Read Vute Lúkàs 6 Bible Online

Lúkàs 6 - Vute bible

Lúkàs 6

¹Ye Sàbáà kù, Yésù ɓe nɨ̀fuùb noò yaá ndóŋnɨ mwaai mɨ́ŋgòŋnì no. Nɨ̀fuùb noò ɨ́ yà wèègènɨ ɓáám mɨ́ŋgòŋnì, ŋgáb a oomce tàŋnɨ.

²Fàrísààb kù ɨ́ fɔ̂ ŋgáb ɨnè: «Àm níì á nyí duce ndɨ̀ŋnɨ nɨ́m ɓíì nɨ́mè du kààŋnɨ ye Sàbáà?»

³Kí á Yésù tacuna ŋgáb ɨnè: «Nyí ya fainhaá nɨ́m Dàvît yi ndɨŋ ye kù, ɓwâ cɨ̧̀ yi nóm ŋgə́ ɓe nùb noò ye?

⁴Ŋgə́ ya léé dúú Mèèín no, ŋgə́ ɨ́ â bɨ̀rê múbí, ŋgə́ ɨ́ tàŋ, ŋgə́ ɨ́ nàɓwê nùb noò, dugií hȩ ɓíì nɨ́mè du tànɨ nò kù nɨ tàaŋ, sé nùb na satɨgàà.»

⁵Yésù ɨ́ tànàkwà ŋgáb: «Mwin Nɨ̀rì ɨ́ du nɨ́ kɨ́ɨ́nɨ ye Sàbáà ru.»

⁶Ye Sàbáà kù, Yésù ɨ́ lê dúú mɨ̀yú̧ú̧ kù no, ŋgə́ ɨ́ yàrê tɔ̀ɔ́. Nɨ̀ŋgwá kù yaá yó ku ɓe ŋgáár lam mvə́ndîn.

⁷Nɨ̀gááŋ káàtàbì ɓe Fàrísààb yaá góòmnyààŋɓànɨ Yésù, pénɨ ŋgə́ yè ɓa wáàŋkɨ́nànɨ nò kù yáb noò ye Sàbáà á kè. Ɓetí ŋgáb yaá mánɨ kum kù ŋgə́ ɓa ndɨ̀ŋniì àm vúm a dɨ̀hè ŋgéé.

⁸Ɨ́dù Yésù yi ɗəəŋtɨ́ nɨ́ kɨ̀cáàb ŋgábè, á ŋgə́ tana nɨ̀ŋgwá ŋgáár mvə́ndîn ndè ɨnè: «Éíwúum còóm, wu a ə́ŋhȩ̀ nùb lâs tíí ɓè.» Nɨ̀ŋgwá rè ɨ́ éíwû còóm ə́ə̀ŋnɨ.

⁹Á Yésù fɔ́ ŋgáb ɨnè: «Ní á ɓíì nɨ́mè du tànɨ: Kùb ndɨ̀ŋ nyɔ̧ɔ̧́ ye Sàbáà kèè kùb ndɨ̀ŋ ɓáŋhîn? Kùb ɓátɨ̀ mè nɨ̀vɨ́tèé kèè, kùb láàŋkɨ́ mè no kɨ́? Mɨ fɔ́ nyí á!»

¹⁰Ŋgə́ ɨ́ ŋgèrɨ̀tèè nùb yi du ɓèé lâs, á ŋgə́ tana nɨ̀ŋgwá rè: «Naamwom ŋgáár.» Nɨ̀ŋgwá rè ɨ́ nààmsò, ɗà ŋgáár noò ɨ́ tàmcù.

¹¹Ɨ́dù nùb yi du ɓè kɨ́ ɨ́ ókɓà bɨ́ njù̧. Ŋgáb ɨ́ yà mánɨ nɨ́m ŋgáb fɨ́tɨ ndɨ̀ŋnɨ Yésùù.

¹²Jíìb kɨ́ no, Yésù ɨ́ wɨ́ì ɓe kù ya gìnɨ mɨ̀yú̧ú̧. Ŋgə́ ɨ́ yôŋ Mèín ɓeè ku séè.

¹³Ɓwâ ye yi sallé, ŋgə́ ɨ́ ɓê vùùm nùb yi tukom ŋgéé lâs, ŋgə́ ɨ́ càhô̧ kpáín ŋgábè no nɨ̀fuùb cóóŋ ɨ́ bɨrɨ́b, ŋgə́ ɨ́ bɨ́nà ŋgáb ɨ́r: «Nùb tómé.»

¹⁴Nùb kɨ́ yɨɨ́m: Sìmôŋ, nò ŋgə́ ya bɨ́na ɨ́r Píyéèr rɨ, ɓe mwin yàá noò Àndɨ̀rê á, Jâk ɓe Jâŋ, Fɨ́lɨ̂b ɓe Bàrtèlèmî,

¹⁵Màtíyò ɓe Tòmâ, Jâk mwin Àlféè, Sìmôŋ nò ya lɨɨŋkom ɓe ɨ́r tií,

¹⁶Yúdàs mwin Jáàk, ɨ́ Yúdàs Ìskàrìyôt nò ya sə́rɨkɨ́ Yésùù.

¹⁷Yésù ɨ́ sócùwò ŋgòmeè ɓe nùb tómé noò, ɗà ŋgə́ ɨ́ ə́ŋhȩ̀ yɨ́ ɗə̀ktə̀k. Nɨ̀fuùb noò ví̧i̧ yaá ɓè. Nɨ̀vɨ́tɨ̀b yaá ɓwê ɓè ví̧i̧: Nùb Jùdéè bɨ̂ŋ, hȩ nùb Yèrúsàlèèm u̧, nùb éísówo Tíìr ɓe nùb Sìdóòŋ, swaàr mɨ̀kwehɨ̀rí yaà.

¹⁸Ŋgáb yi go ónɨ tɔ̀ɔ́ Yésùù á, ŋgə́ a wáàŋnàɓwê ŋgáb yáàb ŋgábè. Nùb nyéhɨ̀b ɓáŋhɨ́b yi jáabkomndé lâs yi wáaŋtɨ́.

¹⁹Nùb lâs yaá mánɨ ŋgə́ dì̧nɨ, ɓetí nyòm kù yaá fó̧nɨ no só, a wáaŋce ŋgáb lâs.

²⁰Yésù ɨ́ ŋgèrè nɨ̀fuùb noò u̧u̧, ŋgə́ ɨ́ tà: «Mɨ̀tù á ɓe nyí nùb tiri, ɓetí Ŋgɔ̧́ɔ̧̀ Mèèín ók ɓe nyí á.

²¹Mɨ̀tù á ɓe nyí, nùb cɨ̧̀ du nómnɨ ɗàròò, ɓetí nyí kwá du ɓe cɔŋ mgbə̀ktə̀k. Mɨ̀tù á ɓe nyí nùb du kɨ́kɨ́rí ɗàròò, ɓetí nyí kwá sərɨ sɨ̀r.

²²«Mɨ̀tù á ɓe nyí, ɓwâ kùb ɓəndɨ nyí, kùb ɨ́ lèhè nyí, kùb ɨ́ àndè nyí, kùb ɨ́ nyìnɓáàŋcè nyínè só ɓe àm Mwin Nɨ̀rì rɨ.

²³Óknáam mɨ̀tù ɓwâ nɨ́m kɨ́ kwá féínndé, ɗà nyí a ŋgà̧à̧nè, ɓetí lɔ̀ɔ́ jíri á nyí móŋnɨ ɓɨllin. U̧ á ɓwê tákɨ̀rɨ́b nùb kwá jóktɨ nyí kɨ́ ya jóktɨkomɓagɨ tɨ́kɨ̀nɨ́b Mèèín.»

²⁴Ɨ́dù jábɨ́r á ɓe nyí nùb njɔdìì, ɓetí nyí kwacií nɨ́ ju nyɔ̧ɔ̧́ nyínè.

²⁵Jábɨ́r á ɓe nyí nùb du ɓe cɔŋ ɗàrò mgbə̀ktə̀k lè, ɓetí cɨ̧̀ kwá ndóoŋ nyí. Jábɨ́r á ɓe nyí nùb du sɨ̀rí ɗàròò, ɓetí nyí kwá kɨ́íɓa cei.

²⁶«Jábɨ́r á ɓe nyí ɓè nɨ̀vɨ́tɨ̀b lâs nyin nyɔ̧ɔ̧́ ɓe ɨ́r nyínè, ɓetí, u̧ á ɓwê tákɨ̀rɨ́b nùb du nyìnnɨ nyɔ̧ɔ̧́ ɓe ɨ́r nyínè kɨ́ ya nyinɓwée ɓe tɨ́kɨ̀nɨ́b kàŋnì!»

²⁷«Ɨ́dù, nyí nùb du mɨ ókkɨ́ɓànɨ rè, mɨ tànà nyí, ɗúnáam nùb ɓi̧ní nyínè. Nùb jɨ nyínè, ndɨ̀ŋná nùb kɨ́ nyɔ̧ɔ̧́.

²⁸Famnáam nùb káí nyínè. Nùb jóktɨce nyínè, nyí a yóŋnà nùb kɨ́ Mèín.

²⁹Nò kù ɨ́ láhè wu ɓɔ̧ɔ̧, ɓàndɨ̀nàcáàŋ ŋgə́ péín meré. Nò kù ɨ́ â júk ndoŋnɨri woò, njèìcáàŋsònà ŋgə́ kɨ́ wo sóò.

³⁰Nò ɓwei wu nɨ́mí, nam nò kɨ́ nɨ́m ŋgə́ ɓwei kɨ́. Nò kù ɨ́ pɨ̀mnè nɨ́m wóò, mbɨ́ksònà nò kɨ́ nɨ́m kɨ́.

³¹Ndɨŋnanáam kùb nɨ́m nyí ɗú kùb ndɨ̀ŋnàcé nyínè.

³²Nyí ɨ́ ɗúhó̧ɗóhè nùb ɗúɓwéece nyínè, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ɗúɓwênɨ nùb ɗú ŋgábè.

³³Nyɔ̧ɔ̧́ nyí ndɨŋndé ɨ́ ókhó̧bɨ̂ŋhácè nɨ́ ɓe nùb ndɨŋɓwéece nyí nyɔ̧né, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ndɨ̀ŋɓwênɨ u̧.

³⁴Nyamandì nyínè, nyí ɨ́ nàhó̧ɗóhè nùb nyí du ɓe gíí ɓa nyí nàcùnɨ á rɨ, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ɓwê nànɨ nyamandì mvókín ŋgábè no u̧.

³⁵Nɨ́m mwi̧, ɗúnáam nùb ɓi̧ní nyínè, nyí a ndɨ̀ŋ ŋgáb nyɔ̧ɔ̧́. Nàná nyamandì, nyí a dù nɨ́ káŋhɨ̀r. Nyí ɓa kwànɨ lɔ̀ɔ́ jíri á, nyí a dùcè munɨ́b Mèín nò du còóm cóo, ɓetí nyàŋnjɔ̧̀ noò duna lamjáar bɨ ɓe nùb ɓírí á.

³⁶Dunáam ɓe njɔ̧̀ nyɔ̧ɔ̧́, hȩ Tá nyínè duceré.»

³⁷«Nyí nɨ nò kù ŋgwìn, Mèín tɨ̀ ŋgwinɓwée nɨ́ nyí. Nyí nɨ nò kù àm ŋgwéé téìn, Mèín tɨ̀ téínɓwée nɨ́ kɨ́ nyínè ŋgwéné. Tɨ́ínáam kùŋ nyínè, Mèín a tɨ́íɓwêcè nyí.

³⁸Nanáam nyər sàk sàk, Mèín a nàɓwêcè nyí. Jɨ̀r nyí na kùŋ nyínè nyər lɨ, Mèín ɓa nyí nàɓwênɨ u̧ á.»

³⁹Yésù ɨ́ gà̧à̧nàkwà ŋgáb gɨ̀gàìn kù, ŋgə́ ɨ́ tà: «Á sàmàìn ɓùɓú̧ ɗaamcu kùùŋ à? Duú u̧, ŋgáb bɨrɨ́b lâs ma ɓaha bɨ gùrénɨ ŋgwiín á ye!

⁴⁰Nɨ̀fuùb nɨ ndóŋnɨ tá tɔ̀hí ɗàà, ɨ́dù ɓwâ ŋgə́ fobɨɓa cei lɨ, ŋgə́ á ɓwê ɓe kɨ̀cáàb hȩ tá tɔ̀hí.

⁴¹Àm níì á wu pə́hó̧ɗóo wú káhé ti du mwin yàá woò íhɨ́nné, wu cè wú kɨ́ɨ̀ŋ kàm wo íhín ndè pə́yàyèwá?

⁴²I̧ á wu fɨ́tɨ tànànɨ mwin yaá woò: ‹Mwin yàá moò, gom mɨ ákɨ́nà wu kpárè úndií wo íhín ndè›, u̧ kɨ́ wu wu pə́ɓàcénɨ kɨ́ɨ̀ŋ kàm wu nɨ̀mɨrí íhín ndè ɗàà. Mɨ̀yooɗíím ndè, ákɨ́yaye kɨ́ɨ̀ŋ kàm wo íhín ndè, ɗà wu a pə́nyààŋɓàgì úndi ti wu ɓa ákɨ́nɨ mwin yàá woò íhɨ́nné.»

⁴³«Yɔ̀ nyɔ̧ɔ̧́ nɨ nànɨ gum ɓáŋhîn ɗàà. Yɔ̀ ɓáŋhîn cè nɨ́ nànɨ gum nyɔ̧ɔ̧́ ɗàà.

⁴⁴Kùb ɗəəŋ bɨ yɔ̀ ɓe gum noò á. Kùb bɨ kòŋnɨ sáá yɔ̀ ŋgamɨ́rí ya ɗàà, kùb cè bɨ́ kòŋnɨ loob ɗə̀b lúŋbí ya ɗàà.

⁴⁵Mîn nò nyɔ̧ɔ̧́ du ndɨ̀ŋniì fó̧ nɨ́ no njɔ̧̀ɔ̧ á. Ɓáŋhîn nò ɓáŋhîn duce ndɨ̀ŋniì fó̧ nɨ́ no njɔ̧̀ɔ̧ á, ɓetí nɨ́ɨ́b du njɔ̧̀ɔ̧ ɗéé á ɓɔ̧ du tàhó̧nɨ.»

⁴⁶«Àm níì á nyí du mɨ ɓénɨ: ‹Kéké, Kéké›, nɨ́m mɨ taré nyí cè nɨ́ ndɨ̀ŋ?

⁴⁷Nò tu mɨ, ɨ́ ô nyindí móò, ɨ́ ndɨ̀ŋcè nɨ́m mɨ taré rɨ, mɨ á nyí túùmnànɨ nò ŋgə́ du fɨ́tɨ̀niì.

⁴⁸Nò kɨ́ á fɨ́tîn ɓe nɨ̀ŋgwá kù yi óŋ dúú nóò. Ŋgə́ yi lə́rɨɓatɨ́ nɨ́ kɨ̀ɨ̀r sɨ̀neè cei. Ɓwâ mbɨ̀ɨ̀ŋ ya yúklé, ɨ́ dù nɨ́ dúhé hàìnwá ɓetí dúú kɨ́ yaáɓà nɨ ɗàá cɨ́ɨmndȩ́ȩ mîn.

⁴⁹Ɨ́dù nò ók nyindí móò ɨ́ dù nɨ́ ndɨ̀ŋwá nɨ́m mɨ taré, nò kɨ́ á fɨ́tîn ɓe nɨ̀ŋgwá yi óŋ dúú nóò, ŋgə́ ɨ́ dù nɨ́ lə́rɨ̀wá kɨ̀ɨ̀r sɨ̀neè. Ɓwâ mbɨ̀ɨ̀ŋ ya yúklé, dúú kɨ́ ɨ́ mùŋ, ɗà ɨ́ tə̀m.»