn, Àdɨ̀mîn cè mwin Àrníì, Àrnî cè mwin Èsróòm, Èsrôm cè mwin Fàréès, Fàrês cè mwin Jùdáà,

³⁴Jùdâ cè mwin Yákòòb, Yákòb cè mwin Ìsáàk, Ìsâk cè mwin Àbɨ̀ràháàm Àbɨ̀ràhâm cè mwin Tàráà, Tàrâ cè mwin Nàkóòr,

³⁵Nàkóòr cè mwin Sèrúùk, Sèrûk cè mwin Ràgóò, Ràgô cè mwin Fàléèk, Fàlêk cè mwin Èbéèr, Èbéèr cè mwin Sàláà.

³⁶Sàlâ cè mwin Kàyìnáàm, Kàyìnâm cè mwin Àrfàksâd, Àrfàksâd cè mwin Séèm, Sêm cè mwin Nòwéè, Nòwê cè mwin Làméèt,

³⁷Làmêt cè mwin Màtùsálàà, Màtùsálà cè mwin Hèróòk, Hèrôk cè mwin Jàréèd, Jàrêd cè mwin Màlèléèl, Màlèlêl cè mwin Kànáàm,

³⁸Kànâm cè mwin Ènóòs, Ènôs cè mwin Séèt, Sêt cè mwin Àdáàm, Àdâm cè mwin Mèèín.