Read Vute Jâŋ 12 Bible Online

Jâŋ 12 - Vute bible

Jâŋ 12

¹Páskà meé jíì tínmwi̧, Yésù ɨ́ gì Bètànî, yɨ́ Làjáàr, nɨ̀ŋgwá ŋgə́ yi səəmcuhó̧ mvókín nɨ̀kwíbí rè yi dukomndé.

²Féín ku, kùb ɨ́ sìnà ŋgə́ cɔŋ. Máártà ɨ́ gèwònà ŋgə́. Làjáàr yaá ɓwê kpáín nùb ɓe Yésù yi taŋkom cɔŋ kíì no.

³Á Màríyà áwo làmɨ́ndà kùb du gùnnɨ ɓe mòné ceí, létà tə̧ə̧́. Làmɨ́ndà kɨ́ kùb nyaŋhɨ ɓe gum yɔ̀ kùb ɓé Náàr lɨ á. Ŋgə́ ɨ́ sɨ̀ìwúnà Yésù gure, ŋgə́ ɨ́ yà pə̀kcùkɨ́nɨ ɓe mvɨ̀tí no ŋgwéné, ɗà mí làmɨ́ndà rèè ɨ́ gàkî dúhé bɨ̂ŋ.

⁴Á nɨ̀mwi̧ mvókín nɨ̀fuùb Yésùù, Yúdàs Ìskàrìyôt yi ɓa Yésù sə́rɨ̀nɨ rè ta ɨnè:

⁵«Kùb yè tɨ sə́rɨkɨ́bɨ̂ŋ làmɨ́ndà kɨ́ sure mònéè[10] təmərì taarɨ́b á, kùb a gɔ̀knà nùb tiri mwèìn kɨ́.»

⁶Nɨ àm mwàm yi du bìnɨ Yúdàs ɓe nùb tiri sé ŋgə́ yi nyin nyindí kɨ́, yi du nɨ kɨ̀cáàb yúú á, ɓetí hȩ ŋgə́ yi du nò yi gə́tɨkom càká mònéè rèé, mwèìn lə́ nókwe lâs, ŋgə́ yaá cè nɨ́ yɨ́hó̧lɨ́ŋnɨ.

⁷Ɨ́dù Yésù ɨ́ tà ɨnè: «Mbɨ́k wu ŋgə́ nyɔ̧́ɔ̧̀, làmɨ́ndà lê sèrɨ̀nnè moò á ŋgə́ miinacɨ nɨ́ mɨ kɨ́.

⁸Nyí kwá dulɨ́ŋ ɓe nùb tiri ɓwâ lâs, ɨ́dù kɨ́ moò, nɨ́me nyí tɨ̀ nɨ mèkɨ́wa.»

⁹Jwîf bɨ yi óó ɨnayâna Yésù á Bètànî, á ŋgáb ŋgwéígeɓa ku ví̧i̧. Ŋgáb yi bɨ́ gɨ̀ɗóòwá àm Yésùù, ŋgáb yi gɨɓwée pénɨ Làjáàr Yésù yi səəmcuhó̧ mvókín nɨ̀kwíbí rè á.

¹⁰Á mvènnɨ́b nùb na satɨgàà ta á ɗúnɨ Làjáàr kúɓwêtɨ,

¹¹ɓetí Jwîf bɨ ví̧i̧ á bɨ́ vúm mbɨ́knɨ ɓe ɨ́r nɨ́m Yésù ya ndɨŋ ɓe ŋgə́ rè, ŋgáb a ə́mnè bɨ́ Yésù yáá.

¹²Ye saín, vùùm nùb yi ŋgwéíso Yèrúsàlèm gùr jùrúb Páskàà, ɨ́ ô ɨnayâna Yésù á gɨ̀sònɨ.

¹³Ŋgáb ɨ́ tȩ́ȩ̀sò kehɨ́b bɨ́llí ŋgáré ŋgáré, gìnɨ ŋgə́ móŋwònɨ jȩ̀ȩ̀; ŋgáb ɨ́ yà kɨ́ɨ̀ŋnɨ ɨnè: «Hòsánà, mgbíí dù ɓe Mèín. Mèín nò du Kékéé fàm nò ŋgə́ tómwo ɗàrɨ́. Mèín fàmɓà mvèìn jíri gbàŋ Ísràyéèl!»

¹⁴Yésù ɨ́ kwà tɨ́ha̧ ti kù, ŋgə́ ɨ́ wúì ya dùrénɨ, ɓetí á tɨín káàtà Mèèín no ɨnè:

¹⁵«Nyí nùb Sìyóòŋ,[11] nyí nɨ vùù ô, pə́náye mvèìn jíri nyínè á du gònɨ mwin tɨ́ha̧ní kù ya du̧ú̧ ɗàrɨ́.»

¹⁶Nɨ̀fuùb Yésùù ɨ́ dù bɨ́ ókwa njàb nɨ́m yi ndóŋ kíì; ɨ́dù ɓwâ Mèín yi səəmcuhó̧ Yésù cwéé, nànɨ ŋgə́ mgbíhɨ́rí, ŋgáb ɨ́ lə́ə̀mcùgì ɨnayâna káàtà Mèèín no, kùb yi takɨ́cií nɨ́m ɓa ŋgə́ ndɨ̀ŋniì, nɨ́m kɨ́ á kùb ndɨŋmece ŋgə́ kɨ́.

¹⁷Vùùm nùb yi du ɓe Yésù ɓwâ ŋgə́ ya səəmcuhó̧ Làjáàr cwéé rè ɨ́ yà átɨ̀nɨ nɨ́ɨ́b ŋgáb yi pə́ré.

¹⁸Àm kɨ́ á nɨ̀vɨ́tɨ̀b yi goɓa ví̧i̧ ŋgə́ gàmnɨ ru, ɓetí ŋgáb yi óó àm lɨ̀m ŋgə́ yi ndɨŋ kɨ́.

¹⁹Á Fàrísààb yaré ŋgùùŋtèènɨ mvókín ŋgábè no ɨnè: «Nyí pə́haá hȩ nɨ̀ŋgwá rè yɔ́k nɨ́mè ye; nɨ̀vɨ́tɨ̀b lâs á ɓàcéyè bɨ ŋgə́ tùnɨ!»

²⁰Mvókín nùb yi wú Yèrúsàlèm gwɨ̀ì jùrúbí ɗómnɨ Mèín ndè, Gɨrêk bɨ kù yaá no.

²¹Ŋgáb ɨ́ gì kwànɨ Fɨ́lɨ̂b. Ŋgə́ yɨɨ́m nò Bètsáyídàà á, ɗɔ̀ɔ́b Gàlìléè no. Ŋgáb ɨ́ tànà ŋgə́ ɨnè: «Tá, nɨ́m á ɗúnɨ pénɨ Yésù.»

²²Fɨ́lɨ̂b ɨ́ gì tànànɨ Àndɨ̀rê, ɓe kùùŋ bɨrɨ́b lâs ɨ́ gɨ̀ndôŋ tànànɨ Yésù.

²³Á Yésù tana ŋgə́ ɓe kùùŋ ɨnè: «Ɓwâ Mèín ɓa sə̀ə̀mcùhó̧nɨ Mwin Nɨ̀rì cwéé nànɨ ŋgə́ mgbíhɨ́rí ɗóogií.

²⁴Mɨ tanaɓa nyí àmɨɨr wááŋ á, íì nɨ́m ɗo̧né ɨ́ lê ɗàá mwi̧, ŋgə́ ɨ́ sû, ŋgə́ ɓa nàcùnɨ íhɨ̀b ví̧i̧ á. Ŋgə́ ɨ́ dùcè nɨ́ ɗàá lə́wa, ŋgə́ tɨ̀ meháce nɨ́ íì mwi̧ u̧.

²⁵Nò njei mè noò ɓa mè no kɨ́ mə̀mnɨ á. Ɨ́dù nò nakɨ́ mè noò ɓe ɨ́r moò ɗɔ̀ɔ́b lè noò, nyaaŋkɨ́ nɨ́ mè no kɨ́ ɓe ɨ́r mè mɨ̀cɨ̧̀ɨ̧́ á.

²⁶Nò ɗú mɨ ə́nnàniì, nò kɨ́ tù mɨ ɗà ŋgə́ a dùɓwê yɨ́ mɨ ɓa dùniì. Tá moò á dɨ̀ɨ̀mnɨ nò ə́nna mé.»

²⁷«Ɗàrò, njɔ̧̀ á mɨ vɨ̀ntìì, mɨ ɗə̀ə̀ŋwá nɨ́m mɨ fɨ́tɨ tàniì. Mɨ ma tà Bɨ̀bá, paahó̧kɨ́ mɨ jábɨ́r du gònɨ rè no kèè? Sàmàìn mɨ tace u̧nèé ɗàà ɓetí mɨ yi go mɨ gùr mɨ pə́ jábɨ́r kíì á.

²⁸Bɨ̀bá, túumnam nɨ̀vɨ́tɨ̀b mgbíí woò.» Á kúu kù tasówo ɓɨllin ɨnè: «Mɨ túumcií mɨ́ mgbíí mo kɨ́, ɨ́dù mɨ á túùmkwànɨ kɨ́ gwì bɨrɨ́bí.»

²⁹Nùb yi du ɓèé yi ók kúu rè nyìnniì, ɨ́ tà: «Nà̧á̧ ɨ́ ɓain ndu!» Nùb kù ɨ́ tàcè: «Dùgal Mèèín kù weinaá ŋgə́ ɓɔ̧!»

³⁰Ɨ́dù Yésù ɨ́ wáànà ŋgáb ɨnè: «Kúu kɨ́ tɨ nɨ mɨ nyìnsónàwá, tɨ nyinsó nɨ́ àm kpɔ́k nyínè á.

³¹Ɗàrò á gɨ̀ Mèín ɓa ŋgùnnɨ nùb ɗɔ̀bɨ́nné. Ŋgə́ ɓa jùkɨ́nɨ nò tɨ ŋgáŋkom ɗɔ̀ɔ́b lè noò á.

³²Kɨ́ moò cè, ɓwâ kùb ɓa mɨ kɨ́kwúnɨ bɨ̧̀ɨ̧́, njɔ̧̀ ə́mne mé ɓa nèìɓàgɨ̀nɨ nɨ̀vɨ́tɨ̀b lâs á.»

³³(Ŋgə́ yi nyin nyindí kɨ́ u̧ tànànɨ nɨ̀vɨ́tɨ̀b kúúŋ cwá ŋgə́ ɓa kúniì á.)

³⁴Á nɨ̀vɨ́tɨ̀b tacuna ŋgə́ ɨnè: «Káàtà ɓíhɨ̀bì no, á tɨín ɨnayâna Mèsî kwá nɨ kú̧u̧ kûr, wu a tà wú kùb ɓa kɨ́kwúnɨ Mwin Nɨ̀rì bɨ̧̀ɨ̧́ á na á à? Mwin Nɨ̀rì kɨ́ macè nɨ́ na?»

³⁵Á Yésù tana ŋgáb: «Nyí á yè ɓe mwa, ɨ́dù tɨ̀ nɨ yə̀əŋ. Ndɨ̀ŋná gùr ɓwâ nyí duye ɓe mwa rè, àm sɨ́mnɨ̀r tɨ̀ sɨrɨ nyí sɨrɨ́nne. Ɓetí nò du gìnɨ sɨ́mnɨ̀rí nɨ ɗə̀ə̀ŋwá yɨ́ ŋgə́ du gìniì.

³⁶Ə́əmnáam mwa ɓwâ ŋgə́ duye ɓe nyí rè, àm nyí a sèì nùb mwahí.» Cùr Yésù yi nyincáŋhȩ nyindí kíì, ŋgə́ ɨ́ éíkî nɨ́ ŋgáb ya, ŋgə́ ɨ́ gì nɨ́ yòknɨ cóo.

³⁷Dugɨ ɓe vùùm lìím ŋgə́ yi ndɨŋ ŋgáb a pə́ce rè, ŋgáb yi bɨ́ ŋgə́ ə́ə̀mháwa.

³⁸Nɨ́m kɨ́ yi ndɨŋ u̧ àm nyindí Èsáyà tɨ́kìn Mèèín yi nyinndé a fô̧ hàráá á, ŋgə́ ya taá ɨnè: «Kéké, nò ə́mne kìn nɨ́mè nɨ ɗàà. Nò wu túumna nyòm woò nɨ ɗà?»

³⁹Yi nɨ́ sàmàìn ŋgáb ə́mne Yésùù ɗàà, ɓetí Èsáyà yi takwatɨ́ ɨnè:

⁴⁰«Mèín ɓoŋkíí ŋgáb íí, ŋgə́ ɗeinkíí ŋgáb kɨ̀cáàb àm ŋgáb tɨ̀ pə́ré, ŋgáb tɨ̀ kwaɓaye kɨ̀cáàb ŋgáb ɓandɨró mɨ no, mɨ a ɓátè ŋgábè.»

⁴¹Èsáyà yi nyin u̧ àm ŋgə́ yi pə́cɨ nɨ́ mgbíí Yésù yi ɓa dùnɨ ɓe kíí rè á, ŋgə́ ya nyince nɨ́ ɓe ɨ́r Yésùù á.

⁴²Á mvókín kɨ̀jííb Jwîf bɨ nɨ̀miib, nùb ví̧i̧ ə́mne Yésù. Ɨ́dù ŋgáb yi bɨ́ wáàhó̧ɓànɨ laŋtɨ̧ɨ̧́ ɗàà àm Fàrísààb tɨ̀ juhó̧ vúm dúú mɨ̀yú̧ú̧.

⁴³Kɨ̀jííb Jwîf yaá bɨ ɗúnɨ kùb dɨ̀ɨ̀mbɨ̂ŋ vúm, ɨ́ ndôŋ kɨ́ Mèín dɨɨm vúmè.

⁴⁴Yésù ɨ́ tàɓà kúu còóm ɨnè: «Nò ə́mne mé nɨ mɨ ə́ə̀mɗóòwá, ŋgə́ ə́əmɓwée nɨ nò ya tómwo mé á.

⁴⁵Nò pə́ mé, pə́ɓwéetɨ́ nò ya tómwo mé.

⁴⁶Mɨ yi go mɨ ɗɔ̀bín hȩ mwa á, àm nò ə́mne mé tɨ̀ du sɨ́mnɨ̀rí.

⁴⁷Nò ók kìn moò ŋgə́ ɨ́ dù kìn kɨ́ jə̀ŋwáá, nɨ mɨ sé ɨ́ ɓa nò kɨ́ àm ŋgwéé ténnɨ, ɓetí mɨ yi go mɨ ɓátɨ̀nɨ nɨ̀vɨ́tɨ̀b á, mɨ yi mɨ́ gòwá kùb àm ŋgwéé ténnɨ.

⁴⁸Nò mvúlehe mɨ, ɨ́ dù ə́ə̀mwá kìn moò, á cɨ̀ nɨ ɓe tɨ́ŋgù̧ú̧ nóò: tɔ̀ɔ́ mɨ yi na nyí rè ɨ́ ɓa ténnɨ àm ŋgéé ŋgwéné ye cáŋhɨ̀rí ru.

⁴⁹Ɓetí nɨ́m mɨ nyinndé lâs nɨ ɓe nyòm mɨ nɨ̀mɨrí sé, ɨ́dù tá moò nò ya tómwo mé, ŋgə́ nɨ̀mɨr yi tawonaá mɨ nɨ́m mɨ ɓa nyìnniì ɓe kɨ́ mɨ yi ɓa tɔ̀ɔ̀niì.

⁵⁰Mɨ ɗəəŋtɨ́ nɨ́m ŋgə́ ta kùb ndɨ̀ŋte á nànɨ mè mɨ̀cɨ̧̀. Hȩ dùnɨ u̧nèé, nɨ́m mɨ du nyìnniì, mɨ nyinháce mɨ́ hȩ tá moò ta mɨ nyìnte á.»