Read Vute Jâŋ 11 Bible Online

Jâŋ 11 - Vute bible

Jâŋ 11

¹Nɨ̀ŋgwá kù yaá ku, ɨ́r noò yaá Làjáàr. Ŋgə́ ya dukom Bètànî, kwɨ́í Màríyà ɓe mɨkɨ̀r noò Máártà ya dukom nóò no. Làjáàr kɨ́ ɨ́ gù yə́b.

²Màríyà rè, nɨ̀gwi ya swiwúna Yésù làmɨ́ndà gure, ŋgə́ ɨ́ pə̀kcù ɓe mvɨ̀tí no ŋgwéné rè á. Làjáàr yi du yábnɨ rè cè wɨ́í nóò á.

³Nɨ̀gub bɨrɨ́b lè ɨ́ tôm nò kù tànànɨ Yésù ɨnè: «Kéké, ɓwàjìrí woò Làjáàr á yábnɨ.»

⁴Ɓwâ Yésù yi ók péìn kíì, ŋgə́ ɨ́ tà: «Yáb kɨ́ tɨ̀ nɨ Làjáàr kwíhɨ̀r. Yáb kɨ́ du nɨ àm túmnɨ nyòm Mèèín á, kùb a mgbíìcè Mwin Mèèín.»

⁵Yésù yaá ɗúɓànɨ Máártà ɓe wɨ́í nóò Màríyà, ɓe Làjáàr ɓwê.

⁶Ɓwâ ŋgə́ yi ók ɨnayâna Làjáàr á yábniì, ŋgə́ ɨ́ gwíncùyè nɨ́ yɨ́ ŋgə́ yi dukom ndè jíì bɨrɨ́b.

⁷Ŋgə́ ɨ́ tànà nɨ̀fuùb noò ɨnè: «Nɨ́m gɨ̀cùná Jùdê.»

⁸Á nɨ̀fuùb tana ŋgə́ ɨnè: «Tá tɔ̀hí, jíìb víyèwá, kùb tɨ ɗúú wu lóòŋkwíìkɨ́nɨ Jùdê ku ɓe sɨɨ, wu tà ní gɨcuhá ku na á à?»

⁹Á Yésù tana ŋgáb ɨnè: «Yàrénɨ yekɨ́rɨ̀b há̧á̧ lɨ́tɔ̧ɔ̧́, duha mvihin á ye? Nɨ̀vɨ́tè ɨ́ dù gìnɨ gùr mvihin, sàmàìn ŋgə́ jób nɨ́m kù ɗàà, ɓetí ŋgə́ á pə́ɓànɨ mwa fèín.

¹⁰Ɨ́dù nò kù ɨ́ dù gìnɨ gùr cɨ́ɨ́m, ŋgə́ ɓa nɨ jóbnɨ nɨ́m kù á, ɓetí ŋgə́ á nɨ nàkɨ̀ɨ̀m, mwa ɗàà.»

¹¹Yésù nyinna ŋgáb u̧, á ŋgə́ takwa: «Ɓwàjìrí nɨ́mè Làjáàr á nɨ́ wumí, mɨ gɨ̀yè ŋgə́ sə̀ə̀mnɨ mbáb.»

¹²Á nɨ̀fuùb tana ŋgə́: «Tá tɔ̀hí, duú ɓe ŋgə́ du wumí, ŋgə́ ɓa wáàŋnɨ á.»

¹³Yésù yi tana nɨ̀fuùb noò ɨnayâna Làjáàr kúú nɨ́ na á, nɨ̀fuùb ɨ́ lə́ə̀mgì bɨ́ ŋgə́ ta nɨ wum nɨ̀mɨ́r á.

¹⁴Á Yésù wáanagi ŋgáb ɨnè: «Làjáàr kúú nɨ́.

¹⁵Mɨ óktɨ́ mɨ̀tù hȩ mɨ tɨ du mɨ́ ɗàá ɗàwáá! Nɨ́m kɨ́ ndɨŋ u̧ ɓe ɨ́r nyínè á, àm nyí a ə́mnè mé. Nɨ́m gɨ̀ná ku.»

¹⁶Á Tòmâ (kùb yi ɓékom nyɔ̧ɔ̧) tana kùb noò nɨ̀fuùb ɨnè: «Nɨ́m gɨ̀náɓwêtɨ, nɨ́me ŋgáb kúɓáà cúk!»

¹⁷Ɓwâ Yésù féínndé, ŋgə́ ɨ́ kwà Làjáàr á cɨ̀ sèrìn jíì nààsɨ̀b.

¹⁸Bètànî yaá gín Yèrúsàlèm sàmàìn kílòmétà taarɨ́b.

¹⁹Jwîf bɨ ví̧i̧ yi gáíwonaá Máártà ɓe Màríyà cwá wɨ́í ɓóò Làjáàr.

²⁰Ɓwâ Máártà yi ók Yésù á gòniì, ŋgə́ ɨ́ gì ŋgə́ gàmnɨ jȩ̀ȩ̀, Màríyà ɨ́ mè yó.

²¹Máártà ɨ́ tànà Yésù ɨnè: «Kéké, wu tɨ dùyè hò̧, wɨ́í móò yè nɨ́ kúwa.

²²Ɨ́dù mɨ ɗəəŋtɨ́, dùgɨ̀ ɗàrò, nɨ́m wu ɓa ɓwèìnɨ Mèín ndɨ, ŋgə́ ɓa wu nànɨ nyòm wu ndɨŋndé á.»

²³Á Yésù tana ŋgə́: «Wɨ́í wóò ɓa sə̀ə̀mcùnɨ á.»

²⁴Máártà ɨ́ tà: «Mɨ ɗəəŋtɨ́ ŋgə́ kwá səəmcu ye cáŋhɨ̀rí, ɓwâ nɨ̀kwííb kwá səəmcuhó̧ sèrɨ̀nnè.»

²⁵Yésù ɨ́ tànà ŋgə́: «Mɨ du nò sə̀ə̀mcuhó̧ nɨ̀kwííb, mɨ a nà ŋgáb mèè á. Nò ə́mne mé, ŋgə́ kúgɨ̀ kú̧u̧, ŋgə́ ɓa kwànɨ mè á.

²⁶Nò du ɓe mè, ɨ́ ə́mnè mé tɨ̀ nɨ kûr, wu ə́əmtɨ́ u̧ à?»

²⁷Á Máártà ta: «I̧i̧, Kéké! Mɨ ə́əmtɨ́ wu ɨ́ du Mèsî, Mwin Mèín ya ɓwáí tómwònɨ ɗɔ̀bɨ́nné ru.»

²⁸Máártà nyincáŋhȩ u̧, ŋgə́ ɨ́ gì fɔ̀ɔ̀nànɨ wɨ́í nóò Màríyà ɨnè: «Tá féínwotɨ́, ŋgə́ ta wu gɨ̀sòo.»

²⁹Jɔ̀ Màríyà óknɨ pénè kíì, ŋgə́ ɨ́ éíwúkɔ́hè, gànnɨ Yésù.

³⁰Yésù ya nɨ́ kwé lə́yèwá, ŋgə́ yaá háyè nɨ yɨ́ Máártà yi gɨ ŋgə́ gàmnɨ jȩ̀ȩ̀ rè.

³¹Ɓwâ Jwîf bɨ yi gáíwo cwá kíì yi pə́ Màríyà fó̧kɔ́ɔ̀niì, ŋgáb ɨ́ tù ŋgə́. Ŋgáb yi lə́mne bɨ́ ŋgə́ gɨ nɨ sèrìn kɨ́kɨ́rí á.

³²Ɓwâ Màríyà yi féín yɨ́ Yésù duré, ŋgə́ ɨ́ pê ŋgéé, á ŋgə́ gucáamsé Yésùù ɓusiín, ŋgə́ ɨ́ tà: «Kéké, wu tɨ dùyè hò̧, wɨ́í móò yè nɨ́ kúwa.»

³³Ɓwâ Yésù yi pə́ Màríyà ɓe Jwîf bɨ yi go ɓe ŋgə́ rè kɨ́íniì, yəré ɨ́ bì ŋgə́ sum,

³⁴Á ŋgə́ fɔ́ ŋgáb: «Nyí kɨ́ɨ́ ŋgə́ ŋga?» Ŋgáb ɨ́ tà: «Kéké, gom wu a pê.»

³⁵Yésù ɨ́ yàrê kɨ́ínɨ.

³⁶Á Jwîf bɨ ta: «Ŋgə́ yaáɓà nɨ ɗúnɨ Làjáàr yáà!»

³⁷Ɨ́dù, mvókín Jwîf bɨ no, nùb kù ɨ́ tà: «Ŋgə́ nò yi kuumna ɓùɓú̧ íí rè, sàmàìn ŋgə́ tɨ ndɨŋɓwée Làjáàr a dù nɨ́ kúre ɗàwá à?»

³⁸Yésù ɨ́ yéín kwà, ŋgə́ ɨ́ gì sèrìn. Sèè kɨ́ yɨɨ́m mgbààŋ á, yaá ɗeín ɓe sɨɨ.

³⁹Ŋgə́ ɨ́ tà: «Pɨ́ɨŋkɨ́náam sɨɨ rè.» Máártà, mɨkɨ̀r nɨ̀kúr Làjáàr ɨ́ tà: «Kéké, ŋgə́ ɓacɨ nɨ dùnɨ mínɨ á, ɓetí ŋgə́ á cɨ̀ nɨ sèrìn ku jíì nààsɨ̀b.»

⁴⁰Á Yésù fɔ́ Máártà: «Mɨ tɨ mɨ wu tànàwá ɨnayâna, óo wu ə́əmtɨ́, wu ɓa pénɨ mgbíí Mèèín á na à?»

⁴¹Kùb ɨ́ pɨ́ɨ̀ŋkî sɨɨ rè. Á Yésù ŋgerɨwú íí ɓɨllin, ŋgə́ ɨ́ tà: «Bɨ̀bá, mɨ sáktií wu hȩ wu ə́əmna mɨ nɨ́m mɨ ɓa wu ɓwèìniì rè.

⁴²Mɨ ɗəəŋtɨ́ wu á mɨ ə́ə̀mnàlɨ́ŋnɨ ɓwâ lâs. Ɨ́dù kɨ́ rè mɨ ta ɓe ɨ́r nùb dukɨ́ rè á, àm ŋgáb a ə́mnè ɨnayâna wu ɨ́ tómwo mɨ ru na á.»

⁴³Nyìncáŋhȩ̀ȩ́ u̧nèé, ŋgə́ ɨ́ tàɓà kúu còóm ɨnè: «Làjáàr, fó̧wom!»

⁴⁴Làjáàr ɨ́ fô̧, gurùb ɓe ŋgárɨ̀b lâs ɓoóm ɓe júk kùb ya vɨ́rɨ ŋgə́ ɓe kíí, tí ɓwê ɓoóm ɓe pɨ́cî júú. Á Yésù tana nùb yi du ɓèé ɨnè: «Palɨkɨ́náam ŋgə́, nyí a mbɨ̂ ŋgə́ gìnɨ.»

⁴⁵Jwîf bɨ ví̧i̧ yi gáíwona Màríyà cwé rè yi péé nɨ́m Yésù yi ndɨŋndé, ŋgáb ɨ́ ə́mnè ŋgə́.

⁴⁶Ɨ́dù nùb kù mvókín ŋgábè noò ɨ́ gàìngè Fàrísààb, átɨ̀nànɨ ŋgáb nɨ́m Yésù tɨ ndɨŋndé.

⁴⁷Fàrísààb ɓe mvènnɨ́b nùb na satɨgàà ɨ́ gì ɓáhɨ́r ŋgwìn jírií, ŋgáb ɨ́ tà: «Nɨ́m tɨ̀ ndɨŋɓaye i̧ ɓe nɨ̀ŋgwá rè, ɓetí ŋgə́ á nɨ túùmnɨ lìím cei.

⁴⁸Nɨ́m ɨ́ mbɨ̂ ŋgə́ gìnɨ tíí ɓe nɨ́ɨ́b ŋgə́ du ndɨ̀ŋnɨ kɨ́, nùb lâs ɓa bɨ ŋgə́ ə́ə̀mnɨ á, ɗà nùb Róòm a gò bɨ́ ɓə̀tɨ̀kɨ́nɨ Dúú jíri Mèèín nɨ́mè ɓe ti nɨ́mè!»

⁴⁹Nɨ̀mwi̧ mvókín ŋgábè noò, ɨ́r yi du Kàyîf, yi duce Nɨ̀gáŋ satɨgàà dáín kɨ́ noò ɨ́ tànà kùb noò ɨnè: «Nyí nɨ ɗə̀ə̀ŋwá nɨ́m du ndóŋniì.

⁵⁰Nyí pə́wa á mîn nɨ̀vɨ́tè mwi̧ kúbɨ̂ŋ ɓe ɨ́r gbàŋ nɨ́mè, ɨ́ ndôŋ kɨ́ gbɨ̧̀ lâs nduklé à?»

⁵¹Nɨ́m nɨ̀ŋgwá kɨ́ yi nyin kɨ́, yi nɨ́ ɓe kɨ̀cáàb ŋgə́ nɨ̀mɨrí sé. Hȩ ŋgə́ yi du nɨ̀gáŋ satɨgàà dáín kɨ́ rèé, á ŋgə́ yi kwa kɨ̀cáàb ŋgə́ takɨ́yaye àm cwá Yésù yi du kúnɨ ɓe ɨ́r gbàŋ Jwîf ru.

⁵²Cwá kɨ́ yi nɨ́ ɓe ɨ́r gbàŋ Jwîf sé ɗóò, yi duɓwée nɨ àm ɓáàcùú munɨ́b Mèèín yi njatee ɗɔ̀ɔ́b lè bɨ̂ŋ ndè yá mwi̧, ŋgáb a dùcù ɓanné á.

⁵³Yàrê ye kíì á kɨ̀jííb Jwîf bɨ ta á ɗúnɨ vúm kwíhɨ̀ Yésù yáá.

⁵⁴Àm kɨ́ á Yésù yi ducɨ nɨ́ yə̀ŋtèènɨ laŋtɨ̧ɨ̧́ mvókín Jwîf bɨ ɗàà ru. Ŋgə́ ɓe nɨ̀fuùb noò ɨ́ gì bɨ́ Èfɨ̀ràyîm; kwɨ́í ti kɨ́ yaá ɗɔ̀ɔ́b yi du gín ti súmnií no.

⁵⁵Páskà, jùrúb Jwîf ɓoò yi ŋgóobtɨ́, á nùb ví̧i̧ ti kɨ́ noò yi ɓáasokɨ́yaye Yèrúsàlèm, àm ə́rɨ́b sàtèé síhé.[9]

⁵⁶Ŋgáb yaá Dúú jíri Mèèín no, ŋgáb ɨ́ yà mátèènɨ Yésù ŋgáb a tace mvókín ŋgábè no ɨnè: «Nyí pə́ce i̧? Ŋgə́ tɨ̀ nɨ gùr jùrúb lèè gò kèè?»

⁵⁷mvènnɨ́b nùb na satɨgàà ɓe Fàrísààb yi sóoŋteekíí nɨ̀vɨ́tɨ̀b ŋgáb ɨ́ tà nò ɗəŋhȩ yɨ́ Yésù duré gò vúm tànànɨ, vúm yè bií ŋgə́.