Read Vute Lúkàs 5 Bible Online

Lúkàs 5 - Vute bible

Lúkàs 5

¹Ye kù, Yésù yaá ə́ŋhîn gín ɓáí Jènèsàréèt, á kùŋkùŋ nɨ̀vɨ́tɨ̀bì gainɓállɨso ŋgə́ ku, gìnɨ óknɨ àm Mèèín.

²Ŋgə́ ɨ́ pê kwááì bɨrɨ́b súuŋ, nɨ̀miib kíí á cè mvɨ́njááb ŋgábè sènɨ.

³Yésù ɨ́ lê kwáí Sìmóòŋ no. Ŋgə́ ɨ́ yôŋ Sìmôŋ ŋgɨ̀ɨ̀résò kór mvúúm ŋgób. Ŋgə́ ɨ́ dùrê kwáí kɨ́ no, ŋgə́ ɨ́ yàrê nɨ̀vɨ́tɨ̀b tɔ̀ɔ̀nànɨ àm Mèèín.

⁴Ɓwâ ŋgə́ yi nyincáaŋndé, ŋgə́ ɨ́ tànà Sìmôŋ ɨnè: «Gerésom kór ndɨ̀mnìn, nyíne nùb woò a wàhè mvɨ́njááb nyínè ɓè.»

⁵Sìmôŋ ɨ́ tàcùnà Yésù ɨnè: «Tá, nɨ́m waasaa? séè, nɨ́m nɨ́m kù bɨ̀wá, ɨ́dù hȩ wu tànɨ u̧nèé, mɨ á wàànɨ.»

⁶Ŋgáb ɨ́ wààhácè mvɨ́njááb ŋgábè. Həré ɨ́ yúkɓà no cei há̧á̧ lí mvɨ́njábí ɨ́ yàrê tȩ́ȩ̀nɨ.

⁷Ŋgáb ɨ́ kwààsò nùb yi du kwáí kù mwi̧í̧ nokwe gò vúm kpɔ́knɨ. Nùb kɨ́ ɨ́ gò. Ŋgáb ɨ́ yúhè kwááì bɨrɨ́b kɨ́ lâs ɓe həré hȩ kwááì kɨ́ ɓa wúùbnɨ.

⁸Ɓwâ Sìmóŋ Píyéèr yi pə́ u̧nèé, ŋgə́ ɨ́ cáàmsê ɗàá Yésùù tíí, ŋgə́ ɨ́ tà ɨnè: «Ŋgɨɨkɨ́ wu gín móò, Kéké, ɓetí mɨ mɨ cɨcóm á!»

⁹Ɓe vùùm həré Sìmóŋ Píyéèr ɓe nùb noò yi bɨ kɨ́, vùù ya bɨɓatɨ́ nɨ́ ŋgáb cei.

¹⁰Vùù yi bɨɓwéetɨ́ Jâk ɓe Jâŋ, munɨ́b Sèbèdéè yi gɨlɨ́ŋkom həréé ɓe Sìmôŋ ndè. Ɨ́dù, Yésù ɨ́ tànà Sìmôŋ: «Wu wu vùù ô, yàrénɨ ɗàrò, nɨ̀vɨ́tɨ̀b á wu ɓacɨ ɓáànɨ ru.»

¹¹Ŋgáb ɨ́ gècùwò kwááì ŋgábè sɔ̀ɔ́, ŋgáb ɨ́ mbɨ́kkɨ́sò nɨ́ɨ́b kɨ́ lâs ɓè, ŋgáb ɨ́ tù bɨ́ Yésù.

¹²Hȩ Yésù yi du kwɨ́í kù noò, nɨ̀ŋgwá njɨ̀njə́ kù ɨ́ féínsò. Ɓwâ ŋgə́ yi pə́ Yésùù, ŋgə́ ɨ́ cáàmfúùsê ɗàá, ŋgə́ ɨ́ yôŋ ŋgə́ ɨnè: «Tá, ɓè wu tɨ ɗúɓayeré naa, wu á ɓàhá ɓe nyòm wu cáaŋkɨ́na mɨ njɨ̀ɨ̀b mo rèè, mɨ a dùcù járkɨ́ták.»

¹³Kí á Yésù namne ŋgáár, ŋgə́ ɨ́ dì̧nè ŋgə́, ŋgə́ ɨ́ tà: «Mɨ ɗúmetɨ́ u̧, ducum járkɨ́ták!» Ɓè mu̧u̧, njɨ̀ɨ̀b nɨ̀ŋgwá rèè ɨ́ sùtè.

¹⁴Kí á Yésù na ŋgə́ ɓíì ɨnè: «Kpáb, wu nò kù àm kɨ́ tànàwá, ɨ́dù gɨm túùmnànɨ nò na satɨgàà hȩ wu duré. Ɓwâ kɨ́ wu a nà satɨgà Mòyîs yi ta kùb nàte, àm nɨ̀vɨ́tɨ̀b lâs a ɗə̀ŋhȩ̀ yáb woò cɔ̧́tɨ́.»

¹⁵dugií u̧, wúúm Yésùù yaá gɨ̀ndóŋnɨ tíí tíí. Kùŋkùŋ nɨ̀vɨ́tɨ̀bì a ɓáalɨ́ŋháce gín nóò, óknɨ tɔ̀ɔ́ nóò. Nùb kù cè àm ŋgə́ wáaŋkɨ́na ŋgáb yáàb ŋgábè.

¹⁶Ɨ́dù Yésù yaá fó̧kɨ́lɨ́ŋnɨ kpánȩ́ȩ́, gìnɨ yá nɨ̀vɨ́tɨ̀b du ɗàwáá, Mèín yóŋnɨ.

¹⁷Ye kù, Yésù yaá tɔ̀hí. Fàrísààb ɓe nɨ̀gááŋ káàtàbì á cè du̧ú̧ gín nóò. Vùùm ɓoò lâs, ŋgáb yi éíteewo kwɨ́ì cutɨ́b Gàlìlê ɓe Jùdéè no á. Nùb kù yi goɓwéetɨ́ Yèrúsàlèm. Nyòm Mèèín yaá ɓe Yésù, ŋgə́ ɨ́ yà nɨ̀yáàb wáàŋnɨ.

¹⁸Nɨ̀ŋgwáàb kù ɨ́ féínsò ɓe kɨ̀ɓók kù pàmnɨ̀rí. Ŋgáb yaá mánɨ hȩ ŋgáb ɓa ŋgə́ hànndésònɨ, gìnɨ kɨ́knɨ Yésùù tíí.

¹⁹Ɨ́dù víì nɨ̀vɨ́tɨ̀bì yi nɨ́ ŋgáb nàwá mvókín ŋgáb hanndéndóŋ ŋgéé. Á ŋgáb yi wúí wèìɗóòrénɨ ŋgwé dúhéé yɨ́ Yésù yi duré, ŋgáb ɨ́ ndə̀ə̀mndésò pààm kɨ̀ɓók du yá gwîn ndè há̧á̧ Yésùù tíí.

²⁰Hȩ Yésù pénɨ ə́ə́m ŋgábè sumíì, ŋgə́ ɨ́ tànà kɨ̀ɓók lè ɨnè: «Ɓwàjìrí moò, cuum wóò lâs á tɨ́in.»

²¹Nɨ̀gááŋ káàtàbì ɓe Fàrísààb ɨ́ yàrê lə́ə̀mnɨ ŋgábè sumí ɨnè: «Nɨ̀ŋgwá ŋge á duye nɨ́ nyìnɓáàŋnɨ ɓe ɨ́r Mèèín ɨnè rè? Na ɨ́ fɨ́tɨ tɨ́ínɨ cuum, ɓè du nɨ́ Mèín ŋgə́ mwi̧ séé!»

²²Hȩ Yésù ɗəŋhȩ mɨ̀lə́m ŋgábè sumíì, á ŋgə́ fɔ́ ŋgáb: «Àm níì á nyí du ɓe kúúŋ mɨ̀lə́m kíì?

²³Kɨ́ ŋge ma ɨ́ dubɨ́ɨŋ kə́sə́k tànànɨ nɨ̀ŋgwá rè: ‹Cuum wóò á tɨ́in›, kèè ‹Éíwúum còóm, wu a gì gùr›?

²⁴Ɨ́dù mɨ ɗú nyí ɗə̀ŋhɨ̀ ɨnayâna Mwin Nɨ̀rì á ɗàá hò̧ ɓe nyòm tɨ́í cumbi.» Á ŋgə́ tanagɨ kɨ̀ɓók kɨ́: «Mɨ taá wu éíwú còóm, fain pààm woò, wu a gì wo yó!»

²⁵Ɓè mu̧u̧, nɨ̀ŋgwá rè ɨ́ éíwî còóm nɨ̀vɨ́tɨ̀bì tíí ɓè, ŋgə́ ɨ́ fàì pààm kùb tɨ hainwo ŋgə́ yá rè, ŋgə́ ɨ́ gì no yó, ŋgə́ a mgbíiséce Mèín.

²⁶Nùb lâs ɨ́ gbɨ̀ɨ̀ŋɓà cei. Vùù ɨ́ bì ŋgáb. Ŋgáb ɨ́ yà mgbíìnɨ Mèín ŋgáb a tace: «Kə́í! Mwáín, nɨ́m péé nɨ́m nɨ́m pə́kɨ́yèwáá!»

²⁷Cùr kɨ́ no, Yésù ɨ́ fô̧, ŋgə́ ɨ́ pê nò ɓáhɨ làmpóò kù ɨ́r yi du Lèvî, du̧ú̧ yɨ́ no ə́ré, á Yésù tandóŋna ŋgə́: «Tuwom mɨ!»

²⁸Lèvî ɨ́ éíwû còóm, ŋgə́ ɨ́ mbɨ́kkɨ́sò nɨ́ɨ́b lâs, ɗà ŋgə́ ɨ́ tù Yésù.

²⁹Á Lèvî ɓé Yésù gò dínàà níì yó yáá. Nùb ɓáhɨ làmpóò kù ɓe nùb saai kù yaá ɓwê dínà kɨ́ no.

³⁰Fàrísààb ɓe nɨ̀gááŋ káàtàbì ŋgábè ɨ́ ô bɨ́ ɓáŋhîn, á ŋgáb fɔ́ nɨ̀fuùb Yésùù ɨnè: «Àm níì á nyíne nùb ɓáŋhɨ́b, dùgɨ̀ nùb ɓáhɨ làmpóò duce tàŋɓáànɨ cɔŋ?»

³¹Yésù ɨ́ tànà ŋgáb ɨnè: «Nùb du síí wááŋ bɨ gáínɨ tɨ́ŋgar ɗàà, nɨ̀yáàb ɨ́ du bɨ́ tɨ́ŋgar gáínɨ ru.

³²Mɨ mɨ gòwá ɓénɨ nùb ɗɨ́ɗɨ̧́, mɨ go mɨ ɓénɨ nùb ɓáŋhɨ́b á, àm ŋgáb a ɓàndè sumí.»

³³Nɨ̀vɨ́tɨ̀b ɨ́ gò tànànɨ Yésù ɨnè: «Nɨ̀fuùb Jáàŋ á bɨ jɨ̀lɨ́ŋnɨ ɓɔ̧ ŋgáb a yóŋce Mèín, dùgɨ̀ nɨ̀fuùb Fàrísàbì ɓwê. Kɨ́ nɨ̀fuùb woò, ŋgáb á bɨ tàŋnɨ cɔŋ.»

³⁴Yésù ɨ́ tàcùnà ŋgáb ɨnè: «Nyí lə́mne ye gùmní, ɓwâ nɨ̀ŋgwá gùmní du ɓe ɓwàjììb noò ŋgə́ tɨ ɓéworé, ɓwàjììb no kɨ́ á jì ɓɔ̧ ɓwâ ŋgə́ duye ɓe ŋgábè à? Ŋgáb bɨ sàmàìn jɨré ɗàà.

³⁵Ɨ́dù ye kù kwá sai, kùb a hàìnhó̧kî nɨ̀ŋgwá gùmní ŋgábè tɨŋtɨ̧̀ɨ̧́. Ye kɨ́ á ŋgáb ɓa jɨ̀gɨ̀nɨ ɓɔ̧.»

³⁶Yésù ɨ́ gà̧à̧nàɓwê ŋgáb gɨ̀gàìn ndè: «Kùb bɨ àmhó̧nɨ júk heé lààmnɨ júk fìn no ɗàà. Óo kùb ndɨŋtɨ́ u̧, júk heé ɓa nɨ mènɨ aám á, pɨ́cî júk heé kíì á dùcè nɨ́ kɨ́ fìn ya ɗóhɨ̀r.

³⁷Kùb cè bɨ́ fòŋndénɨ súm heé sɨ̀ɓɨ̀ŋ fɨ̀nní ɗàà. Ɓetí óo kùb ndɨŋtɨ́ u̧, súm heé kɨ́ a ɔ̀kkî nɨ́ sɨ̀ɓɨ̀ŋ. Súm a sékî ɗàá, kùb a mə̀mɓwê sɨ̀ɓɨ̀ŋ.

³⁸Ɗúhá nɨ́ Kùb fòŋndé súm heé sɨ̀ɓɨ̀ŋ hehí á.

³⁹Sàmàìn nò tɨ meicɨ súm fìn, ə́əmkwa mènnɨ kɨ́ heé ɗàà, ŋgə́ ɓa nɨ tànɨ kɨ́ fìn á nɨ nyɔ̧ɔ̧́ á.»