Read Vute Jâŋ 10 Bible Online

Jâŋ 10 - Vute bible

Jâŋ 10

¹Mɨ tanaɓa nyí àmɨɨr wááŋ á: «Nò lə́ kpák jírɨ́bí no, ŋgə́ ɨ́ dù nɨ́ ɓavɨ̀rì lə́wa ŋgə́ ɨ́ nyàìwúndôŋ kpɨ́ còóm, nò kɨ́ du nɨ ŋgàyɨ́r tamŋgwéé á.

²Ɨ́dù nò lə́ɓa nɨ́ ɓavɨ̀rìì, nò kɨ́ ɨ́ du nò gə́tɨ jírɨ́bí ru.

³Nò gə́tɨ kpɨ́ɨ́ á ŋgə́ kùùmnànɨ ɓavɨ̀r, jírɨ́b a ô kúu nóò. Ŋgə́ a ɓê ŋgáb nɨ̀mwi̧ ɓe ɨ́r noò gèhó̧nɨ ŋgáb lúu.

⁴Ɓwâ ŋgə́ gehó̧ ŋgáb lúu, ŋgə́ a yà gɨ̀sénɨ tíí, jírɨ́b a tusoce ŋgə́ cùrì, ɓetí ŋgáb ɗəəŋtɨ́ bɨ́ kúu nóò.

⁵Nò ŋgáb du ɗə̀ə̀ŋwáá, ŋgáb tɨ̀ bɨ nò kɨ́ tùr, ŋgáb ɓa bɨ lùɓànɨ cóo á ɓetí ŋgáb bɨ kúu nóò ɗə̀ə̀ŋwá.»

⁶Yésù yi átɨ sà̧à̧ rè gà̧à̧nànɨ Fàrísààb gɨ̀gàìn no á, ɨ́dù ŋgáb ya bɨ́ ókwa njàb kɨ́.

⁷Yésù ɨ́ tàkwà: «Mɨ tanaɓa nyí àmɨɨr wááŋ á: mɨ du hȩ ɓavɨ̀r kpák jírɨ́bí á.

⁸Nùb ya goyaye tíí du bɨ ŋgàyíìb tamŋgwéé á. Jírɨ́b ya bɨ́ ŋgáb jə̀ŋwá.

⁹Mɨ du hȩ ɓavɨ̀r á, nò lə́ndóŋ mɨ noò ɓa dùnɨ gə́tîn mîn á. Ŋgə́ ɓa lénɨ ŋgə́ a fó̧cù hȩ ŋgə́ ɗúré á. Ŋgə́ ɓa kwànɨ cɔŋ noò á.

¹⁰Ŋgàyɨ́r goɗóo nɨ gwɨ̀ì yúú, gwɨ̀ì kwíhe nɨ̀rì ɓe gwɨ̀ì ɓáàŋ á. Kɨ́ moò mɨ go mɨ nànɨ nɨ̀vɨ́tɨ̀b mè á, mè kɨ́ a dùnàɓà ŋgáb nyɔ̧ɔ̧́.

¹¹Mɨ du hȩ nò gə́tɨ jírɨ́bí nyɔ̧ɔ̧́ á. Nò gə́tɨ jírɨ́bí á ə́ə̀mnɨ cwé ɓe ɨ́r jírɨ́b noò.

¹²Nò du nɨ́ nò gə́tɨ jírɨ́bí sé, jírɨ́b cè bɨ́ kɨ́ noò sé rɨ, ŋgə́ éíhó̧ɗóo nɨ ə́r mònéè á; ɓwâ ŋgə́ pə́ màŋgù gòniì, ŋgə́ á lùmbɨ́kkɨ́sònɨ jírɨ́b, màŋgù a gò ŋgáb bììnɨ, nùb meceré a njà.

¹³Ŋgə́ á nɨ lùnɨ ɓetí ŋgə́ éíhó̧ nɨ́ mwèìn noò á, àm noò nɨ ɓe jírɨ́b ɗàà.

¹⁴Mɨ du hȩ nò gə́tɨ jírɨ́bí nyɔ̧ɔ̧́ á. Hȩ Tá ɗəŋhȩ mɨ, mɨ ɨ́ ɗə̀ə̀ŋcè ŋgéé, u̧ á ɓwê mɨ ɗəŋhȩ jírɨ́b moò, ŋgáb ɗəəŋceé mɨ. Mɨ á cè ə́ə̀mnɨ cwé ɓe ɨ́r jírɨ́b moò.

¹⁶Mɨ á kwà ɓe jírɨ́b kù du kpák lè no lə́yèwáá. Á ɗúnɨ mɨ gə́tɨ̀ɓwê ŋgáb, ŋgáb ɓa óknɨ kúu móò á. Ŋgáb ɓa dùnɨ kúùŋ mwi̧ á, ɓe nò gə́tɨ ŋgábè cè mwi̧.

¹⁷Tá á mɨ ɗúnɨ ɓetí mɨ kaikíí mè moò àm mɨ a kwàcù mè mo kíì.

¹⁸Sàmàìn nò kù ga mè moò ɗàà, mɨ nɨ̀mɨr ɨ́ du mɨ́ ə́ə̀mɓànɨ cwé ru. Mɨ á ɓe nyòm mɨ ə́mne cwéé, mɨ á ɓe nyòm mɨ səəmcuhó̧ cwéé. Nɨ́m Tá moò ta mɨ gò ndɨ̀ŋniì á kí.»

¹⁹Nyindí Yésù yi nyin u̧ kɨ́ ɨ́ gèrékwàhâ gɔ̀ mvókín Jwîf bɨ.

²⁰Nùb ví̧i̧ mvókín ŋgábè no ɨ́ tà ɨnè: «Ŋgə́ á ɓe nɨ̀wàtɨ̀b só, ŋgə́ du nɨ yɨŋmîn á. Nyí kɨ́kce tó ɓe nɨ́m ŋgə́ du tàniì àm níì?»

²¹Nùb kù ɨ́ tà: «Nò nɨ̀wàtɨ̀b sóò a nyìn kúúŋ nyindí rèè à! Nɨ̀wàtɨ̀b nɨ sàmàìn kuumna ɓùɓú̧ íhé ɗàwá ye!»

²²Yɨɨ́m ɓwâ màmkwèìn á, kùb yaá cè jɔ̀nɨ jùrúb Dèdìkáàs[8] Yèrúsàlèm.

²³Dúú jíri Mèèín no, Yésù yaá yə̀ŋtèènɨ gwa Sàlòmóòŋ no.

²⁴Jwîf bɨ kù ɨ́ ɓáàwò gín Yésùù, ŋgáb ɨ́ tànà ŋgə́ ɨnè: «Há̧á̧ ɗàrò, wu nɨ́m àm wo sóò tànànyàŋháyèwá, duú ɓè wu du Mèsî, tanaɓam nɨ́m wááŋ.»

²⁵Á Yésù piina ŋgáb: «Mɨ tanacií nyí, ɨ́dù nyí mvúú ə́ə̀mnɨ. Nɨ́ɨ́b mɨ du ndɨ̀ŋnɨ ɓe nyòm Tá moò á túùmnɨ àmɨɨr moò.

²⁶Ɨ́dù, nyí mvú ə́ə̀mnɨ àm nyí du nɨ́ kpáín jírɨ́b moò no ɗàwáá á.

²⁷Jírɨ́b moò á óknɨ kúu móò, mɨ ɗəəŋtɨ́ ŋgáb, ŋgáb á cè mɨ tùnɨ.

²⁸Mɨ á ŋgáb nànɨ mè mɨ̀cɨ̧̀, ŋgáb kwá bɨ kûr, nò kù cè sàmàìn ɓa ŋgáb gàhó̧nɨ mo ŋgáréè ɗàà.

²⁹Nɨ́m Tá moò na mé á jíri ndóóŋ nɨ́ɨ́b lâs, nò kù cè sàmàìn gahó̧ Tá moò nɨ́m kù ŋgáréè ɗàà.

³⁰Nɨ́me Tá moò, nɨ́m á mwi̧.»

³¹Jwîf bɨ árɨ̀cùhâ sɨɨ àm vúm lóoŋkwíikɨ́ Yésùù.

³²Yésù ɨ́ tànàgì ŋgáb: «Nyínè tíí mɨ ndɨŋtɨ́ nɨ́ɨ́b nyɔ̧ɔ̧́ ví̧i̧ ɓe nyòm Tá moò. Ɓe vùùm nɨ́ɨ́b kíì, kɨ́ ŋge ɨ́ du kɨ́ nyí ɗú mɨ no lóòŋkwíìkɨ́niì?»

³³Á ŋgáb piina ŋgə́: «Nɨ́m nɨ tàwá nɨ́m lóoŋkwíikɨ́ wu àm wu tɨ ndɨŋ nɨ́m du nyɔ̧né, du nɨ àm wu nyinɓáaŋ wú ɓe ɨ́r Mèèín ndè á: Nɨ̀vɨ́tè sam hȩ wu u̧, wu a tà ní Mèín á na á à!»

³⁴Yésù ɨ́ tà ɨnè: «Káàtà ɓíhɨ̀bì nyínè no, á tɨín ɨnayâna Mèín taá: ‹Nyí du nɨ mèín bɨ á.›

³⁵Nɨ́m ɗəəŋtɨ́ nɨ́m du tɨín káàtà Mèèín noò, sàmàìn kùb ákɨ́ré ɗàà. Nùb Mèín yi ta ŋgáb du bɨ mèín bɨ á na rè du bɨ nùb kìn noò yi gonaré á.

³⁶Kɨ́ moò, Mèín yi caá mɨ, ŋgə́ ɨ́ tómwò mɨ ɗɔ̀bín. Ína á nyí fɨ́tɨce nɨ́ tànɨ mɨ nyinɓáaŋtɨ́ ɓe ɨ́r Mèèín àm mɨ tɨ ta ɨnayâna mɨ du mɨ Mwin Mèèín á na rè.

³⁷Mɨ ɨ́ dù mɨ́ ndɨ̀ŋwá nɨ́ɨ́b Tá moò ta mɨ ndɨ̀ŋte, nyí nɨ mɨ ə́mnɨ̀r.

³⁸Mɨ ɨ́ ndɨ̀ŋcè nɨ́ɨ́b kɨ́, nyí dùgɨ̀ nɨ mɨ ə́ə̀mwá, ə́ə̀mhó̧náhá nɨ́ɨ́b mɨ du ndɨ̀ŋnɨ kɨ́ àm nyí a ɗə̀ə̀ŋɓà kɨ́ gwìí mwi̧í̧ ɨnayâna Tá á ɓaín ɓe mɨ, mɨ á cè ɓaín ɓe Tá.»

³⁹Ŋgáb ɨ́ ɗúkwàhâ ŋgə́ bìnɨ, ŋgə́ a ti nɨ́ yààr, lɔ̧́ɔ̧.

⁴⁰Yésù ɨ́ pècù Jùrdə̧̂ cəə́r, yɨ́ Jâŋ yi kɔɔkom kùb kɔ ə́mní rè. Ŋgə́ ɨ́ dù nɨ́ ku.

⁴¹Nɨ̀vɨ́tɨ̀b ví̧i̧ ɨ́ gàìnwò Yésù, ŋgáb ɨ́ tà: «Jâŋ ya nɨ́ lɨ̀m kù túùmwá, ɨ́dù nɨ́m ŋgə́ ya ta ɓe ɨ́r nɨ̀ŋgwá rèè nɨ àmɨɨr á.»

⁴²Ɓè á nɨ̀vɨ́tɨ̀b ví̧i̧ yi ə́mne Yésù.