Read Vute Lúkàs 4 Bible Online

Lúkàs 4 - Vute bible

Lúkàs 4

¹Yésù, yúklîn ɓe Nyéhè Sarîn, ɨ́ éícùwò Jùrdə̧̂; á Nyéhè gendóŋ ŋgə́ ŋgwàì ndɨ̀ŋnì.

²Ŋgwàì ndɨ̀ŋnì ku, Sátàìn ɨ́ kə̀hè ŋgə́ há̧á̧ jíì vii bɨrɨ́b, vùùm jíìb kíì, ŋgə́ nɨ́m kù tàŋwá. Cùr kɨ́ no, cɨ̧̀ ɨ́ ndóŋnè ŋgə́.

³Á Sátàìn tana ŋgə́: «Duú ɓè wu dumeɓa Mwin Mèèín, tanam sɨɨ rè, ŋgə́ sèì bɨ̀rê.»

⁴Á Yésù tacuna ŋgə́: «Káàtà Mèèín wáaɓatɨ́ ɨnè: ‹Nɨ ɓe bɨ̀rê sé ɗóò á nɨ̀vɨ́tè du ɓáínɨ.› »

⁵Sátàìn ɨ́ gèwúndôŋ ŋgə́ yɨ́ nyáam kù, ŋgə́ ɨ́ túùmkɨ́nà ŋgə́ tɨb ɗɔ̀bɨ́nné lâs mbáàwá, ŋgə́ ɨ́ tà:

⁶«Mɨ ɓa wu nànɨ njɔdɨ̀b tɨb kɨ́ noò lâs, ɓe nyòm wu kɨ́ɨ́ ŋgábè á, ɓetí nɨ́ɨ́b kɨ́ lâs du mo ŋgáré á. Nò mɨ ɗúré, mɨ a nà ŋgə́.

⁷Wu ɨ́ cáàmsénà mɨ ɗàá, nɨ́ɨ́b kɨ́ lâs a ô ɓe wu.»

⁸Á Yésù tacuna ŋgə́: «Á tɨín káàtà Mèèín no ɨnè: ‹Jə̀ŋ Kéké nò du Mèín wóò, wu a ɗôm ŋgə́, ŋgə́ mwi̧cáŋ.› »

⁹Kí á Sátàìn yi gendóŋ ŋgə́ Yèrúsàlèm, ŋgə́ ɨ́ kɨ́kwúsò ŋgə́ ŋgwé Dúú Jíri Mèèín ya, ŋgə́ ɨ́ tànà ŋgə́: «Duú ɓe wu dumeɓa Mwin Mèèín, sɨ́msə́əm ɗàá.

¹⁰Ɓetí káàtà Mèèín wáaɓatɨ́ ɨnè: ‹Mèín ɓa tànɨ dùgallɨb noò gə́tɨ̀ wu á.›

¹¹Á kwà tɨín ɨnè: ‹Ŋgáb ɓa wu hànnɨ ŋgáré á, àm gurub tɨ̀ ɓei wu sɨɨ kù ya kwe.› »

¹²Yésù ɨ́ tàcùnà ŋgə́ ɨnè: «káàtà Mèèín wáatɨ́ ɨnè: ‹wu wu Kéké nò du Mèín wóò kə̀hɨ̀r.› »

¹³Ɓwâ Sátàìn yi kəhɨcáŋhȩ Yésù mɨ̀kúúŋ kɨhɨr bɨ rèè lâs, á ŋgə́ yi éímbɨ́kkɨ́so ŋgə́, móŋndóŋcɨ̀nɨ ɓwâ kù.

¹⁴Yésù ɨ́ gɨ̀cù Gàlìlê, yúklîn ɓe nyòm Nyéhè Sarɨ́nne. Wúúm noò ɨ́ gàkî ɗɔ̀ɔ́b Gàlìléè bɨ̂ŋ.

¹⁵Ŋgə́ yaá tɔ̀ɔ̀tèèlɨ́ŋnɨ dúhɨ́b mɨ̀yú̧ú̧ no, kùb a kúumce ŋgə́.

¹⁶Yésù ɨ́ gɨ̀cù Nàsàrêt yá ŋgə́ yi hamwúré. Ye Sàbáà, ŋgə́ ɨ́ lê dúú mɨ̀yú̧ú̧, hȩ ŋgə́ yi ndɨŋlɨ́ŋkomndé. Ŋgə́ ɨ́ éíwî còóm, fàìnnɨ nɨ́m yi du tɨín káàtà Mèèín noò.

¹⁷Kùb ɨ́ nà ŋgə́ ɓuùŋ káàtàà Èsáyà tɨ́kìn Mèèín yi tɨnndé. Ŋgə́ ɨ́ pàrè ɓuùŋ kɨ́, ɗà ŋgə́ ɨ́ kwà yɨ́ yi du tɨín ɨnè:

¹⁸«Nyéhè Kékéé á mo só. Ŋgə́ yi caá mɨ, mɨ gènà nùb tiri Kìn Nyɔ̧ɔ̧́. Ŋgə́ yi tómtɨ́ mɨ, mɨ gɨ̀ ɓéènànɨ nùb du nìrì ɨnayâna nì̧ì̧ ŋgábè cɔ̧́tɨ́. Mɨ gɨ̀ ɓùɓú̧ù̧b íí kùùmcùnànɨ. Mɨ gɨ̀ ɓátɨ̀nɨ nùb kùb du ɓánniì.

¹⁹Mɨ gɨ̀ tànànɨ nɨ̀vɨ́tɨ̀b dáín Kéké ɓa nyàŋnjɔ̧̀ noò túùmniì.»

²⁰Kí á Yésù ɓoŋcu Káàtà kɨ́, ɗà ŋgə́ ɨ́ nàcùsò nò ə́ré yó kwe. Á ŋgə́ ducuré ɗàá. Nùb yi du yó kwe lâs, ŋgə́ íí ya yùk.

²¹Kí á ŋgə́ tana ŋgáb ɨnè: «Nɨ́m yi du tɨín káàtà Mèèín no, nyí ókkɨ́ ɗàrò rè, ɗóorétɨ́ mwáín.»

²²Vùùm ŋgábè lâs, ŋgáb ɨ́ yà sèìkɨ́nɨ Yésù, ŋgáb a gbɨɨŋce ɓe nyààŋ kàm nyindíí yi fó̧kom ŋgéé ɓɔ̧ne. Ŋgáb yaá tànɨ: «Nò rè hà mwin Yòsə́ə̀b á ye?»

²³Yésù ɨ́ tànà ŋgáb ɨnè: «Mɨ ɗəəŋɓatɨ́ gɨ̀gàìn nyí ɓa mɨ gà̧à̧nàniì á ɨnè: ‹Tɨ́ŋgar, nyaaŋcunam síí wu nɨ̀mɨrí ŋgar›. Nyí a tàkwà: ‹Nɨ́ɨ́b wu yi ndɨŋ Kàpèrnàwúùm lâs, nɨ́m óktɨ́, ndɨŋɓwéecéem hò̧, kwɨ́í wu nɨ̀mɨrí no.› »

²⁴Ŋgə́ ɨ́ tàkwà: «Mɨ tanaɓa nyí àmɨɨr wááŋ á: kùb bɨ ə́ə̀mnɨ tɨ́kìn Mèèín ŋgə́ nɨ̀mɨrí kwé ɗàà.

²⁵Mɨ tanaɓa nyí àmɨɨr á, ɓwâ nà̧á̧ yi du nàwá há̧á̧ dáín taarɨ́b ɨ́ gbɨ́ktèìn ti Ísràyéèl bɨ̂ŋ, ɗà ŋgàk ɨ́ gù rɨ, mámkwííb yaáɓà ku víi̧; yaámcè ɓwâ ya Èlíì á.

²⁶Ɨ́dù mvókín ŋgábè no, Mèín ya nɨ́ Èlî yɨ́ nɨ̀mwi̧ ɓà rɨ tómgèwá, gìnɨ nò kɨ́ kpɔ́knɨ, jɔ̀sé yɨ́ mámkwííb yi du Sàrə́btà, ɗɔ̀ɔ́b Sìdóòŋ noò.

²⁷Njɨ̧̀njə́ə̀b yaá ɓwê ti Ísràyéèl no ví̧i̧ ɓwâ yi Èlìséè, tɨ́kìn Mèèín, ŋgə́ ɨ́ dù nɨ́ nɨ̀mwi̧ ɓàì rɨ wáàŋwá, jɔ̀sé Nàmâŋ, yi du nò ɗɔ̀ɔ́b Sìríì.»

²⁸Á vùùm nùb yi du dúú mɨ̀yú̧ú̧ kwe lâs yi ókɓa njù̧ ɓe nɨ́m ŋgə́ yi nyin kɨ́.

²⁹Ŋgáb ɨ́ wììwî còóm, ŋgáb ɨ́ njóòhô̧ ŋgə́ lúu há̧á̧sò kúr gə́nȩ̀ȩ́. Kwɨ́í kɨ́ yaá ó̧o̧ ɓeè còóm. Ŋgáb ɨ́ ɗàmmgbə́ktɨ̀wúsò ŋgə́ há̧á̧ ŋgwé ɓeè ku àm vúm a njóklèèrê ŋgə́ njaŋnjɨ̧né.

³⁰Ɨ́dù, ŋgə́ ati nɨ́ ŋgábè ŋgáré yààrhó̧, ŋgə́ ɨ́ gì nɨ́ nɨ́m nóò.

³¹Yésù ɨ́ gì nɨ́ Kàpèrnàwûm, kwɨ́í ɗɔ̀ɔ́b Gàlìléè. Ŋgə́ yaá tɔ̀ɔ̀nɨ nɨ̀vɨ́tɨ̀b dúú mɨ̀yú̧ú̧ no, ye Sàbáà.

³²Nɨ̀vɨ́tɨ̀b ɨ́ gbɨ̀ɨ̀ŋɓà bɨ́ tɔ̀ɔ́ nó kɨ́, ɓetí ŋgə́ yaá nyìnnɨ ɓe sɨr Mèín yi naré ŋgə́ sóò.

³³Nɨ̀ŋgwá kù nɨ̀wàtɨ̀b yi njáaŋkɨ́ré yaá ɓwê dúú mɨ̀yú̧ú̧ ku. Nɨ̀ŋgwá kɨ́ ɨ́ yàrê wámnɨ ɨnè:

³⁴«Ína! Nɨ́me nyí yaye ní ya, Yésù nò Nàsàréèt lè. Wu go wu nɨ́m ndùùkɨ́nɨ á à? Mɨ ɗəəŋɓatɨ́ wu mîn, wu nò járkɨ́ták Mèín tómworé á!»

³⁵Yésù ɨ́ pámɓà nɨ̀wàtɨ̀b kɨ́, ŋgə́ ɨ́ tà: «Kí ɓè lók! Éíkɨ́ɓam nɨ̀ŋgwá rèè só!» Nɨ̀wàtɨ̀b kɨ́ ɨ́ lòmsékɨ́sò nɨ̀ŋgwá rè ɗàá nɨ̀vɨ́tɨ̀bì tíí ɓè, á ŋgə́ éíkɨ́ ŋgə́ ya. Ŋgə́ ɨ́ dù nɨ́ ŋgə́ ɓáŋhîn kù ndɨ̀ŋwá.

³⁶Nùb lâs ɨ́ gbɨ̀ɨ̀ŋɓà, ŋgáb ɨ́ yà tànɨ mvókín ŋgábè no ɨnè: «Àm ŋge á yènɨ rè! Nɨ̀ŋgwá rè, ɓe sɨr ŋgéé sóò, ŋgə́ á pámkɨ́ɓànɨ nyéhɨ̀b ɓáŋhɨ́b nɨ̀vɨ́tèé só, ŋgáb a éíkî!»

³⁷Ɗà wúúm Yésùù ɨ́ gàkî ŋgɨ̀ŋgɨ́ŋ ɗɔ̀ɔ́b kíì bɨ̂ŋ.

³⁸Yésù ɨ́ éíkî dúú mɨ̀yú̧ú̧, ŋgə́ ɨ́ gì Sìmóòŋ yó. Cɨ̀mcɨ̀m yaá mgbɨ́ktɨ̀nɨ mɨgwìn Sìmôŋ kíì yó ku. Á kùb yóŋ Yésù wáàŋkɨ́ ŋgə́.

³⁹Yésù ɨ́ tɨ̀ɨ̀msê nɨ̀gwi rè ya, ŋgə́ ɨ́ nyìn ɓe ɓéín cúk, á cɨ̀mcɨ̀m nɨ̀gwi rèè cɔ̧́. Ɓè mu̧u̧, nɨ̀gwi rè ɨ́ éícùwû còóm, ŋgə́ ɨ́ yàcùrê ə́rɨ́b.

⁴⁰Lɨ́tɔ̧ɔ̧́ ɓwâ mvii ya lə́ré, nùb yi du ɓe nɨ̀yáàb mɨ̀kúúŋ mɨ̀kúúŋ, ɨ́ gèsò ŋgáb yɨ́ Yésùù. Ŋgə́ ɨ́ hèìtèèwî ŋgáb ŋgáár ŋgwéé, ŋgáb a wáaŋce.

⁴¹Nɨ̀wàtɨ̀b ɨ́ éíkî nɨ̀yáàb ví̧i̧ só, ŋgáb a kɨ́ɨŋce ɨnè: «Wu Mwin Mèèín á!» Ɨ́dù Yésù ɨ́ ɗènndɨ̀rê nɨ́ ŋgáb àm kɨ́ ɓɔ̧ɔ̧, ɓetí nɨ̀wàtɨ̀b kɨ́ yi ɗəəŋtɨ́ bɨ́ ɨnayâna Yésù nɨ Mèsî á.

⁴²Ye sərì, Yésù ɨ́ ɗókhô̧, ŋgə́ ɨ́ gì kúr gə́nȩ̀ȩ́, yá nɨ̀vɨ́tɨ̀b yi du ɗàwáá. Nɨ̀vɨ́tɨ̀b ɨ́ yàrê ŋgə́ mátèènɨ. Ɓwâ ŋgáb yi kwacu ŋgéé, ŋgáb ɨ́ ɗû ŋgə́ hàrɨ̀nɨ gùr, ɓetí ŋgáb yaá bɨ́ ɗúnɨ vúme ŋgáb dùhá ɓè.

⁴³Ɨ́dù Yésù ɨ́ tànà ŋgáb ɨnè: «Á ɗúnɨ mɨ tànàɓwê nùb kwɨ́í bɨ kù noò Kìn Nyɔ̧ɔ̧́ du ɓe ɨ́r Ŋgɔ̧́ɔ̧̀ Mèèín, ɓetí Mèín yi tómwo nɨ mɨ ɓe àm kíí á.»

⁴⁴Ŋgə́ ɨ́ yà ɓéètèènɨ Kìn Nyɔ̧ɔ̧́ kɨ́ dúhɨ́b mɨ̀yú̧ú̧ ti Jùdéè no.