Read Vute Lúkàs 9 Bible Online

Lúkàs 9 - Vute bible

Lúkàs 9

¹Yésù ɨ́ ɓáhè nɨ̀fuùb cóóŋ ɨ́ bɨrɨ́b, ŋgə́ ɨ́ nà ŋgáb nyòm ŋgáb ŋgɨ́íkɨ́ nɨ̀wàtɨ̀b, ŋgáb a wáŋhȩ̀ nɨ̀yábì.

²Ɗà ŋgə́ ɨ́ tôm ŋgáb tàtèènɨ kìn du ɓe ɨ́r Ŋgɔ̧́ɔ̧̀ Mèèín, ŋgáb a wáàŋcê nɨ̀yáàb.

³Ŋgə́ ɨ́ tànà ŋgáb ɨnè: «Nyí nɨ́m kù ŋgáré ágèwá, dùgɨ̀ túb, dùgɨ̀ càká, dùgɨ̀ cɔŋ, dùgɨ̀ mòné, dùgɨ̀ júk.

⁴Yɨ́ lâs nyí ɓa féínniì, dúú kùb gamndé nyí noò, dùná yó ku há̧á̧ hȩ nyí ɓa ndóŋnɨ tíí.

⁵Yɨ́ lâs kùb ɓa mvúnɨ nyí gàmnɨ rɨ, éíkɨ́náam kwɨ́í kɨ́ no, nyí a lámkɨ́sò mvútúúb nyínè gureè[2] túùmnànɨ ŋgáb ɨnayâna ŋgáb ndɨŋtɨ́ ɓáŋhîn, ŋgáb gə́tìi.»

⁶Nɨ̀fuùb ɨ́ ə́llê. Ŋgáb ɨ́ yà gɨ̀tèènɨ kwɨ́ì lâs no. Ŋgáb ɨ́ yà tàtèènɨ Kìn Nyɔ̧ɔ̧́, ŋgáb a wáaŋteece nɨ̀yáàb yɨ́ lâs.

⁷Mvókín kɨ́ no ɓwê, Hèrôdə̀ nò yi du mvèìn jírií ɨ́ ô kùb átɨ̀nɨ nɨ́ɨ́b yi du ndóŋniì. Kɨ̀cáàb ɨ́ yɔ̂ ŋgə́ ɓetí nɨ̀vɨ́tɨ̀b yaá tànɨ: «Jâŋ nò kɔhɨ kùb kɔ ə́mní ɨ́ səəmcuhó̧ mvókín nɨ̀kwíbí ru.»

⁸Nùb kù ɨ́ tà: «Èlî ɨ́ cuwo nɨ́ ru.» Nùb kù ɨ́ tàcê: «Tɨ́kìn Mèèín kù tɨŋtɨ̀ŋ kɨ́b ya tíí noò ɨ́ səəmcu nɨ́ ru.»

⁹Ɨ́dù Hèrôdə̀ ɨ́ yà tànɨ no sumí ɨnè: «Mɨ nɨ̀mɨr ya móobɓa kùb téínkɨ́ Jâŋ ŋgwé ru, nò mɨ dukwacɨ mɨ́ óknɨ wúúm noò rè ma cè nɨ́ na?» Ŋgə́ ɨ́ yà mánɨ pénɨ Yésù.

¹⁰Nɨ̀fuùb ɨ́ cùwò. Ŋgáb ɨ́ átɨ̀nà Yésù nɨ́ɨ́b ŋgáb tɨ ndɨŋndé lâs. Ŋgə́ ɨ́ ɓéhô̧ ŋgáb gə́nȩ̀ȩ́, ɓe ŋgáb ɨ́ gì yɨ́ nɨ̀vɨ́tɨ̀b yi du ɗàwáá, gín kwɨ́í kù ɨ́r du Bètsáyídà.

¹¹Ɨ́dù nɨ̀vɨ́tɨ̀b ɨ́ ɗə̀ŋhȩ̀ bɨ́ àm kɨ́, á ŋgáb tuge bɨ́ ŋgə́. Yésù ɨ́ gàm ŋgáb, ŋgə́ ɨ́ nyìnnà ŋgáb àm Ŋgɔ̧́ɔ̧̀ Mèèín. Ŋgə́ ɨ́ wáàŋcê nùb yi du yábniì.

¹²Hȩ mvii yi ducɨ nɨ́ gi̧né, nɨ̀fuùb cóóŋ ɨ́ bɨrɨ́b lè ɨ́ ŋgɨ̀ɨ̀sò gín Yésùù, ŋgáb ɨ́ tànà ŋgə́ ɨnè: «Mbɨ́k wu nùb lè gɨ̀cù bɨ kwɨ́ì ɓe mwaai dutee hò̧ kə́sə́ə́ no, mánɨ yɨ́ gúnnè ɓe nɨ́m ŋgáb taŋndé. Ɓetí nɨ́m du nɨ hò̧ tɨfuru̧ú̧ á.»

¹³Ɨ́dù Yésù ɨ́ tànà ŋgáb ɨnè: «Nyí nɨ̀miib, nanáam ŋgáb nɨ́m cɔɔ̀ŋ!» Á ŋgáb tacu ɨnè: «Nɨ́m á ɗóò ɓe bɨ̀rê ŋgiì ɓe həré bɨrɨ́b. Kèè wu ɗúú nɨ́m gɨ̀ gwɨ̀ìwònɨ cɔŋ ɓe ɨ́r vùùm nùb lèè lâs á à?»

¹⁴(Nɨ̀ŋgwáàb yi du ɓèé yaá sàmàìn ndɨŋ tɔ́sìn ŋgiì.) Yésù ɨ́ tà ŋgáb ndɨ̀ŋ nɨ̀vɨ́tɨ̀b dùtèèré ɗàá mɨ̀kù̧ú̧ mɨ̀kù̧ú̧. Mɨ̀kù̧ú̧ mwi̧ nɨ̀vɨ́tɨ̀b sàmàìn vii bɨrɨ́b ɨ́ cóóŋ.

¹⁵Ŋgáb ɨ́ jə̀ŋ nyindí kɨ́; á ŋgáb ndɨŋ nùb lâs dùré ɗàá.

¹⁶Kí á Yésù ágɨ bɨ̀rê ŋgiì ɓe həré bɨrɨ́b lè, ŋgə́ ɨ́ ŋgèèwî íí còóm, ŋgə́ ɨ́ sáktè Mèín. Ŋgə́ ɨ́ kùùmè, á ŋgə́ na nɨ̀fuùb noò gɔ̀knà nɨ̀vɨ́tɨ̀b.

¹⁷Nùb lâs ɨ́ tàŋ, ŋgáb ɨ́ fùb. Kùb ɨ́ ɓáhè kumsiì ya meré há̧á̧ lɨ̀ŋtɨ̧̀ cóóŋ ɨ́ bɨrɨ́b.

¹⁸Ye kù Yésù yaá mɨ̀yú̧ú̧ ŋgə́ mwi̧, nɨ̀fuùb noò ɨ́ gàìnsò ŋgə́. Ŋgə́ ɨ́ fɔ̂ ŋgáb ɨnè: «Kɨ́ nɨ̀vɨ́tɨ̀bì, ŋgáb á tàcénɨ mɨ macè na?»

¹⁹Ŋgáb ɨ́ pììnà ŋgə́ ɨnè: «Nùb kù á tànɨ wu Jâŋ nò kɔhɨ kùb kɔ ə́mní á, kɨ́ nùb kù wu Èlî á, nùb kù cè, tɨ́kìn Mèèín tɨŋtɨ̀ŋ kɨ́b ya tíí noò ɨ́ səəmcuhó̧ nɨ́ ru.»

²⁰Yésù ɨ́ fɔ́kwà ŋgáb ɨnè: «Kɨ́ nyínè nyí ma lə́əmce mɨ macè na?» Píyéèr ɨ́ pìhè ɨnè: «Wu Mèsî á, nò Mèín ya wúrɨna gbám mvènnì.»

²¹Yésù ɨ́ tà kpáb! Ŋgáb nò kù àm kɨ́ tànàwá.

²²Ŋgə́ ɨ́ tàkwà ɨnè: «Á ɗúnɨ Mwin Nɨ̀rì pə́ jábɨ́r cei. Kɨ̀jííb ɓe mvènnɨ́b nùb na satɨgàà ɨ́ nɨ̀gááŋ káàtàbì ɓa ŋgə́ mvúnɨ á, kùb a kwíhè ŋgə́. Cùr jíì taarɨ́bí, Mèín a tì sə̀ə̀mcùhô̧ ŋgə́.»

²³Á ŋgə́ tana nùb lâs ɨnè: «Nò kù ɨ́ ɗû mɨ tùnɨ, ŋgə́ mvúyàyè síí ŋgə́ nɨ̀mɨrí, ŋgə́ a â bàŋ noò, ŋgə́ a tùwò mɨ.

²⁴Ɓetí nò ɗú ɓátɨ̀nɨ mè noò, ɓa mə̀mnɨ mè no kɨ́ á, ɨ́dù nò məm mè noò ɓe ɨ́r moò ɓa cénnɨ mè no kɨ́ á.

²⁵Nɨ̀vɨ́tè ɨ́ kɨ̂ nɨ́ɨ́b ɗɔ̀ɔ́b lè noò lâs ɗà ŋgə́ ɨ́ mə̀m mè noò, ŋgə́ ɨ́ lɔ̧̂, ní ɨ́ kpɔ́khó̧ce ŋgə́ no?

²⁶Nò kù ɨ́ ô sə̀ré ɓe mɨ, ɓe nyindí móò ɓwê, ɓwâ Mwin Nɨ̀rì ɓa cùwònɨ nyòm noò duɓwéece nyòm Tá ɓe dùgallɨbi noò, ŋgə́ ɓa ókɓwênɨ sə̀ré ɓe nò kɨ́ á.

²⁷Mɨ tanaɓa nyí àmɨɨr wááŋ á: nùb kù tɨŋtɨ̀ŋ nùb lè noò ɓaye bɨ dùnɨ jáŋ ɓwâ Mèín ɓa ŋgáŋnɨ nɨ́ɨ́b lâs yaà á.»

²⁸Sàmàìn jíì sə́r cùr Yésù yi nyin nyindí kíì, ŋgə́ ɨ́ ɓégè Píyéèr, Jâŋ ɓe Jâk. Ŋgáb ɨ́ gì ɓe kù ya Mèín yóŋnɨ.

²⁹Ɓwâ Yésù yi du Mèín yóŋniì, ɓɨ̀m noò ɨ́ cə́ndè, júk nó sóò ɨ́ vùùɓà tóóm.

³⁰Tií na, nɨ̀ŋgwáàb bɨrɨ́b kù ɨ́ sə̀mcɨ̀ bɨ́ ɓè sà̧nì ɓe Yésù. Yɨɨ́m Mòyîs ɓe Èlî á

³¹yi mwȩ́ȩhó̧ bɨ́ ɓè ɓe mwa kàm ɓɨllɨnne ru. Ɓe Yésù bɨ yaá nyɨ̀nnɨ ɓe ɨ́r cwá ŋgə́ yi ɓa kúnɨ Yèrúsàlèm, yúùnɨ nɨ́m ŋgə́ yi go ndɨ̀ŋniì rè.

³²Píyéèr ɓe ɓwàjììb noò yaá bɨ́ wumí ɗákɗák; ɨ́dù ŋgáb ɨ́ sə̀mnè, ŋgáb ɨ́ pê mwa Yésùù ɓe nɨ̀ŋgwáàb bɨrɨ́b yi ə́əŋkom ɓe ŋgə́ rè.

³³Ɓwâ nɨ̀ŋgwáàb lè yi du éímbɨ́kkɨ́sònɨ Yésùù, á Píyéèr tana ŋgə́: «Tá, á mîn nɨ́m dùná nɨ hò̧. Nɨ́m á óŋnɨ njáŋnɨ̀b taarɨ́b, kɨ́ woò mwi̧, kɨ́ Mòyíìs mwi̧, kɨ́ Èlíì cè mwi̧.» (Píyéèr ya nɨ́ ɗə̀ə̀ŋwá nɨ́m ŋgə́ yi du nyìnnɨ kɨ́.)

³⁴Ŋgə́ á cè nyìnkɨ́nɨ u̧, á ɓàk kù ya go ŋgáb ɗèìnkɨ́nɨ. Vùù ɨ́ bɨ̀ɓà nɨ̀fuùb hȩ ŋgáb yi pə́ ɓàk kɨ́ ŋgáb fúùniì.

³⁵Ɓàk kɨ́ no, kúu nyindíí kù ɨ́ tàhô̧ ɨnè: «Nò rè mwin móò mɨ caré á, jəŋnáam ŋgə́!»

³⁶Cùr kúu kíì, kùb ɨ́ pə́ɗóòhácì bɨ́ Yésù mwi̧. Nɨ̀fuùb ɨ́ dù bɨ́ néín. Jíìb kɨ́ no, ŋgáb ɨ́ dùcè bɨ́ nò kù nɨ́m ŋgáb tɨ pə́ kɨ́ átɨ̀nàwá.

³⁷Kpíí kɨ́ no, Yésù ɓe nɨ̀fuùb taarɨ́b lè yaá sócùnɨ ɓeè. Kùŋkùŋ kàm nɨ̀vɨ́tɨ̀bì ɨ́ gàìnwò Yésù.

³⁸Mɨ̀kwìn kɨ́ no, nɨ̀ŋgwá kù ɨ́ yà kɨ́ŋhó̧nɨ ɨnè: «Yée Tá tɔ̀hí! Góomwúum mwin móò íí ya, kpòk muní moò á kí.

³⁹Nyéhè kù á ŋgə́ bìnɨ. Ɓè mu̧u̧, a nà ŋgə́ kɨ́ɨ́ŋ; ŋgə́ á ŋgə́ mgbɨ́ktɨ̀ɓànɨ, káfə́ré a yà ŋgə́ tóŋhó̧nɨ ɓɔ̧ɔ̧. Nyéhè kɨ́ á ŋgə́ ndɨ̀ŋɓànɨ ɓáŋhîn, ŋgə́ a tì éíkɨ́ɓàcì nɨ́ ŋgéé só tìírii.

⁴⁰Mɨ tɨ yóŋtɨ́ nɨ̀fuùb woò jùkɨ́ nyéhè kɨ́, ɨ́dù, ɨ́ yɔ̂ nɨ́ ŋgáb.»

⁴¹Yésù ɨ́ tà: «Kə́í! Ína nyí nùb ɓáŋhɨ́b ə́ə́m sumí ɗàwá rè, há̧á̧ ɓwâ ŋge á mɨ ɓa dùkwànɨ ɓe nyí? Mɨ ɓa nyí jíìkwànɨ há̧á̧ ɓwâ ŋge? Gewona mɨ mwin wó kɨ́ hò̧.»

⁴²Hȩ mutí yi du gòniì, nyéhè rè ɨ́ lòmsê ŋgə́ ɗàá, ŋgə́ ɨ́ mgbɨ́ktɨ̀ɓà ŋgə́ ɓe nyòme. Ɨ́dù Yésù ɨ́ pámɓà nyéhè rè, ŋgə́ ɨ́ wáàŋkî mutí. Ŋgə́ ɨ́ mbɨ́kcùnà ŋgə́ tá noò.

⁴³Nɨ̀vɨ́tɨ̀b lâs ɨ́ gbɨ̀ɨ̀ŋɓà, ŋgáb ɨ́ tà: «Kə́í! Mèín á jíri.» Nùb lâs á cè gbɨ̀ɨ̀ŋháyènɨ ɓe nɨ́ɨ́b Yésù yi ndɨŋndé, á ŋgə́ tana nɨ̀fuùb noò ɨnè:

⁴⁴«Óknáɓam nɨ́m mɨ du nyí tànànɨ rè mîn. Kùb ɓa nàrénɨ Mwin Nɨ̀rì nɨ̀vɨ́tɨ̀bì ŋgáré á.»

⁴⁵Ɨ́dù nɨ̀fuùb ɨ́ dù bɨ́ ókwa nyindí kɨ́. Kùb ya yoonatɨ́ bɨ́ ŋgáb njàb nyindí kíì, àm ŋgáb tɨ̀ óklé. Vùù yaácè nɨ́ ŋgáb bìnɨ fɔ́nɨ Yésù njàb nyindí kíì.

⁴⁶Nɨ̀fuùb ɨ́ yà ndáŋnɨ ŋgábè sumí, mánɨ ɗə̀ə̀ŋnɨ nò du jíri mvókín ŋgábè noò.

⁴⁷Yésù ɨ́ ɗə̀ŋhȩ̀ nɨ́ nɨ́m ŋgáb yi lə́əmkomndé, á ŋgə́ ɗamwo mutí kù gò ə́ə̀ŋnɨ gín nóò.

⁴⁸Ŋgə́ ɨ́ tànà ŋgáb: «Nò gamɓa mwɨi ti rè ɓe ɨ́r moò rɨ, gamɓa mɨ nɨ̀mɨr á. Nò gamce mé, gam nò tómwo mé á, ɓetí mvókín nyínè no, nò gesé síí nóò ɗàá rɨ, nò kɨ́ ɨ́ duɓagɨ nò jíri ru.»

⁴⁹Jâŋ ɨ́ gàm nyindí, ŋgə́ ɨ́ tànà Yésù: «Tá, nɨ́m tɨ péé nɨ̀ŋgwá kù ŋgɨ́nnɨ nɨ̀wàtɨ̀b ɓe ɓêé ɨ́r woò, nɨ́m ɨ́ ɗû ŋgə́ kààŋnɨ, ɓetí ŋgə́ nɨ nò nɨ́mè kpánéné sé.»

⁵⁰Ɨ́dù Yésù ɨ́ tàcùnà ŋgə́ ɨnè: «Nyí nɨ ŋgə́ kàŋhɨ̀r, ɓetí nò du nɨ́ ɓi̧í̧ ɓe nyí ɗàwáá du nɨ nò nyínè á.»

⁵¹Ɓwâ jíìb kùb yi ɓa áwúkɨ́nɨ Yésù ɓɨllɨnne yi ɗóoré, ŋgə́ ɨ́ sàb gìnɨ Yèrúsàlèm.

⁵²Ŋgə́ ɨ́ tómsòkɨ́yàyè tɨ́pénɨ̀b tíí. Nùb kɨ́ ɨ́ gì, ŋgáb ɨ́ gì féínnɨ kwɨ́í kù no, ɗɔ̀ɔ́b Sàmàríì no, nyààŋkɨ́nànɨ ŋgə́ gúúr.

⁵³Nùb kwɨ́í kɨ́ noò ɨ́ mvû ŋgə́ gàmnɨ, àm ŋgə́ yi ɓa nɨ́ ndóŋnɨ ndó̧o̧ gìnɨ Yèrúsàlèm ndè.

⁵⁴Ɓwâ Jâk ɓe Jâŋ nɨ̀fuùb Yésùù, yi pə́ u̧nèé, ŋgáb ɨ́ tà: «Kéké, á sàmàìn nɨ́m ɓésówo wa ɓɨllin gò nùb lè yíìndùùkɨ́niì yoo?»

⁵⁵Ɨ́dù Yésù ɨ́ ɓàndɨ̀cùrê ŋgáb no, ŋgə́ ɨ́ yètè ŋgáb àm ŋgáb ya nyin u̧ kɨ́.

⁵⁶Ŋgáb ɨ́ ə́llê bɨ́ gɨ̀ndóŋnɨ kwɨ́í kù no.

⁵⁷Ŋgáb yaá gùrí jȩ̀ȩ̀, á nɨ̀ŋgwá kù tana Yésù ɨnè: «Mɨ á wu tùnɨ yɨ́ lâs wu ɓa gìniì.»

⁵⁸Á Yésù tacuna ŋgə́: «Gáŋgbòróóŋ á ɓe ŋgwɨi ŋgábè, gààì á cè ɓe óŋnɨ́b ŋgábè, ɨ́dù Mwin Nɨ̀rì nɨ ɓàcéyè ɓe yɨ́ juu cɨ́mîn ɗàà.»

⁵⁹Ŋgə́ ɨ́ tànàkwà nɨ̀ŋgwá kù: «Tuwom mɨ.» Á nɨ̀ŋgwá kɨ́ tana ŋgə́: «Tá, mbɨ́k mɨ gɨ̀yè vɨ́rɨ̀nɨ tá moò.»

⁶⁰Á Yésù tacuna ŋgə́ ɨnè: «Tùwòbɨ̂ŋ wu mɨ, kɨ́ ɗàrɨ́ nɨ ə́r wóò sé. Kɨ́ woò, gɨ wu tàsénɨ kìn du ɓe ɨ́r Ŋgɔ̧́ɔ̧̀ Mèèín.»

⁶¹Nò kù ɨ́ tànàkwà ŋgə́: «Tá, mɨ ɓa wu tùnɨ á, ɨ́dù mbɨ́kye mɨ gɨ̀ nyìndɨ̀kɨ́sònɨ gbàŋ moò.»

⁶²Yésù ɨ́ wáànà ŋgə́ ɨnè: «Nò yaré ɗȩ̀ȩ́ ɨ́ góòmcù íí cùrìì, nɨ nò ə́ré Ŋgɔ̧́ɔ̧̀ Mèèín noò sé.»